MALAKO 5
5
Yesu aheledjai moto ɔdaka na miembo mibe
(Hokea koko Mat 8, 28-34; Luk 8, 26-39)
1Yesu na batingami ba nde baimei ta ngunda ekina ɛ ibeke inɛnɛ la Galilai, ta ekenge ɛ mokpɔtɔ ma ba Gelasenia. 2Oko idubua la Yesu ta bwato, moto omɔti aimani ta makila ko adoa asaka na nde. Moto ona apeamaka na mwembo mobe. 3Odie ba nde badaka ta makila, ko pɛpɛ moto omɔti ɔhɔnɔkɔ omonanga, noko na monyɔɔlɔ; 4mbala djike, bamoisaka bibende ta mako na minyɔɔlɔ ta mabɔ, endolo atswaka minyɔɔlɔ ko abukaka bibende. Pɛpɛ moto ɔdaka na ngulu ɛ omoika. 5Bihole bisusu, bulu na moi, adaka oko alebalebe ta makila na ta diko la makoli, apeli agame ko ena asabenedjae yo mɛɛnɛ na ndeke. 6Ehole ɛ enɛ yo Yesu ohali; apeta ebango, akwa magunda boso ba nde, 7ko agama na ngulu boo: «Ma wɛ na mbai nda, Yesu, Mwana ɔ Ndjambe Onɔi Diko? Naongɔɔni na ingbangba ta kombe ɛ Ndjambe, pɛpɛ otungeani oko!» 8– Tin'ɛ Yesu abala na nde boo: «Mwembo mobe, imana odii moto hoo!» 9Yesu amohɔdja boo: «Kombe ɛ wɛ nda?» Asɔmbɛdja boo: «Kombe ɛ mbai edii “Bike”, tina ɛ boo lodii iso bike.» 10Ko amongɔɔnɔ na ingbangba boo atabaloma osokolu ɛ ngando. 11Na bea bwela bonɛnɛ ba ngulu badaka ena, mbuti na ngomba, bahomba mia ma oya. 12Miembo mibe maongɔɔnɔ Yesu boo: «Loloma otei ba ngulu, lokina laingee odi bo!» 13Yesu abapa enɔli. Na bea miembo mibe maimana odii moto ona ko maingia odii ngulu. Bwela ba ngulu bosusu – mbuti na ngulu koto ibae – bahilingoana ta mokpukulu ma ngomba basasopa ta ibeke inɛnɛ ko badinda. 14Babaneli ba ngulu batia ko bakɛɛ ananganedja gala ta ibonga na ta bimbangu. Bato badoa aenɛ moda manɔɔ modjɔ mua. 15Baimea mbuti na Yesu ko baenɛ moto ona ɔdaka na miembo mibe mike: adii na manɔkɔ, alwali bisendja ko yongi ɛ nde esɔmbi. Ko badaa na bɔɔ. 16Bato ibaenɛ modjɔ mua moda manɔɔ mo babatɔndɔ moda mahela na moto ɔdaka na miembo mibe ko na isolo la bwela ba ngulu. 17Na bea babanga oongɔnɔ Yesu adonge ta ekenge ɛ bobo ɛ mokpɔtɔ. 18Ehole ɛtitea Yesu ta bwato, moto ona ɔdaka na miembo mibe aongɔɔnɔ Yesu boo adikame odii yo. 19Yesu aidhima boo akɛɛ nɔbɔ nde, endolo abala na nde boo: «Sɔmbɔ odii wɛ, ta ibota la wɛ, ko batɔndɔ midjɔ misusu diko la opele bokomɛi Kumu ko na moda mookei yo ndjokwa.» 20Moomi ona asɔmbɔ ko abanga otɔndɔ ta mabonga doomi midjɔ misusu makɔɔ Yesu tina ɛ nde; ko bato basusu ibamooka baluma na okamoa.
Mwana mwali ɔ Yailo na mwali ɔbinga esendja ɛ Yesu
(Hokea koko Mat 9, 18-26; Luk 8, 40-56)
21Yesu asɔmbɔ na bwato ta dɔngɔ ikina la ibeke inɛnɛ, ko bato bike babolama mbuti na nde. Adaka ta ekulu ɛ ibeke inɛnɛ. 22Omɔti ɔ bakumu ba ndako ɛ miɔngɔnɔ ɛ Bayuda, adoa. Kombe ɛnde Yailo. Aeni Yesu, akwi na magunda ta mako ma nde. 23Ko amoongɔɔnɔ na ingbangba boo: «Mwana ɔ mbai mwali adii mbuti na ogwa, dua ta mobakee mabɔ bɛngɛ boo epeko ɛsie ko adae na mohelo!» 24Yesu akɛɛ na nde engbanga emɔti. Bato bike bamokimana ko bamombambamedja mɔɔngɔ masusu.
25Na bea mwali omɔti adaka ena, ona ɔimanaka makia mbua doomi na babae. 26Aenɛ minganga bike, salo ɛbobo ɛimoheledja; abeedja odiheli ba nde bosusu, pɛpɛ ohela; endolo ego engalaka oko ongala. 27Mwali ona aoka moda mabalaka bo tin'ɛ Yesu. Adoa ta ndanda ɛ bato bike, sangɔngɔ dja nde, ko abinga esendja ɛnde. 28Tinɛ asabaleaka boo: «Nakabinga noko bisendja ba nde, nahelalea.» 29Oko ena ambuku, makia makina oimana ko asaoka bo aheli ta epeko ɛ nde. 30Yesu aoka oko ta ehole ena, boo ngulu emɔti eimani ta tei ɛ nde. Ahombana ta ndanda ɛ bato bia bike ko ahɔdja boo: «Obingi bisendja ba mbai nda?» 31Batingami na nde bamosɔmbɛdja boo: «Oenɛkɛ bato bike baombambamedjai mɔɔngɔ masusu, ko ɔhɔdjaka boo: “Obingini ndani?”» 32Endolo Yesu ahokea mbuti na nde tina ɛ odjeba ona okɔi modjɔ mua. 33Mwali angongoma na bɔɔ tinɛ adjeba modjɔ mokɔɔmi odii yo; adoa asadumba ta mako ma Yesu ko amotɔndɔ sooti esusu. 34Yesu abala na nde boo: «Mwana ɔ mbai mwali, odhima ba wɛ booheledjai. Kɛɛ na ogoo ko hela na ego ɛ wɛ.»
35Oko ena ɔdaka Yesu abala bea, bato ba ndako ɛ kumu ɔ ndako ɛ miongɔnɔ ɛ Bayuda baimea ko babala na nde boo: «Mwana ɔ wɛ mwali agwi. Tina ɛ otungea koko Molehi nda?» 36Endolo Yesu aibakea molema ta mibalo ma bobo ko abala na kumu ɔ ndako ɛ miɔngɔnɔ ɛ Bayuda boo: «Pɛpɛ obanga, dhima oko odhima.» 37Yesu aipa enɔli odi moto omɔti bo akɛɛ na nde, dongedja oko Piɛlɛ, Djake na mwanango Yoani. 38Baimea ta ndako ɛ kumu ɔ ndako ɛ miongɔnɔ ɛ Bayuda, oho Yesu atanea bato na moyeke monɛnɛ, bayea ko bagama na ngulu. 39Aingea ta ndako ko abala na bu boo: «Tin'ɛ moyeke mu mosusu ko na bie bii nda? Mwana agwiti, ahwɛli hiɔ.» 40Endolo bamosɛkɛ. Bea aimanedja bato basusu osokolu, atomba oko sango, nango na batingami basato, ko aingea ta ekenge ɛ ndako ɛ mwana. 41Apea ebɔ ɛ mwana ko abala na nde boo: «Talita kumi!» Etingodjai boo: «Yɛngɛ mwali, nabali na wɛ, emaa!»
42Na mbala emɔti mwana mwali aema ko abandi odala – tin'ɛ boo adaka na mbua doomi na babae. Ena ambuku, bato basusu badaa na okamoa bonɛnɛ. 43Endolo Yesu abatuba matoi boo batatɔndɔɔ bato modjɔ mua; bea abala na bu boo: «Mopani mia ma oya.»
Iliyochaguliwa sasa
MALAKO 5: ngc
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
©2025 Communauté des Eglises Travaillistes (CET)
