Isáak 4
4
Ekúlu u kúúsí, okóyikoyi u Támbák
1Pitíénye ne pitul óókoólinon naánɛ́ káánɔ́ ɛ́ kikɛtɛ́kɛtɛ́ɛ? Kútipá ɔ́ pilɔ́ɔ́ŋɛ́t píánɔ́ pinyiɛ́ káánɔ́ kí itɛ́m pínúényesíé malááŋ máánɔ́ á? 2Nuɔ́pílɔ́ɔ́ŋɔ nutipá nupian; nunyɛ poónónín nuapian insaná na puandá nutipá kutáŋap puɔ. Akáánɛ́ pitul na tusalasala píkinyi káánɔ́ ɛ́ kikɛtɛ́kɛtɛ́ɛ, nutipá kupia epú nuambanɛ́ɛ, nutipá nuówon peseé. 3Nuɔ́kɔɔŋɔn nutipiá á kiákí ɛ́ɛ́ kuɔŋin kúánɔ́ nyɛ kilɔk ɛ́ kuɛlɛ ɛ́ɛ́ nuɔ́kɔɔŋɔn ó pusíó pú pilɔ́ɔ́ŋɛ́t píánɔ́. 4Pɛɛnd pá kati nulátát epe, nutipá numenyen ɛ́ɛ́: pukúl na maandá mé kúúsí ekue nyɛ nikóyi na Támbák á? Ewú unyɛɛ́ ekúl u maandá mé kúúsí ekue nyɛ nikóyi na Támbák. Ewú unyɛɛ́ ekúl u maandá mé kúúsí nyɛ okóyikoyi u Támbák. 5Nuápítááka ɛ́ɛ́ púnyɛ ɛ́ sɛ́kísɛ́k nukál nú Támbák nyɛɛ́ nuɔ́ŋɔ́ ɛ́ɛ́: Támbák ɔ́ɔ́kɔɔyɔ Emfúnukufúúmɛ umaák káásɔ́ ɔ́ nuɔ́l na pukaaka. 6Támbák ɛ́ɛ́kɛɛlɛ peseé káásɔ́ ó pusíó; Tɛ ɔɔ́pɔn nukál núɛ́yɛ́ ɔ́ɔ́kɔɔyɔ ɛ́ɛ́: Támbák nyɛ etímbímét é péépé pɛ́pímɛlɛnɛ́ɛ, unyɛ peseé é péepé pépíselesié. 7Ɔ́nuɔ́pínɔ́n kɔk Támbákɛ́ɛ, ánulúndánɛ́n sáátanɛ, ukɔ́núpínɔɔn kaáyɛ́ɛ. 8Énupísíítín Támbákɛ́ɛ, ukenúpísíítin. Ánusuká imbɔ́k síánɔ́ pafalfál epe, núsukuna itɛ́m síánɔ́ pomútoómútaŋɛ epe! 9Énumenyí ɔsɔ́k wáánɔ́, ánupaŋa, núpíyɛpulɛ; ɛ́nyɛɛlɛ́ tuɔnɔ túánɔ́ píséndi na ambaŋɔ́, anyamɔ́ wáánɔ́ píséndi ni insíkíl. 10Énupíselí ó pusíó pú Ɔkɔ́n, akáánɛ́ ukaányínúnyálɛk.
Nutisóósósí pákúánɔ́
11Paandimán, nutikálánɛ́n kilɔk panúɛ na panúɛ ɛ́ɛ́. Ewú wɔɔyɔnɛ́ɛ kilɔk kí sɔ́k kúnyaánɛ usóósosi wɔ, waákála kilɔk ó kikotí woond usóósosi kikotí kí Támbák. Índɛ kɔk oósóósosi kikotí, ɛmɛ́ɛ́yí osóósí kikotí atipá aand ɛnɛkɛn kɛ́ɛ. 12Ɛ́ kuɛn, Támbákɛ́ɛ wééŋényí weekenyée pikotí woond usóósosi pɛɛnd. wɔ́ unyɛɛ́ na pukaaka pú kusóti ne pú kunyími. Kiákí ɛnyɛɛ́, osóósosié waakúánɔ́?
Panɔ́ inɛ́m, ánupá ni inséti kí imbalá
13Panɔ́ epé nuɔyɔnɛ́ɛ ɛ́ɛ́: «Tukayɔɔk á pálɛ́k u imbáákináa nakinyámɔ́ kúnyaánɛ ínanɔ, tútépuki yɔɔŋ túɛlɛ endunyée tupúta muenyí.» 14Tɛ nuémenyen kiákí kíkaányí núamɛ́n káánɔ́ ɔ́ kusɔ́t, á kiákí ɛ́ɛ́ nunyɛ ɛlɛɛ́ kilɔ́ndɔ́ kíámanɛ́ɛ, mɔnɔ́ kisikɛl kísákɛn. 15Nɛkuɛ́nyɛ́ɛlɛ ɛ́ɛ́ núɔ́yɛ́t ɛ́ɛ́: «Índɛ Ɔkɔ́n ɔ́ɔ́kɔɔyɔ, tukɔsɔ́t túɛl epue ɛlɛɛ́ opúnóo.» 16Nuɛ́pímɛlɛ na nunamá nú tukál túánɔ́. Nunamá nú aliam nukáánɛ́ nyɛ kilɔk. 17Ewú umenyenée kuɛl peseé, utiɛlɛ́ wɔ́ ápítúúkán kinɔ́m kí kifal.
ที่ได้เลือกล่าสุด:
Isáak 4: yav
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© 2026, CABTAL