Matyáasa 17
17
Yésusu a céndyámó pwényí
(Már 9:2-9; Rúk 9:28-36)
1Na nimé ra metúú máráátó, Yésusu a ma wɔ́rɔ́ Pyéere, Yáka na Yóhánese ójó navéne Yáka, kó a ma endá nawó urehí na vato na máná ra ekáné yá yene. 2Ɔ́kɔ́, wusó wá Yésusu wó ma céndyé na aŋgísó ráwó, okésyé onanja ámó oŋgóná, cunú ráá okésyé opume ámó ohéhémbé. 3Ikɔkɔ ka mana, vihoóhóná íví vítátó ví ma tómbá wená Mósese na Eríyasa vá rényé na Yésusu. 4Ɔ́wɔ́ kówo Pyéere a ma járá na Yésusu anáá: «Okí, wó ámó wusi anáá to rií ará. Wa díŋgé ŋgo né háámó virárá vítátó ará, ímwéesií na wusó wɔɔ́, ímwéesií na wusó wá Mósese, eyomó na wusó wá Eríyasá.» 5A rií na ojárá, isíŋge éyé é nánjámó é ma bútyááná Yésusu, Mósese na Eríyasa, kó naáté yá eyásá mwané, mií e ma húmé ɔ́wɔ́ e járá anáá: «Oojó a ámó Mwaná wame wa andiŋgé, ómwané kójo ŋgo ma ijátá na vitaka, o me vátɔ́réénámáno!» 6Ará vihoóhóná ví ma ová mií eméje, wohwá wó ma wó ambááná kó vá ma edúmáná mesyó na cí. 7Yésusu a ma wó kéréná o wó táhátena, kó a ma járá nawó anáá vá hátéena vá mwané ka tíné. 8Kó vá ma hetíyáná aŋgísó vá enámó bɛ́ŋ Yésusu moká. 9Na itíndíkáná íjí vá katé sise yene, Yésusu a ma wó tévéré aye nawó anáá: «Vinó ka ojana moto wandá na até éyé no mó ená onde humé ará Mwaná moto a mó hónowámó na raaté wa vigwé.»
Yésusu a ojámó anáá Eríyasa ojo a né jovámó wuré
(Már 9:11-13)
10Kó vihoóhóná ví me súsámó anáá: «Na wusó wá até kówo vayéere vá mbéndɔ́ vá ma járá anáá Eríyasa kójo a né jovámó wuré?» 11A wó wúndiyámó anáá: «Eríyása a né jovámó síkí wuré, kó a né heéhendámó mamba mimáná. 12Kó na noó ŋgo nó ojánámó anáá Eríyasa a ma uré kó vato vá ta ma mó jembe, kó vá ma mo eŋgá ámó vá ma diŋgé. Naná hónó kówo vato mwané vá né tuúriyámó Mwaná moto.» 13Ɔ́wɔ́ kówo vihoóhóná vyáá ví ma jembé anáá a katé járá ndɔ́ŋɔ ra Yóhánese adwe vato.
Yésusu a ondónámó maŋgájo ojó a nɔ́mó osásámbá
(Már 9:14-29; Rúk 9:37-43)
14Ará vá ma húmé pandó éjé vato vá katé rií, moto omo a ma endá uré owedúmena Yésusu na eŋgoró, 15aye naá anáá: «Okí, éná mwaná wá me noóŋgó esene éyé a obanámó osásámbá, kó a enámó etɔɔ mbunu, a katámó wobana na ihyáne, táma emo naáté yá matéyá. 16Ŋgo ma enda naá na vihoóhóna vyɔɔ́, kó a ma wó pásá orɔndɔ.» 17Yésusu a ma wɔ́rɔ́ enjárá a ye anáá: «Eé vinó vato ává wusóó no ta timbé ŋgɔ́tɔvena, kó no eŋgámó wóbé ŋgo ne riyámó na vinó o húmé itíndíkáná ijyáté? Ŋgo né nó ménevámó ondo húmé itíndíkáná até? Na nimé ráá a ma járá na moto omójo anáá uré na ombwene rɔ́ɔ́ ará.» 18Yésusu a ma riŋgáána ombe Ireréŋgi kó a ma tómbá wo urukyé na nótó rá maŋgajó, maŋgájó otómbá we étá oŋgondó. 19Ará vihoóhóná ví ma cáná na Yésusu vá mwané vaká, vá ma me súsé anáá: «Na wusó wá até kówo ireréŋgi eméye é má só pásá na ugúné?» 20Yésusu a ma wó wundíyé anáá: «Wó ámó esene éyé no ta timbé ŋgɔ́tééná mbunu. Ŋgo nó ojánámó na vatɔ́ɔ́tɔ́ anáá ŋgé na timbé ŋgɔ́tééná tɔɔ dekétií ámó cámá ra goyáka, no né pítyámó ojárá na yene ojó anáá úrúkyé ará wenda pere ejómo kó yene omójo ó né orúkyámó wandá, wómó wó ta né o nó pásá. 21Kó honó ogúné ówó ukúkú rá ireréŋgi eméye osusámó bɛ́ŋ mbasóóriye na mutíndíkáná mwa iki rá manyá.»
Yésusu a ojámó nugwé náa na ehonowa yáa na eŋgendɔ eba
(Már 9:30-32; Rúk 9:43-45)
22Na nimé raá, vihoóhóná ví ma endá váwónjéena bimé na Gariréya. Yésusu aye nawó anáá: «Mwaná moto a né kawenámó na embɔɔ́ ra vato, 23vá né me onámó kó na metúú mátátó, a né wundámó ohonowa.» Kó etémá e ma káná vihoóhóná nasesi.
Yésusu nawó na Pyéere vá yáánamo tása na yanje yá Irɔŋgɔ
24Ará va ma endá húmé na oŋgórá Kaperenahumu, vato ává vá katé wɔ́rɔ́nɔ tása vá ma keréná Péere o me súsé anáá: «Oyéere wa vinó ómwané a ta yááná tása ra yanje yá Irɔŋgɔ?» 25Pyéere a ma wó wúndíyé anáá: «A yáánámó.» Na nimé raá, Pyéere a ma wundé na yanje. A rií na wiŋgáana, Yésusu a ma tómbá omándéena na enjárá aye na Pyéere anáá: «Aá Pyéere, mámó wenámó twiiŋí? Avaté káva vá géremenámó oyáána tásá na mahumu ámá na cí ejé? Ye vato vá edɔŋgɔ kee menɔ́?» 26Pyéere a ma wundíyé anáá: «Menɔ́.» Yésusu a ma eŋgá naá anáá: «Naná wó tírevenámó anáá vato vá edɔŋgɔ vá ta ámó na inɔti anáá vá yáána sí náná? 27Kó ámó vato ává vá wɔ́rɔ́nɔ́mó tásá na yanje yá Irɔŋgɔ vá ta ová náná, ndá na osómbo, ojuumiye onɔɔ́ na matéyá, cwí ra makésyé éjé o né ambaanámó, o mo bune uŋgúté. Ɔ́wɔ́ o né etíyámó ekpama yá mwení eyé e né geremenámó na oyáána ówó tása rame na írɔɔ. Mámó owɔ́rɔ́ mwení imíji ondo wó hwá.»
Iliyochaguliwa sasa
Matyáasa 17: tii
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2024, CABTAL
