تكوين 16
16
والودة إِسْمَاعِيل
1وَ سَارَايْ مَرِةْ أَبْرَامْ مَا وِلْدَتْ لَيَّهْ. وَ عِنْدَهَا خَادِمْ مَصْرِيَّةْ أُسُمْهَا هَاجَرْ. 2وَ سَارَايْ قَالَتْ لِأَبْرَامْ رَاجِلْهَا: «دَاهُو اللّٰهْ دَحَرَانِي الْوَالُودَةْ. شِيلْ خَادْمِي دِي. أَكُونْ اللّٰهْ يَنْطِينِي مِنْهَا عِيَالْ.» وَ أَبْرَامْ قَصَّدْ بِكَلَامْ مَرْتَهْ. 3وَ دَا بَعَدْ هُمَّنْ سَكَنَوْا عَشَرَةْ سَنَةْ فِي بَلَدْ كَنْعَانْ. وَ خَلَاصْ، سَارَايْ مَرِةْ أَبْرَامْ دَفَعَتْ خَادِمْهَا هَاجَرْ الْمَصْرِيَّةْ لِأَبْرَامْ رَاجِلْهَا أَشَانْ تَبْقَى لَيَّهْ مَرَةْ. 4وَ أَبْرَامْ دَخَلْ فَوْقهَا وَ هِي بِقَتْ غَلْبَانَةْ.
وَكِتْ عِرْفَتْ نَفِسْهَا هِي غَلْبَانَةْ، بَدَتْ تَحْقِرْ سِتَّهَا. 5وَ سَارَايْ قَالَتْ لِأَبْرَامْ: «الْحُقْرَةْ الْهَاجَرْ قَاعِدَةْ تِسَوِّيهَا لَيِّ دِي، مِنَّكْ إِنْتَ! أَشَانْ أَنَا بَسْ أَنْطَيْتَكْ خَادْمِي وَ هَسَّعْ مِنْ هِي عِرْفَتْ كَدَرْ هِي غَلْبَانَةْ، قَمَّتْ تَحْقِرْنِي! وَ أَنَا خَلَّيْتَكْ مَعَ اللّٰهْ!» 6وَ أَبْرَامْ قَالْ لَيْهَا: «دِي هِي خَادِمْكِ. هِي قَاعِدَةْ تِحِتْكِ. سَوِّي فَوْقهَا أَيِّ شَيّءْ التِّدَوْرِيهْ.» وَ خَلَاصْ، سَارَايْ بَدَتْ تِتَعِّبْهَا. وَ هَاجَرْ قَمَّتْ عَرَّدَتْ مِنْهَا.
7وَ بَعَدْ دَا، مَلَكْ اللّٰهْ لِقَاهَا لِهَاجَرْ قَرِيبْ لِعَيْن أَلْمِي الْفِي الصَّحَرَاءْ فِي الدَّرِبْ الْمَاشِي عَلَيْ بَلَدْ شُورْ. 8وَ قَالْ لَيْهَا: «يَا هَاجَرْ خَادِمْ سَارَايْ! جَايَةْ مِنْ وَيْن وَ مَاشَةْ وَيْن؟» وَ هِي قَالَتْ: «أَنَا مُعَرِّدَةْ بَعِيدْ مِنْ سِتِّي سَارَايْ!»
9وَ مَلَكْ اللّٰهْ قَالْ لَيْهَا: «قَبِّلِي لِسِتِّكِ وَ كَرِّمِيهَا.» 10وَ قَالْ لَيْهَا بَتَّانْ: «اللّٰهْ يَنْطِيكِ ذُرِّيَّةْ مِنْ الْكَتَرَةْ مَا تِنْحَسِبْ. 11دَاهُو إِنْتِ غَلْبَانَةْ وَ تَلْدَيْ وِلَيْد وَ تِسَمِّيهْ إِسْمَاعِيلْ (مَعَنَاتَهْ اللّٰهْ يَسْمَعْ) أَشَانْ اللّٰهْ سِمِعْ بِتَعَبْكِ. 12وَ وِلَيْدكِ يِعِيشْ وِحَيْدَهْ مِثِلْ حُمَارْ الْكَدَادَةْ النَّادُمْ مَا يَقْدَرْ يِضَلِّلَهْ. وَ يَبْقَى ضِدّ كُلَّ النَّاسْ وَ كُلَّ النَّاسْ يَبْقَوْا ضِدَّهْ. وَ يَبْقَى ضِدّ أَخْوَانَهْ كُلُّهُمْ.»
13وَ هَاجَرْ قَالَتْ فِي نَفِسْهَا: «عَجَبْ! صَحِيحْ كَيْ! أَنَا شِفْت اللّٰهْ الْقَاعِدْ يِشِيفْنِي وَ لِسَّاعْنِي قَاعِدَةْ حَيَّةْ وَلَّا؟» وَ هِي سَمَّتْ اللّٰهْ الْحَجَّى لَيْهَا بِالْأُسُمْ إِنْتَ الْإِلٰـهْ الْقَاعِدْ تِشِيفْنِي. 14أَشَانْ دَا بَسْ، الْبِيرْ الْقَاعِدَةْ أَمْبَيْن حِلَّةْ قَادِشْ وَ حِلَّةْ بَارَدْ دِي، سَمَّوْهَا بِيرْ اللّٰهْ الْحَيّ الْقَاعِدْ يِشِيفْنِي.
15وَ بَعَدْ دَا، هَاجَرْ وِلْدَتْ لِأَبْرَامْ وِلَيْد. وَ أَبُوهْ أَبْرَامْ سَمَّاهْ إِسْمَاعِيلْ. 16وَ أَبْرَامْ عِنْدَهْ 86 سَنَةْ وَكِتْ هَاجَرْ وِلْدَتْ لَيَّهْ إِسْمَاعِيلْ.
Iliyochaguliwa sasa
تكوين 16: ع.د.ت19
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
La Bible en arabe tchadien © Alliance biblique du Tchad, 2019