Luka 4
4
Mungu Nse Gwadaa Yesu
Mat 4.1-11; Mk 1.12,13
1De Yesu, sika ni Aworo ni Mirikisi, kuma dege a totolo riki ni Yoda Aworo ni Mirikisi biya nshi butu te a denka, 2anya de obiri gwada e yi nana aribeyi. A siki nana mu e si mbodaa ba, se a karishe e zi nyunwa.
3Obiri pala gye Yesu nkye, <<Nde ki ma yaa ni Mirikisi, gye dunsi mu de e ma mbosi.>> 4Yesu keleba nkye, <<E rubuta a siki takada Mirikisi: <Nsebeki yaama leyi sobon mbosi kede ba.>>>
5Anya ni obiri biya Yesu te bisi nyisa e nana e yi guru solota ni durinya. 6Obiri gye Yesu, <<Na ba ke guru yiko asu nja girima asu, guru mbo mu su la ba ni, e ni Na baa du nsu de Na so. 7Nde ki bowuta, guru yaa ma na ke.>> 8Yesu keleba, <<E ma rubuta a siki takada Mirikisi, ki bowuta Obagizi Mirikisi e ke de ki bowuta yi eshi ndandaa.>> 9Se anya ni obiri biya Yesu te Wurishelima E sa yi sakisi a kiya bisi gizi Mirikisi. E gye yi nkye, <<Nde ki ma yaa Mirikisi,>> tirimi nki e ke de ki zo a kisi. 10E ma rubuta a siki takada Mirikisi nkye:
<<<Mirikisi yaa beyi doka ba Meleku yi sobon e ke,
sua zo de su tengele ke nkyawu;
11sua la ke a bisi a nani asu,
kede seni e ke e buga adunsi ba.>>>
12Yesu keleba, <<Nkye su rubuta a takada: <Kede ki gwada Obagizi Mirikisi ake ba.> >>
13De obiri gama gwada yi guru kwanki piri mu se e bila e yi.
Yesu Para Anki a Galili
Mat 4.12-17; Mk 1.14,15
14Se Yesu kuma te Galili a siki sori ni Aworo ni Mirikisi, se nabari e yi gyewe anya guru keteri kesa ni. 15E kokoyi a siki kolonwa su, kowoni nse sua yobo yi.
Su ki Yesu a Nazere
Mat 13.53-58; Mk 6.1-6
16Se Yesu te a Nazere, anya de e yi girima a siki e yi, se a nana ni asibi e te a siki kolonwa, yiri de e saba te. Se e dege a bisi de e karanta. 17Su beyi takada ni anebi Ishaya anebi. De bure yi, e geni anya de su rubuta nkye:
18<<Aworo ni Mirikisi e ma nja ni,
sobon e shapa ni meyi
de ni beyi nabari kyakyawu ba worede ma potoruwa.
E saka ni de ni yi doka ni kunshe nsu worede ma jaru
nja de makapi su samu geni,
de su sika worede sua girika su,
19de Ni yi doka ba ntani a kiya kwanki de Mirikisi yaa yi ntani aniyeri.>>
20Se e lende takada, e kuma nshi ba nsu worede sua geni laki Mirikisi se zuzunwa kisi. Guru ntani de ma kolonwa lepa su kapa Yesu ndani, 21se Yesu sigeba ngye su nkye, <<Yawumu takada Mirikisi de su rubuta sika yiri de kwa zi,>>
22Guru asu su beyi sheeda kyakyawu a kiya yi nja su yi mamanki kelima kyakyawu de butu arishiya yi. Su minya nkye. <<Damu na ema yaa Yusupu ni bo?>>
23Yesu gye su nkye, <<Ni shina kwa gye ni keri beta mu: <Nsu megeni, ki worikye nkiya ke! Ki yi anya a geri ke mbode mu zi nkye ki yi a siki Kapanawu.> >>
24<<Na gye ku gaskye,>> e si geba, <<Ntani sua taba keleba manki ni anebi Mirikisi a geri e yi ba. 25Na gye ku gaskye a kwanki ni anebi Iliya muma mata makeyi nyowa de minji su muntu a Izireyila, de riki ni Mirikisi sakisi ni shekera wuku nja wonta shida, de su yi totolo nyunwa a guru a kesa ni. 26Du yomu su saka Iliya anya nse daa a siki asu ba, sede anya ni mase makeyi de ma a Zarepa dege Sidon. 27A kwanki ni Elesha anebi muman kputuru Nyowa a Izireyila, ba nseda a siki asu de samu worikye ba, se Naama ni kesa Suriya kede.>>
28Guru ntani de su ma kolonwa su yi anwashi de su zi mbode Yesu pala. 29Su dege a bisi, su jaa Yesu butu a woze totolo geri, su keyi ta a kiya totolo ogbo de su gini geri asu a siki e yi, de su kiri yi puari butu a kiya ogbo. 30Sede Yesu yi tepiya a siki nyowa ntani e te meyi.
Nseminji Nsu Mungu Aworo
Mk 1.21-28
31Se Yesu te a Kapanawu, geri a siki Galili, a nana asibi yaa kokoyi ntani.
32Mbode yaa kokoyi su ba su mamanki, sobon manki e yi e man yiko.
33A siki kolonwa lepa yaa minzi daa e ma anya ni de e man aworo nsu dola, nja mumungu aworo. E yi kuruwa nja totolo murinya, 34<<wululu! Mina ka bila nja mu, Yesu ni Nazere? Ki zo de ki kisa mu? Ni shina waa ma e ke, nsuseki ni Mirikisi!>>
35<<Yesu kwabe mungu aworo nkye!>> Yi shuru. <<Ki butu Bele yi>> Se mumungu aworo e la nse ni buga a kisi a geba asu se butu bila e yi e zi suwo ba.
36Guru ntani su yi mamanki su gye nkiasu, <<Mina da mu yaa kokoyi mu? nja yiko nja nana girima de yaa gye mungu aworo de sua butu a woze!>> 37Se nabari a kiya mbode Yesu yi kakada anya guru.
Yesu Worikye Ntani Nyowa
Mat 8.14-17; Mk 1.29-34
38Yesu bila siki kolonwa e te a gizi ni Sima. Amaa ni mata Sima yaa yi suwo ni mashapo, se su gye Yesu de worikye yi. 39Se Yesu jaa kusa anya de e ma shi e kwabe mashapo de Bele yi, dandani e dege a bisi e ba su mbosi.
40De nana puari, ntani keyi guru nsu worosu de su man suwo yiri yiri, se e sa nani e yi a kiya kowon daa e worikye su. 41Jaja mumungu aworo kwa butu bila ntani Nyowa, sua yi kuruwa su nkye, <<Ki ma Yaa Mirikisi!>>Sede e kwabe su se e nana su beta, sobon su shina e ma kiristi la.
Yesu Beyi Manki a Kolonwa
Mk 1.35-39
42De anya kwa yi Yesu te anya de nse daa ma ba. Ntani sua bila e yi sede su zo anya de e ma, sua so de kede e bila su gagaba. 43Sede Yesu nkye,<<Dole na Ni te gye su nabari kyakyawu ni solota Mirikisi ba worosu geri du, sobon yomuna su saka Ni.>> 44Se Yesu sigeba ni beyi manki a siki kolonwa ni kesa Yawudiya.
Iliyochaguliwa sasa
Luka 4: Gaa
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Word for the World International and The Word for the World Nigeria
