Matiós 2
2
Mbuísi símɛɛ́d gá búlúgenye Yésuse
1Yésuse umebíbíén Bɛtlɛhɛ́m uguá gibéyi giá guísi giá Yudé, uguá ginɛŋ giá ofuŋ uhugɔ́n Helód. Uguá mɔɔ́sɛ máguɔ́, mbuísi isíónoólín ɔmbɔ́g huá gibéyi giá guísi igiɛ́ ɔhɛ́nyɛ húhámaninaá, isíésieg Yelusalɛ́m. 2Isíóhún áneé: «Ofuŋ huá bayúdɛn uhúmanyaá gubíén na bíbíén húnyɛ hanyɛ? Dimán yoódódi hiég ɔmbɔ́g uhuɔ́ ɔhɛ́nyɛ húhámaninaá, gúu dimól gá búlúgenye huɔ́.» 3Ofuŋ uhugɔ́n Helód, húmɔɔ́mɔ́b anagányɛ, manɔ́ŋ még amásúmbɛ́ɛg naá má bandɔ bá Yelusalɛ́m gidigid. 4Helód uwagúsígan bɔgúnɔ́gɔ́n bá bedúmbinusámb bá Uhaluá na belinsibigodi bá buán gá guóhún bɔ́ buhɔɔ́m ubuɔ́ Bémeyíde úmabá áneé wenébíbíén. 5Obóndinye yɔ́ áneé: «Bɛtlɛhɛ́m uguá gibéyi giá guísi giá Yudé, gá giagiá búnyɛ ubúɔ́ŋɔ́n uguá yubu hiá ebunebúné áneé: 6“Aŋuá súsɔ́n Bɛtlɛhɛ́m, gibéyi giá guísi guá Yudé, adibá maná tísɔna uguá ɔlɔŋ huá biandá biá eguíli ibínya uguá guísi guá Yudé, gá giagiá agáhɔ ofuŋ uhúénéndenyeé buán buámɛ, Íslayɛ́l, húánáhámína.”» 7Helód uwɔdɔ́ŋɛ́ɛn gɔg mbuísi gá isogi gá lɛns beseé na beseé ginɛŋ igiɛ́ bámaán yoódódi híhámán. 8Uwadɔ́m bɔ́ gɔg Bɛtlɛhɛ́m, uwesilidin bɔ́ áneé: «Idánánɔ nuóhón beseé na beseé hɔɔ́m ɔhɔɔ́ bugadiá únya, númán yɔ́, nuandunúŋɔyídɛ́n gá gueleé yaŋuá súsɔ́n, yɛɛ́d yenebúlúgényé yɔ́.» 9Ofuŋ uhugɔ́n Helód, húmáamáman gusilen mbuísi anagányɛ, isíálád ŋŋil. Símaágánda, yoódódi ihiɛ́ símaán ɔmbɔ́g uhuɔ́ ɔhɛ́nyɛ húhámaninaá híánda uguɔ́b guá busió, ihíénedélímín agumunámuná huá hɔɔ́m ɔhɔɔ́ bugadiá úmabá. 10Símaámáan yoódódi gudélímin, isíébísenidinye na mefunde. 11Símeémébíŋín uguá giansɛ, isíán bugadiá na Malía, noódíe weg. Isíégunsigen dunúnú gá búlúgenye yɔ́. Isíébune dukólókóŋ duɔ́b gá guéŋin yɔ́ muand umuɔ́ símesín yɔ́: na góol na bulua na gitɛm. 12Egélém agányɛ, Uhaluá úmodógínyé siɛ́ uguá ilɛm áneé sídiondín agá Helód, isíɔ́gɔ́l ŋŋil idoódi gá gúg.
Gubínɔh gá guɛ́d uguá gidɔŋ giá Egíbt
13Mbuísi síméemégúg, gilúna giá Ɔgúná igíébíéníginye Yɔ́sɛba uguá ilɛm, igíɔ́yidɛn yɔ́ áneé: «Adígɛ́n dabdab, gɔ́l na muɔ́n na noódíe, ɔbínɔ́h gá guɛ́d uguá gidɔŋ giá Egíbt gá giagiá Helód waáguamba guɔ́n yɔ́. Gígá guɔ́ gueneg uguá ginɛŋ igiɛ́ yɔ́nɔ́guɔyidinaá.» 14Yɔ́sɛba uwadigɛn gɔg na budúg, uwɔgɔ́l na muɔ́n na noódíe gá guɛ́d uguá gidɔŋ giá Egíbt. 15Uwagíga hɔ́ gueneg haná Helód úmegué. Búmabíal nɔ́ gá gueleé nugálɔ nuá Ɔgúná unuɔ́ úmagálɛ́ɛd uguá niíd niá ebunebúné únúmabá áneé: «Mmɔdɔ́ŋɛ́ɛn muɔ́n wamɛ gá hám uguá gidɔŋ giá Egíbt» núbíhónye.
Gihúhie giá baán bá gidɔŋ giá Bɛtlɛhɛ́m
16Ofuŋ uhugɔ́n Helód, húmaámáan áneé mbuísi símɔ́nɔŋ yɔ́, uhúéhílíg. Uhúádɔ́m bandɔ Bɛtlɛhɛ́m naá uguá bidɔŋ ibímabá uguá maáyɛ gidigid, uguég guá ihiligine na bugaga buá gueleé bɔ́na baán abanúmɔndɔ gidigid, gubulin agá babugadiá gueneg uguá baán bá duɔŋ dúandɛ. Mɔɔ́nɔ́na má baán abagányɛ, mámanigiman na ginɛŋ igiɛ́ mbuísi símelinsé yɔ́. 17Agányɛ gɔg nugálɔ nuá ebunebúné Yelemí, 18unúmabá áneé:
«Ugelu húóguólonin Láma, diɔ́guɔ́bɔn mbídadɛ na masiana.
Búnyɛ Lasɛ́l úbaŋanɔ́ baán bég: udiáguamba áneé béhédenye yɔ́ gá giagiá udiganduguán bɔ́» númobíhónyé.
Guosiond na dugumin Nasalɛ́d
19Ofuŋ uhugɔ́n Helód, húmeémégué, gilúna giá Ɔgúná igíébíéníginye Yɔ́sɛba uguá ilɛm uguá gidɔŋ giá Egíbt. 20Igíɔ́yidɛn yɔ́ gɔg áneé: «Adígɛ́n, gɔ́l na muɔ́n na noódíe ond uguá gibéyi giá guísi giá Íslayɛ́l. Gá giagiá, bandɔ abámbá guɔ́n muúŋayɔ, béguén wɔ́s.» 21Yɔ́sɛba uwadigɛn, uwɔgɔ́l na muúŋayɔ na noódíe gá guond uguá gibéyi giá guísi giá Íslayɛ́l. 22Uwɔɔ́b gɔg áneé, Alkelaós, muɔ́n wa ofuŋ uhugɔ́n Helód, úwɔɔ́gɔ́l ondig huá bufuŋ buá síe uguá gibéyi giá guísi giá Yudé. Uwabia gɔg bugádɔ gá dugumin hɔ́. Haná gilúna gímɔsíɔyídɛ́n yɔ́ uguá ilɛm, uwenedugúmín uguá gibéyi giá guísi giá Galilé. 23Uwenedugúmín agá tísɔna uyɔɔ́ bɔ́dɔ́ŋɔnaá áneé Nasalɛ́d. Anagányɛ ŋŋɔ́ŋɛ ya ebunebúné iyɔyɔnɔ́ áneé: «Bɔ́nɔ́dɔ́ŋɔn yɔ́ áneé maná banasalɛ́d» ímobíhónyé.
Iliyochaguliwa sasa
Matiós 2: EKM
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Matiós 2
2
Mbuísi símɛɛ́d gá búlúgenye Yésuse
1Yésuse umebíbíén Bɛtlɛhɛ́m uguá gibéyi giá guísi giá Yudé, uguá ginɛŋ giá ofuŋ uhugɔ́n Helód. Uguá mɔɔ́sɛ máguɔ́, mbuísi isíónoólín ɔmbɔ́g huá gibéyi giá guísi igiɛ́ ɔhɛ́nyɛ húhámaninaá, isíésieg Yelusalɛ́m. 2Isíóhún áneé: «Ofuŋ huá bayúdɛn uhúmanyaá gubíén na bíbíén húnyɛ hanyɛ? Dimán yoódódi hiég ɔmbɔ́g uhuɔ́ ɔhɛ́nyɛ húhámaninaá, gúu dimól gá búlúgenye huɔ́.» 3Ofuŋ uhugɔ́n Helód, húmɔɔ́mɔ́b anagányɛ, manɔ́ŋ még amásúmbɛ́ɛg naá má bandɔ bá Yelusalɛ́m gidigid. 4Helód uwagúsígan bɔgúnɔ́gɔ́n bá bedúmbinusámb bá Uhaluá na belinsibigodi bá buán gá guóhún bɔ́ buhɔɔ́m ubuɔ́ Bémeyíde úmabá áneé wenébíbíén. 5Obóndinye yɔ́ áneé: «Bɛtlɛhɛ́m uguá gibéyi giá guísi giá Yudé, gá giagiá búnyɛ ubúɔ́ŋɔ́n uguá yubu hiá ebunebúné áneé: 6“Aŋuá súsɔ́n Bɛtlɛhɛ́m, gibéyi giá guísi guá Yudé, adibá maná tísɔna uguá ɔlɔŋ huá biandá biá eguíli ibínya uguá guísi guá Yudé, gá giagiá agáhɔ ofuŋ uhúénéndenyeé buán buámɛ, Íslayɛ́l, húánáhámína.”» 7Helód uwɔdɔ́ŋɛ́ɛn gɔg mbuísi gá isogi gá lɛns beseé na beseé ginɛŋ igiɛ́ bámaán yoódódi híhámán. 8Uwadɔ́m bɔ́ gɔg Bɛtlɛhɛ́m, uwesilidin bɔ́ áneé: «Idánánɔ nuóhón beseé na beseé hɔɔ́m ɔhɔɔ́ bugadiá únya, númán yɔ́, nuandunúŋɔyídɛ́n gá gueleé yaŋuá súsɔ́n, yɛɛ́d yenebúlúgényé yɔ́.» 9Ofuŋ uhugɔ́n Helód, húmáamáman gusilen mbuísi anagányɛ, isíálád ŋŋil. Símaágánda, yoódódi ihiɛ́ símaán ɔmbɔ́g uhuɔ́ ɔhɛ́nyɛ húhámaninaá híánda uguɔ́b guá busió, ihíénedélímín agumunámuná huá hɔɔ́m ɔhɔɔ́ bugadiá úmabá. 10Símaámáan yoódódi gudélímin, isíébísenidinye na mefunde. 11Símeémébíŋín uguá giansɛ, isíán bugadiá na Malía, noódíe weg. Isíégunsigen dunúnú gá búlúgenye yɔ́. Isíébune dukólókóŋ duɔ́b gá guéŋin yɔ́ muand umuɔ́ símesín yɔ́: na góol na bulua na gitɛm. 12Egélém agányɛ, Uhaluá úmodógínyé siɛ́ uguá ilɛm áneé sídiondín agá Helód, isíɔ́gɔ́l ŋŋil idoódi gá gúg.
Gubínɔh gá guɛ́d uguá gidɔŋ giá Egíbt
13Mbuísi síméemégúg, gilúna giá Ɔgúná igíébíéníginye Yɔ́sɛba uguá ilɛm, igíɔ́yidɛn yɔ́ áneé: «Adígɛ́n dabdab, gɔ́l na muɔ́n na noódíe, ɔbínɔ́h gá guɛ́d uguá gidɔŋ giá Egíbt gá giagiá Helód waáguamba guɔ́n yɔ́. Gígá guɔ́ gueneg uguá ginɛŋ igiɛ́ yɔ́nɔ́guɔyidinaá.» 14Yɔ́sɛba uwadigɛn gɔg na budúg, uwɔgɔ́l na muɔ́n na noódíe gá guɛ́d uguá gidɔŋ giá Egíbt. 15Uwagíga hɔ́ gueneg haná Helód úmegué. Búmabíal nɔ́ gá gueleé nugálɔ nuá Ɔgúná unuɔ́ úmagálɛ́ɛd uguá niíd niá ebunebúné únúmabá áneé: «Mmɔdɔ́ŋɛ́ɛn muɔ́n wamɛ gá hám uguá gidɔŋ giá Egíbt» núbíhónye.
Gihúhie giá baán bá gidɔŋ giá Bɛtlɛhɛ́m
16Ofuŋ uhugɔ́n Helód, húmaámáan áneé mbuísi símɔ́nɔŋ yɔ́, uhúéhílíg. Uhúádɔ́m bandɔ Bɛtlɛhɛ́m naá uguá bidɔŋ ibímabá uguá maáyɛ gidigid, uguég guá ihiligine na bugaga buá gueleé bɔ́na baán abanúmɔndɔ gidigid, gubulin agá babugadiá gueneg uguá baán bá duɔŋ dúandɛ. Mɔɔ́nɔ́na má baán abagányɛ, mámanigiman na ginɛŋ igiɛ́ mbuísi símelinsé yɔ́. 17Agányɛ gɔg nugálɔ nuá ebunebúné Yelemí, 18unúmabá áneé:
«Ugelu húóguólonin Láma, diɔ́guɔ́bɔn mbídadɛ na masiana.
Búnyɛ Lasɛ́l úbaŋanɔ́ baán bég: udiáguamba áneé béhédenye yɔ́ gá giagiá udiganduguán bɔ́» númobíhónyé.
Guosiond na dugumin Nasalɛ́d
19Ofuŋ uhugɔ́n Helód, húmeémégué, gilúna giá Ɔgúná igíébíéníginye Yɔ́sɛba uguá ilɛm uguá gidɔŋ giá Egíbt. 20Igíɔ́yidɛn yɔ́ gɔg áneé: «Adígɛ́n, gɔ́l na muɔ́n na noódíe ond uguá gibéyi giá guísi giá Íslayɛ́l. Gá giagiá, bandɔ abámbá guɔ́n muúŋayɔ, béguén wɔ́s.» 21Yɔ́sɛba uwadigɛn, uwɔgɔ́l na muúŋayɔ na noódíe gá guond uguá gibéyi giá guísi giá Íslayɛ́l. 22Uwɔɔ́b gɔg áneé, Alkelaós, muɔ́n wa ofuŋ uhugɔ́n Helód, úwɔɔ́gɔ́l ondig huá bufuŋ buá síe uguá gibéyi giá guísi giá Yudé. Uwabia gɔg bugádɔ gá dugumin hɔ́. Haná gilúna gímɔsíɔyídɛ́n yɔ́ uguá ilɛm, uwenedugúmín uguá gibéyi giá guísi giá Galilé. 23Uwenedugúmín agá tísɔna uyɔɔ́ bɔ́dɔ́ŋɔnaá áneé Nasalɛ́d. Anagányɛ ŋŋɔ́ŋɛ ya ebunebúné iyɔyɔnɔ́ áneé: «Bɔ́nɔ́dɔ́ŋɔn yɔ́ áneé maná banasalɛ́d» ímobíhónyé.
Iliyochaguliwa sasa
:
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia