Números 26
26
Israel runakunata censashqan
1Tsaypitanami Moisésta y cüra Aarónpa tsurin Eleazarta Tayta Dios kayno nirqan: 2<<Ishkay chunka (20) watayuqpita janaman lapan Israel runakunata aylunpa aylunpa censapäkuy.#Núm. 1.1-46. Tsay runakunaqa guërraman aywapäkunanpaq kalpanchönami karkaykan>>.
3Tsay witsanmi Israel runakuna Jericó tsimpan y Jordán mayu nawpan Moab pampacho karkaykarqan. Censananpaq Tayta Dios niptinmi Israel mayinkunata Moisés y Eleazar kayno nirqan: 4<<Tayta Dios nishqannöla ishkay chunka (20) watayuqpita janaman lapayki censakäriy>>.
Egiptupita yarqamuq Israel runakunapa aylunkuna mayqan kashqanpis kaychömi qelqaraykan:
Rubén trïbuta censashqan
5Israelpa mayor kaq tsurin Rubénpita miraqkuna karqan Enoc aylu runakuna, Falú aylu runakuna, 6Hezrón aylu runakuna y Carmi aylu runakuna. 7Rubénpita miraqkunata censaptinmi karqan chusku chunka kimsa waranqa qanchis pachak kimsa chunka (43,730) runakuna.
8Falúpa tsurinmi karqan Eliab. 9Eliabpa tsurinkuna karqan Nemuel, Datán y Abiram. Datán y Abiramqa mayor runakunami karqan. Paykunami Coréwan juntakaykur Moiséspa, Aarónpa y Tayta Diospa contran sharkapäkurqan. 10Tsayno contran sharkuptinmi patsa kichakar Datánta, Abiramta y Coréta ultakurkurqan. Nirkurnami ishkay pachak pitsqa chunka (250) qatiraqninkunatapis nina rupar usharqan. Tsay runakunaqa wanurqan wakin Israel runakunapis rikakärinanpaqmi. 11Corépa tsurinkunami itsanqa kawaykar quëdarqan.
Simeón trïbuta censashqan
12Simeónpita miraqkuna karqan Nemuel aylu runakuna, Jamín aylu runakuna, Jaquín aylu runakuna, 13Zera aylu runakuna y Saúl aylu runakuna. 14Simeónpita miraqkunata censaptinmi karqan ishkay chunka ishkay waranqa ishkay pachak (22,200) runakuna.
Gad trïbuta censashqan
15Gadpita miraqkuna karqan Zefón aylu runakuna, Hagui aylu runakuna, Suni aylu runakuna, 16Ozni aylu runakuna, Eri aylu runakuna, 17Arod aylu runakuna y Areli aylu runakuna. 18Gadpita miraqkunata censaptinmi karqan chusku chunka waranqa pitsqa pachak (40,500) runakuna.
Judá trïbuta censashqan
19Judápa tsurinkuna Er y Onán tsuriynaq kaykar Canaáncho wanuptinmi aylunkuna mana karqantsu. 20Tsaymi Judápita miraqkuna karqan Sela aylu runakuna, Fares aylu runakuna y Zera aylu runakuna. 21Farespita miraqkuna karqan Hezrón aylu runakuna y Hamul aylu runakuna. 22Judápita miraqkunata censaptinmi karqan qanchis chunka soqta waranqa pitsqa pachak (76,500) runakuna.
Isacar trïbuta censashqan
23Isacarpita miraqkuna karqan Tola aylu runakuna, Fúa aylu runakuna, 24Jasub aylu runakuna y Simrón aylu runakuna. 25Isacarpita miraqkunata censaptinmi karqan soqta chunka chusku waranqa kimsa pachak (64,300) runakuna.
Zabulón trïbuta censashqan
26Zabulónpita miraqkuna karqan Sered aylu runakuna, Elón aylu runakuna y Jahleel aylu runakuna. 27Zabulónpita miraqkunata censaptinmi karqan soqta chunka waranqa pitsqa pachak (60,500) runakuna.
Manasés trïbuta censashqan
28Josépita miraqkuna karqan Manasés trïbu runakuna y Efraín trïbu runakuna. 29Manaséspita miraqkuna karqan Maquir aylu runakuna y Galaad aylu runakuna. Galaadqa Maquirpa tsurinmi karqan. 30Galaadpita miraqkuna karqan Jezer aylu runakuna, Helec aylu runakuna, 31Asriel aylu runakuna, Siquem aylu runakuna, 32Semida aylu runakuna y Hefer aylu runakuna. 33Heferpa tsurin Zelofehadpa manami olqu tsurinkuna karqantsu, sinöqa warmilami tsurinkuna karqan. Tsay warmi tsurinkunapa jutinkunami karqan Maala, Noa, Hogla, Milca y Tirsa. 34Manaséspita miraqkunata censaptinmi karqan pitsqa chunka ishkay waranqa qanchis pachak (52,700) runakuna.
Efraín trïbuta censashqan
35Efraínpita miraqkuna karqan Sutela aylu runakuna, Bequer aylu runakuna y Tahán aylu runakuna. 36Sutelapita miraqkuna karqan Erán aylu runakuna. 37Efraínpita miraqkunata censaptinmi karqan kimsa chunka ishkay waranqa pitsqa pachak (32,500) runakuna. Tsaynömi Josépita miraqkuna aylunpa aylunpa karqan.
Benjamín trïbuta censashqan
38Benjamínpita miraqkuna karqan Bela aylu runakuna, Asbel aylu runakuna, Ahiram aylu runakuna, 39Sufam aylu runakuna y Hufam aylu runakuna. 40Belapa tsurinkuna karqan Ard y Naamán. Paykunapitami mirarqan Ard aylu runakuna y Naamán aylu runakuna. 41Benjamínpita miraq runakunata censaptinmi karqan chusku chunka pitsqa waranqa soqta pachak (45,600) runakuna.
Dan trïbuta censashqan
42Danpita miraqkunami karqan Súham aylu runakuna. 43Súhampita miraq runakunata censaptinmi karqan soqta chunka chusku waranqa chusku pachak (64,400) runakuna.
Aser trïbuta censashqan
44Aserpita miraqkunami karqan Imna aylu runakuna, Isúi aylu runakuna y Bería aylu runakuna. 45Beríapita miraqkuna karqan Heber aylu runakuna y Malquiel aylu runakuna. 46Aserpa warmi tsurinpa jutinmi karqan Sera. 47Aserpita miraq runakunata censaptinmi karqan pitsqa chunka kimsa waranqa chusku pachak (53,400) runakuna.
Neftalí trïbuta censashqan
48Neftalípita miraqkuna karqan Jahzeel aylu runakuna, Guni aylu runakuna, 49Jezer aylu runakuna y Silem aylu runakuna. 50Neftalípita miraq runakunata censaptinmi karqan chusku chunka pitsqa waranqa chusku pachak (45,400) runakuna.
51Censayta usharkur yupaptinmi Israel runakuna karqan soqta pachak juk waranqa qanchis pachak kimsa chunka (601,730) runakuna.
Chakrakunata imano aypunakunanpaq tantiyatsishqan
52Tsaypitanami Moisésta Tayta Dios kayno nirqan: 53<<Censarkur cada trïbucho ayka runakuna kashqanman tupu chakrata aypunki herencian kananpaq. 54Atska runakuna kaptin jatunta chakrata aypunki. Walka runakuna kaptinqa takshalata aypunki. Censarkur ayka runakuna kashqanman tupu cada trïbuta aypunki. 55Chakrakunataqa suertita jitaypa aypunki. Cada runa chakrata chaskinqa mayqan trïbumanpis taytan pertenecishqancho. 56Suertita jitaypa tsayno aypunki trïbucho atska runakuna kaptinpis o walka runakuna kaptinpis>>.#Núm. 34.13; Jos. 14.1-2.
Levitakunata censashqan
57 Levitakunata censarqa Gersón aylu runakunata, Coat aylu runakunata y Merari aylu runakunatami censarqan. 58Tsaynöpis tsay aylukunacho karqan Libni aylu runakuna, Hebrón aylu runakuna, Mahli aylu runakuna, Musi aylu runakuna y Coré aylu runakuna.
Coatpa tsurinmi karqan Amram. 59Amrampa warminmi karqan Jocabed. Jocabedpis Leví trïbumi karqan. Payqa Egiptuchömi yurirqan. Amrampa y Jocabedpa wamrankunami karqan Aarón, Moisés y María. 60Aarónpa tsurinkunami karqan Nadab, Abiú, Eleazar y Itamar.#Núm. 3.2. 61Nadab y Abiúqa wanurqan Tayta Diospa nawpancho lutala inciensuwan qoshtatsishqanpitami.#Lev. 10.1-2; Núm. 3.4.
62Levitakuna chakrata mana chaskinanpaq nishqa kaptinmi Israel mayinkunata censarkurraq paykunata censarqan. Tsaymi levitakunata juk killayuqpita janaman censaptin karqan ishkay chunka kimsa waranqa (23,000) runakuna.
63Jericó tsimpan y Jordán mayu nawpan Moab pampacho kaykarmi Israel mayinkunata Moisés y cüra Eleazar censarqan. 64Moab pampacho censakuq runakuna manami mayqanpis censashqaraqtsu karqan Moisés y Aarón Sinaí chunyaq jirkacho Israel runakunata unay censaptin.#26.64 Paykunataqa mana censarqantsu wamralaraq kaptin o manaraq yurishqa kaptinmi. 65Sinaí jirkacho censashqan runakunaqa lapanpis Tayta Dios nishqannölami chunyaq jirkacho wanur ushakarqan. Tsaymi mayqanpis mana karqantsu qepa kaq censupaqqa. Jefonipa tsurin Caleb y Nunpa tsurin Josuélami kawaykar quëdarqan.#Núm. 14.26-35.
Kasalukuyang Napili:
Números 26: qvmB
Haylayt
Kopyahin
Paghambingin
Ibahagi
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2003, Wycliffe Bible Translators, Inc. All rights reserved.