Matta 17
17
Buw wucum tə Yesu
(Markus 9:2-13; Luka 9:28-36)
1Waŋ ŋkuh abə dawaŋ ta, Yesu a ŋgasl Piyer, Yakuba liŋ Yahwana zliŋgeŋ tə Yakuba, ɓa, a deɓta əŋ wuzum sə jiŋ, i mbə taataɗ tata. 2Yesu kəbuw za a nje tata, nje ŋga a mar ley waɗ mənaŋ pis, rukut ŋga a mbaɗ ŋga kʉkweɗek ndeɗndeɗ mənaŋ lay mawaɗ. 3Mbehmbeh mba, Musa abə Eliya i gizeŋta wucum əŋ gula tə Yesu iyi, tata bək tata iyi i kədəm ŋgalaw abə Yesu. 4Piyer a zlapaŋ əŋ Yesu, a zla: «Waa Bay Bayta, səntaŋ seh, nakwa iyi nja a nawa. Əŋgah hwa kəmba, sa nda i ker biŋ iyi maakaɗ a nawa, ntaɗ əŋ hwa, ntaɗ əŋ Musa, ntaɗ əŋ Eliya.» 5Əŋ mbiŋ a kəzlap ndagwa, mekwetene sə kweɗek ndeɗndeɗ a ndaha a bərəɗta, wula a zlimehe əŋ mekwetene ta, a zla: «Wawa, ar Mbu na mamba, sa kəɗiy səsəm na fuk a mbiŋ. Hi teheŋ zləm!»
6Əŋ gula iyi i mə zlim wula ta seh, i kələndəŋ za mbeh səku, i ndəv ma duc əŋ teyek. 7Yesu a kərəɗaha, a ges a tata, a zlapaŋta, a zla: «Hi garaha, hi mba i ləndəŋ səku.» 8I kaf nje izey, i kəlim hedi par halla, sey Yesu taataɗ ŋga.
9Əŋ tata i kəbəreŋgehe a wuzum sey, Yesu a ɗalaŋta ŋgəz wa, a zla: «Hi mba i giz məsəkəŋ heni mə lim wa kwa əŋ viyey səku, ha əŋ pis tə Mbu tə Hedi mə nda i garaha əŋ faŋw tə hedi maməc iyi.»
10Ɓa, gula iyi i ɗəpu, i zla: «Metir tə ma majaw iyi i zla seh, sey Eliya mə ndaha za məpər ndagwa seh, məŋgəvday a mey?» 11Yesu a ziŋgeŋta zlap, a zla: «Məndiwiŋ, sey Eliya a ndaha za ndagwa məpər ley ɗiy məsəkəŋ iyi fuk. 12Ama sa seh, sa kəzlapaheni, Eliya kəndaha cuza, hedi iyi i kəsəŋza halla, ama i kəɗalaŋ məsəkəŋ tata mə mba za. Ar mənaŋ mba bahayim, Mbu tə Hedi abə talaŋ ŋga, a zləŋ takwaŋ za a ndəra tata.»
13Əŋ hala ta mba, gula iyi i kəzlim za izey, a zlapaŋta seh, a talaŋ Yahwana mə ɗal batem.
Yesu a mbəl mbu mə dal əŋ məc mə ɓərəzl hedi i ɓərəzl
(Markus 9:14-29; Luka 9:37-43a)
14Əŋ Yesu abə gula ŋga iyi i gwar əŋ kelek hedi makwas iyi seh, hedi məzəwindi aka, a kərəɗaha əŋ kelek Yesu, ɓa, a mar ley dar malakw a ma ŋga, 15a zla: «Waa Bay Bayta, səŋ nje həhər a mbu na wa. Mbiŋ abə məc mə ɓərəzl hedi i ɓərəzl, a kəzləŋ takwaŋ mbeh səku: mbu ta, a kəndəv hwayhway əŋ kahaw, aka səku əŋ yim. 16Sa kədahaw za əŋ kelek gula təkwa iyi, ama i gula i mbəlza səku.»
17Yesu a ziŋgeŋ zlap, a zla: «Hey, heni hedi madawar iyi, mə kuw ma tə Bizlaf səku iyi, sa nda i nja abə heni ha waŋ veney? Sa nda i ɓəsaheni ha waŋ veney? Hi dahaka mbu ta əŋ nawa.» 18Yesu a bəbəc mimiɗ madawar ta, ley təɗaha ŋga, mbehmbeh mba, mbu ta, a mbəl ŋga.
19Abə dawaŋ ta izey, gula iyi i kərəɗaha əŋ kelek Yesu taataɗ tata, i ɗəpu, i zla: «Nini gula i gam mimiɗ madawar ta səku seh, məŋgəvday a mey?» 20Yesu a ziŋgeŋta zlap, a zla: «Məŋgəvday kuw ma təheni ɓəraŋ. Sa kəzlapaheni məndiwiŋ, əŋgah heni abə kuw ma kwa kʉsit nawa, mənaŋ mbu tə veŋcehew aka seh, heni gula i zlapaŋ əŋ wuzum wa: “Gar za a nawa, nda əŋ macu”, a gar ŋga za, məsəkəŋ mə nda i dayaheni fagay seh halla. [21Ama mimiɗ madawar mənaŋ wawa, ley təɗahaw seh, sey abə ley ɗal mbuh abə dalyam.]»
Yesu a giz baha məc ŋga abə garaha ŋga tə əŋ faŋw tə hedi maməc iyi
(Markus 9:30-32; Luka 9:43-45)
22Gula tə Yesu iyi fuk i kwas əŋ Galili, Yesu a zlapaŋta, a zla: «I ber Mbu tə Hedi za əŋ ndəra hedi iyi, 23i jaza za, ama əŋ waŋ maakaɗ ta, a garaha ŋga za əŋ faŋw tə hedi maməc iyi.» Əŋ tata i mə zlim ma ta, kəjaŋta wucum za.
Yesu abə Piyer i min budu tə biŋ tə Bizlaf
24Əŋ Yesu abə gula ŋga iyi i mə gwar əŋ Kafarnahum, hedi mə cakal budu iyi tə əŋ biŋ tə Bizlaf, i kərəɗaha əŋ kelek Piyer, i ɗəpu, i zla: «Metir təheni a kəmin budu tə biŋ tə Bizlaf səku vaw?» 25Piyer a ziŋ zlap, a zla: «A kəminʉ.» Əŋ Piyer a kətəɗ əŋ ge seh, Yesu məpər ley zlapaŋgu, a zla: «Simaŋw, hwa wulək seh, viŋgey? Mə nda i min budu, aka səku garama əŋ bay iyi tə əŋ məŋhayak wa seh, viyey? Hedi tə əŋ hayak iyi ta vaw? Aka səku, hedi madaway iyi vaw?» 26Piyer a ziŋgeŋ zlap, a zla: «Ar hedi madaway iyi.» Yesu a zlapaŋgu, a zla: «Mənaŋ zlap ta seh, hedi tə əŋ hayak iyi ta i kəmin budu səku. 27Ama məŋgəvday nakwa iyi mba i dəmaŋta nəf tə hedi iyi ta səku seh, nda əŋ gaw, nah ŋgele əŋ yim, kəlif mə mar ley zəm ŋgele mba, təɗahaw, rəzaŋ ma, hwa lim dala tə malaway za a ɗəməŋ, a hwas za ley min budu na abə tə təkwa, ɓətu, vəlaŋta məŋgəvday ley min budu tamu.»
Iliyochaguliwa sasa
Matta 17: xmd
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
