Ruma 9
9
Bizlaf abə həji ndə a dəmata aagi
1Sa ɗa ala Kərist, sa zlap ŋter, ara ndə sa ɗa dzəv abə Kərist, sa kazla gaɗaɗaŋ səku. Deŋ ŋkwaɓ naka ma ndaha gwara ara Miɗ ma ghwaɗeɗe a kaghal ci, sa zlap ŋter: 2A ꞌunəf naka, sa abə bay ghuɗek, sa kasa yaka pal. 3Ayəw, andza a kaalima ka ci, galaɓa Bizlaf magəyzaka bəza, galaɓa ni ɓizh cini abə Kərist aska zlina ma ɗa Yahuda aagi. Aa ɗa shiŋ naka aagi, 4təmta ma ɗa həji Isərayila aagi, təmta ana ndə Bizlaf a bəwata ka a wəzhi tə aagi. Pa a vəlatana sləf tə, abə dzəv ma abə təmta, pa a vəlatana ma ma garagar, ɗalanə zlən, abə ghalatana səkən aka a vəla. 5Aa ɗa shiŋ jiji ndə aa kazlap ata təmta aagi, a mbəwha ata shiŋ ta ana Kərist ma mbəwha andza həji ma dəgnak, ma ndza aha səkən aagi tiwtiw, Bizlaf ndə həji kahəmənə kwa vepiy. Amen.
6Ama tazlap ci, səkən ndə Bizlaf a va a ghalatana ka a vələ, a ɗa ɓəlaakaka səku: ara ndə a ɗa ya, kala həji ma mbəwha ata shiŋ Isərayila aagi ci, aa ɗa həji Isərayila ma ŋter aagi tiwtiw səku, 7azha, həji ma mbəwha ata shiŋ Ibərahima aagi ci, aa ɗa ŋter wəzhi tə aagi tiwtiw səku. Ayəw, Bizlaf tazlapanə a Ibərahima, iŋgaya: Dək shiŋ ataa Isiyaku ana ma kaaɗa wəzhi ndə sa ghal ka a vəlahu aagi. 8A may a zlap a ɗi ci, wəzhi mambəwha andza həji ma dəgnak ata shiŋ ataa Ibərahima aagi ana ma ɗa wəzhi Bizlaf aagi səku. Ama ma ɗa wəzhi Bizlaf aagi ci, wəzhi ndə a va a ghalanə ka a vəlanə aagi. 9Tsakwa ana ma ndə Bizlaf a ghal ka a vələ: Akaca a makwaɗə, sa azhinha a gəra Saratu talima mbə mawəl. 10Azha, dək sha gagagha səku: Rebeka yəm tambəwha ŋhul a vava ma ŋtaguleŋ, ma ɗa jiji takwa Isiyaku. 11Ama wəzhi tə aagi tanaka a mbəwha kwagwa səku, kwa aa taɗalzə zlən ma gamak abə ma ŋtan aka səku abə a zlapanə a Rebeka, aska a zlən ndə Bizlaf a kamay a ɗalə. 12Zlən watsa a ꞌwa aka ara ya tə ndə a yaha həji aagi, ama taɗa dawna zlən ta səku. Bizlaf tazlapanə, iŋgaya: Mbə ma dagal a aɓin a ɗalanə zlən a ma feŋ. 13Andza ndə Ɗerewal ma ghwaɗeɗe a ghal ka, iŋgaya: Sa tamay Yakubu, ama sa taŋkalzə Isəwa.
14A may a zlap avaŋga? Bizlaf tagwar a ɗa dəlili səku, azha vəw? Tep a ndza ikwa səku! 15Ara ndə a ɗa ya, tazlapanə ka a Musa, iŋgaya: Sa aɓin a za hahər aska ala ndə sa kamay a za hahər aska, sa aɓin a ndza kadək abə ala ndə kamay a ndza kadək abə sha . 16Watsa tataŋ may həji aagi səku, tataŋ zlən ta səku, ama a ɗa sənma Bizlaf gagagha. 17Taŋtiraya a Ɗerewal ma ghwaɗeɗe, Bizlaf a kazlapanə a bay ma dagal Firawna, iŋgaya: Sa tatsahu ka anawatsə a ɗa bay ma dagal aska a sa a ghal ɓərɓər naka a hwa, aska aagi a sən zləm naka a ŋge ata manahayak tiwtiw . 18Ikwa azha, Bizlaf kula a za hahər tə aska ala ndə a mayə, kula a bəwanə ꞌunəf aka gamak ana ala ndə a may a bəwanə ꞌunəf tə ka gamak.
Ghuɗek Bizlaf abə za hahər tə
19Ama mbara, hwa aghalaka, huniy iŋgaya: «Bizlaf a gulak həji aagi azha ara veme?» Ara ndə a ɗa ya, ala ma kaaɗa kula a ŋkalzə səkən ndə a kamay a ɗalə vaya? 20Ama hwa nda dza səbakw abə Bizlaf, hwa həji ma dəgnak ya, hwa ɗa vaya? Dərish ꞌunəw kula a zlapanə ana ala ma kaꞌun ya, hwa ꞌunaka ka ikwa avəy, iy vəw? 21Ala ma ꞌun kula a ɗal andza ndə a kamayə abə dərish tə wəra? Abə dərish ma ŋtaguleŋ, kula ꞌun ɗeŋ ma wala wala abə ɗeŋ mawəl a mawəl aka wəra? 22Bizlaf a may a ghalatana ghuɗek tə abə ɓərɓər tə a həji aagi. Avəli həji ndə Bizlaf a zhiva a ghuɗek abə təmta aagi, zhana ndə a zhiva a dzawata ka aagi, Bizlaf taləm a səw ma ta dagala. 23A ɗal ikwa aska a ghalatana ŋtsəɓ ataa sləf tə, gwara ara səkən ta za hahər ata həji aagi, ndə a slata ka ambəɗa tə, aska aagi alima sləf tə, 24ŋkwa ana ndə a yaata gagagha a taba Yahuda aagi səku, ama həji ndə a yaata a ŋge a taba həji ma ŋkula sən Bizlaf aagi aka. 25Təwah ana ma ndə a ghal ka, a ɗerewal ataa Uziya, ala ma ɗaf ma ndə a zlimazə ara Bizlaf, iŋgaya: Həji ma ŋkula va a ɗa həji naka aagi ya, sa aɓin a yata a ɗa həji naka aagi, ma ŋkula va a ɗa madaraf naka aagi ya, sa aɓin a yata a madaraf naka aagi. 26Ata la ndə aa va a zlap, aagi iŋgaya: «Huni həji naka aagi səku» aagiy, aagi aɓin a yata a wəzhi Bizlaf ma ndza abə nja aagi. 27Isaya ata guva tə, a ŋtiri ata həji Isərayila aagi: Kwa ndə Isərayila aagi ɗa vərəm andza vakw ma ndza a zlazlər aagi, kajik ikwa a taba ta ana ma kaaɓin a ɗa reh gagagha. 28Ara ndə a ɗa, a aɓin a kəliy tə katkadək ana zlap ataa Bay Madagal kahkah ata manahayak. 29Azha andza ndə Isaya watsa wəruk a va a zlap, iŋgaya: Andza Bay Madagal ma ɓərɓər tavəlaŋkwa shiŋ aka səku ci, həna həji abəw takwa andza həji ma ndza a Suduma aagi, həna həji asaɓ andza həji ma ndza a Gumara aagi.
30Ma watsə a may a ghalə avaŋga? Həji ma ŋkula ɗa Yahuda aagi, ma ŋkula gas a ɗa dəlili atama Bizlaf ci, aa tabəw ta a həji ma dəlili aagi ata nja tə dawna ɗal awa. 31Ama ataa həji Isərayila ma kagas a ɗa dəlili atama Bizlaf gwara ara ma ma garagar aagi ya, ɗal takum andza ndə ma ma garagar a ghalə. 32Ara veme? Ara ndə aa deŋ ka ci, ndza ma dəlili atama Bizlaf ci, abə ɗal awa səku. Ama abə zlən ta aagi. Aa tandəv ta ata ŋkəɗaŋ ta dza həji a ŋtsuꞌun, 33ara ndə a ɗa, Bizlaf tazlap a Ɗerewal ma ghwaɗeɗe iŋgaya: Sa tatsa ŋkəɗaŋ ta dza həji a ŋtsuꞌun aka a hayak ma dzamadzam Siyuna, kefe ma karəzahəji, ama ala ma tsa deŋ tə ka a heɗe ya, a kaaɓin a za marva aka səku.
ที่ได้เลือกล่าสุด:
Ruma 9: GOU
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้