BIKƆMELI BI BA PƆSOLU 20
20
Mɔɔngɔ mo Polo ta Masedoane ko ta Gɛlɛse
1Ehole esia mongangale, Polo abolea batingami ngɔngɔ dji bobapingedja, abaisea ndese e suka ko aso akɛɛ ta Masedoane. 2Alekedja ta ekenge emina e mokili ko iho apingedja badhimi ngɔngɔ djimina akɛɛ ta Gɛlɛse 3iho akɔɔ songe basato. Apalaka akwee ta masuwa bɛngi akɛe ta Sili endelo ta tina e kopolo ekɔɔ Bayudha ta tina e nde, iboa atomba meko e bosɔmbɔ ta Masedoane. 4Sopatɛlɛ, mwana moomi o Pilisi, o Bele, akɛɛ na nde ndjea emɔti, na Alisitalake na Sekundusi o Tesalonike, Gaiusi, o Dɛlɛbe, Timote, ko na Tisike na Tolopime bato ba ekenge e mokili mo Adjia. 5Bato ibibi basua boso ko baloamba ta Toloasi. 6Ta tina e biso, ngɔngɔ dji tɛkɛ e mapa ma pɛpɛ levile, lokwea ta masuwa ta Pilipe ngɔngɔ dji masu matano, lobatanea ta Toloasi iho lokɔɔ eyenga mobimba.
Polo asukedji bokɛɛ ta Tolaosi
7Isu di mbangi di eyenga loputoana bɛngi lobuke ipa. Polo adaaka na mbuno e bodala ngɔngɔ dji busa bomɔti, asolaka na iputo. Ko atuba molɔkɔ tee mbunoko ta nanda e bulu. 8Milinda midaka minɛnɛ iho ta ekenge e ndako e diko edaka iso loboli. 9Enakoboa mwenga omɔti na kombe Yutuku adaaka na mobondo ta ininisi. Awɛɛkɛ hiɔ na ngulu mɛnɛ iyana atubanaka Polo molɔkɔ; ta ndanda e hiɔ apinoa iho ta ndako e ekpalaka e basato odiko ko akwa ko aso agwa. 10Iboa Polo aso atita ko angulama ko amopea ta mɔmɔ ko abala bo: «Pɛpɛ bobanganioko: adii na bomɔ!» 11Ehole asɔmbɔ Polo boiwea o diko, akabana mapa ko bayaka. Ngɔngɔ asombɔ bobala naikina tee mbunoko ehuma, aso akɛɛ. 12Batomba mwenga iyona mohelake ko modjɔ momina moso mobapingedja bobuke mɛnɛ.
Mɔɔngɔ mo Toloasi ko ta Milɛ
13Lokɛɛ boso bɛngi lotitee ta masuwa ko loso lokɛɛ ta Asosi, ta polo ebwanaka iso botomba Polo ta ibongu. iyene edii meko etomba iyo, modjɔ mo apalaka akɛe ta Asosi na mako. 14Ehole elotanea iyo ta Asosi, loomotomba ta masuwa bɛngi lokɛe ta Mitilɛni. 15Lodonga ena, lokɛɛ ko loimea ta boso bo Kio aya busa. Ngɔngɔ dji busa bomɔti, loimea ta Samosi, ko aya busa ibua bokina loimea ta Milɛ. 16Modjɔ mo Polo atomba meko e bonɔɔ boso ta Epeso na pɛpɛ bonɔdjɔ ngonga ta ekenge e mokili mo Adjia. Asasweyaka bɛngi ekabɔngɔ aimee ta Yelusalɛmɛ ta busa bo Patekote.
Polo abali na basuku ba Epeso
17Polo aloma bwɛndi ta Milɛ aloma bwɛndi ta Epeso bɛngi babee basuku ba Ekelesa. 18Ndelo eimea bo mbuti na nde, abala na bu bo: «Odjebekadeani bopele mɛnɛ mondumba mohelama mbi na nu ehole esusu, banga busa bo mbi bo mbangi boimea mbi ta ekenge e mokili mo Adjia. 19Nasalea Kumu na bosatitedja bosusu, na mbisoli ko na minɔngɔ miɛnɛ mbi ta tina e kopolo dji Bayudha. 20Enakoboa naibomba nongo modjɔ momɔti modaaka na tɛtɔ ta tina e bino: naotɔndeani ko naolehani midjɔ misusu, ta miso ma bato ko na ta ndako dji bino. 21Nabea Bayudha ko na bato badaaka pɛpɛ bodaa Bayudha bahombedje milema mi bobo ta dii Ndjakomba ko badhime Kumu o biso Yesu. 22Ko edɛdiyeye, nakɛi ta Yelusalɛmɛ, mondumba molindakadeani Mwembo nakɔe, ko na bosi midjɔ mikɔmɔdea na mbi iho. 23Nadjebadea bo, engi ngando enɛnɛ, Mwembo Mosɛnɔke motɔndeakadeani bo bɔlɔkɔ ko na minɔngɔ miambakadeani#20, 23 Boɛngɛ 21:4.11.. 24Naɛnɛkɛdea bomɔ bo mbi eka ngasa; etungi na mbi bokɛɛ mbunoko ta suka e elomu e mbi ko bosidja mosala mopani Kumu Yesu: botɔndea Bwɛndi Bopele bo ngɔlu e Ndjakomba#20, 24 Boɛngɛ 2 Tim 4:7..
25«Nanɔɔ ta tei e bino alehe Bokumu bo Ndjakomba, endelo nadjebakadea edɛdiyeye bo pɛpɛ nongo omɔti o bino oɛnɛdeani. 26Na tina emina naotɔndeakadeani busabubu bo: omɔti o bino akabunga, makiya ma nde mabakiti ta molo mo mbi. 27Modjɔ mo naotɔndeani mbuno esusu e Ndjakomba, na pɛpɛ mbombi. 28Sabaneanani ko na bhata ibia baopani Mwembo Mosɛnɔke obabaneeni. Baneani Ekelesa iyena edia Ndjakomba ta tina e yogo e Mwana o nde mɛnɛ. 29Mbi nadjebakadea ngɔngɔ dji bokɛɛ bo mbi swa ba bobila bakweyadea ta tei e bino ko batabaneadea bhata. 30Na nongo ta tei e bino, bato bakina babaladea midjɔ mi bokuta bɛngi batube badhimi babakimane. 31Iboa toma sɛndjɛlɛni ko lɛdjɛni bo, bianga bisato itombo, bulu na moi naikina bokebedjani omɔti omɔti o bino edae ta tei e biyo.
32«Ko edɛdiyeye naopini na Ndjakomba ko na mobalo mo ngɔlu e nde. Adii na bokondji bobodaledjani boso ta edhimeli ko boboopani mapele madedja iyo tina ibia basusu badii ba nde. 33Naihomba eka e moto, edae palanga, wolo kaoko esendja e moto. 34Ino bɛnɛ odjebakadeani bo nasalaka na mɔmɔ ma mbi mɛnɛ bɛngi mbi na bato badalaka na mbi lobolodje eka ekambaka na su#20, 34 Boɛngɛ 18:3.. 35Naoinedjani na bosusu bo etungi osaleni bɛngi okamoeni bakwali, ta bolɛnɛ mobalo mobala Kumu Yesu iyo mɛnɛ bo: “Bokaba bonɔi bodia na mongandi#20, 35 Mobalo imu mo Yesu moibombama ta mɛndi mapele.!” »
36Ngɔngɔ dji bobala iboa badaa ibo basusu na magbunda ko aangɔnɔ. 37Ibo basusu bayeaka ko basadumba ta dɔli di Polo ko bamodingaka ekɔpi. 38Badaaka mɛnɛ na ndjokwa modjɔ mo abalaka bo batamoɛnɛdea naikina. Ngɔngɔ djimina badala na nde engbanga mbunoko ta masuwa.
Iliyochaguliwa sasa
BIKƆMELI BI BA PƆSOLU 20: ngc
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
©2025 Communauté des Eglises Travaillistes (CET)
