Ichedendik 20
20
Abraham ọttạra Abimẹlẹk
1Abraham ubin ofona k'ẹkhạma ch'Nẹgẹv, ọta uruk k'ottemkwẹ kw'ifhon s'Kadẹsh ọttạra Shur. Wa uning k'Gẹra k'okpenwa sạsạkhẹ. 2Ma ibyi nnọ rọ wa Abraham ọkpaakhẹ anạng bẹ́, ikwanạng kwẹ, Sara, ode nnwotte kwẹ. Ma wọ Abimẹlẹk kw'ode ọvaarnạng kw'Gẹra ọtọhmọ abẹ ayeri Sara anạng-ẹ, ọtạkh-ẹ.
3Okhenka, Ubinọkpaabyi uyini Abimẹlẹk abẹ k'idachen, usi ẹyaakha ọnạng-ẹ bẹ́, “Ọma kk'pạpe apua e, ukwuru bẹ́, ikwanạng nwọ kw'atạk achok ma ọchọhm kwọ, kk'udim ọba e.”
4Okhenka, wa Abimẹlẹk ọttạra Sara abẹ ayok abẹ tạm náyima, ma wọ, Abimẹlẹk ọbạbhọ Ọvaar Ubinọkpaabyi bẹ́, “Attitte, ma n'abạra atạkha anạng p'nạn ipyibha tạm n'asia afhọ-o? 5Abraham oyeni wọ ọkpaakh-m bẹ́, Sara ode nnwotte kwẹ. Sara oyeni ma akhẹ k'ifor ọbạra ọkpaakh-m bẹ́, Abraham ọttạra ẹma abẹ ade ivotte. Amma udik ngwa k'ẹyaakha nạ́nsia o.”
6Ma o, Ọvaar Ubinọkpaabyi oben Abimẹlẹk k'idachen bẹ́, “Uwe-e, amma oyeni nsonga ma bẹ́, udik ngwa k'ẹyaakha násia, ẹgwọ usi bạra mkpọ-ọ eden ọfha nạngẹ ipyibha k'ititikha saam asi, mbạra mkpọ-ọ eden ọfha abạnga nạngẹ ayok abẹ ayim. 7Nemi eden tte ikwanạng nwọ ọbọhk nạng udim kwẹ, khiri udim ode ọnạng kw'nusi ẹyaakha. M'ọjọhm atim ọnạng-ọ aruk akpen. Okhenka, de nạn khẹ ọbọhk náttia, songa k'udik ọkka bẹ́, ọma ọttạra ẹchọhmfhạr chọ phyibh m'apope.”
8Ma wọ, s'iwu echobh bẹ hii, Abimẹlẹk oyeri adennạng pẹ phyibh akwu, ọtạkha idik nnọ phyibh otek bẹ. Ojora fididen ọvạkha bẹ. 9Ma wọ Abimẹlẹk oyeri Abraham, ọbạbh-ẹ bẹ́, “Bạng udik-khira gwọ kw'asi mạna ma? Ntto yạn k'akhọ k'ititikha, kw'aseng akwẹ anạng amma ọttạra anạng paam ipyima demachẹ nja? Udik kw'ayom maa nọ́baana a.” 10Abimẹlẹk ofon ororo ọbạbh Abraham bẹ́, “Bạng ọtọhk vọ aseng apfẹ asi-m udik demakwẹ ngwa?”
11Abraham ọpọhn-ẹ bẹ́, “Amma nkkẹ bẹ́, anạng p'ofhon ngwa Ubinọkpaabyi kạnárạbh, mbẹ abẹ akke ma afhọ-m ukwuru ikwanạng kwaam. 12Ayongu ma, ikwanạng nwa ode nnwotte kwaam, kw'otte wạnọ ofhonu mạna, ankhenka ankhạmọ ab'ọkka. Amma ntạkh-ẹ masẹ ikwanạng kwaam. 13Okpe kw'uwa Ubinọkpaabyi usi-m mbina nnik ẹchọhmfhạr ch'otte kwaam, nsenga mfona k'ibyi k'ibyi, amma mbeni Sara bẹ́, ibyi sidede s'm'anta, n'atek anạng bẹ́, amma nde nnwotte kwọ, ọfha atima ma akhọhkh-m idạdaakha.”
14Ma wọ Abimẹlẹk ọtạk arạkhạmaan ọttạra mmaam, ọttạra abira p'ajunung ọttạra p'ipanạng, ọnạng Abraham, ọbạra ọtạkha Sara ọkpa nnạm ọnạng-ẹ. 15Ma wọ Abimẹlẹk n'obeni bẹ́, “Kkeri, isisek saam rọ ining-ọ ma ititikha, ruk k'ibyi sidede s'idaakh-ọ.”
16Abimẹlẹk ọbạra oben Sara bẹ́, “Kkeri, amma m'nnạng nnwotte kwọ ashẹkẹl p'silva nnọhna mfa ukuma arạbh jobh. Ma wọ m'ode ẹkhọhkha bẹ́, udik ngwọ kk'ọsa, ọttạra bẹ́, ipina jạnẹ jạnẹ kàkhaam ma udik ngwọ.”
17Ma o, Abraham ose njọhm ọnạng Ubinọkpaabyi. Ubinọkpaabyi ukwu ubina ọnạng Abimẹlẹk, ọttạra ikwanạng kwẹ, ọttạra abira pẹ p'ipanạng, ọfha abẹ amaan adạkhẹ iva, 18ukwuru bẹ́, wa Ọvaar Ubinọkpaabyi kk'Sara, kw'ode ikwanạng kw'Abraham abẹ osenga usi ipanạng p'ẹchọhmfhạr ch'Abimẹlẹk phyibh ajidim.
Iliyochaguliwa sasa
Ichedendik 20: mfn-x-os
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
©️2025 West Africa Christian Mission