Lucas 2

Zezusi hã ipotozé

Mateus 1.18-25

1Taha bâtâ mono na hã, Roma te apito Céza Agustu hã ma tô ti'ru, dahâiba mono bâ te te 're ida'a'madâ'â mono zéb 'remhã, danhisi na da te rob'ui'éré za'ra da, daza'rada ité hã hâimana da. 2Quirino hã roti'wa na hâimana ré, ma tô ã hã imorĩ'rada danhisi na daza'rada hã tihâiba, Siria na ti'a nhisi 'remhã. 3Tahawa, uburé pese danhisi na da te rob'ui'éré za'ra da, ma tô ai'aba'ré ni, date 'ri nho'u, 're idapoto za'ra mono zé mono bâ.

4Tahawa, Zuzé hã ma tô mo Nazaré hawi, Galiléia danhipti'a nho'õmo 'remhã, 'ri nho'u Belẽ na isisi u, Zudéa na danhipti'a nho'õmo nhisi 'remhã, apito Davi hã ipotozéb u. Tamomo ma tô mo Zuzé hã, tinhisi na te te dame rob'ui'éré da, apito Davihi nhihudu wa. 5Maria hã ma tô siré saprõ, ãma mro da, ropisutu zahi zarina isimi'madâ'â na tãma ihâimana hã, isisi na da te dame rob'ui'éré zahuré da. Wasã ré te saprõ. 6Tawamhã Belẽ ãma hâimana zahuré ré, bâdâ hã ma tô oto iwa waptãrã, ai'uté ipotozéb da hã. 7Tahawa Mariaha ma, ma ai'uté hã oto podo, i'ra ipoto'rada hã. Poto wamhã, zazahâ hâiwaré na ma tô ubu, 'watébrémi hã. Ma tô duré tihi, wede're danhimizama 're isaihuri mono zé wa, daza'warizéb ãma isa'warizéb da hã, 'ri're baba tãma 'maihâimana zahuré õ wa.

Pone'ẽrebâ 'madâ'â'wa norĩ ma, hâiwa hawi romhuri'wa norĩ te te irowasu'u za'ra zé

8Tamemhã pone'ẽrebâ 'madâ'â'wa norĩ hã te mara bâre pone'ẽrebâ hã 'madâ'â za'ra, rom na Belẽ 'rata. 9Tawamhã hâiwa hawi Uburé Danhib'apito ma romhuri'wa hã ma tô tãma sihâi'ré za'ra. Uburé Danhib'apito te, rowa'a za'ẽne hã ma tô duré imana wawi rowa'a za'ra. Tawamhã ma tô tãma tipahi pese za'ra. 10Tane nherẽ, hâiwa hawi romhuri'wa hã ma tô tãma nharĩ za'ra, ãne:

— Aipahi za'ra wa'aba tõ! Rowasu'uwẽ, wa we aima âri za'ra wa'wa, uburé dapoto mono bâ ãma dama irowẽ za'ẽtẽ uptabi za'ra da hã. 11Ã bâtâ na Danho'reptui'wa hã ma podo, Davihi za'rui ãma. Ta hã Cristu#2.11 Cristu hã, “'Re ihâimana u'âsi mono te te ipisudu, Danho'reptui'wa da” te wasu'u, Uburé Danhib'apito. 12Ã hã, tô sena ãma iwaihu'u za'ra wa'aba zéb da hã: Ai'uté pré hã te za asiwi isõpẽtẽ 'wa, zazahâ na ubu na nomro ré, duré wede're danhimizama 're isaihuri mono zéb 're, nomro ré.

13Tawamhã waptu na rosa'rese õ ré, ma tô hâiwa hawi romhuri'wa siré, isiré hâiwa hawi romhuri'wa norĩ hã sihâi'ré za'ra, ahâ uptabi na. Ta norĩ hã te tinho're na 'Re ihâimana u'âsi mono ãma tiwata za'ra, ãne:

14— 'Re ihâimana u'âsi mono, hâiwa ãma 're isãmra mono ãma si, tô i'ru zahi, ãma 're idawata za'ra mono da hã!

Duré ti'ai ãma rowẽ hã dama 're ihâimana za'ra mono da si, rowẽ u'âsi 're nomro mono da, te te sima 're i'awẽ mono norĩ hã!

15Tawamhã hâiwa hawi romhuri'wa norĩ hã apâ hâiwa u si'aba'ré za'u hã, pone'ẽrebâ 'madâ'â'wa norĩ hã ma tô sima nharĩ za'ra, ãne:

— Oto wasi'aba'réi wa'aba Belẽ u, Uburé Danhib'apito te te wama iwaihu'u za'ra hã, wa te sabu za'ra da, marĩ ihâimanazé hã.

16Tahawa si'aba'ré na ma tô ai'aba'ré, Belẽ u. Tame ma tô sõpẽtẽ za'ra, Maria hã duré Zuzéhé zama. Ma tô duré siwi 'madâ, ai'uté wede're danhimizama 're isaihuri mono zé wa, inomro hã. 17Te te siwi 'madâ'â wamhã, imama norĩ ma, ma tô rowasu'u za'ra, hâiwa hawi romhuri'wa norĩ te te tãma irowasu'u za'ra zé hã, 'watébrémi ãma. 18Tawamhã pone'ẽrebâ 'madâ'â'wa norĩ nhimirowasu'u, uburé da te iwapari za'ra norĩ hã ma tô ãma tatob'uzu za'ra ni. 19Tane nherẽ, Maria hã tipẽ'ẽ 're, ma tô sima tété isimirowasu'u za'ra hã. Te duré ãma rosa'rata u'âsi. 20Taha pari, pone'ẽrebâ 'madâ'â'wa norĩ hã ma tô apâ ai'aba'ré, 'Re ihâimana u'âsi mono ãma wata za'ra mono sina, uburé marĩ te te i'madâ'â za'ra zém na duré te te iwapari za'ra zém na zama, hâiwa hawi romhuri'wa norĩ hã te te tãma iwaihu'u za'ra zéb zarina.

'Watébrémi, Zezusi na imama norĩ te te isisi zahuré zé

21Tawamhã ipotozém na 8 na bâdâ ãma ne parimhã, 'watébrémi da te isihâiwata nhizârizé bâtâ na ma tô imama norĩ hã sisi zahuré Zezusi na, ã hã isisi hã poto õ ré, hâiwa hawi romhuri'wa te te ipisutu siromo zéb zarina.

22Tawamhã Maria duré Zuzé isihâiba pese zahuré zéb da hã bâdâ iwa waptã'ã wamhã, Mozésihi nhimiroti zahi te te ãma uwaimrami zahuré da hã, ma tô ai'uté hã siré subzari zahuré, Zeruzalẽ u, Uburé Danhib'apito ma, apâ te te sõmri zahuré da, 23Uburé Danhib'apito nhimiroti zahi hã te te nharĩ wa, ãne: “Uburé da'ra si'watébrémi ipoto'rata norĩ hã te za aimawi 're hâimana za'ra mono da hã da te 're sõmri za'ra, Uburé Danhib'apito ma.” 24Tinhoprubzé te te duré sõmri zahuré da, ma tô tineb zahuré, Uburé Danhib'apito nhimiroti zahi zarina, ãne: “maparane naire hã niwamhã maparane utu'ure hã.”

Simiã hã 'Re ihâimana u'âsi mono ãma iwatazé

25Tawamhã Zeruzalẽ 'remhã te 're sãmra, Simiã na aibâ isisi hã. Ta hã aibâ 're imorĩ wẽ, duré 'Re ihâimana u'âsi mono te te 're iwazé pese mono, duré Izaraéu nhihudu norĩ nho'reptuzéb zô 're isimipari mono. 'Re ihâimana u'âsi mono Pẽ'ẽzani hã te isiré 're hâimana. 26Taha ma, ma tô 'Re ihâimana u'âsi mono Pẽ'ẽzani hã tãma ropisutu, dâ'â õ ré, Cristu za te te i'madâ'â na hã, Uburé Danhib'apito za we te te isatõrĩ hã. 27Tawamhã 'Re ihâimana u'âsi mono Pẽ'ẽzani te te tãma iwaihu'uzéb zarina, ma tô mo, 'ri 'rãihâ#2.27 'ri 'rãihâ hã, “'Re ihâimana u'âsi mono nhorõwa, ãma 're idawata za'ra mono zé” te wasu'u u. 'Watébrémi Zezusi hã, 'ri 'rãihâ u imama norĩ 'Re ihâimana u'âsi mono nhimiroti zahi te te ãma uwaimrami zahuré da, te te ãwisi zahuré wamhã, 28Simiã hã ma tô sa'ra tipa, 'watébrémi hã. Tawamhã 'Re ihâimana u'âsi mono ãma te tiwata, ãne:

29— Uburé Danhib'apito, ma'ãpé ãhã na hã oto waprosi, aima romhuri'wa hã rowẽ sina si'ré da, tãma iropisutuzé hã ãma tãma uwaimrami wa.

30E marĩ wa. Asiminho'reptuzé hã ĩtõmo na te oto sabui wa,

31uburé dapoto mono bâ datõmo nho'a sada irobza'ra pese zé hã.

32Ta hã rowa'a, zudeu'õ norĩ, bâdâdi iwẽ na te te 're i'anhimroi mono da hã, duré ta hã asib'a'uwẽ norĩ Izaraéu nhihudu norĩ ma, rowa'a'wa da hã.

33Tawamhã imama norĩ hã ma tô ãma titob'uzu zahuré, Simiã mreme 'watébrémi ãma te te inharĩzé, te te wapari zahuré wamhã. 34Tawamhã Simiã, iwẽ hã ma tô tãma pisutu zahuré. Ãne ma tô duré Mariaha ma tinha, Zezusihi na ma:

— Ã hã 'watébrémi hã, 'Re ihâimana u'âsi mono ma tô pisutu, da'ahâ na te te 're ida'a'moropãrĩ mono da hã, duré da'ahâ na te te 're ida'awahutu mono da hã, Izaraéu nhihudu norĩ 'remhã. Ta hã te za 'Re ihâimana u'âsi mono te, rowa'õno hã dama hâi'ré. Tawamhã da'ahâ na te za sada 're dahâimana za'ra. 35Ãne wamhã, da te 're irosa'rata za'ra mono zé hã te za sõ'awi 're hâimana za'ra. Tawamhã robzei'õ hã, sib'ézé i'wa pese uptabi ne, te za aipẽ'ẽ 'remhã ro'razâ, Maria.

Ãnahã wasu'u

36Tawamhã tame te duré 're sãmra, 'Re ihâimana u'âsi mono zadawa 'mahârâ'wa sipi'õ, Ãna na isisi hã. Ta hã Fanuéu 'ra sipi'õ, Aséhé nhihudu. Duré ta hã ãma wahub za'ẽtẽ di. Imro hã tiwi dâ'â parimhã, ma tô mro ãna 're sãmra, 7 na wahum na siré 're simasisi zahuré mono pari, si'ãma mro zahuré parimhã. 37Tawamhã taha ãma ma tô oto ãma tiwahu, 84 na. 'Re ihâimana u'âsi mono nhorõwa 'ri 'rãihâ 'wawi wa'ra 're, ma tô 're sãmra u'âsi, niwa watobro ãna. Te duré 're wata u'âsi, 'Re ihâimana u'âsi mono ãma si, barana duré bâtâ na zama. Sai ãna te duré 're hâimana, 'Re ihâimana u'âsi mono wi te te 're rowaptẽrẽ mono da hã. 38Taha bâtâ na hã ma tô itẽme za'ra sina rotété. 'Re ihâimana u'âsi mono ãma ma tô tiwata. 'Watébrémi hã ma tô duré tãma wasu'u za'ra, Zeruzalẽ ãma 're idasi'ubumroi mono norĩ nho'reptuzéb zô, 're isimipari za'ra mono norĩ ma hã.

Zuzé hã Mariaha me, Nazaré u apâ inebzé

39Zuzé norĩ Mariaha me, Uburé Danhib'apito nhimiroti zahi, te te uburé ãma a'uwaimrami zahuré parimhã, apâ ma tô sina siri zahuré Nazaré u, Galiléia 'remhã, 're isimasisi zahuré mono zéb u.

40Tawamhã 'watébrémi hã ma tô prédu mono. Isiptede hã te te duré tãma sina hâimo u'âsi. Te te duré rowaihu'u pese uptabi di. 'Re ihâimana u'âsi mono nhimipawaptobzé hã te duré isiré 're hâimana.

'Watébrémi Zezusi hã, 'Re ihâimana u'âsi mono nhorõwa 'ri 'rãihâ ãma isãmrazé

41Wahup sidâpâsi, te Zezusihi mama norĩ hã 're neb zahuré Zeruzalẽ u hã, Pascoa na dato nhisi 're ihâimana mono u. 42Tawamhã Zezusihi ãma 12 na ãma wahu wamhã, imama norĩ hã ma tô duré tineb zahuré datoi u, te te 're i'manharĩ u'âsi zahuré mono zéb zarina. 43Tawamhã dato hã si'utõrĩ parimhã, te oto apâ tineb zahuré, tinhorõwa u. Tane nherẽ, 'watébrémi Zezusi hã te Zeruzalẽ ãma nhamra u'â, isa'u zahuré, imama norĩ te te waihu'u zahuré ãna. 44Ma tô ãma rosa'rata zahuré, isiré idasi'aba'ré norĩ siré morĩ newa. Tawamhã ineb zahuré zé, misi bâdâ wahuré ãma imorĩ zahuré zém na ma tô oto sô amrami zahuré. Tahawa te sô tirĩtĩ zahuré, tisiwadi norĩ wazari, duré tisiwaihu'u norĩ wazarib zama. 45Tawamhã te te sõpẽtẽ zahuré õ wa, ma tô apâ sina siri zahuré Zeruzalẽ u hã, sô rĩtĩ zahuré da. 46Tawamhã si'ubdatõ bâdâ ãma ne parip si, ma tô sõpẽtẽ zahuré, 'Re ihâimana u'âsi mono nhorõwa 'ri 'rãihâ ãma. Tame te Zezusi hã nhamra, Re ihâimana u'âsi mono nhimiroti zahi na rob'ui'éré na dama rowahutu'wa norĩ wazari. Ta norĩ hã te awapa. Te duré nasi azadanha. 47Tawamhã uburé iwapari'wa norĩ hã ma tô ãma titob'uzu za'ra isimirowaihu'u na, duré te te nasi ãma i'azada'âbâzém na zama. 48Imama norĩ hã te te duré 'madâ'â zahuré wamhã, ma tô ãma titob'uzu zahuré. Tawamhã ina hã ma tô ãne tãma tinha:

— Ĩ'ra, e tiha da, ma tô ãne hã wama i'manha. Aimama me wa wahâtâ'â sina asô 're warĩtĩ.

49Tawamhã Zezusi hã ma tô ãne sada'âbâ zahuré:

— E marĩ da, te ĩzô 're airĩtĩ aba mo. E ĩ'ãma rosa'rata waihu'u aba ã bâ, Ĩmama nhorõwa ãma, za ĩnhamra na hã ĩma i'ru zahi zarina.

50Tane nherẽ, te te sadaihu'u zahuré õ di, te te tãma inharĩ zahuré zém na hã.

51Tawamhã Zezusi hã timama norĩ siré ma tô apâ mo, Nazaré u. Te te duré 're wapari pese u'âsi zahuré. Tawamhã ina hã te uburé ãne na ãma iromhâimanazém na te te ãma 're rosa'rata u'âsi, tipẽ'ẽ 're.

52Zezusi hã iprédu mono siré, te rowaihu iwẽ hã te te tãma sina hâimo u'âsi. Taha na 'Re ihâimana u'âsi mono te te iwẽsãmrizé hã te te sina hâimo u'âsi. Da te iwẽsãmri za'ra zéb zama te dama sa'ẽtẽ u'âsi za'ra.

Iliyochaguliwa sasa

Lucas 2: xavBP

Kuonyesha

Shirikisha

Nakili