MATIE 10
10
Baapotele doomi na babae
(Hokea koko Mal 3, 13-19; Luk 6, 12-16)
1Yesu abea batingami ba nde doomi na babae ko abapa kpati ɛ obengana miembo mibe ko ɛ oheledja bipeko bisusu na biɛmɛ bisusu. 2Hokea kombe dja batingami bia doomi na babae: ɔ boso Simo, ɔbeaka bo Piɛlɛ, na mwanango Andele; Djake na mwanango Yoani, ibo basusu babae bana ba Zebedai; 3Pilipo na Batelemi; Toma na Matie moputedjeli ɔ puti; Djake mwana ɔ Alefe na Tade; 4Simo mosweeli ɔ ngando na Yudasi Isikaliote, ona ɔkaba Yesu.
Elomu ɛ batingami doomi na babae
(Hokea koko Mal 6, 7-13; Luk 9, 1-6)
5Edii bato bii doomi na babae ibaloma Yesu ngɔngɔ dja obala na bu na opipo boo: «pɛpɛ okɛni ta bikomi bikina ko pɛpɛ oingeani ta mabonga ma Samalia. 6Endolo kɛɛni odii bhata ibabunga ba bato ba Isalɛlɛ. 7Ngise susu idjinɔlea no, lehani boo: “Okumu ba busa bobatami!” 8Heledjani bato ba bipeko, pusoani bago, sɛnɔdjani bato ba mabha, benganani miembo mibe. Pani ngasa, tina ɛ boo ino koko ɔdihani ngasa. 9Pɛpɛ otombani na ɔlɔ, na palata, na falanga ta misenge ma boono; 10pɛpɛ otombani tɔmbi tina ɛ mwɛngɔ, pɛpɛ mikoto mibae, pɛpɛ otomba sapato, na pango. Tina ɛ boo mosali aboani oyaka ta mosala ma nde.»
11«Ta ibonga kaoko ta ngando esusu eingealea no, hombani moto ona oboani boo aosɛni ko daani ta ndako ɛ nde mbunoko ehole edongalea no. 12Okaingeani ta ndako ena, iseani bato ibatanealea no ena na obala boo: “Yɛɛ ogoo badae na nu.” 13Nga bato ba ndako ena bakabɔngɔ na ogoo bua, yɛɛ ogoo banɛngɛdjae ta tei ɛ bobo; nga bamiti oosɔni, yɛɛ ogoo basɔmbɛ odii no. 14Bakalona oosɔni ko ookani, dongani ta ndako kaoko ta ibonga dia ko pupolani mabutu ma bigbota ba boono. 15Nabalaka na nu sooti boo: ta iswi la esambi, etumbu ɛ bato ba ibonga kaoko ngando ena edabi epipo onɔɔ etumbu ɛ Sodɔmɔ na Gomɔla.»
Minɔngɔ ta tei ɛ elomu
(Hokea koko Mal 13, 9-13; Luk 21, 12-17)
16Naolomakani elɛngɛ bhata ta ndanda ɛ swa. Bea daani na okeba elɛngɛ ndjɔ ko na bwɛli elɛngɛ bimbenga. 17Tomangataanani, tina ɛ boo bato baokababini ta tibinalo ko baobomabini pimbo ta ndako dja bobo dja miongɔɔnɔ dja Bayuda. 18Baotombabini na ngulu boso ba bagupunɛlɛ na bakumu ta tina ɛ mbai, edabi enɔli tina ɛ boono ɛopaa tati boso ba bobo na bapagano. 19Ehole eopundabini boo boso ba balɔndi, pɛpɛ osatungeani na midjɔ ma obala kaoko na moda ma osɔmbɛdja; tina ɛ boo midjɔ miboani no obala mipamabi na nu oko ta ehole ena; 20editi ino bato babalabi, endolo Mwembo ma Sangwanu abalabi na ndjia ɛ minɔkɔ ma boono. 21Mwɛngɛmoto akababi mwanango bɛngɛ bamoowoe ko sɛngɛmoto akababi mwana ɔ nde bɛngɛ bamoowoe; bana batɔmbɔbi na baboti ba bobo, ko babanɔdjabi ta ogwa. 22Bato basusu baolonabini ta tina ɛ kombe ɛ mbai; endolo moto odabi na ingbangba mbunoko ɔ suka ahelabi. 23Ehole eonyɔkɔlɔbini bo ta ibonga imɔti, tiani ta ibonga ikina. Nabalaka na nu sooti boo: obɛtetebini odala ta mabonga masusu ma Isalɛlɛ boso boo Mwana ɔ moto adoe.
24«Motingami tanɔe molehi ɔ nde; mobuli tanɔe moswa nde. 25Endolo edii opele motingami adae elɛngɛ molehi ko mobuli adae elɛngɛ moswa nde. Bakabea moswa ndako Belezebulu, edalea moda ndani tina ɛ bato ibadii ta ndako ɛ nde!»
Moto oboani bo obanga
(Hokea koko Luk 12, 2-7)
26«Pɛpɛ obangani moto omɔti. Modjɔ mosusu ma mbombi moenɛmɛbi, ko modjɔ mosusu ma pɛpɛ odjebama modjebamabi. 27Midjɔ imaotondokɔni mbai hadɛdi ta modidi, mibalani na moi; ko mia imabalaka bo na nu ta itoi, mibalani diko la etondo. 28Pɛpɛ obangani bato ibahɔni oowa mokuku endolo batahɔnɔ oowa mwembo; bangani Ndjambe ona ohɔni oowa mokuku engbanga na mwembo ta ipelu. 29Tebatɛke basoketele babae na ikota imɔti? Endolo, pɛpɛ omɔti ɔ bobo ohɔni okwa ta kpɔtɔ nga Sangwanu amiti djeba. 30Tina ɛ boono, Ndjambe akadjebe noko motwuia ma swee dja boono. 31Ta tina ɛna pɛpɛ obangani: ino onɔini basoketele na motswuia!»
Odhima mabunga kaoko oingaana Yesu Klisto
(Hokea koko Luk 12, 8-9)
32«Moto mosusu oopalea tati boso ba bato boo adii moto ɔ mbai, mbai koko napalea tati boso ba Tata oodii ta busa boo adii tina ɛ mbai; 33endolo moto oinganaaleani ta miso ma bato, mbai koko namoinganaalea boso ba Tata ona odii odiko.»
Titi ogoo endolo mopata
(Hokea koko Luk 12, 51-53; 14, 26-27)
34«Pɛpɛ olɛdjani boo nadoa tina ɛ olwɛni ogoo ta ngondo: naiolwɛni ogoo, endolo mopata. 35Nadoa aisa mabɔtɔ ta ndanda ɛ mwana moomi nɔbɔ sango, mwana mwali nɔbɔ nango, mwali ɔ moki nɔbɔ okio ba nde mwali; 36Baloni ba moto badabi oko bato ba ibota la nde. 37Moto okapale sango kaoko nango onɔ mbai aboaniti odaa moto ɔ mbai; moto okapale mwana ɔ nde moomi kaoko mwana ɔ nde mwali onɔ mbai abaoniti odaa moto ɔ mbai. 38Moto mosusu odii pɛpɛ otomba ekulusu ɛ nde tina ɛ okimanani aboaniti odaa moto ɔ mbai. 39Moto ona ɔpalaka obanyea mohelo ma nde amobungedjalea; endolo moto obungedjalea mohelo ma nde tina ɛ mbai amodihalea koko.»
Ona oosini aosini
(Hokea koko Mal 9, 41)
40«Moto oosini aosini; ko ona oosini aosi ona ɔlomani. 41Moto oosɔbi motɛli tina ɛ boo adii motɛli, adihabi iputi moda momɔti na motɛli; ko moto oosi moto ɔ odjoo tina ɛ boo adii na odjoo adihabi iputi moda momɔti na moto ɔ odjoo. 42Nabalaka na nu, edii sooti: moto mosusu oopabi noko kɔbɔ ɛ madiba ma piɔ odii omɔti ɔ bana bii bakɛkɛ tina ɛ boo badii batingami ba mbai adihabi iputi la nde.»
Iliyochaguliwa sasa
MATIE 10: ngc
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
©2025 Communauté des Eglises Travaillistes (CET)
