Yirugana Yovapositoli 8
8
1Ano Sarusa nage kwa li pandere edipago lyaSitefanesa.
Saurusa ta hepeke mbungakriste
Mezuva lyoolyo yimo va tamekere kuhepeka unene mbungakriste zomoJerusarema. Vapuli navenye kwa lihanene monomukunda daJudeya naSamaliya, vapositoli velike va hupire mo. 2Vagara vamwe wokutjira Karunga tava vhumbike Sitefanesa, ano nomfa dendi kwa di lilire unene.
3Nye Saurusa ta hanagura mbungakriste oku ta bubura a purutute mo vagara novakadi, a va gave kodorongo.
Eudiso lyoMbudi zoNgwa moSamaliya
4Vapuli ava va haraganesere, makura tava zi mwa za sirongo, va udise Mbudi zoNgwa. 5Filipusa kwa zire kositata saSamaliya, a ka va udisire Kristusa. 6Mbunga mudima tazi kara mutjima gumwe pokuzuvha eyi ga tente Filipusa nopokumona yitetu eyi ga rugene. 7Yeeyi nompepo donondona kwa tundire movantu wovanzi ava va kere nado, oku tadi zigire unene, ano yirema yomondambo noyirema yoyinzi nayo kwa verukire. 8Vantu womoSamaliya kwa yi haferere unene.
9Mositata oso mwa kere mugara gumwe, edina lyendi Simoni. Age nga tetura vantu noumpure wendi, ta tanta asi age yige Kamana?-?Kandongo. 10Navenye, a kare munona ndi mukurona, kwa hamene kwendi, tava tanta asi: “Age yige nonkondo dina dononene daKarunga, edi va tanta.” 11Awo kwa hamenene kwendi, morwa ga va mana nare nombeva noumpure. 12Nye Filipusa age kwa va udisilire Mbudi zoNgwa zoUntungi waKarunga nedina lyaJesus Kristusa, awo makura tava mu pura. Makura vagara novakadi tava va kuhu. 13NaSimoni googu nage ta pura, tava mu kuhu, age nga kara nkenye apa naFilipusa. Age kwa tetukire pokumona yidiviso noyitetu yoyinene eyi ngayi horoka.
14Vapositoli ava va kere moJerusarema, apa va zuvhire asi Samaliya zina tambura nonkango daKarunga, makura tava tumu ko oPeturusa naJohanesa. 15Awo kwa wizire va ya kandererere vapuli ava, asi ngano va gwane Mpepo zoKupongoka, 16yeeyi azo nagumwe si za humburukira po powo, nye kwa va kuhwilire tupu medina lyaHompa Jesus. 17OPeturusa naJohanesa makura tava va kambeke mawoko gawo, vena makura tava gwana Mpepo zoKupongoka.
18Ano Simoni apa ga mwene asi pokukambeka vapositoli muntu mawoko gawo, yipo ava gavere Mpepo zoKupongoka, makura ta ninki asi a pe oPeturusa naJohanesa yimaliva, 19ta tanta asi: “Peni nge ko name edi nonkondo, asi nkenye ogu ngani kambeka mawoko gange, nga gwane Mpepo zoKupongoka.” 20Nye Peturusa ta mu limburura asi: “Yimaliva yoge ngo ze kumwe nayo moMundiro gwanarunye, morwa ono gazara asi uhwi waKarunga o u rande noyimaliva. 21Ove mutupu ruha roge ndi evega lyoge mo mweyi, yeeyi mutjima goge kapi guna hungama kosipara saKarunga. 22Litezurura nye koudona ou, makura o kanderere kwaKarunga, nampo na ku dongwenena po aga magazaro gomutjima goge. 23Yeeyi nina ku mono asi ove kuna zura mfudu zokufa nokutara, ove hena mupika gononzo.” 24Nye Simoni ta limburura asi: “Kandererereni nge one kwaHompa, asi ya ha gwana nge eyi muna tanta.”
25Va mana kugava umbangi wawo oku tava udisa nonkango daHompa, vapositoli makura tava tengura koJerusarema. Sikatji tava udisa Mbudi zoNgwa monomukunda dononzi daSamaliya.
Filipusa nerenga lyomoEtiyopiya
26Muengeli gwaHompa kwa tanterere Filipusa asi: “Katuka o vyuke korwaMbindakano, o ze konzira ezi za tunda koJerusarema zi kunkumuke koGasa.” Nzira ozo zomomburundu. 27Filipusa makura ta katuka a ka ze. Monzira ozo mwa kere mugara gekuto, age erenga lyenene lyaKandake, hompa gomukadi gwaEtiyopiya, ogu nga mu tunine ugawo wendi naunye. Age kwa zire koJerusarema a ka tongamene Karunga. 28Opo ngoso age momutengu, kuna hingire metemba lyendi oku ta resa mobuke zomuporofete Jesaya. 29Ano Mpepo zaKarunga makura tazi tantere Filipusa asi: “Zende o ka kare pepi netemba lina.” 30Filipusa makura ta dukire ko, a mu zuvhe kuna kuresa mobuke zomuporofete Jesaya, ta mu pura asi: “Enye, tomu yi zuvhu tupu eyi muna kuresa?” 31Erenga tali limburura asi: “Omu nani yi zuvha ngapi, pwa hana ogu na vyukisa nge?” Age makura ta zigida Filipusa, a ronde metemba va ya hingire nendi. 32Etjangwa eli ga resere lyeli asi:
“Moomu ava twara nzwi va ka zi dipage, nage yimo,
moomu azi mwena nzwi pokuzikurura,
nage nokuzahura si kana kendi.
33Age kwa mu dina, awo kwa mu pangura momudona.
Ogu nga vhura kusanseka eyi ngayi mu horokera yilye?
Yeeyi ukaro wendi wepevhu kwa u mu hagesera.”
34Erenga makura tali pura Filipusa asi: “Na ku kanderere, tantera nge, mwene ogu muporofete yalye yene eyi ana kutanta, yamwene ndi yagumwe peke?” 35Filipusa ta vareke kumusingwenena, a tamekere petjangwa lyeeli, makura ta mu udisire Mbudi zoNgwa zokuhamena Jesus. 36Hava za mokugenda, tava gwana mema konzira. Ano erenga tali mu tantere asi: “Mema gaga, yinke hena nayi limba po kukuhwa nge?” ( 37Filipusa ta mu limburura asi: “Ove nsenesi kuna pura nomutjima nagunye, kuwapa tupu.” Age ta limburura asi: “Ame na pura asi Jesus Kristusa yige MunwaKarunga”). 38Erenga tali ninki asi, etemba li sikame. Pouvali wawo, Filipusa nerenga tava humburuka va ze momema, makura Filipusa ta kuhu erenga. 39Tupu va zaukire mo momema, Mpepo zaHompa tazi gusa po Filipusa. Erenga kapi lya mu mwene hena, nye alyo kwa twikilire nzira zalyo noruhafo. 40Nye Filipusa ga liharuka ko, moAsidodo ana kara. Age kwa gendagwire mwa za sirongo oku ta udisa Mbudi zoNgwa moyitata nayinye, dogoro ta ka sika koKesareya.
© Egwanekerobibeli Lyanamibia 1987, 2003
© Bible Society of Namibia 1987, 2003