MATIE 15
15
Bileho ba okɔkɔ
(Hokea koko Mal 7, 1-13)
1Bafalusai na bato ba edjebeli ɛ mibeko ibadonga ta Yelusalɛmɛ badoa odii Yesu ko babala na nde boo: 2«Tina ndani batingami ba wɛ tebasume okɔkɔ ba booso? Tina ɛ boo tebasose mabɔ mabobo boso baoya#15, 2 Hokea koko Luk 11, 38..» 3Yesu abasɔmbɛdja boo: «Bea ko ino, tina ndani tosumeni mibeko ma Ndjambe endolo okasumeni oko okɔkɔ ba boono? 4Tina ɛ Ndjambe abala boo: “Suma sangwao na ngwao”, na koko boo: “moto ona olakedjai sango na nango aboani na etumbu ɛ ogwa#15, 4 Hokea koko Oim 20, 12 ko Det 5, 16; Oim 21, 17 ko Lew 20, 9..” 5Endolo ino okaleheni boo: moto ona obali na sango kaoko na nango boo: “Ekɔmɛdjɛli epalaki mbai naopɛ, nayepi elengɛɛ epeeli odii Ndjambe”, 6abukiti mobeko ma opa nango na sango isuma. Na moda mua odiini oimedjaa ebaeli ɛ Ndjambe ngasa bɛngɛ oihwedjaeni okɔkɔ ba boono! 7Bato ba owɛi bobe! Isaya atɛlɛ opele mɛɛnɛ ta tina ɛ boono:
8Bato bii bakasumeni etoko na eposo ɛ monɔkɔ,
endolo milema ma bobo midii ohali na mbai.
9Miongɔɔnɔ mika ongɔɔneni bo midii etoko ma ngasa,
tina ɛ bileho ba bobo bidii oko mibeko ma bato.»
Midjɔ imikaimedjae moto mbindo
(Hokea koko Mal 7, 14-23)
10Yesu abea emumu ɛ bato ena ko abala na bu boo: «Okani ko sipoani midjɔ mii: 11Eka ekaingee ta monɔkɔ ma moto temoimedjae mbindo. Endolo edii wɛte eka ena ekaimane ta monɔkɔ ekaimedjae moto mbindo.» 12Bea batingami basabatea mbuti na Yesu ko babala na nde boo: «Otadjebaka boo kɔpɛ djibali wɛ itɛdjai Bafalusai ibaku?» 13Yesu abasɔmbɛdja boo: «Kona esusu ɛdaa Tata ɔ mbai odii odiko pɛpɛ oona ebikoamalea. 14Bakinani: edii bato ba miso mago ibadaledjaka bato bakina ba miso mago! Ko nga moto ogwa miso akadaledja mina nde okina ogwa miso, ibo basusu babae bakweala ta mombɔndɔ.» 15Piɛlɛ atomba kɔpɛ ko abala na Yesu boo: «Lotingodja indjɛ dii.» 16Yesu abala boo: «Ino koko odiini, pɛpɛ owɛi? 17Otasipoakani boo eka esusu ekaingee ta monɔkɔ ekakɛɛ ta sɔpɔ ko ngɔngɔ ekadumbame ta ibela? 18Endolo ena ekaimane ta monɔkɔ ekadonge ta molema, ko yo ekaimedjae moto mbindo. 19Tina ɛ boo malɛi mabe makadonge ta molema imaka molome ta oowa, ta bɔɔli, ta ndukeli, ta iba, ta tati ɛ epulu na masingi odii bamina nde. 20Hokea midjɔ imikaimedjae moto mbindo! Endolo oyaka pɛpɛ ososa mabɔ boso, teimedjae moto mbindo.»
Mwali mokɛndeli adhimi Yesu
(Hokea koko Mal 7, 24-30)
21Yesu adonga ena ko akɛɛ ta ekenge ɛ mokpɔtɔ ɛ Tula na Sidona. 22Mwali omɔti ɔ Kanana#15, 22 Kombe ena ɛ mwali ɔ Kanana ɛinedjaka mwali ona ɔdaka ɔ baswa ngando ta ekenge ɛ mokpɔtɔ ma Fenisia. Noko akadaa mwali ɔ pɛpɛ odaa Moyuda etasiaka boo adae pɛpɛ ooka babala ta tina ɛ Yesu. ɔhelamaka ta ekenge ena ɛ mokpɔtɔ adoa odii Yesu ko agama boo: «Kumu, Mwana ɔ Davidi, okeani ndjokwa! Mwana ɔ mbai mwali atungeami obuke na mwembo mobe!» 23Endolo Yesu aimosɔmbɛdja noko kɔpɛ. Batingami babatama mbuti na Yesu ko bamohɔdja boo: «Mobengana#15, 23 Mobengana eboani koko otingodja boo: mopaa eka ɛsɛngɛkɛ yo, tina ɛ boo agamaka ngɔngɔ dja booso.» 24Yesu abasɔmbɛdja boo: «Nalomama oko odii bhata ibabunga ba Isalɛlɛ#15, 24 Hokea koko Mat 10, 5-6..»
25Endolo mwali ona adua akwa magunda boso ba nde ko abala boo: «Kumu, kɔmɛdjani!» 26Yesu asɔmbedja boo: «Editi opele otomba ipa la bana ko olidumba odii mvua.» 27«Mwali ona asɔmbɛdja boo: Edii sooti, Kumu, noko bea mvua bakayɛ oko bikenge ba mapa bikakwae ta mesa ɛ moswa bu.» 28Bea Yesu abala na nde boo: «Mwali! Edhimeli ɛ wɛ edii enɛnɛ! Yɛɛ boo ekɔɔme na wɛ oko moda mopali wɛ.» Ko mwana ɔ nde mwali ahela oko ta ehole ena.
Yesu aheledjai bato ba bipeko bike
29Yesu adonga ena ko akɛɛ ta ibeke inɛnɛ la Galilai. Aihwea ta diko la ikoli ko adaa. 30Bimumu ba bato badoa odii yo, badoa na bato ba mitɛngu, bato ba miso mago, bato ba biɛmɛ, bimimi na bato bakina bike ba bipeko. Babadedjaa ta mako ma Yesu ko abaheledja. 31Bato bakamoa obuke ɔenɛ bo bimimi babali, bato ba mitɛngu baheli, bato ba biɛmɛ badali ko bato bagwa miso baeni, bea bakumedja Ndjambe ɔ Isalɛlɛ.
Yesu ayedjai bato koto inei
(Hokea koko Mal 8, 1-10)
32Yesu abea batingami ba nde ko abala na bu boo: «Naokeaka emumu he ɛ bato ndjokwa, tina ɛ boo bakɔi maswi masato engbanga na mbai ko baditi na eka ɛ oya. Naloni obayanedja sɔpɔ bwase; basaka embɛ mikuku na ndjia.» 33Batingami ba nde basɔmbɛdja boo: «Ha ta esobe, esika ndani ehɔni so odiha mapa bɛngɛ layedjae emumu ɛ bato moda muu?» 34Yesu abahɔdja boo: «Odini na mapa meka?» Ko bamosɔmbɛdja boo: «Lodii na mapa sambo na baa swi bakɛkɛkɛ.» 35Bea, Yesu abala na emumu ɛ bato boo badae ta kpɔtɔ. 36Atomba mapa sambo na swi, asakoa Ndjambe, amabuka ko apa bikenge bia odii batingami, ko batingami babikaana odii bato. 37Bato basusu bayaka ko bagola. Bea batuta bikengakengi ko balumedja ngombe sambo. 38Bato ibayaka badaka koto inei, pɛpɛ olanga bali na bana. 39Ngɔngɔ dja oyanedja emumu ɛ bato, Yesu atitea ta bwato ko akɛɛ ta ekenge ɛ mokpɔtɔ ɛ Magadania.
Iliyochaguliwa sasa
MATIE 15: ngc
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
©2025 Communauté des Eglises Travaillistes (CET)
