Luka 7

Yesu wunyakisa mundongo wu mfumu yi bambulumbulu

(Mat 8.5-13)

1Yesu bu kamana zonza misamu mimvimba ku mukangu wu muzungidila, wuyenda ku mbanza Kapenawumi. 2Kuba na mfumu yimosi yi zimbulu-mbulu nkama, wuba na mundongo wumosi wu katoma tya bubwingi. Mundongo bewowo wuba na kimbevo na wuba lukufi mufwa. 3Bu kayuwa kikumu ki Yesu, wutambika mwa ndambu bantu mu kati di zimbuta zi Bayudayo, mwanki ba mulomba kiza kanyakisa mundongo andi. 4Bu batula ha ntadisi yi Yesu, bamubombidila bubwingi ni bamuteela ti: «Muntu bewowo fwanakani wu musadisa. 5Mu dyambu ti, tiidi nsi eto, mboki yandi wututungidi nzo yi lusambulu.» 6Yesu wuyenda nawu. Kansi bu kaba bela-bela na nzo yi mfumu yi zimbulumbulu nkama, muntu bewowo wutambika zinkayi zandi mu teela Yesu ti: «Mfumu kukikwamisandi ko, mu dyambu ti niidi wulunga ko ti wukota mu nzo ani. 7Ni hahoho nyenini ti, ni wulunga ko mu kwiza meno bende ha ntadisi aku. Kansi ta kwandi mpova yimosi, kisadi kyani kyaanyaka. 8Mu dyambu ti meno bende nii ku nsye lutumu lu zimfumu zani zi luyalu, mpe nii na zimbulu-mbulu ku nsye lutumu lwani. Ni namana ta ku wumosi: “Yenda!”, waakwenda, ni namana ta ku wuhiika: “Yiza!”, waakwiza, mpe namana ta ku mundongo ani: “sala kisalu eki!”, kyaakasala.» 9Yesu bu kayuwa misamu bemyomyo, wuyituku na wubangumuka ku bantu bedi kwe mulandingi na wubateela ti: «Kedika mu kati di bantu ba-Isaeli nayeni kiminu ki mutindu bewuwu ko.» 10Bantu batambika mfumu yi bambulumbulu bu bavutuka ku nzo andi, bayenda bwana mundongo bewowo wunyaka.

Yesu wufulukisa mwana wufoola di Nayini

11Ku manima, Yesu wuyenda ku mbanza yi Nayini, milongoki myandi na kamba di bantu bayenda nandi. 12Bu batula ha mwelo wu mbanza, bayena bantu bedi kwenda ku ndyamu: wuba mwana wubakala wakwa wumosi wufoola dimosi, bisi mbanza beyoyo babingi bamulanda. 13Mfumu bu kamuyena, wumufwila kyadi na wumuteela ti: «Kudilandi ko!» 14Mboki Yesu wufinama na wusimba kesi, bedi kwe nati kesi batelama. Yesu wuta: «Nge Toko, nina kutuma, vumbuka!» 15Muntu wuba wufwa wuzakala na wutona mu zonza. Yesu wumuvutula ku ngudi andi. 16Bantu bamvimba bayena bunkuta na bakembila Nzambi, mboki bata ti: «Mumbikudi wuwunene wutotokidi ha kati-kati dyeto! Nzambi wizi sadisa bantu bandi!» 17Nsangu zimwangana mu kizunga kimvimba ki Yuda na mu bizunga bi muzungidila mu myo mihidika Yesu.

Yoane Mbotiki fidisi milongoki myandi ku Yesu

(Mat 11.2-19)

18Milongoki miyadila mfumu awu Yoane mpolo mu mimvimba myedi hyoka. Na Yoane wutumisa milongoki myole ha kati dyawu 19na wubafidisa ku Mfumu mu mufuula ti: «Ngeye ni muntu bewowo waakwiza hoti tufweti kingila wuhiika e?» 20Milongoki mi Yoane bu batula ku bela Yesu, bamuteela ti: «Yoane Mbotiki wututambikidi ku ngeye mu kufuula ti: “Ngeye ni muntu bewowo waakwiza hoti tufweti kingila wuhiika e?”» 21Mu ntangu beyoyo kwandi, Yesu wunyakisa bantu babingi mu bimbemvo, na byeta na wuduukisa mpeve zimbi na wuzibula meso ma zimpofo zizingi. 22Na wubahaana mvutu ti: «Yendeeno luyala mpolo ku Yoane mu mimvimba mi luyeni na mi luyudi:

zimpofo zena yena, bana byeta mu malu bana dyata bumbote,

banga bwazi bana vedoso, bafwa makutu bana yuwa,

bafwa bana fuluka, na Musamu Wumbote wa bana samuna ku bamputu.

23Kyese ku muntu bewowo walembolo bika mu sa kiminu kyandi mu meno!»

24Bantu bafidisa Yoane bu bavutuka, Yesu wutona mu zonzila Yoane ku bamvimba baba nandi kintwadi na wubafuula ti: «Nani luyenda tala ku nsi yinkatu e? Dyadya dyedi ningusu ku mupepe e? 25Buna, nani kwandi luyenda tala e? Muntu wuba wulwata binkutu bi ntoko e? Kansi bantu bakwe lwaatanga binkutu bimbote ni yabobo bakwe zinganga mu kimvwama mu zinzo zi zintinu. 26Kadi nani kwandi luyenda yena ku nsi yinkatu e? Mumbikudi e? Ninga, meno nina luteela ti, yandi hyokididi mumbikudi. 27Mu dyambu ti Yoane wudi wumosi mu masonama mana teela ebu:

“Nina tambika ntumwa ani ku mutwala aku,

mu ku kubikila #7.27 Kutanga mpe mu Luka 1:16-17nzila.”

28Kedika nina luteela, mu bantu bamvimba ba ha nza, kunaani muntu wu hyokidi Yoane mu mfunu. Kansi, wuvudi bukeke mu Kimfumu ki Nzambi, yandi wumuvudidi bunene. 29Bantu bamvimba na bitoti bimpaku bedi muyuwanga, babakula ti Nzambi wu lunungu kadi, Yoane ni kamana babotika. 30Kansi Bafalisi na Milongisi mi Misiku babisa kwawu mambu ma bazodisila Nzambi na babisa kwawu ti Yoane ka babotika.»

31Yesu wubateela dyaka ti: «Na banani ndendi fwanikisa bantu ba mbandu beyiyi e? Ku banani bafwanakani e? 32Bafwanakani na baala bafyoti bazakadi ha kibuka kikwe vukananga bantu bamvimba, mboki kutelasana yawu na yawu ti:

“Yeto bu tusikidi hungu, kansi yeno lukinini ko!

Yeto bu tuyimbidi mikunga mi kyadi, kansi yeno ludididi ko!”

33Mu dyambu ti Yoane bu kayiza, kedi dyanga mampa ko, mpe kedi nwanga vinu ko, kansi yeno luna ta ti: “Mpeve yimbi yi nandi!” 34Mwana Muntu wizidi, wuna dya mpe wuna nwa, kansi luna ta ti: “Taleno kweno muntu bewuwu, kisalu kyandi ku dya na ku nwa, nkayi zandi ni mitoti mimpaku na minsumuki!” 35Kansi ndwenga zi Nzambi zikwe yenikanga zi lunungu ku yobobo bakwe mutambulanga.»

Yesu ku nzo yi Mufalisi wu nkumbu Simoni

36Mufalisi wumosi wutumisa Yesu mu dya kintwadi nandi. Yesu wukota mu nzo yi muntu bewowo na wuzakala ha meza. 37Mu mbanza beyoyo muba na mukento wumosi wuba munsumuki. Bu kayuwa ti Yesu ha meza kadi mu nzo yi Mufalisi, wutwala mbwata yi alabati yifuluka mu mananasi, 38na wuyenda ba kumanima ma Yesu, ha ndambu bitambi byandi. Wudila na wubodisa bitambi bi Yesu mu mansangasa mandi, mboki wukusuna byo mu milengi myandi na wufiba byo mpe wukusa byo mananasi. 39Mufalisi bewowo wutumisa Yesu mu dya, bu kayena bobo, wuta ku nsye mutima andi ti: «Tala ti muntu bewuwu mumbikudi kadi, nganunu keti zaba nani wudi mukento bewowo wuna kwe musimbi, munsumuki wunani wudi.» 40Buna Yesu wumuteela ti: «Simoni, musamu ntiidi mu kuteela.» Simoni wuvutula ti: «Zonza kwaku Mulongisi.» 41Yesu wumuteela ti: «Bantu bole baba na mfuka ku kidefisi ki mbongo. Wumosi, wudefa nkama tanu zimbongo zi bisengo, wuhiika makumatanu ma mbongo zi bisengo. 42Bu balembolo ba na mbongo ze mufuta, wubayambudila mfuka zawu ya babole. Buna nani mu ya babole, wavula mutya e?» 43Simoni wuvutula ti: «Mu mayindu mani, ni muntu bewowo wukayambudila mfuka yihyokidi kitezo.» Yesu wumuteela ti: «Bumbote zonzidi.» 44Mboki, wubangumuka ku mukento na wuteela Simoni ti: «Yeni mukento bewuwu e? Meno nkotidi mu nzo aku, wumpeeni mamba me sukudila malu ko, kansi yandi nsukudi malu mu mansangasa mandi na nkusuni mo mu milengi myandi.

45Ngeye wumfibidi ko, kansi, yandi buna kakotidingi mumu, kabiikidi ko mu kwe fibi malu mani. 46Ngeye wunkusidi mananasi ku mutu ani ko, kansi, yandi nkusidi mananasi mu malu mani. 47Ni hahoho, nina luteela ti, yandi tambudi ndemvokolo yi masumu mandi mamingi, mu dyambu ti lonkidi luzolo lwandi lulwingi. Kansi, muntu wu bakwe lemvokilanga ndambu, wukwe lonkanga luzolo lu fyoti.» 48Mboki Yesu ni kateela ku mukento bewowo ti: «Masumu maku ma lemvokolo.» 49Bantu bamvimba ba banandi kintwadi ha meza batona mu ta ku nsye mitima myawu ti: «Yandi nani kadi, mu lemvokila masumu e?» 50Kansi Yesu wuteela mukento ti: «Kiminu kyaku ki kuvuukisi: yenda mu kiyenge.»

Iliyochaguliwa sasa

Luka 7: dde Ddo

Kuonyesha

Shirikisha

Nakili