MATIE 8
8
Yesu aheledjai moto ɔ mabha
(Hokea koko Mal 1, 40-45; Luk 5, 12-16)
1Ehole ɛtita Yesu ta ngomba, emumu ɛ bato ɛmokimana. 2Moto omɔti ɔ mabha asabatea ko akwa magunda boso ba nde ko abala boo: «Molehi, okapala, sɛnɔdjani.» 3Yesu aninodja ebɔ, amopea ko abala boo: «Napali ɛdae bea, sɛnɔdjama!» Ambuku, asɛnɔdjama na mabha ma nde. 4Ko Yesu abala na nde boo: «Hokamedja opele: pɛpɛ otɔndɔɔ moto omɔti modjɔ mu. Endolo kɛɛ asaenɛmɛdjae odii nganga ɔ Ndjambe, ko pa epeeli okimana na mobeko ma Mose, bɛngɛ edae tati ta miiso ma bobo boo oheli.»
Yesu aheledjai mosali ɔ kumu ɔ basoda
(Hokea koko Luk 7, 1-10; Yoa 5, 12-16)
5Ehole ɛingea Yesu ta Kapalanauma, kumu omɔti ɔ basoda adoa odii yo ko amohɔdja boo amokɔmɛdjae. 6«Kumu, mosali ɔ mbai asambi ta ndako, atahɔnɔko odala ko adii na epeko epipo.» 7Yesu amosɔmbɛdja boo: «Nadoake amoheledja.» 8Endolo kumu ɔ basoda asɔmbɛdja boo: «Kumu, naboaniti boo naosɛ ta ndako ɛ mbai. Endolo bala etoko kɔpɛ emɔti ko mosali ɔ mbai ahelalea. 9Tina ɛ boo mbai mɛɛnɛ nadii nase dja bakumu ibanoini ko nadii na basoda ibadi nase dja okumu ba mbai. Nakabala na omɔti boo: “kɛɛ!”, akakɛɛ, nakabala na okina boo: “dua!”, akadoe; ko nakabala na mobuli ɔ mbai boo: “kɔɔ boo”, akakɔe.» 10Ehole ɛoka Yesu bibaeli bia, akamoa obuke ko abala na bato ibamokimanaka boo: «Nabalaka na nu, sooti, mɛɛnɛ boo: napakita tanea moto ɔ odhima moda mu ta Isalɛlɛ. 11Nabalaka na nu, bike badongabi ta dɔngɔ likaimane diiso la busa na dɔngɔ likatite diiso la busa ko badabi ta mesa ɛ Okumu ba Ndjambe engbanga na Abalayama, Isaka na Yakobo. 12Endolo bato ibaboanaka osangoa Okumu badumbamabi osokolu, ta modidi, ehoo bayeabi ko bakpɛkɛɛnɛbi miino.»
13Bea Yesu abala na kumu ɔ basoda boo: «Sɔmbɔ ta ndako ɛ wɛ, yɛɛ ekɔɔme okimana na odhima ba wɛ!» Ko mosali ɔ kumu ɔ basoda ahela oko ta ehole ena.
Yesu aheledjai bato bike ba bipeko
(Hokea koko Mal 1, 29-34; Luk 4, 38-41)
14Ngɔngɔ djia Yesu akɛɛ ta ndako ɛ Piɛlɛ. Atanea okio ba Piɛlɛ asambi: tina ɛ boo adaka na mokuku mosa. 15Yesu amopea ta ebɔ ko mokuku mosa masia, bea aɛma ko amobɔngedja mia ma oya.
16Ehole ɛimea mɔkɔmɔkɔ, badua odii Yesu na bato ba miembo mibe bike. Abengana miembo mibe na ebaeli ɛ nde ko aheledja bato basusu ba bipeko. 17Ɛkɔɔmɔ bea bɛngɛ boo bibaeli babala motɛli Isaya bakokedjame: «Atomba bigo ba booso ko aloheledja na bipeko ba booso.»
Ibapalaka okimana Yesu
(Hokea koko Luk 9, 57-62)
18Ehole ɛenɛ Yesu emumu ɛ bato emohiki, abala na batingami ba nde boo bakatise ta dɔngɔ ikina la dua. 19Moto ɔ edjebeli ɛ mobeko abatama ko abala na nde boo: «Molehi, naokimanalea ngise susu idjikɛbi wɛ.» 20Yesu amosɔmbɛdja boo: «Bibanga badii na mikpo ma obolama ko mbulu badii na meepu, endolo Mwana ɔ moto aditi na esika ɛ osambea molo ma nde.»
21Moto okina ta ndanda ɛ batingami ba nde, abala na nde boo: «Kumu, pani ndjia nakɛɛ boso apusea tata.» 22Endolo Yesu amosɔmbedja boo: «Kimanani ko kina bato bago basapusee ibo mɛɛnɛ.»
Yesu asii lungu
(Hokea koko Mal 4, 35-41; Luk 8, 22-25)
23Yesu atitea ta bwato ko batingami ba nde bamokimana. 24Mbala emɔti, lungu epipo ɛkwa ta ibeke inɛnɛ ko mula masamaka ta bwato. Ta ehole ena Yesu adaka ahwɛli hiɔ. 25Batingami basabatea na nde ko bamongɔdjaa ena bagama boo: «Kumu, loheledja! Logwalea!» 26Yesu abala na bu boo: bato ba edhimeli ekɛkɛ, tina ebangaka no nda? Bea aemaa, agamea lungu na mula ko ogoo bonɛnɛ basɔmbɔ. 27Ibo basusu bakamoa ko basabaleana boo: «Moto hoo adii moda nda bɛngɛ boo noko na lungu na mula la mosume?»
Yesu aheledjai bato babae ba miembo mibe
(Hokea koko Mal 5, 1-20; Luk 8, 26-39)
28Ehole ɛimea yo ta dɔngɔ ikina la ibeke iinɛnɛ, ta ekenge ɛ mokpɔtɔ ɛ Gadala, bato babae ba miembo mibe baimana ta makila ko badoa asaka na Yesu. Badaka bato ba mondea mopipo ko bato babangaka onɔɔ ta ndjia ena. 29Babangaka ogama boo: «Mwana ɔ Ndjambe, modjɔ ma booso na wɛ nda? Odoi haa bɛngɛ olotungee boso ba ehole ɛbɔngɛdjama?»
30Bwela ba ngulu badaka bayaka maa ohali na esika ɛdaka bo. 31Miembo mibe maongɔɔnɔ Yesu boo: «Nga okapala ɔlobengane, loloma ta bwela buu ba ngulu.» 32Yesu abala na miembo mibe mia boo: «Imanani». Baimana odii bato bia babae ko bakɛɛ aingea odii ngulu. Bea bwela bosusu ba ngulu bahilingoana diko la ngomba mbunoko ta ibeke inɛnɛ ko bagwa ta madiba. 33Babanyeli ba ngulu batia, bakɛɛ ta ibonga atɔndɔɔ gala dja midjɔ misusu imanɔɔ ko imatanea bato bia babae ba miembo mibe. 34Bea bato basusu ba ibonga baimana bɛngɛ basake na Yesu; ehole ɛmoenɛ bo, bamoongɔɔnɔ boo adonge ta ekenge ɛ bobo ɛ mokpɔtɔ.
Iliyochaguliwa sasa
MATIE 8: ngc
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
©2025 Communauté des Eglises Travaillistes (CET)
