LUKA 5

Yesu abei batingami ba boso

(Boindja pongono a Mat 4, 18-22; Mal 1, 16-20)

1Busa bomɔti, Yesu aemaka ta mokula mo ibeke di Genedjalɛtɛ,#5, 1 Ibeke di Genedjalɛtɛ: kombe ekina e ibeke a Galileya. Boindja pongono a Mal 6.53 ko emumu e bato bamombambamedjaka tina e booka mobalo mo Ndjakomba. 2Aɛnɛ maato mabae matingi ta ibongu mbuti na ngondo. Baoweli baswi baduboa ta tei e mu basosaka midjanga mi bobo. 3Ta maato imia mabae atitea ta bomɔti ibua bodaaka bo Simona. Amowadja bo atangodje bwato ta dua ko, adaaka na mobondo ta tei e bwato ko alehaka emumu.

4Ehole esiedja iyo boleha, abala na Simona bo: «Titedja bwato ta mbɛngɛ, ko dumbani midjanga mi bino bɛngi bo oowoeni swi.» 5Simona amosɔmbedja bo: «Molehi, losatungei bulu bosusu ko lodiiti eka emɔti endelo, asabala wɛ iboa, nadumbadea midjanga naikina.» 6Iboa badumba midjanga ta madiba ko mitaedja swi banɛnɛ, midjanga mi bobo mibangaka boaleana#5, 6 Kuanedja a 21.6.. 7Babea binabu ibibi badaaka ta bwato bokina bo badoe a bakamoa. Binabu badoa ko balumedja maato mabae ma swi botɔɔ mbuti na bodinda. 8Ehole eɛnɛ Simona Petelo midjɔ mimina, akwa na magbunda ta boso bo Yesu ko abala na nde bo: «Kumu, donga mbuti na mbi, modjɔ mo na dii moto o pekato.» 9Adaaka na bokamoa bonɛnɛ, iyo na bato ibibi badaaka na nde, tina e swi banɛnɛ ibia baowa bo. 10Edaaka oko boa tina e binande Djake ko Yoane, bana ba Djebede. Endelo Yesu abala na Simona: «Pɛpɛ bobanga oko, banga busa ibubu oimei mohombeli o bato.» 11Basɔmbedja bwato ta ibongu, bakina losusu, ko baso bakimana Yesu.

Yesu aheledji moto o mabha

(Boindja pongono a Mat 8, 1-4; Mal 1, 40-45)

12Ehole edaaka Yesu ta ngando enɛnɛ emɔti, moto omɔti iyoo oluma mokuku na mabha. Aɛnɛ iyo Yesu, asunami ta kpɔtɔ ko amoangɔnɔkɔ ko abala na nde bo: «Kumu, okapala, obwani bosɛnodjani.» 13Yesu aninodja ebɔ e nde ko amobɛndjɛ ko abala na nde bo: «Napalakadea modjɔ momina, sɛnɔɔ!» Ko na mbala emɔti mabha ma nde masia. 14Yesu amosia bo adae pɛpɛ botɔndea moto: «Kɛɛ asainedje ta di nganga o Ndjakomba ko pa mbeka mondumba mokoma Mose ta mobeko mo nde, iboa bato basusu badhimadea bo osɛnɔi#5, 14 Boindja a Lew 14.2-32. sooti.» 15Ta tina emina, gala e Yesu enangana pamba djisusu, ko emumu e bato badoa ta esika edaaka iyo tina e bomohokamedja ko abaheledje na bego dji bobo. 16Endelo Yesu asatiedjaka ta etengelenge tina e boɔngɔnɔ.

Yesu aheledji moto o binama bikatatake

(Boindja pongono a Mat 9, 1-8; Mal 2, 1-12)

17Busa bomɔti, Yesu adaaka aleha. Bapalisai ko na balehi ba mibeko badaaka ena; badongaka ta ngando djisusu dji Galileya ko idji dji Yudhea, ko na dji Yelusalɛmɛ. Ngulu e Kumu edaaka ta dii iyo ko aheledja bato ba bego. 18Bato badoa, na moto omɔti o binama bikatatake na ngaka; bahombaka bo bamokwedje ta ndako ko bamosambee ta boso bo Yesu. 19Endelo baidia esika e bomokwedja, tina emumu e bato. Baiwea ta diko di ndonga e ndako, batɔi ndɛlɛ ta diko di etondo, ko bamotitedji na ngaka ta ndanda e bato, boso bo Yesu. 20Yesu aɛnɛ edhimeli e bobo, abala na moto o yogo bo: «Mina mbi, pekato dji wɛ djikutubani.» 21Balehi ba mobeko na Bapalisai balɛnɛ bo: «Moto iyoyo adii nda? Iyoyo otiolakadea Ndjakomba? Moto ndani obwani bokutubanedja pekato? Ediiti oko Ndjakomba yo mɛnɛ!» 22Endelo Yesu adjebaka malɛno ma bobo, abasɔmbedjaka bo: «Tina elɛnɛkɛ ino ta milema mi bino iboa nda? 23Modjɔ monɔi na bopipo nda bobala bo: “Pekato dji wɛ djikutubani”, kaoko bobala na nde bo: “Angɔɔ ko dala?” 24Endelo napalakadea odjebeni bo: Mwana o moto adii iyaya ta kpɔtɔ na bokondji tina e bokutubanedja pekato.» Abala na moto o binama bikatatake bo: «Angɔɔ, andowa ngaka e wɛ ko yana ta ndako e wɛ!» 25Mbala emɔti, moto omina asangɔdjɔkɔ ta boso bo bato basusu, aandoa ngaka ko ayana ta ndako e nde ko adaaka akumedja Ndjakomba. 26Bato basusu bakamoa. Ko bakumedjaka Ndjakomba, balumaka na bɔɔ, ko babalaka bo: «Iso loɛni busa ibubu midjɔ mi bokamoa!»

Yesu abei Lewi

(Boindja pongono a Mat 9, 9-13; Mal 2, 13-17)

27Ngɔngɔ djimina, Yesu aimanaka ko aɛnɛ moputedji o puti omɔti kombe e nde Lewi, adaaka na mobondo ta bilo e puti. Yesu abala na nde bo: «Kimanani!» 28Lewi aangɔ, ko akina losusu ko amokimana. 29Lewi akɔɔ tɛkɛ enɛnɛ tina e nde ta ndako e nde; baputedji ba puti banɛnɛ ko bato bakina badaaka esika emɔti ta mesa na bu. 30Bapalisai ko balehi ba mobeko bakotoa modjɔ momina; bawadjaka na batingami ba nde bo: «Tina ndani oyakakadeani mia ko omwakakadeani na baputedji ba puti ko na bato ba pekato?» 31Yesu abasɔmbedja bo: «Bato ibibi badii na mikuku mipele te bakambe na monganga, endelo bato ba bego bakakambe na monganga. 32Naidoa abeya bato ba bodju, endelo nadoa abeya bato ba pekato bɛngi bahombedje milema mi bobo.»

Yesu ko na mongilo

(Boindja pongono a Mat 9, 14-17; Mal 2, 18-22)

33Bapalisai babala na Yesu bo: «Batingami ba Yoane, ko na ibibi ba biso, bakakɔe mongilo mandɛi mandɛi ko bakaɔngɔne; ko ibibi ba wɛ, bakayake ko bakamwake.» 34Yesu abasɔmbedja bo: «Ndenge ndani bato ibia babeami ta tɛkɛ e moki ba bwani bokɔɔ mongilo ta ndelo edii moswa moki ta ndanda e bobo? 35Endelo masu ma ngɔngɔ ehole ebakinabi moomi o moki; ta masu mamina, bakɔɔbi mongilo.»

36Yesu abala na bu pongono ekuanedji iyeye: «Moto taalake epasa e esendja eyeene bɛngi bo atonge na esendja eyou; tengasa, esendja eyeene ealeadea ko esendja eyeene etabwanadea na iyee eyou. 37Moto taise vino eyeene ta mbola djiyou; tengasa, vino eyeene ebwani bobatodja mbola: ko vino ebwani bosopea ko mbola djibatoanadea. 38Endelo vino eyeene, ebɔngi na mbola djiyeene! 39Ko moto ndani okadhimee bomwa vino eyeene ngɔngɔ dji bomwa vino eyou. Basɔmbedja bo: “Vino eyou edii epele.”»

Iliyochaguliwa sasa

LUKA 5: ngc

Kuonyesha

Shirikisha

Nakili