Ŋaha 8
8
Yɛm ni nyari paɣibu shɛm
1Yɛm bi boonila niriba?
Ka tɛhi’ zilima mi duhiri di yee?
2O ʒiɛla luɣ’ shɛŋa din du zuɣu
mini so’ naŋgban’ kpansi ni sochira zuɣu.
3 #
Ŋaha 1.20-21
O ʒiɛla fɔntinsi dunɔdaya ni,
o bela dunɔdaya maa gbini n-kuhiri boona:
4“Yinima ninsalinim’ ka m boona.
Bɛnkam be bɛ nyɛviya ni ka m booni maa.
5Yinim’ bɛn nyɛ tarimba ŋɔ, bomiya yɛm.
Yinim’ bɛn ka fahim ŋɔ, bomiya li.
6Wummiya, dama n yɛn tɔɣisila bintitaŋa yɛtɔɣ’ viɛla,
ka din yɛn yi n noli ni na nyɛla din tuhi.
7Dama yɛlimaŋli ka n yɛn yɛli;
ninvuɣ’ biɛtali nyɛla din chihiri n noli ni yibu na.
8N yɛtɔɣa zaa nyɛla wuntizɔbo yɛtɔɣa,
di shɛli pala ʒiri bee n-nyɛ din gɔŋ.
9Di zaa nyɛla din tuhi ninvuɣ’ so
ŋun baŋ di gbinni sani,
ka nyɛ din tuhi ninvuɣ’ shɛb’ bɛn
mali baŋsim sani.
10Piimi n wuhibu ŋɔ ka chɛ anzinfa.
Piimi baŋsim ka chɛ salima din viɛla.
11Dama yɛm so salima nɛma,
ka a ku tooi zaŋ a ni bɔri
binshɛŋa zaa buɣisi yɛm.
12Man’ yɛm, m mini baŋsim m-be,
ka baŋsim mini fahim be n sani.
13Nir’ yi zɔri Yawɛ,
o nyɛla ŋun je zaɣ’ biɛɣu.
N je karimbaani mini maŋduhibu ni
zaɣ’ biɛɣu ni ʒiŋmabo yɛtɔɣa.
14M mali kpamdi zilinkom din viɛla
mini yɛm maŋli.
M mali tɛhi’ zilima,
ka lan mali kpiɔŋ.
15Mani n-chɛ ka nanim’ diri nam.
Mani n-sɔŋdi zuɣulaannim’ ka bɛ zaani
zaligu shɛŋa din doli yɛlimaŋli.
16Mani n-chɛ ka zuɣulaannim’
su bɛ niriba,
ka chɛ ka bɛnkam su niriba
su ba viɛnyɛliŋga.
17N yuri bɛn yuri ma,
ka ninvuɣ’ shɛb’ bɛn bɔri ma
ni nimmoo nyari ma.
18Buni mini jilima be n sani,
ka azichi din yuura mini tɔŋsim be n sani.
19N daanfaani so salima,
hal salima alali gba.
Ka n ni tiri niriba binshɛli gari
anzinfa viɛlli.
20N dolila wuntia soli ka doli yɛlimaŋli soli.
21N zaŋdi buni tiri ninvuɣ’ shɛb’ bɛn yuri ma,
ka chɛ ka bɛ daazichi duri paana.
22 #
Kah 3.14
Mani ka Yawɛ daa daŋ nambu o tuma piligu ni,
din daa nyɛ o tuuli tuma kurimbuni ha.
23Yumakaʒe din garila ka o daa nam ma,
mani ka o daa daŋ nambu pɔi
ka naanyi nam dunia ŋɔ.
24Bɛ daa dɔɣi ma ka teeku na kani,
ka kɔbilinina din bilisiri kom pampam
gba daa na kani.
25Bɛ daa dɔɣi ma,
ka zoya na kani,
ka daboya gba na kani,
26o daa na bi nam tiŋgbani mini puri
bee n-sɔŋ dunia tampuɣili.
27O ni daa nam zuɣusaa,
n daa beni,
o ni daa booi booli gili teeku zuɣu,
n daa beni.
28O ni daa chɛ ka sagbana din be
zuɣusaa ŋɔ zani viɛnyɛliŋga
ka yɔhi teeku ni kɔbilinina,
29o ni daa zali teeku di tarisi ni nyɛ
shɛm din ni chɛ ka di kom ku
zo n-yaɣi o ni zal’ li shɛli tariga,
o ni daa booi tiŋgbani tarisi saha shɛli,
30di saha maa n daa bela o luɣili zuɣu
kaman tumtumdiba kpɛm’ la.
O suhu daa piɛli n zuɣu dabisili kam,
ka n kul mali suhupiɛlli o sani sahakam.
31N daa mali suhupiɛlli o dunia din
pali binnɛma ŋɔ zuɣu,
ka mali suhupiɛlli ninsalinim’ zuɣu.
32M bihi, pumpɔŋɔ wummiya n yɛligu.
Ninvuɣ’ shɛb’ bɛn doli n soli mali suhupiɛlli.
33Wummiya n wuhibu, ka niŋ yɛm.
Miriya ka yi zaɣisi li.
34Ninvuɣ’ so ŋun wumdi n yɛligu,
ka ʒe n dunɔdali gbini dabisili kam,
ka ʒe n dunoli ni guhiri mali suhupiɛlli.
35Dama ŋunkam bo n-nya ma, o nya nyɛvili,
ka Yawɛ ni niŋ o nirilim.
36Amaa ninvuɣ’ shɛb’ bɛn kɔŋ ma,
bɛmaŋ’ ka bɛ tum barina maa.
Ninvuɣ’ shɛb’ bɛn zaa je ma nyɛla
bɛn yuri kum.
Red Letter Dagbani Bible © Bible Society of Ghana, 2011