Matta 7
7
Hi mba i hem hedi iyi səku
(Luka 6:37-38, 41-42)
1«Hi mba i mbaɗ əŋ hedi mə mbəzl ma a talaŋ hedi iyi səku, məŋgəvday Bizlaf a nda i hemeheni bahayim. 2Məŋgəvday a ɗek, Bizlaf a nda i hemeheni mənaŋ heni mə hem hedi dakayta iyi mba bahayim. Məsəkəŋ kə sla məsəkəŋ heni mə ɓət ley sla məsəkəŋ tə abə mbiŋ mba, i nda i slaheni məsəkəŋ abə mbiŋ bahayim. 3Hwa kəgər heziɗ tə əŋ nje tə zliŋgeh, ama hwa kəgər mpay səndawl tə əŋ nje təkwa səku seh, məŋgəvday a mey? 4Hwa nda i mar ley zlapaŋ əŋ zliŋgeh: “Yak sa kʉslekeh heziɗ tə əŋ nje təkwa za.” Hwa, mpay mbə əŋ nje təkwa mba seh, viŋgey? 5Hwa, hedi mə zlap ganaɗ sə bək bək, mar ley ɓət mpay tə əŋ nje təkwa za ndagwa. Ɓa, hwa gər nje lawlaw ley kʉslek heziɗ tə əŋ nje tə zliŋgeh.»
6«Hi mba i vəlaŋta məsəkəŋ sə kweɗek əŋ haza iyi səku, halla seh, i ziŋgehe za əŋ talaŋ təheni ley ŋgwahakaheni. Hi mba i kapaŋta gəvde təheni iyi əŋ gəldam iyi səku, məŋgəvday ta i dakta abə ŋgas.»
Hedi mə ɗəp məsəkəŋ a ndəra Bizlaf seh, a lim za
(Luka 11:9-13)
7«Hi ɗəp, i vəlaheni za. Hi pələk məsəkəŋ, hi lim za. Hi taw medigiɗ, i rəzaheni lay za. 8Məŋgəvday hedi mə ɗəp məsəkəŋ, i vəlaŋ za. Hedi mə pələk, a lim za. Hedi mə taw medigiɗ bahayim, i rəzaŋ lay za. 9Əŋ faŋw təheni, əŋgah hedi məzəwindi mbu ŋgaŋ a ɗəpaŋ məsəkəŋ kə zəm, a vəlaŋ nvəŋ za vaw? 10Aka səku, əŋgah a ɗəpaŋ kəlif, a vəlaŋ zʉzʉk za vaw? 11Kwa heni hedi madawar iyi maa, heni kəsəŋ ley vəlaŋta məsəkəŋ səntaŋ əŋ wuziyi təheni iyi. Abə dakayta Baba təheni tə wuzlaf, a vəlaŋta məsəkəŋ səntaŋ əŋ hedi mə ɗəp tə ndəra ŋga iyi seh halla vaw?»
12«Hi ɗalaŋta məsəkəŋ səntaŋ əŋ hedi iyi mənaŋ heni mə mba, hedi iyi i ɗalaheni əŋ heni bahayim. Wawa, ar ma majaw tə əŋ ɗerewel tə Musa abə tə hedi mə giz ma abə miya tə Bizlaf iyi#7:12 Rawma iyi 13:8-10..»
Medigiɗ sə mbəlewmbəlew
(Luka 13:23-24)
13«Hi təɗ kəɗi medigiɗ sə mbəlewmbəlew. Məŋgəvday medigiɗ sə bugudaŋw abə kataf sə baŋgwa seh, a kədeɓ hedi əŋ kuɗəp, hedi iyi mbeh səku i kəziber kəɗi mba. 14Ama medigiɗ sə mbəlewmbəlew abə kataf sə lerler seh, a kədeɓ hedi əŋ mədəŋcur lawayaŋ, hedi iyi i mə nda kəɗi mba seh, ga#7:14 Ga, aka səku, mbeh səku. halla.»
Hi sla wucum abə hedi mə giz ma məndiwiŋ səku abə miya tə Bizlaf iyi
(Luka 6:43-44)
15«Hi sla wucum abə hedi mə giz ma məndiwiŋ səku abə miya tə Bizlaf iyi. I nda i ndaha əŋ kelek təheni mənaŋ ntek iyi, ama əŋ tata seh, ar haza damu sə lem iyi. 16Heni səŋta za a kəzəɗ tata iyi. I kəmbal wuziyi tə mpay kwa vitikey mənaŋ maŋgwaraw a mpay tə abə digeɗ vaw? Aka səku, i kəmbal wuziyi tə mədifsəkiɗ a cəcəp vaw? 17Kwa mpay səntaŋ vitikey, a mbuw wuziyi səntaŋ iyi bahayim, ama mpay madawar, a mbuw wuziyi madawar. 18Mpay səntaŋ a gula i mbuw wuziyi madawar seh halla. Mpay madawar a mbuw wuziyi səntaŋ seh halla bahayim. 19Kwa mpay vitikey mə mbuw wuziyi səntaŋ iyi səku, i rəslu, i kapu əŋ kahaw. 20Mənaŋ mba bahayim, hi səŋ hedi mə giz ma məndiwiŋ səku abə miya tə Bizlaf iyi za abə ley gər kəzəɗ tata i mə ɗal.»
Gula tə Yesu məndiwiŋ iyi
(Luka 13:25-27)
21«Ar hedi iyi fuk i mə nda i zlapaku: “Bay Bayta, Bay Bayta”, tata i mə nda i təɗ əŋ Bay tə wuzlaf səku, ama sey hedi iyi i mə ɗal mba tə Baba na tə wuzlaf. 22Əŋ pis kə mbəzl ma tə a talaŋ məŋhayak seh, hedi iyi mbeh səku i zlapaka za: “Bay Bayta, Bay Bayta, nini kəzlap za mənaŋ hedi mə giz ma abə miya tə Bizlaf iyi abə miya təkwa, nini kəgam mulula iyi za abə miya təkwa, nini kəɗal mazla iyi par par za abə miya təkwa səku vaw?” 23Abə dawaŋ ta izey, sa zlapaŋta za, sa zla: “Sa kəsəŋgaheni səku səlak, hi nda təheni guduk abə sa, heni hedi mə ɗal məsəkəŋ madawar iyi#7:23 Jabura 6:9..”»
Ge iyi bək
(Luka 6:47-49)
24«Mənaŋ wa, hedi mə zlim ma sa mə zlap wa, kəɗal kəzəɗ za abə mbiŋ seh, kəmbaɗ za mənaŋ hedi tə abə burŋguzl mə ləm ge tə a talaŋ kefeɗ. 25Vaŋ kəzah za, lakwat a daha za, bərgədəŋ kəɗal za a talaŋ ge ta, ama kəhurum halla. Məŋgəvday manjaraf tə ge ta mbə a talaŋ kefeɗ. 26Ama hedi mə zlim ma sa mə zlap wa, kəɗal kəzəɗ abə mbiŋ halla seh, kəmbaɗ za mənaŋ hedi mə tak burŋguzl mə ləm ge ŋga tə a talaŋ vakw. 27Vaŋ kəzah za, lakwat a daha za, bərgədəŋ kəɗal za a talaŋ ge ta, ge ta kəhurum za, hurum madawar.»
Fagay tə Yesu
28Əŋ Yesu kəcukwaɗ sərək ŋga iyi wa kwata, hedi iyi fuk i kəhar za a sərək ŋga ta, 29məŋgəvday kəsərəkta mənaŋ metir tə ma majaw iyi i mə sərəkaŋta seh halla, ama a sərəkta abə fagay.
Iliyochaguliwa sasa
Matta 7: xmd
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
