Ichedendik 40
40
Josẹph usi ẹyaakha ch'adachen p'agbakkọhbhọ attaar
1K'okpe mạnna gwạnọ, wa ọnạng kw'n'ọnạng ọvaarnạng kw'Ijip atwuk, ọttạra ọnạng kw'n'usi uchiattọhk pfẹ, apini aro kwabẹ, kw'ode Phero, kw'ode ọvaarnạng kw'Ijip. 2Wa Phero ọdwạkh-ẹ otena atọhmnạng mbọ pẹ afa, p'ade ocho kw'anạng p'n'anạng ọvaarnạng atwuk, ọttạra ocho kw'anạng p'n'asi uchiattọhk anạng ọvaarnạng. 3Wa ọtạk bẹ ọta ọkpạkha k'ọchọhm kw'ochonạng kw'akker-agbakkọhbhọ, k'ọgbakkọhbhọ-ter ngwọ gwạnọ kw'abẹ akpạkhẹ Josẹph. 4Odennạng kw'ọgbakkọhbhọ-ter ngwọ otte bẹ ọbọhk ọnạng Josẹph, Josẹph okkeri bẹ.
Masẹ anạng mbọ afa k'mgbakkọhbhọ ayima k'okpe ma, 5k'irunguwu jạnẹ, ajunung mba afa, oyok kw'n'ọnạng ọvaarnạng kw'Ijip atwuk, ọttạra oyok kw'n'usi uchiattọhk, p'abẹ akpạk k'ọgbakkọhbhọ-ter, ọnạng-ọnạng ọttaar idachen s'ikhaam ẹyaakha ch'ede nkhạmọ kha nnọ s'oyok ọttaar.
6Masẹ Josẹph ukwu k'ekpebha, n'ose bẹ́, abẹ aning ikwosi-ikwosi. 7Ma wọ n'ọbạbhọ atọhmnạng p'Phero p'abẹ atwạnọ ayima mgbakkọhbhọ, k'ọchọhm kw'otte kwẹ bẹ́, “Ode yạn kw'chemma nttem iphyaangẹ bạnga ẹmma oche ngwa o?”
8Abẹ apọhn-ẹ bẹ́, “Amạna mba anạng afa anttaar adachen. Okhenka, ọnạng kw'm'usi ẹyaakha ch'adachen mbọ ọnạng mạna kòde.”
Josẹph n'oben-ẹ bẹ́, “Atotokhạn, akpaakh-m adachen pabạnga, Ubinọkpaabyi wọ n'ọnạng ẹyaakha ch'adachen phyibh e.”
9Ma wọ ocho kw'anạng p'n'anạng ọvaarnạng atwuk, ọkpaakhẹ Josẹph idachen sẹ, ọbẹ́, “Amma nttaar s'ichi ch'grep ebe-m k'ititikha. 10Ichi njọ ch'grep ẹkhaam abọhkha ataan. Masẹ abọhkha mbọ ayini agbo bẹ ẹ, ẹtạma ayoyo sisi, ẹyạm adwuk p'agrep, apyẹ ẹbhạkhẹ ekhor. 11K'ọbọhk kwaam, ntim nkkọbh kw'ọvaar Phero, kw'mmyạn adwuk mbọ p'grep nge, ntạkha nnạng Phero.”
12Ma wọ, Josẹph ọnang-ẹ ẹyaakha bẹ́, “Achibọhkha mbọ attaan ayini iwu ittaan. 13K'iwu ittaan k'oro, Phero m'oreng-ọ k'mgbakkọhbhọ, ọbạra ọnạng-ọ ininga chọ, bạra n'anạng-ẹ atwuk k'oche kw'uwa n'acheden asi. 14Okhenka, okpe kw'idik m'ijibh inạng-ọ, totokhạn khaam kha bonu, kpaak Phero bẹ́, amma nning kha, ọfha ọrạbh-m k'mgbakkọhbhọ nna. 15Amma wa, abẹ avạkh-m k'ẹfa k'isek s'aHiburu atima akwu maa ofhon ngwa. Masẹ mbạra nninga maa ofhon ngwa, amma udik gwạnọ-gwạnọ nạnja, kw'wạra m'nsenga akwẹ nnyima mgbakkọhbhọ nna s'nnyim ma.”
16Ma o, masẹ ocho kw'anạng p'n'asi uchiattọhk f'ọvaarnạng, osẹ bẹ́, ẹyaakha s'idachen s'oyok ide ikkasẹ inạng-ẹ, oben Josẹph bẹ́, “Amma mgba nttaara idachen e. Ma idachen nnọ, ntọhk ọkhạrạbaang ọttaan p'abrẹd k'echo. 17Ichiakpo k'akhira-k'akhira py'Phero m'uchi, ining k'ikhạrạbaang s'ẹrạng-ẹrạng k'ẹtaanga, okhenka, ọnọhn f'iyokhu n'ukwu ochoru ichiakpo mbyọ ma akhaam k'echo, itima efona.”
18Ma wọ, Josẹph ọnạng-ẹ ẹyaakha bẹ́, “Idachen nnọ iyini bẹ, ọkhạrạbaang mvọ ọttaan, uyini iwu ittaan. 19K'iwu ittaan s'ororo, Phero m'upu-ọ echo, ọbạra ọtạkha ibukhu sọ orena k'ichi, ọnọhn vọ m'uchi atenạng pọ phyibh.”
20Ma iwu njọ ch'ettọng ittaan, Phero usi erobha ch'utim ujima iwu ch'ọmmaan, obher atọhmnạng pẹ phyibh. Ukwu ọnạng ẹfa bẹ́, abẹ ata arengi ocho kw'anạng p'n'anạng ọvaarnạng atwuk, ọttạra ocho kw'anạng p'n'asi uchiattọhk anạng ọvaarnạng, obe bẹ k'ititikha s'ayok. 21Ọbara ọkpa nnạm ọnạng ocho kw'anạng p'n'anạng-ẹ atwuk, ininga chẹ, obạra onạng Phero atwuk k'oche kw'uwa n'ọnạng-ẹ. 22Okhenka, n'ọnạngẹ ẹfa bẹ́, abẹ ape echo ch'ocho-nạng kw'n'usi uchiattọhk f'ọvaarnạng, abẹ abạra atạkha ubukhu kwẹ arena k'ichi, k'oche kw'uwa Josẹph kk'ẹyaakha ocheden usia ọnạng bẹ.
23Okhenka, ocho kw'anạng p'n'anạng ọvaarnạng atwuk, n'obonu bẹ́, ọkpaak ovaarnạng udik kwidede otena k'Josẹph kw'utim uning k'mgbakkọhbhọ.
Iliyochaguliwa sasa
Ichedendik 40: mfn-x-os
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
©️2025 West Africa Christian Mission