Matiyu 10
10
Yesu saka Yayagizi yi gom sha bi
Mk 3.13-19; Lk 6.12-16
1Yesu sukwa yayagizi yi gom sha bi e ba su sori de su butu mumungu aworo nja de su worikye kowoni suwo nja suwuta.
2Da mu e shiya ma seni yaamanki gom sha bi: Ni pari, Sima, de sua sukwa yi Biturusu, nja yayiwa e yi Anduru; Yakubu yaa ni Zabedi, nja yayiwa e yi Yaaya; 3Pilibu nja Batalomi; Tomasi nja Matiyu nsu keleba gendu; Yakubu yaa ni Alipa nja Tadus; 4Sima de ma Kaana nja Yawuda Isikariyoti, nsude butu Yesu a beyi.
Yesu Saka Yayagizi yi Gom sha Bi
Mk 6.7-13; Lk 9.1-6
5Menza gom sha bi Yesu saka su ni manki nkye: Kede ku te a siki worede su shina Obagizi nja geri Samariya ba. 6Sede ku te anya Izireyila de su ma kankye timshiya worede su beta . 7Nde ku te, ku gye su manki nkye: <Solota gizi bisi yi kusa.> 8Ku worikye nsu suwo, ku dege worede su muntu nleyi, ku worikye worede su ma kputuru, Ku kula arizeni, kyawuta ku keleba kyawuta ku beyi. 9Kede ku keyi zinari ko aziripa ko riga, ko gyolo ba; 10Kede ku la Angala ba, ko riga, ko takalami ko gwala. Nsu ANKI yi kyawu de su beyi nani wuta mbode e yi.
11<<Guru totolo geri ko dende geri de ku yuru, ku bila nse gangasi anya ni ku zunwa nja shi ari nana de kwa bila anya ni. 12Nde ku yuru a siki gizi, ku yi su selema. 13Nde nsu gizi ni keleba ku, se selema aku e ma Nja e shi; nde e ma ba bila de selema aku e kuma biya ku. 14Nde nse da yi ku naba ba ko e zi beta aku ba, ku kekebe kula ni seni ku nde kwa bila gizi ko totolo geri ni. 15Na gye ku gaskye yaa pi zi toseyi ntani Sodoma nja Gomora, a nana shiriya ntani kesa de su ki ku.
Genbeki Nsu zo
Mk 13.9-13; Lk 12.11-12; 21.12-19
16Na saka ku a woze kankye timshiya a siki kere bikiya. kuma nsu wayo nta mesi kuma miyo kankye nkurisha.
17<<Ku sa ndani ni ntani durinya mu; Sua la ku ba yaya gwala de su dukwa ku a siki Kolonwa. 18Sobon eni sua zo nku a geba toree nja seleki de ema su sheeda nja worede shina Mirikisi ba. 19Kwanki de su ka ku, kede ku damu ni mbo de kwa pala ba ko mina kwa pala. A kwanki ni Mirikisi yaa ba ku mbo de kwa pala. 20Sobon oku na kwa yi beta ba; Aworo ni Adaa ku yaa yi beta a siki ku. 21Yayuwa sua la yayuwa su a beyi de su kisa su; yomuna adaa yaa yi yaya yi, yaya sua yi geba nja nsu adaa su sua sa su de su muntu. 22Guru ntani sua ki ku sobon eni, sede du nsude sakisi nsori ari karishe yaa sila. 23Nde su ki ku a geri daa ku yi gudu de ku kuma te a geri daa. Na gye ku gaskye kwa gama gyowe guru kesa Izireyila ba de Yaa nsebeki yaa kuma zo. 24Yaa makaranta yaa taba pi male yi ba, ko bunwa yaa pi nsugizi yi ba. 25E deta de yaa makaranta e ma kankye male yi, nja bunwa e ma kankye nsu gizi yi. Nde su sukwa tolense gizi nkye tolense arizeni, yaya gizi sua sukwa su nkye kona!
Nsude Su Zi Womba yi
Lk 12.2-7
26Sobon yomu kede ku zi womba su ba, ba mbo de ma a boyi de sua de yaa ki ma a bure ba, ko mbo de ma boyi de sua shina yi ba. 27Mbo de Na gye ku a siki dopuwa ku pala yi a siki asikye, nja mbo de ku zi a kuni ku pala yi a pegye. 28Kede ku zi womba worede sua kisa nki ku sede sua kisa leyi aku ba; sede ku zi womba Mirikisi, e shi de yaa kisa nki aku nja leyi aku de ala kutiri te siki wuta. 29Nkwankwala bi sua la see toro bi na bo, ba daa a siki asu de puari a kesa ba ni shina adaa ku. 30Ko gesa kiya ku guru su kirigayi. 31Sobon yomu kede ku zi womba ba; ku mani anpani pi nkwankwala nyowa.
Nana Yeda ni Kiristi A geba ntani
Lk 12.8-9
32Sede guru nsude nana kiya su nkye su ma nna na a geba ntani, Eni ma Na nana nkye su ma nna na a geba adaa na ni bisi. 33Sede guru nsude ki ni a geba ntani, Eni ma na ki yi a geba adaa de ma a bisi.
Ba zunwa Selema naba Sede Topula
Lk 12.51-53; 14.26-27
34Kede ku geni nta Ni zo de ni keyi selema na zo a durinya. ayi, Ni zo ku nselema ba, sede Ni zo ku ni obalaba la. 35Ni zo de sa yaminzi nja adaa yi de su yi rikishi, yaamase nja amaa yi, mase amere nja minzi yi. 36Obokigeba ake yaa ma ntani siki gizi ke.> 37Nsude yaa so Adaa yi ko amaa yi pi ni e deta de yaa ma nna ba; Nsude so yaa yi ni minzi ko ni mase pi ni e deta de yaa ma nna ba. 38Guru nsude la gidiri yi de e biya ni ba e deta de yaa ma nna ba. 39Du nsu de yaa so leyi yi yaa lesa yi; du nsu de lesa leyi yi sobon eni yaa samu yi.
Nani wuta
Mk 9.41
40<<Du nsude keleba ku eni na e keleba, nja nsude keleba ni e keleba nsude e saka ni la. 41Du nsude keleba anebi sobon de e ma anebi yaa keleba nani wuta ni anebi. Guru nsude keleba nse gangasi sobon de ema nse gangasi yaa keleba nani wuta ni nse gangasi. 42Guru nsude e ba nseda koshiya riki a siki keseyi yaya naa dende mu sobon ema yayagizi na, Na gye ku gaskye, yaa lesa nani wuta yi ba.>>
Iliyochaguliwa sasa
Matiyu 10: Gaa
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Word for the World International and The Word for the World Nigeria
