ข้อพระคัมภีร์ยอดนิยมจาก Matié 6

Ɛ́nusíɛ́lɛ́ kuamba Pufuŋ pú Támbák ne epú púnyɛɛ́ indɛ́ndɛ́nɛ kɛ́ɛ́yiɛ́ ké eŋís, móólémóond Támbák áánúfáan mɔ́ na pitál.

Nutitúmén kɔk na nakinyámúɛ: nakinyámúɛ étúmen nɛɛyɛ́ wɔ́ muɛ́t. Siki puɔ́síɛ́ nɛ múɛ́yɛ́ muyu.

«Púúpú inúɔ́yɔnɛ́ ɛ́ɛ́: Nutitúmén ó pusíó pú kusɔ́t kúánɔ́ ne epú nukaná anyáánɛ́ɛ, no ó pusíó pú tuɔ́l túánɔ́ ne epú nukaná apíákanɛ́ɛ. Kusɔ́t áátápukan múkunya, nuɔ́l tápukan insunú.

Aŋúɛ, aká aambanɛ́ɛ kupísókoliti, píkín kááwɔ kí insúmbiɛ, ɛ́fɛl nipíkínín ópísókolonyi Tíɔ unyɛɛ́ akáánɛ́ kí insunse. Tíɔ wɛɛ́nɛnɛ́ kí insunse kakunam.

«Panɔ́ kɔk, ónupísókólónyí anɛ: Síí waasɔ́ unyɛɛ́ mɛnɛ́mɛnɛ́ɛ, tíínyi pɛɛnd peem ewú ɛnyɛɛ́, ɛlɛ́ ɛ́ɛ́ Pufuŋ púáwɔ áásiám, ɛlɛ́ ɛ́ɛ́ epú ɔɔyɔnɛ́ píwóónyi ekué e kúúsí asi mɛnɛ́mɛnɛ́ɛ.

Túéki ɔ́ puɔ́s pú ínanɔ múkunyá múɛsikɛɛnɛnɛ́ naasɔ́

Túyapɛ́n káásɔ́ á pifal aná pasɔ́ kákáásɔ́ tuyapinanɛ́ epé pɛ́tuɛ́lɛnɛ́ kilɔk

atitúyapá ɔ́ yɔɔ́pítɛ́n, tútúkún ké ewú wɔɔ́pitɔninɛ́ɛ.

«Á kiákí ɛ́ɛ́, índɛ nusiayapɛn pɛɛnd á pipínanɔ́ píɔ́p, Síí waanɔ́ unyɛɛ́ mɛnɛ́mɛnɛ́ɛ kanúyapɛn kákáánɔ́ á pipínanɔ́ píánɔ́

Ónuyoósín munoní: mútipá múkúna tɛ kukaya, mútipá múline maandá á pisasá; tɛ nɔ, Síí waanɔ́ unyɛɛ́ mɛnɛ́mɛnɛ́ɛ óókooyosi múu! Panɔ́ nuátápukan munoní táásɛ. Wooyi munoní utinúóyí á?

«Nutipítulén punɛ́m pú kúúsí, kɔɔ́mɔ ne puúnyée ni insíiŋí nyáanɛ́ɛ, peépí kata piansi péépe. Énulílíkén punɛ́m mɛnɛ́mɛnɛ́ɛ, kɔɔ́mɔ ne puúnyé ni insíiŋí tiányípá kunyá, tɛ peépí pátipá kukata piansi ɛ́ɛ́ péépe. Á kiákí ɛ́ɛ́ kɔɔ́mɔ punɛ́m púáwɔ nyɛɛ́, kɔ́ɔkɔ́ ɔtɛ́m wááwɔ nyɛɛ́.

«Atipá kukɔtinɔn pamásɛ páandɛ́: akapá ɛfɛmɛ ewe ɔɔyɔ owúnóo, púnyaánɛ akapá makánákana ne ewe ɛyɛɛnɛ owúnóo. Atipá kukɔtinɔn na Támbák ne Muenyí.

Índɛ Támbák siɛlɛŋɛ pikuti pí putiɛ́púlɛ́ɛ anakáánɛ́, pínyɛɛ́, píi kɔ́ɔ́kɔ ínanɔ, nakinyámɔ pípɛk, tiɛkiɛ́ kɔk Támbák kaná kuɛlɛ́ utinulɛŋɛ́ kutápɔk? Kiákí pipíóndínyí ɔtɛ́m píánɔ́ nyɛɛ́ pukétí anɛ?

Aŋúɛ kɔk, aká opookosíé ɔsúkɔsukɔ, ɛ́nyɛɛlɛ́ ɔmbɔ́k wááwɔ waakányí leeme epú wɔɔnɛ́m ɛ́ɛlɛnɛ́ɛ, ɛ́ɛ́ nupoo núáwɔ lɔp insunse; Tíɔ wɛɛ́nɛnɛ́ kí insunse áányíkunam.

«Nutiambá ɛ́ɛ́ núɛ́lɛ ké eŋís yɛ́ pɛɛnd maandá emé Támbák óówonée, ɛ́ɛ́ núpítíínyenyi; kati nɛ́ɛ, nutíápíá pinamá ku Síí waanɔ́ unyɛɛ́ mɛnɛ́mɛnɛ́ɛ.

«Aká nupíkotosíé múkunya, nutiyɔ́ɔ́yɔ́n, aná pɛɛnd pɛ́nyɛɛ́ nɛ nunɛ́m ɛ́ɛ́lɛnɛ́ɛ: póyoosonin ɔsúkɔsúkɛ ɛ́ pétíínyi pɛɛnd peseékése ɛ́ɛ́ póópíkotosi múkunya. Kémuémue yɔɔ́núɔ́yɔn ɛ́ɛ́ pakanyi na pinamá piɔ́p. Aŋúɛ kɔk, aká opíkotosíé múkunya, písukɛ́t pusíó, épíwúú elepínde kɛ́ ɛtɔ́, ɛ́ɛ́ mɔɔnd timenyí ɛ́ɛ́ oópíkotosi múkunya, ɛsiɛ́ Tíɔ wééŋényí unyɛɛ́ akáánɛ́ kí insunse; Tiɔ́, wɛɛ́nɛnɛ́ kí insunse áányíkunam.