Atus 4
4
Pedru norĩ Zuwãhã me, dama roti'wa ipire norĩ nho're isima'warazé
1Tawamhã Pedru norĩ hã Zuwãhã me, zahadu te te dama rowasu'u zahuré ré, ma tô sasedoti norĩ hã aihutu, 'Re ihâimana u'âsi mono nhorõwa 'ri 'rãihâ 'madâ'â'wa norĩ nhib'apito siré duré saduceu norĩ zama. 2Ta norĩ hã ma tô ab'rui pese za'ra, Pedru norĩ hã Zuwãhã me te te dama rowahutu zahuré wa, Zezusi hã apâ ihâiwa'utu na duré taha zarina, za apâ idâ'â za'ra norĩ hã 'Re ihâimana u'âsi mono te te i'ahâiwa'utu na hã. 3Tawamhã Pedru norĩ hã Zuwãhã me ma tô siwi timra. Za oto robrazéb u wa, ma tô dazazéb 're siwi tiza a'â, awẽb u sima'wara da. 4Tane nherẽ, da'ahâ na ma tô saze za'ra ni, Zezusihi wasu'u da te iwapari za'ra hã. Aibâ norĩ te te isaze za'ra norĩ hã niwamhã 5 miu na ihâiba za'rata za'ra hã.
5Tawamhã awẽm na hã ma tô si'rã'õtõ, Zeruzalẽ ãma sasedoti ipire norĩ hã duré Zudeu norĩ ma roti'wa norĩ hã duré 'Re ihâimana u'âsi mono nhimiroti zahi na rob'ui'éré na dama rowahutu'wa norĩ zama. 6Tamemhã te dame tihâimana zahuré, Anasi hã sasedoti 'Re ihâimana u'âsi mono ma da'ãma romhuri'wa, tisiré norĩ nhipai u ipire uptabi hã duré Caifasi, Zuwã, Alesãdri duré isiré norĩ hã sasedoti pire na 're ihâimana za'ra mono sipoto hawi a'uwẽ hawimhã. 7Ta norĩ hã ma tô dama 'ru za'ra, Pedru norĩ hã Zuwãhã me, isõ'reb za'ra da te dasiwi simizusi da.
Tahawa, ma tô sadanharĩ zahuré ni, ãne:
— E 'wai waihu'u pese na duré e 'wa nhisi na ma tô ãne hã i'manharĩ 'wa.
8Tawamhã Pedru hã 'Re ihâimana u'âsi mono Pẽ'ẽzani ihâiba 'remhã 'masisi wa, ma tô ãne tãma nharĩ za'ra:
— Dama ipire norĩ duré danhib'ihâ'a norĩ! 9Te iwazadanharĩ za'ra wa'wa, iwẽ hã wa te i'manharĩzém na aibâ ihi'ré ma duré niha ipesezéb zô. 10Wẽ di tô! Waihu'u za'ra wa'aba duré uburé Izaraéu nhihudu norĩ hã. Ã hã aibâ imorĩ ré na asiwi i'madâ'â 'wa hã ma tô tipese, Zezu Cristuhu waihu'u pese na, Nazaré ãma aré 're isãmra mono asiwi iwĩrĩ 'wa, 'Re ihâimana u'âsi mono apâ te te ihâiwa'udu. 11Ta hã Zezusi, Ibaihâ Iwazé pese na rob'ui'éré na te te iwasu'u hã, ãne:
“Ẽne, a norĩ wa'wa 'ri'wa norĩ, asiwi iwẽ'õ wa'wa hã. Ta hã oto danhipai u pire uptabi di.”
12Danho'reptuzé hã, Zezusihi ãma si wa za wa te 're sõpẽtẽ za'ra. Ni'wa, isine hã hâimana õ di, daro mono bâ 're idahâimana za'ra mono 'remhã, 'Re ihâimana u'âsi mono te te ipisudu hã, danho'reptuzé wa te ãma 're isõpẽtẽ za'ra mono da hã.
13Tawamhã Pedru norĩ hã Zuwãhã me pahi ãna te te irowasu'u zahuré zém na duré te te sada romnhoré zahuré õ nherẽ, te te 'madâ'â za'ra wamhã, ma tô ãma titob'uzu za'ra. Ma tô duré 'madâ'â waihu'u za'ra, Zezusihi siré 're inem na hã. 14Tane nherẽ, niha hã te te tãma nharĩ waihu'u za'ra õ di, aibâ ihi'ré te te ipese zahuré hã, isababa sab zahuré wa. 15Ãne wa, ma tô tãma rob'ru za'ra, neb da oto dasi'rã'õtõzém hawimhã. Pusi za'u si, ma tô ãma sima robzanhamri za'ra. 16Ãne te sisadanharĩ za'ra:
— E marĩ, wa za 'manharĩ za'ra ni, ã hã aibâ norĩ ãma hã. Zeruzalẽ 'remhã uburé dama waihu'u pese za'ra di, marĩ dama i'manharĩ waihu'u'õ te te i'manharĩ zahuré na hã. Tahawa, wa te wasiwi udâ waihu'u za'ra õ di. 17Tane nherẽ, rowasu'u hã daza'rui mono bâ te te ropé tõ da hã, wa te tãma amhâzépa za'ra na, te te dama irowasu'u zahuré na te te sahu zahuré tõ da, Zezusihi wasu'u na hã.
18Tawamhã apâ ma tô sô tihârâ za'ra. Ma tô tiwi sawi pese za'ra, te te dama irowahutu zahuré na hã te te ãma sahu zahuré tõ da, Zezusihi wasu'u na. 19Tane nherẽ, Pedru norĩ hã Zuwãhã me ma tô ãne dazada'âbâ zahuré:
— 'Râwi asima waihu'u za'ra wa'aba: E i'uwaibaba, 'Re ihâimana u'âsi mono ma hã wa te wapari õ wamhã, a norĩ wa'aba si wa te aiwapari za'ra wa'aba wamhã. 20Wa te sahâri waihu'u õ di za, watõmo na wa te 're i'madâ'â mono wasu'u hã duré wapo're na wa te 're iwapari mono wasu'u hã.
21Te te duré nasi tãma amhâzépa za'ra pari, ma tô oto siwi satõrĩ zahuré. Niha hã te te tãma rob'manharĩ waihu'u za'ra õ di, uburé 'Re ihâimana u'âsi mono ãma dawata za'ra wa, iromhâimanazém na hã. 22Aibâ ihi'ré marĩ dama i'manharĩ waihu'u'õ na ipesezé hã 40 nhipai u ãma wahum nherẽ.
Zezusihi zazei'wa norĩ te te irowaptẽrẽ za'ra zé
23Tawamhã Pedru norĩ hã Zuwãhã me da te tãma rob'ru zahuré pari, ne wamhã oto, ma tô apâ aimasisi, tisiré isazei'wa norĩ u. Tame ma tô tãma rowasu'u za'ra, 'Re ihâimana u'âsi mono ma, da'ãma romhuri'wa ipire norĩ mreme na duré dama ipire norĩ mreme na duré uburé te te tãma inharĩ za'ra zém na zama. 24Ãne hã te te wapari za'ra wamhã, ma tô uburé siré 'Re ihâimana u'âsi mono ãma tiwata za'ra, ãne:
— Uburé Danhib'apito, a hã hâiwa ma tô ipo, ti'a, âporé duré uburé marĩ iwa 're ihâimana za'ra mono norĩ hã! 25A hã ma tô inha, Aipẽ'ẽzani na duré aima romhuri'wa zadawa na, wahi'rada Davihi zadawa na, ãne:
“E marĩ wa, daro mono bâ 're idahâimana za'ra mono, ma tô tazahi pese za'ra ni. E marĩ wa, a'uwẽ norĩ hã ma tô rowa'õno 'manharĩ za'ra, i'uptabi õ na.
26Ti'ai ãma isib'apito norĩ hã duré ite ti'ai wa'õtõ mono bâ roti'wa norĩ zama, te sada tihâimana za'ra, Uburé Danhib'apito 'Re ihâimana u'âsi mono zada, duré te te sima ipisutu zada zama.”
27— Tô sena, Erodi norĩ hã duré Põsiu Pilatuhu me, ma tô si'rã'õtõ, zudeu'õ norĩ me duré ãme a'uwẽ Izaraéu nhihudu norĩ 're ihâimana za'ra mono norĩ me, sada hâimana za'ra da Iwẽ uptabi aima romhuri'wa Zezusi, Danho'reptui'wa da, asima ipisutu da, hâimana za'ra da. 28Ma tõ si'rã'õtõ, uburé marĩ te te 'manharĩ za'ra da, aiwaihu'u pese na duré asima iwẽzéb zarina, marĩ hã hâimana za'ra da, iwaihu'u siromo zé hã. 29Uburé Danhib'apito, ãhã na hã ãma rosa'rata, te te wama i'amhâzépa za'ra zém na hã. Ma'ãpé rowaihu hã wama sõmri za'ra na aima romhuri'wa norĩ ma, wanhib'ru na wa te 're aimreme 'mahârâ za'ra mono da. 30Asib'rada hã wei wẽ na, 're da'apese mono da. Marĩ dama i'manharĩ waihu'u'õ hã duré 're a'manharĩ mono iwẽ uptabi hã, aima romhuri'wa iwẽ uptabi Zezusihi nhisi na.
31Tawamhã te te rowaptẽrẽ za'ra parimhã, ihâimana za'ra zéb ãma 'ri hã ma tô sãsã. Tahawa 'Re ihâimana u'âsi mono Pẽ'ẽzani ré 'masisi na ma tô tihâimana za'ra uburé. Ãne wa pahi ãna ma tô oto 'Re ihâimana u'âsi mono zadawa wasu'u na sãna'rata za'ra.
Isazei'wa norĩ hã sima 're ihâimana za'ra mono zé
32Uburé te te 're isaze za'ra mono hã aiwap si misi haré ma tô te te 're rosa'rata za'ra. Duré misi haré tipẽ'ẽ 'remhã ma tô 're hâimana za'ra. Ni'wa hã te te sawi waihu'u õ di, marĩ tite sima si hã. Tazahã wẽ uptabi na ma tô te te sima 're po'o za'ra, tinhimarĩ hã. 33Mreme nhiptete sina, ma tô Wanhib'apito Zezusi apâ ihâiwa'utuzém na ma tô te te 're rowasu'u za'ra, isadawa wasu'u'wa norĩ hã. 'Re ihâimana u'âsi mono hã iwẽ te te tãma ipisutu za'ra zé hã sa'ẽtẽ na ma tô tãma 're hâimana za'ra. 34Isiré za'ra hã ni'wai õ di, tãma ropire na 're ihâimana mono hã. Ni'wam norĩ ma, ti'a hã duré isõrõwa hã ma tô te te 're wede za'ra. Iwa'â hã ma tô te te 're ubumro za'ra. 35Ma tô te te 're ãwisi za'ra, Zezusihi zadawa wasu'u'wa norĩ u. Tawamhã ma tô te te 're po'o za'ra dahâiba mono bâ, ni'wam norĩ ma, marĩ zô tiwi 're irowaptâ'â za'ra mono zéb zarina.
36-37Zuzé, Levihi nhihudu Chipri hawimhã, Zezusihi zadawa wasu'u'wa norĩ hã Barnabé na te te siwi isisi hã (te wasu'u isisi hã “Danhiptete'wa”). Ta hã ma tô wede tinhipti'a hã. Tawamhã rob'uiprazé hã ma tô ãwisi, Zezusihi zadawa wasu'u'wa norĩ u.
Iliyochaguliwa sasa
Atus 4: xavBP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2011, Wycliffe Bible Translators, Inc.
