Matyáasa 3
3
Yohánese adwe vato
(Már 1:1-8; Rúk 3:1-18; Yoh 1:19-23)
1Metúú mwané, Yohánese adwe vato a ma paá na ekwété yá cí pere éjé na Yúdeyá, a béndé wɔkɔ́ anáá: 2«Céndyáno púrú rá vinó! Esené Tamba éjé na máná ye okéra berebe na vinó!» 3Yohánese a ámó moto ójó Isáyá ahúmíye maró wa Irɔŋgɔ a ma járá anáá: «Mií emo e rúmámó na ekwété yá cí anáá: Hééhéndáno pé rá Okí, no ganona vitómbéná vyáa.» 4Yohánese a kate byá cunú rá kumbú ra eyákása, nkandá wa ekoo yá nama na nosówó ná ŋgɔɔ́, a katé nyá mbarasaná na bweyá wá njáná. 5Vato ává na Yerusareme, na Yudéyá uŋgime, na ava na kɔnkɔŋgɔ ra osombo ójó vá beráanámó anáá Yurudéne vá ma báábáŋgá ondo me etíye. 6Kó va ma ojá mabé máwó na aŋgiso ra moto uŋgime, na nime kó Yohánese a ma wó dwé naáté yá Yurudéne.
Yohánese adwe vato a turámó vató etú anáá vá céndyé vambé váwó vá púrú
(Rúk 3:7-9)
7Amó Yohánese adwe vato a ma ená ombunu rá va Pariséne na va Sadusyeéne vá urána na nduwáná, a ma járá nawó anáá: «Mbɔŋɔ ra pené, áné kójo a ma nó tíhíyé ohaŋga, anáá no pamba na urúndú rá Irɔŋgɔ ójó wó urámó? 8Ŋgáno sɔɔ́ mamba ámá má tíhíyámó anáá nó océndyé vambé vá púrú vá vinó 9kó vinó ka rékána ojárá naáté yá etémá ra vinó anáá Abaraháma a ámó kókó wa visó esene éyé ŋgo nó ojánámó anáá Irɔŋgɔ a ámó otimbaana na atááné ajá ukú ójó anáá a eréena Abaraháma vaná. 10Iréŋgú yó etá berebe anáá í sómbá marété na eŋgaŋgá, werété wimé ówó wó ta umé vesi vá viboma, wó né sómbávenámó onɔvena na ihyáné.»
Nduwáná ra matéyá na nduwáná ra ihyáné
(Már 1:7-8; Rúk 3:15-18; Yoh 1:24-28)
11Yohánese a wundámó ojárámo na vato anáá: «Noó ŋgo no dwámó ná mateyá, ndeme eje anáá ne ocendye vambé wa purú wa vinó, woje rií anáá ojo a uramo na nime ra ame a timbamo ŋguru otómbá noó, ta gerémená hónó anáá ŋgo me sútúne ŋgoo; ómwané a né nó dwámó ná Ireréŋgi éyé Mwáŋ mwáŋ kó hée na ihyáné. 12A timbámó iseese raá na ombɔɔ́, a né seesámó kó mpaŋá ra ombótá, a né váámó naáté yá ndáŋgé raá; kaá vihuru, a né túmámó naáté yá ihyáné íjí í ta híndíyé.»
Yésusu a duwanámó
(Már 1:9-11; Rúk 3:21-22)
13Yésusu a ma endá uré na Gariréya hwɔs na osombo ójó vá béráanámó anáá Yurudéne ukú ójó anáá Yohánese a me dwe. 14Kó Yohánese a ma eŋgá anáá a váráŋga aye na Yésusu anáá: «Mámó kójo o geremenámó ondwe noó kó wo urámó na noó anáá ŋgo wo dwe?» 15Yésusu a mo wundiyámó anáá: «Atɔ́wɔ́ anáá wó eŋgávena náná tetee ojó esene éyé náná kówo to geremenámó weŋga até yimé éyé é ámó ndíŋgirííŋ na aŋgísó rá Irɔŋgɔ.» Ɔ́wɔ́ kówo Yohánese a ma atɔ́wɔ́. 16Béŋ ámó Yésusu a ma duwáná, a ma urúkyé na osombo. Máná e ma bunúwé kó a ma ená ámó Ireréŋgi yá Irɔŋgɔ é ma sisé ámó omeŋgá ondo batemena na nótó raá. 17Ko mií e ma endá uré na máná e járá anáá: «Ojojó a ámó Mwaná wa andiŋgé wame ómwané kójo ŋgo ma ijátá na vitaka bimé.»
Iliyochaguliwa sasa
Matyáasa 3: tii
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2024, CABTAL
