MATIE 25
25
Indjɛ la baseka doomi
1«Okumu ba busa bokoanabi na baseka doomi ibatomba miinda ma bobo ko bakɛɛ asaka na moomi ɔ moki. 2Ta ndanda ɛ bobo batano badaka bindanga ko batano badaka ba owɛi. 3Baseka ba ondanga batomba oko miinda ngasa endolo baitomba munɛ. 4Endolo bii ba owɛi batomba miinda ma bobo na munɛ ta biiseli. 5Ena ɔnɛngɛdja moomi ɔ moki pɛpɛ oimea; baseka bia basusu baoka hiɔ ko bahwɛɛ. 6Ta ndanda ɛ bulu, moholi momɔti maokama boo: “Moomi ɔ moki ahuli! Kɛɛ asakeni na nde!” 7Baseka basusu baongɔɔ ko babɔngɛdja miinda ma bobo. 8Bindanga babala na bii ba owɛi boo: “Lopani maa ekenge ɔ munɛ ma boono, tina ɛ boo miinda ma booso mahombaka madimee.” 9Endolo baseka ba owɛi basɔmbɛdja boo: “Ngasa, tina ɛ boo motakoka noko osinɛɛ tina ɛ booso na nu. Kɛɛ asombeni ma boono pɛpɛlɛ odii batɛki.” 10Ta ehole ɛkɛɛ bo asomba munɛ, moomi ɔ moki aimia. Baseka ibasabɔngɛdja baingea engbanga na moomi ta ndako ɛ tɛkɛ ko badipa edipako na mongbandi. 11Ngɔngɔ djia, baseka bakina baimea ko babala boo: “Kumu, kumu, lodipoa!” 12Endolo moomi ɔ moki abasɔmbɛdja boo: “Nabalaka na nu, sooti boo: nataodjebakani.” 13Bea Yesu abala boo: sɛndjɛlɛni tina ɛ otadjebakani na iswi, na ehole.»
Indjɛ la taleta
(Hokea koko Luk 19, 12-27)
14Edabi koko elɛngɛɛ moto omɔti ona ɔdaka mbuti na okɛ mwɛngo: abea basali ba nde ko abapa leka la nde. 15Apa odii mosali ɔ boso taleta itano, odii mosali ɔ babae taleta ibae, ko mosali ɔ basato taleta emɔti: abapa okimana na ngulu ɛ moto na moto ko akɛɛ ta mwɛngɔ. 16Ambuku ona ɔosɔ taleta itano adjisa ta mombongu ko adiha taleta ikina itano odiko. 17Mosali ona ɔosɔ taleta ibae akɔɔ oko moda momɔti ko abakea taleta ikina ibae. 18Endolo ona ɔosɔ taleta emɔti alongea mombɔndɔ ta kpɔtɔ ko abomba ikondja la kumu ɔ nde.
19«Ngɔngɔ dja maswi mike, kumu ɔ basali bia ahula ko abahɔdja moda makɔɔ bo na odiheli ba nde. 20Mosali ona ɔosɔ taleta itano adoa na taleta ikina itano ko abala boo: “Kumu, ɔpani taleta itano. Hokea, nabakei ikina itano”. 21Kumu abala na nde boo: “Opele, mosali mopele ko ɔ sooti. Tina ɛ boo odaki na osooti ta leka lokɛkɛ, naopalea mandi ma obanyea leka luke. Doa asepe engbanga na kumu ɔ wɛ”. 22Mosali ona ɔosɔ taleta ibae adoa ko abala boo: “Kumu, ɔpani taleta ibae, hokea, nabakei ikina taleta ibae.” 23Kumu amosɔmbɛdja boo: “Opele, odii mosali mopele ko ɔ sooti. Tina ɛ boo odaki na osooti ta leka lokɛkɛ, naopalea mandi ma obanyea leka luke. Doa asepe engbanga na kumu ɔ wɛ.” 24Bea mosali ona ɔosɔ taleta emɔti adoa ngɔngɔ ko abala boo: “Kumu, nadjebaka boo odii moto ɔmongangale: okabuke mbuma ta gue ɛdaa wɛ pɛpɛ oona ko okatute mbuma ta esika ɛdaa wɛ pɛpɛ omɛsɛ kona. 25Nadaa na bɔɔ ko nakɛɛ abomba taleta ɛ wɛ ta kpɔtɔ. Hokea taleta ɛ wɛ iyeye.” 26Kumu ɔ nde amosɔmbɛdja boo: “Mosali mobe, mohete! Ɔdjebaka boo nakabuke mbuma ta gue edii mbai pɛpɛ oona, ko nakatute mbuma ta esika edii mbai pɛpɛ omɛsɛ kona, 27tina ndani, oisa taleta ɛ mbai odii bato ibakabombe ikondja, ko ta ihule la mbai, nayetombe na tɛtɔ? 28Bea, mokatoani taleta ena ko yepani odii moto ona odii na taleta doomi. 29Tina ɛ boo moto ona odii na eka bamopalea onɔ ko aimealea na leka luke; endolo ona odii pɛpɛ eka, bamokatoalea noko ena edii na nde. 30Bea tina ɛ mosali mobe hoo, modumbani osokolu ta modidi, ta esika edabi bie na okpɛkɛnɛ mino.”»
Esambi ɛ suka
31«Ehole edoabi Mwana ɔ moto ta ekumu ɛ nde engbanga na babwɛndi ba nde basusu, adabi ta ngbɛndɛ ɛ nde ɛ ekumu. 32Bikomi bisusu ba ngondo biputoanabi boso ba nde ko abakaanabi mabondo mabae moda mokakaane mobanyeli ɔ bingbɛndɛ bhata na kambeli; 33adedjabi bhata ta ebɔ ɛ nde ɛ baami ko kambeli ta ebɔ ɛ nde ɛ bali. 34Bea Kumu abalabi na bato ibadabi ta ebɔ ɛ nde ɛ baami boo: “Doani, ino bato ibadjongoama na Tata, ingeani ta Okumu ibaboanedjama tina ɛ boono donga ibange la ngondo. 35Tina ɛ boo nadaka na ndja ko opanini mia ma oya; nadaka na posa ɛ madiba ko opanini madiba ma omwa; nadaka mokɛndɛli ko ɔosɔnini opele; 36nadaka mbundu ko olwɛdjanini bisendja; nadaka na epeko ko osaloanini; nadaka ta bɔlɔkɔ ko ɔdoa aindjanini.” 37Bea, bato ba odjoo babalabi na nde boo: “Kumu, ehole ɔenɛ so na ndja ko laopa mia ma oya, kaoko na posa ɛ mdiba ko laopa madiba ma omwa nda? 38Ehole ɛonɛ so mokɛndɛli ko laosɔ opele, kaoko mbundu ko laolwɛdja nda? 39Ehole ɛonɛ so na epeko kaoko ta bɔlɔkɔ ko ladoa aoindja nda?” 40Kumu abasɔmbɛdjabi boo: “Nabalaka na nu sooti boo: bihole bisusu ibakɔkɔ no midjɔ mia odii baana ba inga iba pɛpɛ tina, djebani opele boo ɔkɔmɛkɛni wɛte mbai.”
41Ngɔngɔ djia, abalabi na bato ibadabi ta ebɔ ɛ nde ɛ bali boo: “Dongani ta miso ma mbai, ino bato ibalakedja Ndjambe; kɛɛni ta mosa ma kɔbili imabɔngɛdjama tina ɛ satana na babwendi ba nde! 42Tina boo nadaka na ndja ko ɔipanini mia ma oya; nadaka na posa ɛ madiba ko ɔipanini madiba ma omwa; 43nadaka mokɛndɛli ko ɔiosɔnini; nadaka mbundu ko ɔilwɛdjanini; nadaka na epeko ko naingea ta bɔlɔkɔ endolo ɔikɔmɛdjanini.” 44Bea, bamohɔdjabi boo: “Kumu, ehole ɛonɛ so na ndja, kaoko na posa ɛ madiba, kaoko mokɛndɛli, kaoko mbundu, kaoko na epeko, kaoko ta bɔlɔkɔ ko laiokɔmɛdja nda?” 45Kumu abasɔmbɛdjabi boo: “Nabalaka na nu, sooti boo: bihole bisusu balonaka no okɔmɛdja ɔmɔti ɔ bii ibakɛkɛ, ɔlonakani wɛte okɔmɛdjani.” 46Ko bakɛbi adiha etumbu ɛ kɔboli, endolo bato ba odjoo bakɛbi adiha mohelo ma kɔbili#25, 46 Hokea koko Dan 12, 2..»
Iliyochaguliwa sasa
MATIE 25: ngc
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
©2025 Communauté des Eglises Travaillistes (CET)
