Ŋaha 6
6
Saɣisigu Shɛŋa Din Pahi
1M bia, a yi lo a ʒiʒiinikpee alikauli bee a yi lo amaŋa nia ti so, 2a noli ni yɛtɔɣa maa ni leei zana bar’ a, ka a noli ni yɛtɔɣa maa ni gbaag’ a. 3Dinzuɣu m bia, a ni yɛn niŋ shɛm n-tiligi amaŋa nyɛla ŋ-ŋɔ: dama a kpe a ʒiʒiinikpee maa nuu ni, cham’ yomyom ti balim a ʒiʒiinikpee maa. 4Di gbihi bee m-pɔb’ a nini. 5Tiligim’ amaŋa kaman waliga ni tiligi tɔha nuu ni shɛm la bee kaman nooŋa ni tiligi noongbahira nuu ni shɛm la.
6Nyin’ vinnyaɣilan’ ŋɔ, cham’ ti nya guliŋguhi biɛhigu, ka niŋ yɛm. 7Bɛ ka zuɣulana bee sapashin’ kpɛma, 8amaa wuuni ka bɛ laɣisiri bɛ bindira sɔŋda, atam kpuɣibu saha ka bɛ vari bɛ bindira sɔŋda. 9Nyin’ vinnyaɣilan’ ŋɔ, a kul yɛn dola nimaani hal ni saha dini? Bɔ saha ka a yɛn neei a gom ni? 10A nini pɔbbu biɛla, gom gbihibu biɛla, zali nuhi ʒia vuhi biɛla, 11#Ŋaha 24.33-34 ka fara lu a zuɣu kaman ŋmɛnditol’ la, ka fakari lu a zuɣu kaman tɔbbia ŋun gbibi bidibbina la.
12Ninvuɣ’ biɛɣu ŋun ka buchi kul chanimi gindi ŋmari ʒiri. 13O chanimi kahind’ o nimbihi ka mal’ o napɔna vuri tiŋa, ka mal’ o nubihi tirita, 14ka lɔri zaɣ’ biɛɣu o tɛha puuni, ka tahiri tuɣiligu na sahakam. 15Dimbɔŋɔ zuɣu zaɣ’ biɛɣu ni lu lala nir’ zuɣu libig’ o n-tum o barina saha biɛla puuni ka di ka yɛtɔɣa.
16Bina ayɔbu m-beni ka Yawɛ je li, ka bina ayopɔin nyɛ din chihir’ o sani:
17Karimbaani lihigu mini ʒiŋmabo
ni bɛn ka taali kubu.
18Suhu ni zaɣ’ biɛɣu lɔbu,
ni ŋun kul zɔri yomyom chani zaɣ’ biɛɣ’ tumbu,
19ni ʒiri shɛhira lana ŋun di ʒiri shɛhira
ni ninvuɣ’ so ŋun tuɣindi nir’ min’ o yiŋnima.
Saɣisigu zaŋ chaŋ zina niŋbu polo
20M bia, dol’ a ba zaligu, ka miri ka a zaɣisi a ma ni wuh’ a shɛli. 21Zaŋm’ li lo n-niŋ a suhu ni sahakam, ka zaŋ li lo a nyiŋgoli ni. 22A yi chana, di ni wuh’ a soli, a yi gbihira, di ni gul’ a, a yi ti neei, di ni dir’ a alizama. 23Dama zaligu maa nyɛla firila, ka wuhibu maa mi nyɛ neesim, ka zuɣu ni kpahibu din wuhiri biɛrisuŋ la mi nyɛ nyɛvili 24din ni gu a ka a ku bo paɣ’ yoli, ka yih’ a paɣ’ zinalan’ naŋgbam’ malisim yɛtɔɣa ni. 25Miri ka a chɛ ka a kɔre kpe o viɛlim ni a suhu ni, ka miri ka a chɛ ka o gbaag’ a o nina ni lihiri shɛm puuni. 26Dama pagɔrili samli yɔri nyɛla bɔrɔbɔro kpilli, amaa so paɣ’ bɔbu nyɛla din diri nir’ nyɛvili.
27Nir’ ni tooi zaŋ buɣim buɣi ka di ku di o situra? 28Bee nir’ ni tooi no buɣimsal’ nɛɔŋ ka di ku nyoog’ o napɔŋ? 29Lala n-nyɛ ninvuɣ’ so ŋun bo o kpee paɣa. Ŋunkam shihi paɣa maa ku yi tibidarigibo ni. 30Kum yi mali tayiɣisi ka bɛ zu bindirigu di, niriba ku lihi ʒiɛm ba di zuɣu. 31Amaa bɛ yi gbahi ba, bɛ ni yo bɛ ni zu shɛli maa zuɣu ʒiibuyopɔin, ka bɛ fa bɛ yinsi nɛma zaa. 32Amaa ninvuɣ’ so ŋun tum zina, o ka yɛm. Ŋun tum lala o saɣim’ omaŋa. 33O ni nya dansi, ka kɔŋ jilima, ka o filiŋ maa ku lan naai; 34dama nyuli zabbu chɛ ka yidan’ suhu yiɣisir’ pam, ka o yi yɛn bɔhi biɛri, o ku lan zɔri nambɔɣu. 35O ku deei sandaani sanyoo kam, o mi ku deei birapu, di yi kul galisi kabo.
Red Letter Dagbani Bible © Bible Society of Ghana, 2011