Mga Popular na Bersikulo sa Biblia mula sa Proverbios 11

Ti chojni ncheki̱to̱nhe̱n ti sin nóa ti nkehe chónta la jína tsꞌejó, la ko ti nkexro sincheki̱to̱nhe̱n jnko vaso ìnta̱ ijnko chojni la kja̱xin íso chojni tsjajon sin ìnta̱ itsꞌi ti nkexro kjuajon.

Ti sin tóxika̱ye̱he ti nkehe chónta la a̱ntsí itsjé tsochónta sin; a̱ndá ti chojni tjekohen la tso̱nóa sin.

Ti kjuahnke mé tji̱ka̱o kjuatosuéhe̱, a̱ndá ti sin nkehya la tja̱ko̱xi̱n kixin jína nohe sin.

Ti kohya nkexro nohe tsꞌe̱to̱an ti chjasin la tso̱kohya kjuaxróxin. A̱ndá ti siín itsjé ti nkexro jína tjenka̱yáxin la jína chrókjuákꞌe ti chjasin.

Ti chojni jína la mé yóhe̱ éxi ijnko inta tꞌóna ito tsjajon kjuachón; a̱ndá ti nkexro jína tja̱ko̱he̱ íso chojni la chónta sin kjuaxrexinkaon jína.

Ti chojni xriko kjuachꞌia la chronka kaín ti nkehe ómó sítóhen. A̱ndá ti nkexro jína, la kjónté nohe ichrén nkehe sítóhen, la táníkoá.

Ti nkexro tjinki̱tsa íjnko chojni la kjuaxróxin tsjakꞌe; a̱ndá ti chojni jie̱he la jehó nchekjasótexín a̱sén.

Ti nkexro imá tsotjinkaon ti nkehe chónta la tíha tsjasótexín; a̱ndá ti nkexro jína la tsochónta ni̱xién fuerza la tso̱yóhe̱ sin éxi ijnko inta yoa.

Ninkehó sínkíhya ti nkehe tjete chónta chojni ti ña̱o sinchekito̱exín Díos, a̱ndá ti chojni ndoá tja̱ko̱xi̱n mé tsaá sin.

Ti tjenka̱yáxin chojni jína la tjinki̱tsa kixin jína tsꞌejó sin, a̱ndá ti chojni chꞌiyehe kícho mé tsꞌitjáñaxín sin ti chꞌia sin.

Éxi ijnko kochꞌa̱ninko oro tjenta xrito ijnko kochíno mé xi̱kaha ti chojnichjin náxrjón tsjehe ndá chóntahya kjuaxrexinkaon jína.

Itꞌéni Díos tóxrìe̱nhña ti nkexro nduáhya nchekjìinxín nkehe, a̱ndá tóxríhi̱n chꞌan ti nkexro ndoá nchekjìinxín ti nkehe nchekji.