Matayu 2
2
Wahenja kuhuma kulihumila lijuwa
1Yesu awelekili kummbwani Betelehemu gha Uyahudi, lipindi lya ulongosi wa nkosi Helodi, wandu wamanya ndondwa kuhuma kuhumila lijuwa wakahika haku mbwani Yelusalemu, 2wakakonya, “Kakugha hayu mwana kaweleka aweli Nkosi wa Wayahudi? Kwaikiva tulola ndondwa ghaki ikihumila kulihumila lijuwa, hinu twenga tuhika kumuyupa.”
3Nkosi Helodi pakayughanila hagha, mweni pamonga na wandu ghaki wakayingilwa na holu na wandu wogha wa Yelusalemu. 4Hinu, Helodi akawakema pamonga watambika wakulu wogha na wavula wa malaghililo lya Sapanga ampeghili Musa akiwakonya, “Kugha hayu Kilisito ateweleka?”
5Weni wakamyanga, “Ateweleka ku Betelehemu gha Uyahudi,” wakayanga. “Handa iyandikilwi na Mlota wa Sapanga,
6Na wenga Betelehemu kumlima gha Yudasia,
ni mkulu paghati gha mimbwani imanyika Kuyudea,
na atewela kilongosi wa Waizilaeli,
na mweni atelongosa wandu ghangu.”
7Hinu, Helodi akawakema kwa kifisu wala wamanya ndondwa, akawakonya apati kumanya lipindi ligha chakaka lya hila ndondwa ihumila. 8Hinu akawalaghila wayendi ku Betelehemu akiwalongela, “Myendi mkalolese kwa umaha habali gha mwana hayu. Na mwenga pamumlola, mniyegheli habali ili na nenga mbati kuyenda kumyupa.”
9Badili gha kumuyughanila nkosi, wala wamanya ndondwa wakayendela njila, na bwitu wakalikangasa kulola hila ndondwa ikiwalongosa, na weni wakaikovekela mbaka pala paaweleka Mwana. 10Hila ndondwa paigholoka kulila lighuta luheku lwao lukayongeseka. 11Hinu, wakayingila mghati lighuta, na wakamlola Mwana yula pamonga na Malia nyongo ghaki, wakatova manung'una na kumuyupa Mwana Yesu. Kuulongolo wakawoposola hupo zyau na kumtolela, hupo hazi, zahabu na uvumba na mtela kwa wana.
12Sapanga awakanisili kundotu yiwa wakotoho kuhuya kwa Helodi, wakahuya kuyenda kumlima ghao kwa kupitila njila ighangi.
Kutuwilila ku Misili
13Wamanyi wa ndondwa pawahuka, Mtumikila wa kundumba wa Sapanga akamuhumila Yusufu kundotu akamlongela, “Uhuki, umtoli Mwana na nyongo ghaki mtuwilile ku Misili. Mlikali haku mbaka pala nitewalongela, kwaikiva Helodi angupala amkomi Mwana hayu.”
14Hinu, Yusufu akatandamuka, akamtola Mwana pamonga na nyongo ghaki, akahuka uhiku, akiyendela ku Misili. 15Akatama kula mbaka Helodi pakahova. Hali lihumila, ili litimili lila lilongelilwi na Bambu kwa mlomo wa mlota ghaki akilonga, “Nimkemili Mwana ghangu ahuki ku Misili.”
Wana wangukomwa
16Helodi pamanyili yiwa wala wamanya ndondwa wawelili wamlulunganya, akahyoma nesu. Hinu akalaghila kukomwa wana wogha walumi wala weni kuwelekwa machuva maivili kuhyetu kumlima wa Betelehemu na mahala kula kungutindila mlima hula. Agholile nagha badili gha kulongelwa na wala wamanya ndondwa.
17Mghalu hau ukaghola kuwoneka yiwa milando ailongelili Yelemia mwenekuwela mlota wa Sapanga itimila.
18“Lilowi likayughanika haku Lama,
kililo na malumbililo ghatangala. Laheli anguwalilila wana ghaki,
kalema kunyamaliswa kwaikiva wogha wahova.”
Kuhuma ku Misili
19Badili gha kihu kya Helodi, mtumikila wa kundumba wa Sapanga akamuhumila Yusufu haku Misili kundotu, 20na kumlongela, “Umtoli, nyongo na Mwana muhuki, mhuyi kumlima wa Izilaili kwaikiva wala wawelili wakihakula kumkoma mwana wahova kala.” 21Hinu, Yusufu akatandamuka, akamtola mwana pamonga na nyongo ghaki, akahuya kumlima Izilaili.
22Ila Yusufu pakahyoghanila yiwa Alikelao, mwana wa Helodi, kawela nkosi wa haku Yudasia akitola fwasi gha tati ghaki, akatila kuyenda kula. Na mweni badili gha kukaniswa kundotu kwa lihanja lya ipili, akayenda mbandi gha Galilaya, 23Akahamila kummbwani waukema Nazaleti. Ndiwa itimilile milando ilongelilwi na walota wa Sapanga, “Atekemwa mundu wa Nazaleti.”
Iliyochaguliwa sasa
Matayu 2: NTMbBL2025
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The New Testament in Mbunga @The Word for The World International and Mbunga Language translation, 2025. All rights reserved.
