Atus 14
14
Paulu norĩ hã Iconiu ãma te te iromhuri zahuré zé
1Tawamhã Iconiu ãma hã, Paulu norĩ Barnabéhé me 're ihâimana zahuré mono zéb zarina, ma tô tizasi zahuré, Zudeu norĩ te rowahutuzéb u hã. Tame ma tô duré rowasu'u zahuré, iwẽ uptabi na. Tahawa da'ahâ uptabi na Zudeu norĩ hã duré zudeu'õ norĩ zama ma tô saze za'ra. 2Tane nherẽ, Zudeu norĩ te te isaze za'ra õ norĩ hã ma tô zudeu'õ norĩ hã wada'uri wasété za'ra, sada hâimana za'ra da, uburé isazei'wa norĩ zada. 3Tawamhã Paulu norĩ Barnabéhé me hã bâtâ ahâ na ma tô aimasisi zahuré, Iconiu ãma hã. Pahi ãna te Wanhib'apito Zezusi hã dama wasu'u wẽ zahuré. Wanhib'apito hã, Paulu norĩ ma, iwaihu'u pe hã ma tô tãma sõmri zahuré, marĩ dama i'manharĩ waihu'u'õ hã te te 're a'manharĩ zahuré mono da, da te waihu'u za'ra da, te te 're irowasu'u zahuré mono zé, tô sena uptabi na. 4Tane nherẽ, 'ri nho'õmo 'remhã ma tô dasima aipo'o ni. Ni'wam norĩ hã Zudeu norĩ niwĩ duré ni'wam norĩ hã Zezusihi zadawa wasu'u'wa norĩ niwĩ.
5Tawamhã zudeu'õ norĩ duré Zudeu norĩ hã tinhib'apito norĩ me ma tô ãma sisaze za'ra, Paulu norĩ ma, te te rob'manharĩ wasété za'ra da, duré ẽtẽ na te te siwi pãrĩ da. 6Ãne hã te te sina waihu'u zahuré wamhã, ma tô dawi aimani zahuré, Licaonia na ti'a nho'õmo nhisi u, 'ri wa'õno Listra u duré Dérbi u duré isababa daro isimasa mono u. 7Tame ma tô rowasu'u zahuré dama, Rowasu'uwẽ na.
Paulu norĩ hã Listra ãma duré Derbi ãma te te iromhuri zahuré zé
8Tawamhã Listra ãma hã aibâ te 're hâimana, ti'a 're isãmra u'âsi mono hã, ipotozém hawim haré imorĩ'õ. Para'õtõ uwa zahuré wa, niwamhã morĩ õ di. 9Ta hã aibâ hã ma tô wapa, Paulu te te dama rowasu'u ré hã. Tawamhã Paulu ma tô 'madâ'â pese. Ma tô 'madâ'â waihu'u, aibâ ma, 'Re ihâimana u'âsi mono te te sina i'umnhasizé tãma ihâimana na, ipesezéb da hã. 10Tahawa, mreme 'rãihâ na te tãma tinha, ãne:
— Aiwahutu! Hâiwi asa na, aipara na!
Tahawa aibâ hã ma tô hâimo sime. Timorĩ na ma tô oto sãna'rata. 11Tawamhã Paulu hã te te i'manharĩzé, da te dasiwi 'madâ'â wamhã, ma tô 're idamreme zusi mono zém na tahãsi ni, dahârâ 'rãihâ na ãne:
— Ihâiba'õ norĩ hã ma tô wei watẽme si'ra zahuré, a'uwẽ hâiba na.
12Tawamhã Barnabé hã ma tô siwi sisi, Zupite na. Duré Paulu hã Mercuriu#14.12 Romanu norĩ nhimizaze na hã Zupite hã ihâiba'õ norĩ nhib'ihâ'a, duré Mercuriu hã ihâiba'õ norĩ mreme 'wapéi'wa. na ma tô siwi sisi. E marĩ wa. Paulu hã te te dama rowasu'u wa. 13Zupite te hã 'ri ãma 're idawata za'ra mono zé hã 'ri nho'õmo 'wawi wa'ra 'ridawa 'rata rowi niwĩ te za. Sasedoti, Zupite ãma 're idawata za'ra mono zéb ãma romhuri'wa hã ma tô ãwisi za'ra powawẽ iba'õmo norĩ hã duré romnhirãrã na danho'rebzu hã, 'ri nho'õmo 'wawi wa'ra 'ridawa u hã. Ta hã a'uwẽ norĩ hã ma tô duré sima wẽ za'ra, powawẽ hã danhoprubzém na da te tãma zata za'ra da, Paulu norĩ ma, ihâiba'õ zahuré newa. 14Tawamhã Paulu norĩ, ãne hã te te waihu'u zahuré wamhã, ti'uza ma tô hâiwazu zahuré. Wara sina ma tô dawa'wa u asamro. Hârâ 'rãihâ na ma tô da'mahârâ zahuré, ãne:
15— Aibâ norĩ, e marĩ da, te ãne hã asiwi i'manharĩ 'wa. Wa norĩ hã ti'ai ãma a'uwẽ, asine za'ra wa'aba hã. Rowasu'uwẽ hã wa te aima wasu'u za'ra wa'aba da, wa ãmemhã wahâimana ni, ãne hã aihâimanazé, rẽme za'ra wa'aba da, marĩ dai õ hã. 'Re ihâimana u'âsi mono u aipizari za'ra wa'aba, hâiwa 'manharĩ'wai u, ti'a, â poré duré uburé marĩ iwa 're ihâimana za'ra mono te te i'apoto mono u. 16Duréihã 'Re ihâimana u'âsi mono hã ma tô rowairébé, dapoto mono 're idahâimana za'ra mono hã date bâdâdi na dasima iwẽ na 're danomro u'âsi mono da. 17Tane nherẽ, 'Re ihâimana u'âsi mono hã ma tô 're siwaihu'u u'âsi, marĩ iwẽ te te 're i'ab'manharĩ mono zém na hã. Õ hã tãi ma, te te 're rob'ru hâiwa hawimhã duré amnho hã 're i'rãi 'ré za'ra mono da hã bâdâ i'uwaibaba na. Õ hã te dasa hã te te aima 're sõmri za'ra wa'wa. Te duré aipẽ'ẽ 're, rowẽ isa'ẽne hã te te aima 're sõmri za'ra wa'wa.
18Tawamhã ãne hã te te dama rowasu'u zahuré nherẽ, pire di te te ida'anhowada zahuré da hã, abaze, da te simro tõ da hã ãma dawata zahuré da, Paulu norĩ ãma hã. 19Tawamhã nima norĩ Zudeu norĩ hã Ãtioquia hawi isihudu hã duré Iconiu hawib zama ma tô dawada'uri wasété za'ra, uburé sada danhib'ru za'ra da hã. Tahawa, ẽtẽ na ma tô dasiwi hâ ni, Paulu hã. Ma tô da te ãma robâdâ, 'ri ahâ nhiti, da te ãma rosa'rata za'ra wa, dâ'â newa. 20Tane nherẽ, isazei'wa norĩ hã te te siwi uirĩ wamhã, ma tô wahudu. Taha pari ma tô duré ãzé apâ, 'ri wa'õtõ u. Tawamhã awẽm na hã Paulu norĩ Barnabéhé me, ma tô oto Dérbi u tineb zahuré.
Paulu norĩ hã Ãtioquia u, apâ ineb zahuré zé
21Tame Derbi 'remhã ma tô Rowasu'uwẽ na dama rowahutu zahuré. Tawamhã da'ahâ na ma tô saze za'ra ni, Zezusihi nhirã zarina oto 're danomro mono da. Taha pari, ma tô apâ tineb zahuré, Listra u, Iconiu u duré Ãtioquia u hã. 22Isazei'wa norĩ hã ma tô te te 're apawaptob zahuré, robze na duré siptete sina ãma 're nomro mono da, 'Re ihâimana u'âsi mono te te sina 're i'umnhasi za'ra mono zém na hã, ãne:
— Tô i'ru zahi, marĩ iwasédé hã ahâ na da te wama 're i'manharĩ za'ra mono zéb zarina, wa te 're irobzépata za'ra mono da hã, 'Re ihâimana u'âsi mono da'ãma 're isib'a'uwẽ mono zéb u 're wanhisisi mono da. 23Isazei'wa norĩ hã siré 're isi'rã'õtõ zé mono na hã, ma tô te te apisutu zahuré, da'madâ'â'wa da hã. Ma tô te te 're rowaptẽrẽ zahuré. Sai ãna ma tô duré a'â 're hâimana zahuré. Wanhib'apito ma, ma tô isib'rata da'madâ'â'wa norĩ hã te te 're anhomri zahuré, marĩ iwasété wi te te 're a'madâ'â pese mono da, te te i'umnhasi za'ra hã.
24Tawamhã Pisidia na ti'a nhisi wa'waibaba, te te ro'rahâri zahuré wamhã, ma tô aimasisi zahuré Paulu norĩ hã, Pãfilia na ti'a nhisi u. 25Perze ãma, Zezusihi wasu'uwẽ na te te dama rowahutu zahuré parimhã, ma tô tineb zahuré, Atalia u. 26Atalia hawimhã ma tô apâ tineb zahuré rowa'u'u na uba're inem na, Ãtioquia u hã. Tame isazei'wa norĩ hã ma tô ãma zahuré 're mreme zusi, 'Re ihâimana u'âsi mono ma, te te 're 'madâ'â pese zahuré mono da, duré te te 're pawaptob u'âsi zahuré mono da. 27Tawamhã Ãtioquia u apâ simasisi zahuré wamhã, isazei'wa norĩ hã ma tô 'rã'õtõ zahuré. Ma tô uburé tãma rowasu'u pese za'ra, 'Re ihâimana u'âsi mono uburé marĩ te te i'a'manharĩ mono zé hã ihâiba na zahuré. Ma tô duré wasu'u zahuré, 'ridawa te te i'ridawa na hã zudeu'õ norĩ zama te te saze za'ra da hã.
28Tame ma tô aimasisi hâ zahuré, Zezusihi nhirã zarina 're inomro mono norĩ 'ratamhã.
Iliyochaguliwa sasa
Atus 14: xavBP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2011, Wycliffe Bible Translators, Inc.
