Iironga 20
20
ONTOPORUA 20.
Ehuvico rja Paulus mu Troas no mu Milet
1Ombujo ndjika sho ha muena, Paulus oku’icana aarongua, e ja kumagida, he te ja rareke nde ta zi po a he ku Makedonia.
2Sho a hendahenda niirongo mbika nde ta kumagida aarongua neehapu odindji, okua ciki motshirongo Greka.
3Sho a ningi mo eemuedi ndatu, aajuda oje mu rangera neji, ngija a hara okuronda okatembameja a he ku Siria. Oku’idiradira momuenjo gue okugaruka nokupitira mu Makedonia.
4Oj’ende puamue na he, Sopater ha Pirrus omuberea, Aristarkus na Sekundus aatessaloniki, Gajus omuderbe, na Timoteus, na mbo ja zi mu Asia, Tishikus na Trofimus.
5Mboka ja tetekere, je tu tegerere mu Troas.
6Omasiku giikuiira iitoue sho ga piti#20:6 Okutja efeste rja Paska., sse otua zi ku Filippi, tua rondo okatembameja, nde omasiku gatano sho ga piti, otue ja ku jo mu Troas. Hoka tua menekera omasiku uunuari.
7Sho tua gongarera esiku rjotango rjotshivike#20:7 Okutja esiku rjosondaha. Aakriste oja shimbika nokuri okuuharera esiku ndika peshara rjesiku rja sabati. pepamburo rjombroto#20:7 Emissa ejapuki., Paulus okua kundacana na jo. Nde sho ta ara okuha esiku rja nofu, okua tsikire ehuvico rje sigo opokati kuusiku,
8Eelampa odindji da ri motshoto moka tua ri tua gongara.
9Omunjasha gumue, edina rje Eutikus, kua a kaatumba pekende. Okua kuatua keemposi eedigu Paulus sho a popi orure. Nde mokukoca okua gu montara ontitatu hondjugo, a ri a sa ngija a shumburua.
10Paulus okua rondoroka, ta hi ku he, ta rara kombanda he, te mu kuata nomooko ge ta ti: “Inamu tira, omuenjo gue omo gu ri.”
11Okuza mpoka okua rondo itsheue, a pambura ombroto, a ri. Nde sho a popi ngaa nanena sigo eruua rja tende, okua hi.
12Omunjasha oje mu eta omunamuenjo, jo j’ekerericua unene.
13Sse otua ronda okatembameja, atu hi ku Assos. Hoka tua ara tu piture Paulus. Otsho e tu rombuera, sho a hara oku ha ko korupadi.
14Ano sho e ja kusse mu Assos, otue mu tuumba nde tua hi ku Mitilene.
15Okuza hoka nokatembameja sse tua tegama na Kios#20:15 Iitengedera jomefuta. esiku rja nofu. Esiku rimue sho rja zi ko, sse tua ciki mu Samos#20:15 Iitengedera jomefuta., nde tue ja mesiku rja nofu ku Milet.#20:15 Otshirando otshinene.
16Oshoka Paulus oku’idiradira momuenjo okupitirira Efesus, ka shukumane mu Asia, a henderera a ka dane efeste rja Pentekosten mu Jerusalem, nge ta vuru.
17Mu Milet okua tumu aatumua ku Efesus, nde t’icana aakuruntu jegongaro.
18Sho je ja ku he jo ja ri puamue, okua ti ku jo: “Omu tshi tshi ongashi nda ri puamue nane omasiku ageshe okuza kesiku rjotango ngija nda ciki mu Asia.
19Ngaje nda rongera arushe Muene mehitshonopeko arishe, momoodi no momamakero nga nda ningirua moru’omarangero gaajuda.
20Ongashi ngaje inandi mu orekera tsha shoka tsh’opara, aaue, onde tshi mu uvicira ngaje nde tshi mu ronga miipaci jaantu ajeshe no meendjugo.
21Onda kumagida aajuda naapagani, jo j’idirurure ku Karunga, j’iteere Muene guetu Jesus Kristus.
22Ndere nena tareni, ond’ihuvite nda ciminikua momuenjo ndi he ku Jerusalem, ndere kandi tshiuo shoka tatshi ka tsakanekandje ko.
23Tshiri, Ombepo Ondjapuki tahi popi nde tahi rombuerendje miirando niirando okutja omapando nomeepeko otaga tegererendje mu Jerusalem.
24Ndere shoka atshishe inandi tshi tira, ngaje kandi nuutende uorutu ruandje mbu u vure mbuija uomuenjo guandje.#20:24 Enongero rjeehapu da Paulus orjo ndika: Ondi irongekeka ndi se ngaje nd’upice omuenjo guandje. Onda ara ouara okuguanica eendjenda dandje muukarere uohapu, mbu nda peua ku Muene Jesus, nokutja ndi okorore evangelium rjesiroshenda rja Karunga.
25Tareni ano, ondi tshi tshi, itamu ka tara ue otshipara tshandje, ne amushemushe mba mua uvicirua otshirongo tsha Karunga, ngija nda endahenda pune.
26Otsho tandi mu rombuere mesiku rjonena: Ngaje kandi nondjo hombinzi homuntu guontumba.#20:26 Paulus ta ti: “Ngaje onda ninga atshishe ndi kerere omuntu keshe kekano rjarushe”.
27Oshoka ngaje kanda ri nuuheci poku mu uvicira ehuco arishe rja Karunga ndi rjokuupica aantu.
28Ikotokereni, kotokereni otshigunda atshishe ne mua rangekua k’Ombepo Ondjapuki ng’aaepiskopi, ne mu pangere eklesia rja Jesus Kristus ndi a hirongera nombinzi he.
29Ondi tshi tshi, ngaje nge nda zi po, iimbungu ja rjagana jo taji guajere mo mokati keni, itaji sire otshigunda oshenda.#20:29 Okutja: Aapukici taa ke ja taa huvica eehapu doshima, ja ara okusharakanica egongaro.
30No mokati keni omu naarumentu, taa ka cikama, jo taa ka popja eehapu di kadi shi d’uka, ja ara okushirira aarongua kombinga hauo.
31Ano nduno taatareni! Dimburukueni nokutja eemvo ndatu, uusiku nomutenja inandi zimbuka okukumagida nomoodi keshe gumue mokati keni.
32Nena ngaje andi mu gandja ku Karunga no kohapu hoshenda ha ngu e neenkondo dokutunga#20:32 Okutja okutunga otshirongo tsha Karunga, eklesia netaandero rjarjo. do dokupa ajeshe uuciga#20:32 Okutja uuciga uerago rjarushe meguru., mba ja japurua.
33Otshisilveri nenge otshingoldi nenge eenguuo inandi di arera ku gumue.
34Ongashi mu tshi tshi ne jene, nokutja atshishe shi tua pumbua, ngaje muene na mba ja ri puamue nangaje, omake ngaka oge tshi gandja.#20:34 Omake ga Paulus. Paulus okua ronga arushe iironga jokutunga eesaila, nde t’irongere niironga mbi shi a ri a pumbua.
35Miinima ajishe ngaje onde mu urukira nokutja sse otu nokukerera aankundi kekano niironga jetu jene#20:35 Aakriste aankundi jomehiteero rjauo kaa diradire meendunge dauo nokutja aahuvici jeehapu da Karunga oja ara okuirikorera uujamba uopevi ndika nehuvico rjauo., sse tu dimburukue arushe ohapu ha Muene Jesus ngu a tja: ‘Mokupa omu nerago ri vure ndjoka rjomokuperua’.”
36Sho a popja eehapu doka, okua tseengoro nde ta garikana puamue na jo.
37Ajeshejeshe oja riri uneenene, ja guire Paulus kocingo, taje mu cipi keemrungu.
38Ndere uupongo uauo ua ningi uunene moru’ohapu ndji e ja rombuera nokutja itaa ka tara ue otshipara tshe. Ongashi je mu cindikire sigo ok’okatembameja.
Omission Heklesia Ekatolika, 1951. Namibian Catholic Bishops Conference.