Atus 23
23
1Tawamhã Paulu hã, ma tô a'madâ'â pese, Zudeu norĩ ma roti'wa norĩ hã. Ãne ma tô tãma nharĩ za'ra:
— Ĩsisãnawã norĩ, ĩnhimirosa'rata 'remhã marĩ te te ĩwi 're ro'wa'ré mono ãna, wa 're ĩhâimana, 'Re ihâimana u'âsi mono nho'remhã ãwa bâtâ u hã.
2Tane nherẽ, Anania hã sasedoti tisiré norĩ nhipai u ipire uptabi hã ma tô aibâ norĩ ma ti'ru, i'rata isimasam norĩ ma, te te siwi sadawa pré'é da, Paulu hã. 3Tawamhã Paulu ma tô Ananiaha ma tinha, ãne:
— Aihâimana si'amoi pese na 're i'aihâimana mono, 'Re ihâimana u'âsi mono hã te za ai'azâ za! E niha asãmra nherẽ hã, 'Re ihâimana u'âsi mono nhimiroti zahi zarina ĩ'ãma rowairébé da hã. Tane nherẽ, ma tô dama ĩ'ru, da te dasiwi ĩ'azâri da, roti zahi te te isawi zahi upana.
4Tawamhã i'rata isimasam norĩ hã te Paulu hã siwi sadanha, ãne:
— E te ãma iwasé, sasedoti ipire uptabi ãma hã.
5Tawamhã Paulu hã ma sada'âbâ za'ra, ãne:
— Ĩsisãnawã norĩ, te waihu'u õ di, õ hã sasedoti dama ipire na hã. Tô Ibaihâ Iwazé pese na rob'ui'éré hã, ãne: “Ãma wasété za'ra tõ, ate a'uwẽ norĩ ma ipire norĩ ãma hã.”
6Paulu hã, nima norĩ dama roti'wa norĩ hã ni'wam norĩ saduceu niwĩ 're ihâimana za'ra mono na hã duré ni'wam norĩ farizeu niwĩm na te te waihu'u wamhã, ma tô mreme 'rãihâ na si'mahâ, ãne:
— Ĩsisãnawã norĩ, wa hã farizeu duré farizeu 'ra. Ãhã na hã ãmemhã ĩ'ãma rowairébé te tihâiba, ãma ĩnhimizazei wa, idâ'â za'ra norĩ niwamhã za apâ ihâiwa'utu za'ra na hã.
7Ãne siwasu'u wamhã, farizeu norĩ duré saduceu norĩ hã ma tô siwasu za'ra. Tahawa dama roti'wa norĩ hã ma tô sima aipo'o. 8E marĩ wa. Saduceu norĩ hã 're simizaze za'ra mono õ wa, idâ'â norĩ hã apâ 're ihâiwa'utu za'ra mono na hã duré hâiwa ãma romhuri'wa norĩ 're ihâimana za'ra mono na hã niwamhã duré dapẽ'ẽzani hã. Tazahã farizeu norĩ, ã norĩ na hã te ãma 're simizaze za'ra. 9Tahawa, ma tô tahârâ 'rãihâ pese za'ra ni. Tawamhã 'Re ihâimana u'âsi mono nhimiroti zahi na rob'ui'éré na dama rowahutu'wa norĩ hã, farizeu norĩ niwĩ 're ihâimana za'ra mono norĩ hã hâiwi ma tô aimasa. Te duré sa'ẽtẽ wasu za'ra. Ãne ma tô nharĩ za'ra:
— Marĩ hã i'upa, wa te wasiwi sõpẽtẽ õ di, ã hã aibâ ãma hã. Ãté tô hâiwa hawi romhuri'wa duré ãté ni'wai pẽ'ẽzani hã tãma tinha.
10Tawamhã siwasu za'ra wa, sisada sib'rui pese za'ra wa, ma tô dasi'wapéi 'manharĩ'wa norĩ nhib'apito hã Pauluhu ãma hâtârâ, da te dasiwi hâiba pru pese õ'umnhasite. Tahawa, ma tô ti'ru, dasi'wapéi 'manharĩ'wa norĩ hã dawa'wa hawi te te siwi wazere da, 'ri isiptete u apâ te te siwi 'mazébré da.
11Tawamhã mara i'amo na Wanhib'apito hã ma tô sihâi'ré, Pauluhu ma. Ãne ma tô tãma tinha:
— Paulu, aipahi tõ! A hã ma tô dama ĩwasu'u, ãme Zeruzalẽ 'remhã. Tane te za duré Roma ãma hã dama ĩwasu'u.
Paulu hã da te dasiwi wĩrĩ da, da te ãma dasima irowa'õtõ za'ra zé
12Tawamhã awẽm na Zudeu norĩ hã ma tô si'rã'õtõ. Ropisutu zahi hã ma tô 'manharĩ za'ra, â te te âhuri tõ da, duré saihuri tõ da, Paulu hã te te siwi wĩrĩ õ ré hã. 13Tawamhã aibâ norĩ, ãne na te te iropisutu za'ra hã 40 nhipai u ihâiba za'ra hã. 14Ta norĩ hã ma tô ai'aba'ré, sasedoti norĩ ma ipire norĩ u, duré Zudeu nhib'ihâ'a norĩ u zama, ãne te te tãma nharĩ za'ra da:
— Ropisutu zahi hã wa tô 'manharĩ za'ra ni, ãne: “'Re ihâimana u'âsi mono hã iwasédé te te tô wama pisutu za'rare, wasaihuri wamhã, duré siwa'ru marĩ wa te âhuri wamhã, Paulu wa te wasiwi wĩrĩ õ ré hã.” 15Tahawa dama roti'wa norĩ, ãhã na hã ma'ãpé dasi'wapéi 'manharĩ'wa norĩ nhib'apito ma 'ru za'ra wa'aba, Paulu hã we te te siwi saprõni da ãwa. Tãma rowasu'u za'ra wa'aba, za wa te ãma irosa'rata pese za'ra na ite romhâimanazém na hã. Tawamhã wei wisi wana ré, wa za sô mare siromo za'ra ni, wa te wasiwi wĩrĩ da.
16Tane nherẽ, 'ritéi'wa Pauluhu hidiba 'ra hã ma tô waihu'u, te te sima irowa'õtõ za'ra zé hã. Tahawa Pauluhu u ma tô ãzé, 'ri isiptete u hã. Tame ma tô tãma rowasu'u pese. 17Tawamhã Paulu hã dasi'wapéi 'manharĩ'wa norĩ wada'uri'wa zô ma tô hâ. Ãne ma tô tãma tinha:
— Saprõni ã hã 'ritéi'wa hã, asib'apito u. Marĩ te te tãma iwasu'u da hã iré hã.
18Tawamhã dawada'uri'wa hã ma tô saprõ, tinhib'apito u. Ãne ma tô tãma rowasu'u:
— Dazazéb 're isa, Paulu na isisi hã ma tô ĩzô hâ. Ma tô ĩma tinha, ã hã 'ritéi'wa hã te we saprõni da, marĩ te te u aima iwasu'u da hã, iré wa.
19Tawamhã dasi'wapéi 'manharĩ'wa norĩ nhib'apito hã ma tô 'ritéi'wa hã pa'â. Danhiti ma tô saprõ. Ãne te sadanha:
— E marĩ te za ĩma iwasu'u.
20Tawamhã ma sada'â, ãne:
— Ni'wam norĩ Zudeu norĩ hã ma tô sima roti za'ra, te te aiwi waptẽrẽ za'ra da, awẽ Paulu hã dama roti'wa norĩ u saprõni da, si'udâ sina, ite romhâimanazém na te te ãma rosa'rata pese za'ra da newa. 21Tane nherẽ, saze za'ra tõ za ãma. Aibâ norĩ hã 40 nhipai u ihâiba za'ra hã te za sô aima'uri za'ra, Paulu hã te te siwi wĩrĩ da. Ta norĩ hã uburé roti zahi hã ma tô 'manharĩ za'ra, ãne: “'Re ihâimana u'âsi mono hã iwasédé hã te te wama pisutu za'rare, wasaihuri wamhã, duré siwa'ru marĩ hã wa te âhuri wamhã, Paulu wa te wasiwi wĩrĩ õ ré hã.” Te oto mapari za'ra, ropisudu hã te te ãma uwaimrami za'ra da hã. Niha hã ãma isada'âbâ za'ra zô si, te oto mapari za'ra.
22Tawamhã apito hã te tãma tinha, 'ritéi'wa ma, ãne:
— Ni'wai ma rowasu'u tõ, ĩma irowasu'u na hã.
Taha pari, te tãma rob'ru, morĩ da.
Apito Félisihi u, Paulu da te isaprõnizé
23Tawamhã dasi'wapéi 'manharĩ'wa norĩ nhib'apito hã maparane tizapari dasi'wapéi 'manharĩ'wa norĩ wada'uri'wa norĩ zô ma tô tihârâ zahuré. Ãne te tãma nharĩ zahuré:
— Ma'ãpé ubumroi wa'aba, 200 na dasi'wapéi 'manharĩ'wa norĩ hã duré 70 nhipai u awaru na 're inomro mono norĩ hã, duré 200 na isi'uwazi 'rã'wa na romhâ'wa norĩ zama, 'ri wa'õno Cézaréia u si'aba'ré da. Asisa rob'ubumro za'ra wa'aba za, ã hawimhã 9 na bâtâ pibuzéb ãma aiwairébé aba da, mara na. 24Awaru hã duré ubumroi wa'aba, Paulu hã ãma imorĩzéb da hã. Asiwi saprõni aba. 'Madâ'â pese aba, ãwisi wẽ wa'aba da asiwi, danhib'apito Félisihi u hã.
25Taha pari, dasi'wapéi 'manharĩ'wa norĩ nhib'apito hã ma tô rob'ui'éré hã 'manha, ãne:
26“Aiwazép sina danhib'apito Félis, wa ãma asawi.
“Wa hã, Claudiu Lizia.
27“Ã hã aibâ hã, ni'wam norĩ Zudeu norĩ hã ma tô siwi ti'â. Ma aré siwi tiwĩ. Romanu na 're ihâimana mono na, te waihu'u wamhã, wa tô itẽme mo, ĩte dasi'wapéi 'manharĩ'wa norĩ me. Wa tô sawi, da te dasiwi wĩrĩ tõ da. 28Wa tô ĩsima wẽ, te waihu'u da, e marĩ wa, ma tô iwasédé hã dasiwi ãma hiri ni. Tahawa wa tô saprõ, Zudeu norĩ ma roti'wa norĩ u hã. 29Tawamhã wa tô waihu'u, marĩ hã te te upai õ di, dazazéb 're isab da hã duré da te iwĩrĩ da hã. Da te dasiwi iwasu'u wasété zé hã, tô õ norĩ nhimiroti zahi wa'rãmi, 're ihâimana mono zém na si ma tô iwasédé hã ãma siwi tihi. 30Da te dasiwi wĩrĩ da, rowa'õno ãma ihâimana na, da te ĩma 'mairowasu'u wamhã, wa tô waihu'u, te ãma atẽme tãma rob'ru da. Wa duré tinha, Zudeu norĩ iwasu'u wasété 'wa norĩ hã asõ'a te te siwi wasu'u wasété da.
“Wa ãma sawi. Claudiu Lizia.”
31Tawamhã dasi'wapéi 'manharĩ'wa norĩ hã tãma i'ru za'ra zé hã ma tô ãma uwaimrami za'ra. Paulu hã ma tô siwi saprõ, mara bâre, Ãtipatridi na 'ri nho'õmo nhisi u. 32Awẽm na dasi'wapéi 'manharĩ'wa norĩ para na isi'aba'ré norĩ hã ma tô apâ ai'aba'ré, 'ri isiptete u hã. Awaru na 're inomro mono norĩ si, Paulu hã te te siwi saprõni da oto, ma tô ta norĩ si rẽme za'ra. 33Cézaréia u sihutu wamhã, apito ma rob'ui'éré hã ma tô siwi tisõ. Pauluhu zama ma tô tãma ãwisi za'ra. 34Apito hã rob'ui'éré hã ma tô sõré. Paulu ma tô duré sadanha, nima hawib zô. Silisia hawim na te te waihu'u wamhã, 35ma tô tãma tinha, ãne:
— Aiwasu'u wasété 'wa norĩ hã we sihutu wap si, wa za wapa ate romhâimanazé hã.
Taha pari dasi'wapéi 'manharĩ'wa norĩ ma, ma tô 'ru za'ra, Paulu hã te te siwi sẽrẽ da, Erodihi nhimiromhurizé 'ri 'rãihâ ãma.
Iliyochaguliwa sasa
Atus 23: xavBP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2011, Wycliffe Bible Translators, Inc.
