Ichedendik 31
31
Jekọb ọrạbhọ k'Laban k'mbọhk
1Wa Jekọb ọbhaang bẹ́, ajunungva p'Laban n'akpaak bẹ́, “Jekọb, kk'arạkhạmaan ọttạra mvu s'otte kwamạna ọtạkha pyibh ọkhaama. Ẹkhaama chẹ phyi-phyibh ibin k'otte kwamạna.” 2Jekọb ọbạra ose bẹ́, Laban dạk kẹ ititikha ikkasẹ k'nọ́nạng.
3Ma wọ Ọvaar Ubinọkpaabyi obeni Jekọb bẹ́, “Sọhng abhạna ator anạng pọ, ọttạra ẹchọhmfhạr ch'atte. Amma m'nninga abọ, mbạra nkkaan-ọ.”
4Osenga ma, Jekọb ọtọhm ẹkkaabha bẹ́, Rachẹl ọttạra Lea akhebh-ẹ kha ibyi s'n'okkeri nten sẹ. 5Oben bẹ bẹ́, Amma kk'nsia bẹ́, ititikha s'atte kwabạnga n'okker-m ibikhi nna, ikkasẹ sạng, okhenka, amma nsong ma bẹ́, Ubinọkpaabyi kw'otte kwaam okpobh, uning abamẹ. 6Abạnga asong ma bẹ́, amma kk'ọtọhm nsia ọttạra ẹfa chaam phyibh nnạng atte kwabạnga, 7oseng ma, kk'aam ọbọra k'ikpe saabhada. Okhenka, Ubinọkpaabyi abẹ nóchera bẹ́, usi-m ọttọhk. 8Okpe kw'obeni bẹ́, Nten nnọ s'ikker-ọkker ẹrọ ide ẹtaam chọ, nten phyibh bạra imaan ayok p'akkẹr-ọkkẹr. 9Ma ukhira ngwọ gwọ, Ubinọkpaabyi ọtạk nten k'atte kwabạnga k'mbọhk, ọtạkha ọnạng-m.
10“K'iwu mạnna jạnẹ, k'okpe kw'nten n'ivura ayok, nttaar idachen s'nse bẹ́, avudim p'n'avura avukpokha, ede py'ẹkkẹr-ọkkẹr, ọttạra py'epe abhaangẹ. 11K'idachen, itọhmọ s'Ubinọkpaabyi iyer-m bẹ́, ‘Jekọb.’ Amma nchera bẹ́, ‘O o, kkeri amma maa e.’ 12Ẹma n'oben-m bẹ́, ‘Yangẹ kha ẹrạng, m'ase bẹ́, avudim p'n'avura avukpokha phyibh akkẹr-ọkker, ọttạra py'epe abhaangẹ. Nsi akwẹ ode oche ngwọ ukwuru bẹ́, kk'udik kwidede kw'Laban n'usi-ọ nsia. 13Amma wọ nde Ubinọkpaabyi kw'Bẹtẹl, ma ibyi s'abyeng ẹta ana k'echo, abạra atạkha echekha ma anạng-m. Nemeden bina rik ofhon ngwa, abhạna k'ọmmaana-fhon kwọ.’ ”
14Ma wọ, Rachẹl ọttạra Lea n'apọhn udim kwabẹ, Jekọb bẹ́, “Ọttọhk f'm'ambạra anchi otte kwamạna obo k'ẹkhaama chẹ phyibh, dạk kóde. 15Otte kwamạna n'ọtak mạna masẹ akhikhennạng, k'ọbada mạnkeni sạng kw'ọnạng mạna, kk'amina-kpokha pamạna uchia bẹ phyibh. 16K'udik ọkka, si oche kwidede kw'Ubinọkpaabyi kk'ọ obena bẹ́, asi, ukwuru bẹ́, Ubinọkpaabyi kk'ẹkhaama ch'otte kwamạna ọtạkha phyibh, n'ọtạk ọnạng amạnamba, ọttạra iva pamạna.”
17Ma wọ, Jekọb ubin, ọtạkha iva pẹ, ọttạra ipanạng pẹ afa, ọnạna k'akamẹl, 18n'utim itirakpo pyẹ phyibh py'kk'ọkhaama k'Padan-Aram ubina osenga bẹ́, ukwuna otor otte kwẹ, Isaak k'Kenaan.
19Masẹ Laban kk'ofona bẹ́, ọta uphyiri arạkhạmaan pẹ aphyạbha, ikwanạng kwẹ, Rachẹl, oseng ọta ufu akpatava p'otte. 20Ayongu ma, wa Jekọb ọbọhr Laban kw'ubin Aram ọbọhra, khẹ nótekha bẹ́, nabạra ọrạbh ofona. 21Ma wọ, Jekọb ọtạk ẹkhaama chẹ phy-phyibh, ojekha ọraanga kw'Yupharetes, okkeri ititikha k'ukhubha kw'okpecho kw'Gilead, ọrạbh ofona.
Laban ukhubhu Jekọb
22Masẹ ottong iwu ittaan, ma wọ abẹ n'atekhi Laban bẹ́, Jekọb kk'ọrạbha. 23Laban ọtạkha ivọkka pẹ p'atwạnọ abẹ, abẹ akhubh Jekọb iwu isenọfa, tạrr abẹ n'avạkh-ẹ kha akpecho p'Gilead. 24Ma wọ, Ubinọkpaabyi uyini Laban kw'ubin Aram abẹ k'idachen ma irungu njọ, ọtwạr-ẹ itọhng, bẹ́, “Tik ifor sọ, nạngẹ ọtọhnga gwạnọ-gwạnọ akpaakhẹ anạng Jekọb, upyibh-upyibh, ujibh-ujibh.”
25Masẹ Laban okhebh Jekọb, Jekọb kk'ukkira kwẹ usia k'akpecho p'Gilead. Wa Laban ọttạra ivọkka pẹ akwu asi ibyibhingasẹ sabẹ abaanga ma dạkhẹ. 26Masẹ abẹ akhebh ayok, Laban ọbạbh Jekọb bẹ́, “Asi yạn abọhr-m, atima apanạngva paam arạbh afona masẹ anạng p'abẹ achi k'ekpong? 27Oseng yạn kw'n'afu-ufu arạbh, abạra abọhr-m o? Usi yạn nạn khaam nátekha bẹ́, n'abạra afona, ọfha ntima ọkkọhna ọttạra ukhira, nnik bạnga k'eden o? 28Khaam ọbọhk mesese náttia bẹ́, mbaakha iva paam ọttạra iva p'abẹ ettem, bạrasẹ abẹ n'afon. Efon ch'asi ma nérebha a. 29Amma nkhaam ẹfa ma wạra m'nsi-ọ ọttọhk, okhenka, chạnachẹ k'irungu, Ubinọkpaabyi uyin-m abẹ k'idachen ọtwạr-m itọhng bẹ́, ‘Tik ifor sọ, nạngẹ ọtọhnga gwạnọ-gwạnọ akpaakhẹ anạng Jekọb, upyibh-upyibh, ujibh-ujibh.’ 30Masẹ uttum-ọ bẹ́, abhạna k'atte k'ofhon, asi yạn afu akpatava paam o?”
31Jekọb ọpọhna Laban bẹ́, “Amma mfon oche ngwọ ukwuru s'ojor-m bẹ́, m'avạkh-m apanạngva pọ ana k'ẹfa. 32Okhenka, de ase ọnạng mạnna wạnọ kamạna k'ikhaana kw'utim akpatava pọ, tte ọnang nwọ nạngẹ akpen urukhu. Maa ititikha s'anạng pamạna, ọma oyeni kkeri, de amma ntim ọttọhk fidede f'ode pfọ, tạkha” Wa Jekọb kósong bẹ́, Rachẹl kk'akpatava p'ote ufua.
33Mạ wọ, Laban ọnwa k'ukkira kw'Jekọb, ọttạra kw'Lea, ọttạra kw'atọhmnạng p'ipanạng afa oror akpatava pẹ, okhenka, ọtọhk vạnọ-vạnọ núsia. Masẹ uyini k'ukkira kw'Lea, ọnwa k'ukkira kw'Rachẹl. 34Wa Rachẹl kk'akpatava p'otte ọtạkha oge k'ẹkpa ch'ibubh ẹyạr-ninga ch'kamẹl kwẹ, uninga ẹyạr onyema pyẹ. Laban ọfạngọ ibyi sidede, akpatava pẹ núsia.
35Ma wọ, Rachẹl obeni otte bẹ́, “Aro kwaam, totokhạn nạng-ọ ọdwạkhọ s'nạn nkke mbina mbobe kakhọ k'ititikha, ukwuru bẹ́, ntto ifor.” Ma o, Laban ofona ororo ọfạngọ k'ibyi sidede, akpatava pẹ núsia. 36Jekọb ukwu ọdwạkh-ẹ Laban abẹ, n'obeni Laban bẹ́, “Amma oyeni, njẹ-ọ bạng udik o? Bạng ipyibha khira jọ kk'nsia o, ch'aseng achẹ akhubh-m ẹkhạm-ẹkhạma oche ngwama o? 37Kk'ọttọhk fidede f'ode pfaam afạnga, bạng ọttọhk vọ ase f'ode pfọ? Jẹ pfẹ ma ititikha s'anạng pamạna, tte abẹ akpaara iponga s'amạna mba anạng afa.
38“Kk'abọ nninga k'icho mạnna ẹrạbh. Ma icho nnọ phyibh, arạkhạmaan ọttạra, mvu sọ s'ifhạr iyini kíde. Ẹrạkhạmaan-dim chọ nạ́nchia. 39Eten chọ ch'mkpaten ifhọ ch'ntim nkken-ọ kéde. Ọttọhk pfọ f'udimi k'akhaam k'mbọhk, f'nạ́n ntwukha kóde. 40Wa akpen paam ade p'ekkekhạra ẹmaanẹ k'ẹya, ekhokh isi-m k'irungu, mbạra ntim ọda. 41Wa akwẹ ode oche ngwọ k'icho ẹrạbh s'nning abọ. Nsi ọtọhm nnạng-ọ k'icho sọnachi, ọfha ntạkha aminava pọ afa k'ọbada, ọttạra icho isajạnẹ s'nkkeri nten sọ, ayongu ma, ayekhi f'ọbaan bẹ́, anạng-m. 42De wạra nạn Ubinọkpaabyi kw'otte kwaam, kw'ode Ubinọkpaabyi kw'Abraham ọttạra Isaak akpobh, núdia kw'uning abamẹ, njanna wạra kk'aam mbọhk-mbọhk akhubha. Okhenka, Ubinọkpaabyi kk'irem saam usia, ọbạra ose ọtọhm f'kk'nsia, ẹgwọ usi, ọkpọ-ọ eden chạnachẹ k'irungu bẹ́, nạng-m ipyibha asi.”
43Ma wọ, Laban n'ubhin Jekọb bẹ́, “Ipanạng mba ade iva paam, iva mba phyibh ade iva p'iva paam, nten nna ibạra ide saam. Ọttọhk fidede f'akhaam maa, ode pfaam. De akker-okkeri, napra wọ m'mbạra ntạkha iva paam, ọttạra iva p'iva paam amaanẹ k'mbọhk sọ dạkhẹ? 44Kwu antạkha echekha annạng ayok, ch'mede masẹ nttẹnsẹ kw'amma ọma abẹ.”
45Ma o, Jekọb ọtạkha ẹta, ofho, achẹ ebe masẹ ntumu. 46Ma wọ, Jekọb n'obeni anạng pẹ bẹ́, “Abạnga atobha ata.” Abe atạkha ata atobha k'ukwung, abẹ abạra aninga abaanga ọtakwung ngwọ achi uchiattọhk. 47Wa Laban oyeri ọtakwung ngwọ Jega-Sahaduta, Jekọb oyeri kwẹ Galeed#31.47 Galeed k'eHiburu uyini ọta-kwung kw'nttẹnsẹ..
48Laban n'obeni bẹ́, “Chemma, ọtakwung ngwa ode nttẹnsẹ kw'amma ọttạra ọma.” Ẹgwọ usi, abẹ ayeri ibyi nnọ Galeed. 49Wa Laban ọbạra oyeri ibyi nnọ Mizpa, oben bẹ́, “Tte Ọvaar Ubinọkpaabyi okkeri mạna masẹ m'antte ayok ọbọhk, ọnạng-ọnạng ofona kwẹ. 50De atim iva paam k'irem, ọbạra ode bẹ́, m'ata atạkha ipanạng adwạkh-ọdwạk kw'oyongu iva paam, ọbạra ode bẹ́ ọnạng mạna núsia, jima bẹ́ Ubinọkpaabyi wọ ode nttẹnsẹ kw'amma ọma abẹ.” 51Laban ọbạra oben Jekọb bẹ́, “Kkeri ọtakwung maa, kkeri ntumu s'kk'nttima k'ottemkwẹ kw'amma ọttạra ọma abẹ. 52Ọtakwung ngwa, ọttạra ntumu nna, abe masẹ nttẹnsẹ bẹ, okpe dạk kòde kw'amma m'mbạra njekha ibyi nna nkwu nsi ọma ipyibha, ọttạra bẹ́, okpe dạk kòde kw'ọma m'abạra ajekha ibyi nna akwu asim amma ipyibha. 53Tte Ubinọkpaabyi kw'Abraham, ọttạra Nahọr, Ubinọkpaabyi kw'otte kwabẹ okpobh, ọkpaara iponga k'echekha nja, ch'amma ọttạra ọma abẹ.”
Ma wọ Jekọb n'ọtạk echekha k'eche ch'ojora f'otte kwẹ Isaak. 54Jekọb n'ọtạk ọrạkhạmaan ọfhọ, utima ọfọhnọ ẹja ọnạng Ubinọkpaabyi k'ukhubha kw'akpecho, ọbạra oyeri anạng pẹ abẹ akwu achi uchiattọhk ma. Masẹ abẹ kk'uchiattọhk achia phyibh, abẹ n'ayim ma tạrr iwu echobha.
55Masẹ iwu kk'echobha, Laban ubina odo ifor s'm'ofona, ọbaakha iva pẹ afa, ọttạra iva p'iva pẹ, ọbạra ọyọbh bẹ itta, brasẹ n'ubin ọbhạna k'akhẹ k'ofhon.
Iliyochaguliwa sasa
Ichedendik 31: mfn-x-os
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
©️2025 West Africa Christian Mission