Luka 13
13
Juyi Ko Ki Bebeta
1Kuzukam, worosu su ntani de su ma anya ni su gye Yesu nabari ni ntani Galiliya de Bilatu sa su kisa su a kwanki de sua beyi Mirikisi sedeka asu. 2Yesu keleba nkye, <<Kuma yi tunani nta ntani Galiliya mu, su pi konwawa lepi a siki Galili sobon su sha Genbeki? 3Yi! Na gye ku, Sede ku juyi bila lepi aku ba oku ma guru kwa bebeta. 4Ko ntani gom sha takusi de laki Silomo puari a kiya su kwa yi tunani su yi lepi pi ririgye ntani de sua zunwa a Wurishelima na? 5Yi! Na gye ku, nde ku juyi bila lepi aku ba, oku ma guru kwa bebeta,>>
Kokongye A kiya Ntasi Bure de Mani Yaya Ba
6Se Yesu gye su abenshi nkye, <<Nseminji daa mani ntasi bori, de e nyunkwa a bikiya e yi, de e te de e nweyi yaya yi, sede e samu yaya a siki e yi ba. 7Se e gye nseminji de yaa kone bekiya nkye, <E yi shekera wuku mu ari kuzukam Na zo bila yaya ntasi bori mu ni samu mbodaa a siki yi ba. Sala e yi kutiri a kisi! mina sa yaa tele kesa yomu?> 8Se nsu gyala bikiya keleba nkye, <Tolense, bila e yi meyi shekera nsum; na yanka romu gyowe yi de ni nya yi taki. 9Nde e yi yaya gagaba, to, nde e te yi yaya ba, mu sala yi kutiri a kisi.>>>
Yesu worikye Mase Nsu Suwo A nana Asibi
10Nana ni asibi Yesu yaa kokoyi ntani a kolonwa ni Yawudawa. 11Se mase daa de mumungu aworo sayi suwo ni shekera gom sha takusi. Se tonkori eya mu ka ba. 12De Yesu geni yi, se e sukwa yi nkye, Iwa gizi, ki worikye a siki suwo ake.>> 13Se Yesu sa yi nani, dandani mase ni munka dege a bisi e yobo Mirikisi.
14Sede tolense ni kolonwa yi anwashi de Yesu worikye manshi mu a nana ni asibi, se tolense ni kolonwa ntani de su ma anya ni nkye, Mu mani nana shida de mwa yi yanki. Se ku zo a siki nana mu de e worikye ku, ba nana ni asibi ba.>>
15Se Obagizi keleba yi nkye, <<Oku munabuki! waana a siki aku yaa kunshe janki dege laki de te nshi a woze de beyi riki nana ni asibi ba? 16Se mase nsum, de ma yaa mase ni juriya Abireyi, de obiri domuna e yi shekera gom sha takusi mu; ba dede na de su worikye yi a nana asibi bo?>>
17De Yesu pala mbo mu, guru nsu oboki geba e yi su zi kumnya, ririgye ntani su yi peri siki sobon mbo mamanki de e yi.
Abenshi yiri ni Mustard Nja Yisti
Mat 13.31,32; Mk 4.30-32
18Se Yesu minya su, <<Nja mina Na gwadaa solota gizi Mirikisi nja shi?. 19Solota Mirikisi ma kankye yiri saba Mosta de nseda la yaapi a bikiya yi. E yi girima e kuma ma ntasi, se nsunsuwa bisi sua yi gizi a yaya nani ntasi.>>
Kokongye A kiya Yisti
Mat 13.33
20Yesu sakye minya su, <<Nja mina Na gwada solota Mirikisi nja shi? 21Solota Mirikisi e ma kankye darigaza de manshi daa la nya a siki atuwa nyowa e kakada yi ari e ripe yi guru.>>
Turiki Kopa Diriri
Mat 7.13,14,21-23
22Se Yesu te atotolo geri nja dende geri, yaa kokoyi ntani a turiki de yaa te a Wurishelima. 23Nseda minya yi nkye, <<Obagizi, ntani piri na sua samu sila?>>
Yesu gye su nkye, 24<<Yi guru kokori ake de ki yuru a kopa diriri, sobon ntani nyowa, Na gye ku, sua yi kokori de su yuru sede sua yi yaa yuru ba. 25Nde nsugizi dege ripe kopa, kwa sakisi a woze kwala kopa ologba yi, <Tolense, bure mu kopa.>
<<Sede keleba su nkye, <Ni shina ku ba ko ku butu angana.>
26Se kwa pala nkye, <Mu si mu sha nja ke, ki kokoyi ntani a geri amu.>
27<<Sede Yesu keleba nkye, <Ni shina ku ba, ku butu angana, ku dege anya na, guru aku nsu yi mumungu mbo!>
28<<Kwa yi kuka nja suku akuri kwanki de ku geni Abireyi, Ishaku nja Yakubu nja guru Anebi a siki solota Mirikisi, sede oku sua la aku kutiri a woze. 29Ntani sua butu yiri anse nja nyema, kudu nja arewa, sua la anya zunwa asu anya buki solota Mirikisi. 30Gaskye worede su ma ni karishe sua mani pari, ni pari sua mani karishe.>>
Yesu Yi Beki Siki Sobon Wurishelima
Mat 23.37-39
31A kwanki ni worosu su parisiyawa su zo anya Yesu su gye yi nkye, <<dege bila anya mu de ki te anya daa mbom. Yiridu yaa so de kisa ke.>>
32Yesu gye su nkye, <<Te de ki gye kere bikiya ni, <Na kula arizeni nja worikye ntani yawu nja gobe, nja nana ni wuku mma yi mbode ni sa dishiya Na yi.> 33A kowon turiki, ema Ni dole na de nsi geba nja tepiya te yawu nja gobe, nja nana ni wuku, de E tabata nkye ba anebi de yaa te muntu a geri daa ba se a Wurishelima! 34<<Aya Wurishelima, Wurishelima, eke de ki kisa Anebi nja ki ribi worede su saka su ni manki anya ku, sen kona Ni mayi kokori de ni tala yaya ke, kankye kaza de yaa tala yaya dende siki nguki yi, sede ki yeda ba! 35Kone, gizi aku yaama kupayi. Na gye ku, kwa geni Ni gagaba sede nana de ku nkye, <Anabirika ma nja nsude yaa zo a siki seni Obagizi.>>>
Iliyochaguliwa sasa
Luka 13: Gaa
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Word for the World International and The Word for the World Nigeria
