जोहा 1
1
जियोन रेयाक् काथा
1एतोहोप्रे काथातेत् ताहेंकाना, आर काथातेत् दो इसोर ठेने ताहेंकाना आर काथातेत् दो इसोरे ताहेंकाना। 2उनिगे एतोहोप्रे इसोर ठेने ताहेंकाना। 3सानामाक्कोगे इसोर दो उनि होतेतेये होयओचोकेदा, उनि बेगोर दो चेत् हों बाङ होयलेना। 4उनिरे जियोन ताहेंकाना आर ओना जियोन दो मानवाकोवाक् मारसाल ताहेंकाना। 5आर ओना मारसाल दो ञुतरे जोलोक् काना, आर ञुत दो ओना बाय इड़िंच् दाड़ेयादा। 6मित् होड़े ताहेंकाना इसोर ठेन खोन कोल ओचोवाकान, ञुतुमताय दो जोहान। 7उनि दो मारसाल बाबोतते गोहा ला़गित्ए हेच्लेना, जेमोन काथाको आँजोम आरको पा़तिया़उक्। 8उनि आच्तेत् दो मारसाल बाय ताहेंकाना, मेनखान मारसाल रेयाङ गोहा एमोक्ए हेच्लेना। 9सा़रि मारसालतेत्गे, ओने उनि जोतो होड़े मारसालाकोकान, धा़रतितेये हिजुक्कान ताहेंकाना। 10धा़रतिरेये ताहेंकाना आर धा़रति दो उनि होतेते होय आकाना, एनरेहों धा़रतिरेनको दो बाको बाडाय ओरोमलेदेया। 11आच्रेनको ठेने हेच्एना आर आच्रेनको दो बाको आताङलेदेया। 12मेनखान तिना़क्को आताङकेदे, ओनको दो इसोररेन गिदरा़ होयोक् रेयाक् एकतिया़रिये एमात्कोवा, ओने ओकोय उनियाक् ञुतुमरेको पा़तिया़उक्कान। 13ओने ओनको माँयाँम खोन दो बाङ, जेल रेयाक् सानाते हों बाङ, हेरेल होड़ रेयाक् सानाते हों बाङ, मेनखान इसोर खोनगेको जानाम आकान। 14आर काथातेत् दोए मानवा जा़त एना आर आबो तालारेये छा़उनिलेना आर उनियाक् ठोनोकले ञेल आकावना। आपात ठेन खोन एसकार जानामिच् रेयाक् ठोनोक लेकागे, दाया आर सा़रियाक्ते पेरेच्गे। 15जोहान दो उनि रेयाङ गोहाय एमेदा आर होहोवातेये मेनेदा, “नुयगे उनि दो ओने ओकोय रेयाक् इञ मेनलेत्, इञ तायोमते दारायकानिच् दो इञ आ़उरि खोनगे मेनाया, एनते इञ खोने लाहागेया।” 16आर उनियाक् दाया रेयाक् पेरेच्तेत् खोन आबो जोतो होड़बोन ञाम आकावाना दाया चेतान दायागे। 17एनते आ़न दो मोसे तिते एम एना, मेनखान दाया आर सा़रियाक् दो जिसु मा़सि होतेते होयेना। 18इसोर दो ओकोय हों तिस हों बाको ञेल आकादेया, एसकार जानाम होपोन उनि आपातआक् होबोररे मेनायिच्, उनिगेये सोदोर आकादेया।
जोहान बाबा़प्तिसिच्आक् गोहा
(माथ 3:1-12; मा़र 1:1-8; लु 3:1-18)
19आर जोहानाक् गोहा दो नोक्ओंय, ओने जिहुदिकोरेन एकतिया़रियानको दो जेरुसालेम खोन नायकेको आर लेबिको उनि ठेनको कोलकेत्कोवा, नोवा कुलिये ला़गित्, “आम दोम ओकोयकाना,” 20उनरे उनि दो बेगोर ओको दानाङे आङगोचकेदा, “इञ दो मा़सि दोञ बाङ काना।” 21आदोको कुलिकेदेया,
“ओकोय एनडेखान आम दो? एलिया़ कानाम?”
खाने रोड़ रुवा़ड़केदा, “बाङ कानाञ।”
“चेत् ना़बि कानाम?”
उनि दोए रोड़ रुवा़ड़केदा “बाङ।”
22आदोको मेतादेया, “ओकोय कानाम? जेमोन कोल आकात्लेको रोड़ रुवा़ड़ले एमाको। आपनार रेयाङ दो चेत्एम मेनेदा?”
23मेनकेदाय:
“इञ दो हाहाङकाररे मित्टेन होहोकानिच् रेयाक् आड़ाङ,
प्रोभु रेयाक् होर सोजहेकातायपे, जेमोन जेसाया ना़बिये मेनलेत् लेका।”
24आर कोललेनको दो फा़रिसि मोदरेनको ताहेंकाना। 25ओनकोको कुलिकेदेया, “चेदाक् एनडेखानेम बा़प्तिसेत्कोवा, मा़सि हों बाङ, एलिया़ हों बाङ आर उनि ना़बि होंम बाङकान खान?” 26जोहाने रोड़ रुवा़ड़ात्कोवा, “इञ दो दाक्तेञ बा़प्तिसेत्कोवा, मित्टेने तेङगोवाकाना आपे तालारे, ओने उनि बापे बाडायेदेकान, 27इञ तायोमते दाराकानिच्गे ओने उनियाक् खारपा रेयाक् तोनोल राड़ाय लेक हों इञ दोञ बाङकान।” 28नोवाको दो जोरदान ओनपारोम बेथानिया़रे होयलेना, ओने ओकारे जोहाने बा़प्तिसेत्को ताहेंकान।
जिसु दो इसोररेन भेडा होपोन
29दोसार हिलोक् जोहान दो जिसु आच् ठेन हिजुक्कान ञेलकेदेतेये मेनकेदा, “हा़नि ञेलेपे इसोररेन भेडा होपोन, ओने उनि धा़रति रेयाक् का़इये गोक् इदियेत्कान। 30नुयगे उनि दो ओकोय रेयाङ इञिञ मेनलेत्, ‘इञ तायोमते मित् होडे़ दारायकाना ओने उनि इञ आ़उरि खोनगे मेनाय, एनते इञ खोने लाहागेया।’ 31आर इञ दो बा़ञ बाडायेदेकान ताहेंकाना, मेनखान नोवा इया़तेगे दाक्ते बा़प्तिसकान इञ हेच्एना, जेमोन इसराएलको ठेने सोदोरोक्”
32आर जोहान दो गोहाय एमकेदा, मेनकेदाय, “सोनोत जिउ दो सेरमा खोन मित्टेन पोताम लेका आँड़गोनकान इञ ञेलआकादेया, आर उनिरेये ताहेंयेना 33आर इञ दो बा़ञ बाडायेदेकान ताहेंकाना, मेनखान दाक्ते बा़प्तिसको ला़गित् कोलकेदेञिच्गेये मेतादिञा जाहाँयरेगे सोनोत जिवे फेडोक्कान आर उनिरे ताहेनकानेम ञेलले, उनिकानगेयाय सोनोत जिउते बाबा़प्तिसिच् दो। 34आर इञ दोञ ञेल आकादा आर गोहाञ एम आकादा, बाङमा नुयकानगेयाय इसोररेन होपोन दो।”
जिसुरेन पा़हिल चेलाको
35दोसार हिलोक् जोहान आरहोंए तेङगोवाकान ताहेंकाना आर उनिरेन चेलाको मोदरेन बार होड़ तुलुच्। 36आर जिसुइ दाँड़ाँबाड़ायकान ताहेंकानरे, उनि बेङगेत् आदेतेये मेनकेदा, “हा़नि ञेलेबेन इसोररेन भेडा होपोन।” 37उनकिन चेला दो उनिये मेनलेत्आक्किन आँजोमकेदा आर जिसुकिन पाँजाकेदेया। 38खान जिसु दो आ़चुरेनते पाँजाकाने ञेलकेत्किना आरे मेतात्किना, “चेत्बेन ञामकाना?” उनकिन दोकिन मेतादेया, “हेंदा रा़ब्बि (मेताक्मे तोरजोमाते दो हेंदा गुरु), ओकारेम ताहेनकाना?” 39जिसु दो उनकिने मेतात्किना, “देला हिजुक्बेन आदोबेन ञेला” आदो सेनकाते उनि ताहेन ठा़ँइकिन ञेलकेदा, आर एनहिलोक् दो उनि ठेनगेकिन ताहेंयेना। ओकते दो दाक् लो बेर गान ताहेंकाना। 40जोहानाक् काथा आँजोमकाते उनकिन पाँजालेदेकिन मोदरे मित् दो सिमोन पातरासरेन बोयहा आ़न्द्रियासे ताहेंकाना। 41उनि दो माड़ाङरे आच्रेन बोयहा सिमोन ञामकेदेतेये मेतादेया “आ़लिञ दो मा़सिलिञ ञामकेदेया” (ओकाटाक् तोरजोमाते दो ख्रिस्ट), 42आर सिमोन दो जिसु ठेने इदिकेदेया। जिसु दो उनिये बेङगेत् आदेया आरे मेतादेया, “आम दो जोहान होपोन सिमोन कानाम, आम दो केफासेम बाहनाक्आ” (ओकाटाक् तोरजोमाते दो, पातरास)।
जिसु फिलिप आर नाथानेले होहोवात्किन
43दोसार हिलोक् दो गा़लिलते ओडोक चालाक् सानाकेदेया, आर फिलिपे ञामकेदेया आर जिसु दो उनिये मेतादेया, “देला पाँजाञमे।” 44फिलिप दो बेथसायदारेने ताहेंकाना, आ़न्द्रियास आर पातरास ता़किनाक् आतोरेनगे। 45फिलिप दो नाथानेले ञामकेदेया आरे मेतादेया, “उनिगेले ञाम आकादेया, ओकोय रेयाङ मोसे दो आ़नरे आर ना़बिको होंको ओल आकात्, जोसेफरेन होपोन, नासारेतरेन जिसुगे” 46नाथानेल दो उनिये मेतादेया, “चेत् जाहान भागेयाक् होय दाड़ेयाक्आ नासारेत खोन?” फिलिप दो उनिये मेतादेया, “देला हिजुक्ते ञेलजोङमे।” 47जिसु दो नाथानेल आच् ठेन हिजुक्काने ञेलकेदेया आर उनि रेयाङे मेनकेदा, “नुक्उँय सा़रियाक्गे मित्टेन इसराएल होड़ ओने उनिरे फा़सिया़रा बा़नुक्।” 48नाथानेल दोए कुलिकेदेया, “चेकातेम ञेल ओरोमेदिञा?” जिसुइ रोड़ रुवा़ड़ादेया, “फिलिप आ़उरिये होहोवामरे, लोवा दारे बुटा़रेम ताहेंकानरेञ ञेललेत्मेया।” 49नाथानेले रोड़ रुवा़ड़ादेया, “ए रा़ब्बि, आमगे इसोररेन होपोन दो! आमगे इसराएलकोरेन राजा दो।” 50जिसुइ रोड़ रुवा़ड़ादेया, “लोवा दारे बुटा़रेञ ञेललेत्मेया मेनतेञ मेताक्मेतेम पा़तिया़उक् काना? नोवाको खोन नापड़ाक्आक्कोम ञेला।” 51आरे मेतादेया, “सा़रि सा़रिगेञ मेतापेकाना, आपे दो सेरमा झिच्आकान आर इसोररेन दुतको मानवा होपोनरे राकाप् कान आर फेडोक् कानपे ञेलकोवा।”
Iliyochaguliwa sasa
जोहा 1: NTSPt25
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The New Testament Books in Santhali Language © The Word for the World International and Santhali Translation Project, Nepal, 2025
