Atus 12
12
Pedru hã dazazém hawi 'Re ihâimana u'âsi mono te te isõ'reptuzé
1Taha wahub 'remhã apito Erodi hã, nima norĩ isazei'wa hã ma tô sé dazazéb 're, te te sima wẽ wa, te te tãma rob'manharĩ wasété za'ra da. 2Tahawa ma tô ti'ru, Tiagu hã da te wĩrĩ da, sib'ézé 'wapa na Zuwãhã dub'rada hã. 3Ãne hã Zudeu norĩ ma, te te irowẽ na te te 'madâ'â wamhã, ma tô duré ti'ru, Pedruhu zama dazazéb 're, da te sẽrẽ da. Ãne hã i'u'ẽtẽ wapu mapu'õ na dasa da te 're ihuri mono zé bâdâ hâimana mono ré, ma tô tiromhâiba. 4Tawamhã Pedru hã dazazéb 're, te te sẽrẽ parimhã, Erodi hã ma tô sõré dasi'wapéi 'manharĩ'wa norĩ maparane si'uiwa na iwa'õtõ na, siwa'rãmi te te nasi siwi i'madâ'â da hã, maparane si'uiwa na dasi'wapéi 'manharĩ'wa hâiba na iwa'õtõ mono bâ. Erodi hã ma tô sima wẽ, Pedruhu ãma danho'a te te rowairébé da. Tane nherẽ, Pascoa na dato nhisi parip si da. 5Ãne wa, Pedru hã ma tô siwi tété dazazéb 're, dasi'wapéi 'manharĩ'wa norĩ hã. Tane nherẽ, isazei'wa norĩ hã ma tô ãma rowaptẽrẽ u'âsi za'ra.
6Tawamhã ahâmhâ na, za oto awẽm na Erodi hã da'ahâ nho'a te te ãma irowairébézéb u, Pedru hã te nhono, para wasisi ré isi'uwazi nhorõ rutu na, maparane dasi'wapéi 'manharĩ'wa norĩ wa'wa. Dasi'wapéi 'manharĩ'wa norĩ hã te duré rob'madâ'â za'ra, dazazéb u dazasizé 'ridawa za'ẽtẽ ãma hã. 7Tawamhã waptu na rosa'rese õ ré, ma tô hâiwa hawi Uburé Danhib'apito ma romhuri'wa hã sihâi'ré. Duré ma tô rowa'a, dazazé 'ri 're wa'wa ãma. Hâiwa hawi romhuri'wa hã Pedru ma tô upi, isisé ãma. Ma tô duré utu. Ãne ma tô tãma tinha:
— Waptu na aiwahutu!
Tawamhã, ipawasisizé hã ma tô tiwaptã'ã zahuré, isib'rata hawimhã.
8Tawamhã hâiwa hawi romhuri'wa hã te tãma tinha, ãne:
— Asi'uza na duré asipara uza na!
Tahawa Pedru hã ma tô 'manha, hâiwa hawi romhuri'wa hã te te i'ruzéb zarina. Te duré tãma ti'ru, ãne:
— Ai'uza ihâpa hã asima sẽrẽ! Taha parimhã ĩzarina we aimorĩ!
9Tawamhã Pedru hã ma tô watobro, dazazé 'ri're wa'wa hawimhã. Hâiwa hawi romhuri'wa zarina ma tô mo. Tane nherẽ, te te waihu'u õ di, hâiwa hawi romhuri'wa te te isõ'reptu na hã. Ma tô rosa'rata, sõtõ 'rowim newa uburé marĩ hã. 10Tawamhã 'ridawa 'madâ'â'wa imorĩ'rada duré maparane ãma hã ma tô sa're zahuré. Taha pari ma tô aimasisi, isi'uwazi na 'ridawa nhitobzé 'ri nhi'riti u dapusizéb u hã. 'Ridawa za'ẽne hã si'uihâ na ma tô si'ridawa. Tawamhã ma tô rob u tipusi zahuré. 'Ri nhi'riti na te tineb zahuré, misi inomro na. Tane nherẽ, waptu na sa'rese ãna ma tô hâiwa hawi romhuri'wa hã oto aimani. 11Tawamhã Pedru hã ma tô oto po're puru, iromhâimanazém na hã. Ãne ma tô tinha:
— Ãhã na hã wa tô oto waihu'u, ĩsiwawãi ãna. Uburé Danhib'apito hã ma tô nare we satõ, tite hâiwa hawi romhuri'wa hã. Ta hã ma tô ĩwaze, Erodihi nhib'rata ĩhâimana nherẽ, duré uburé Zudeu norĩ hã uburé marĩ ĩzô iwatobrozéb zô isimipari za'ra wi.
12Tãma iromhâimanazé hã Pedru te te waihu'u wamhã, ma tô mo, Mariaha nhorõwa u. Ta hã Zuwã Marcusihi na. Tamemhã da'ahâ na ma tô tasi'rã'õtõ ni, da te ãma rowaptẽrẽ za'ra da hã. 13Tawamhã Pedru hã ma tô 'ridawa ta'a, 'ri nho're niwĩmhã. Tahawa romhuri'wa pi'õ Rodi na isisi hã ma tô mo, te te robzabu da. 14Tawamhã Pedruhu mreme te te waihu'u wamhã, tãma rowẽ uptabi di. Apâ ma tô wara, te te 'ridawa ãna 'ridawa hã. Ma tô tãma wasu'u za'ra, ãne:
— Pedru hã rowi te za!
15Tane nherẽ, te pi'õi ma nharĩ za'ra, ãne:
— Mare di. Ma ai'rãsiwamna!
Tane nherẽ, sadahutu ãna te tãma wasu'u za'ra, tô sena Pedru isam na hã.
Tahawa te ãne tãma nharĩ za'ra, ãne:
— Ãté ite hâiwa hawi romhuri'wa!
16Taha ré hã, Pedru te nasi 'ridawa ta'a. Ma tô oto sô 'ridawa za'ra. Te te siwi 'madâ'â wamhã, ma tô ãma titob'uzu pese za'ra. 17Tawamhã tinhib'rata na ma tô tãma 'manharĩ za'ra, ari'iwi simasab da. Taha pari, ma tô tãma siwasu'u za'ra, Uburé Danhib'apito dazazém hawi te te iwazerezém na hã, ãne:
— Ã hã ĩma iromhâimanazé hã Tiaguhu ma, rowasu'u za'ra wa'aba za duré wasisãnawã norĩ isiré isazei'wa norĩ ma zama.
Taha pari, ma tô watobro. Ma tô mo nimomo.
18Tawamhã awẽ wamhã, dasi'wapéi 'manharĩ'wa norĩ hã ma tô 're siwairõtõ, te te siwi waihu'u õ wa, Pedruhu ma iromhâimanazé hã. 19Tawamhã Erodi hã ma tô ti'ru, sô rĩtĩ za'ra da. Tane nherẽ, te te siwi sõpẽtẽ õ di. Tawamhã 'ridawa 'madâ'â'wa norĩ te te sadanharĩ za'ra parimhã, ma tô 'ru za'ra, da te simro da.
Apito Erodi idâ'âzé
Taha pari apito Erodi hã ma tô mo, Zudéa hawi, Cézaréia u. Tame ma tô nhamra, niha bâtâ na.
20Tawamhã Apito Erodi hã sahi uptabi di, 'ri wa'õno Tiru ãma 're isi'ubumroi mono norĩ zada hã duré Sidõ ãmam norĩ zada zama. Tahawa ta norĩ hã ma tô si'rã'õtõ. Taha pari ma tô ai'aba'ré Erodihi u, te te tãma robzanhamri za'ra da. Imorĩ'rata na ma tô Blastuhu wi waptẽrẽ za'ra, te te sadawa upari za'ra da. Blastu hã apito nhimiromhurizé 'ri 'rãihâ 'remhã apito ma, i'umnha. Ãne hã te te ãma uwaimrami za'ra pari, Erodihi u ma tô oto aihutu, romharé na 're hâimana za'ra mono da, te te tiwi waptẽrẽ za'ra da, amnho hã tãma 're isihutu mono hã apito nhipti'ai hawi wa. 21Tawamhã bâtâ pisutu ãma, Erodi hã ma tô si'uza apito norĩ uza na. Tinhamrazém na ma tô nhamra. Timreme na ma tô duré sãna'rata. 22Ãne ma tô nasi tahãsi ni, mreme mono ré hã:
— Ã hã ihâiba'õi mreme. Aibâ mreme õ di, imreme hã.
23Tawamhã waptu na awa'awi pesere ma tô hâiwa hawi Uburé Danhib'apito ma romhuri'wa hã azâ, hâzé da, 'Re ihâimana u'âsi mono ãma si wata õ wa. Tahawa isãna wai'u hã ma tô siwi ti'rẽ. Ta hã ma tô tiwĩ.
24Tawamhã 'Re ihâimana u'âsi mono zadawa wasu'u hã ma tô sa'ẽtẽ u'âsi. Te duré te te ropéi u'âsi.
Barnabé norĩ hã Saruhu me, Ãtioquia u apâ inebzé
25Tawamhã Barnabé norĩ Sauluhu me romhuri hã te te 'rãsutu zahuré pari, ma tô apâ tineb zahuré Ãtioquia u, Zeruzalẽ hawi. Zuwã Marcus hã ma tô siré saprõni zahuré.
Iliyochaguliwa sasa
Atus 12: xavBP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2011, Wycliffe Bible Translators, Inc.
