Zincimpi 8
8
Ngana Zikuyemeziwa
1 #
Zinc 1:20-21. Yuvwilila! Ngana zili na kwihana.
Kuyuvwishisha kuli na kubilikiza.
2Ngana zinemana ha binkanda kunkumo ya mukwakwa,
naha mahambanzila.
3Hahepi na lipangati lya mu munzi,
likwihana ku menginino ngayi,
4“Nili na kwihana enu bantu,
enu nimwenu ba hano hanci.
5Enu bakuyeba, lilongeshenu ngana,
enu bileya, nenu kami yuvwishishenu.
6Yuvwililenu, ndaba nikwamba byuma byabinene,
mu kanwa kami mwa fumanga byambo bya kupwisha.
7Nambanga bya kupwisha,
mahalo shuma sha wunyengwe mu kanwa kami.
8Mazu ami nimwawo enga a kwoloka,
kaliha nambanga mahalo hinge kwamba bya ku shanwisha.
9Mazu nimwawo enga akupwisha kuli ou ukuwayuvwishisha,
enga amawahe kuli baya bali na ngana.
10Hata bilongesha byami kupitakana shiliva,
hinge kalimukisho kupitakana ngolinde.”
11“Ndaba ngana zinapitakana mamanya a ndando yayinene,
kami ku byuma twashinganga kowa sha kulifwanikiza na ngana.
12Ami ngana na zika hamo na kukeya,
nekala na kalimukisho kakuhalula byambo.
13Kutina Nyambi ya Ngula, kunengi kuzimba wubi.
Nazimba kuliyemeza na kulilundumika,
biheka byabibi na nyambilo ya kuluwanganisha.
14Kubela na ngana byenga byami,
nayuvwishishanga kami nekala na ngovu.
15Bamyene ba kulela ndaba ya nami,
kami batulela ba kuyaka ndayano za kupwisha.
16Nimwabo bantwamina ba kupwisha ba kulela ndaba ya nami.
17Niku haka baya bahaka,
kami baya ba kuncinga ba kungwana.
18Wuheti na maleema nekala nabyo,
wuheti wa mwaya myaka na kutangama.
19Mikabo yami yayiwahe kupitakana ngolinde yayiwahe shikuma,
nanebye nikuwaninamo byabiwahe shikuma kupitakana shiliva yayiwahe shikuma.
20Nendanga mu nzila ya kulunga,
na nzila ya kupwisha,
21ngayi mwanga baya ba ku haka nibaheteshe,
mwanga bikongelo byabo binzale na wuheti.”
22Nyambi ya Ngula walengele ami ngana,
niko nekalile oho shilolo alenge hanci.
23Nengile wendi ku balika kushikale,
kufuma ku kutatika oho kaye shilolo katatike.
24Niko nekalile oho shilolo kwikale mawate,
oho shilolo kwikale tuheloke twa mema.
25Niko nekalile oho mapili shilolo atendiwe,
na binkanda oho shilolo bikaleko.
26Oho shilolo alenge hano hanci na mafuba,
na lukungu oho shilolo lubalike kwikala hanci.
27Niko nekalile oho ayakile mayilu mu mwanya,
oho azingwilishile nginza ku mampunga.
28Oho ayakile makumbi kuyilu,
pe wayakile tuheloke twa mema mu mampunga.
29Oho afundilile liwate nginza,
ngayi mema abule kukiluka mazu,
zendi kami oho afundikile mwimbi wa hanci.
30Ami nekalile kumbalila yendi ngonehe muntu mukakuyavwa wamanono,
uya awahililanga nendi ha mutena ha mutena,
nengile waku wahilila shikati nimwasho ku meho wendi.
31Ku wahilila mu kaye kendi mwazika bantu,
na ku wahilila na bantu.
32“Haya yuvwililenu kukwami, enu bana bami,
mfuywezi za nobo ba kulama zinzila zami.
33Yuvwililenu ku longesha kwami,
pe mwikale na ngana hinga muzikana.
34Mfuywezi za muntu ou ukuyuvwilila kukwami.
Walamanga ku mapangati wami ha mutena ha mutena, ukutatilila ku shipana shami.
35Ndaba ou nimwendi ukungwana pe nawana wumi,
kami ukuyamiziziwa kuli Nyambi ya Ngula.
36Ngoboni ou nimwendi ukukwanga kungwana ukulikolesha niye mwine,
nimwabo banzimba ba ku haka lufu.”
ที่ได้เลือกล่าสุด:
Zincimpi 8: LLK
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Libuka Lya Kuyela © Bible Society of Zambia, 2020.