Yoane 21
21
Yesu wuyenika ku milongoki nsambwadi
1Mwa bilumbu bi hyoka, Yesu wuyenika dyaka ku milongoki myandi ha kumu di dyanga di Tibelyade. Tala bwedi kayenikina: 2Simoni Petelo, Toma wu bakwe tumisinanga ti «Nsimba», Natanayeli mwisi-Kaana mu kizunga ki Ngalili, baala ba Zebedayi na milongoki myole mihiika mi Yesu miba ha kimosi nawu. 3Simoni Petelo wubateela ti: «Nenzi ku loba.» Bamuvutudila ti: «Yeto mpe twaakwenda naku.» Bayenda na bamaka mu mulungu. Kansi mpimpa beyoyo, babaka kima ko.
4Bwisi bu bukya, Yesu wuba wutelama ha kumu di mamba. Kansi milongoki myedi zaba ko ti yandi wuba. 5Yesu wubateela ti: «Ee baala, luu na kima nkye dyaka ko e?» Bamuvutudila ti: «Kaani». 6Wubateela ti: «Looseeno mpwasa ku sambu di mimbakala di mulungu na mbo lubaka.» Balosa mpwasa, ni bedi lembakana mu kotisa yo mu mulungu, mu dyambu ti mbizi zingi ziba. 7Mulongoki wedi tyanga Yesu, ni kateela Petelo ti: «Mfumu wudi!» Simoni Petelo bu kayuwa ti Mfumu wudi, wulwata dyaka mulele, mu dyambu ti kaba wulwata ko, mboki ni kabwa mu mamba. 8Milongoki mi sala myedi kwe nati mulungu ku kumu mpe myedi kwe naningi mpwasa yiba yifuluka mu mbizi: baba dyaka kitatu na kumu ko, kampe zimetele nkama. 9Bu bakulumuka ha nsi, bayena tiya tu makala, mbizi zi tentoko hoho na dimpa. 10Yesu wubateela ti: «Nateeno mwa ndambu mbizi zi lubeki.» 11Simoni Petelo wumaka dyaka mu mulungu na wutunta mpwasa natee ha butoto, yiba yi fuluka mu nkama na makumatanu na tatu di zimbizi zizinene. Mpeleko mbizi zi hyoka kitezo, kansi mpwasa yikakuka ko.
12Yesu wubateela ti: «Yizeno ludya.» Na kaani mulongoki wumosi wulenda mu mufuula ti: «Ngeye ni nani e?» Mu dyambu ti batoma zaba ti Mfumu wudi. 13Yesu wuyenda ba bela-bela nawu. wubonga dimpa na wuba haana dyo. Wusa bumosi mpe mu mbizi. 14Yo ni nkumbu yi tatu Yesu yi kayenika ku milongoki tuka mfulukulu andi mu bafwa.
Yesu na Petelo
15Bu bamanisa mu dya, Yesu wuteela Simoni Petelo ti: «Simoni, mwana wu Yoane, kadi wuntiidi kuhyoka ebaba e?» Wuvutula ti: «Ninga Mfumu, zebi ti nakutiidi.» Yesu wumuteela ti: «Keba baala ba mameme mani.» 16Nkumbu yinzole, Yesu wumuteela ti: «Simoni, mwana wu Yoane, kadi wuntiidi e?» Wumuvutudila ti: «Ninga Mfumu, zebi ti nakutiidi.» Yesu wumuteela ti: «Ba mumvungi wu mameme mani.» 17Mu nkumbu yitatu wumufuula ti: «Simoni, mwana wu Yoane, kadi wuntiidi e?» Petelo wukota mu kyadi mu dyambu ti Yesu wumufuula mu nkumbu yitatu ti: «Kadi wuntiidi e?» Na wuvutula ti: «Mfumu, ngeye zebi mimvimba, nkatika zebi ti nakutiidi.» Yesu wumuteela ti: «Keba mameme mani. 18Kedika mu kedika nina kuteela, bu wuba ntwenya, nge bende wedi kanganga melika aku mpe wedi kwendanga konso kutiidi. Kansi, bu waaba kinunu, waalambula moko, mpe muntu wuhiika waakukanga melika, na waakunata kuma kulembolo tya mu kwenda.» 19Yesu wuzonzila bobo mu lonka bwedi Petelo kaafwila na kaakembisila Nzambi. Bu kamanisa mu zonza, wumuteela ti: «Ndanda.»
Yesu na mulongoki wu kedi tyanga
20Petelo bu kasyetoka, wuyena mulongoki, Yesu wu kedi tyanga wedi kwiza ku manima awu, yondowo wu ba wubembama ha ntulu andi mu ntangu yi bedi dya, wuta ti: «Mfumu, nani wo waakuyekola e?» 21Bu kamuyena, Petelo wufuula Yesu ti: «Mfumu, ha mbo yandi, nki byaamutudila e?» 22Yesu wumuvutudila ti: «Tala ti ntiidi ti kazinga natee bu navutuka, kadi nge miteedi e? Ngeye, ndanda.» 23Musamu wu mwangana ha kati di zimpangi ti mulongoki bewuwu kaafwa ko. Mpeleko, Yesu kateela Petelo ko ti: «Kaafwa ko.» Kansi, ebu kata ti: «Tala ti ntiidi ti kazinga natee bu navutuka, kadi nge miteedi e?»
24Ni mulongoki bewowo wu nata kimbangi ki misamu bemyomyo na wusonika myo, mpe tuzebi ti kimbangi kyandi kikedika kidi.
Misamu mihiika mi Yesu
25Yesu wuhidika dyaka misamu mimingi mihiika. Tala ti ni basonika myo wumosi-wumosi, nganunu nza yimvimba yiketi baka kibuka kye lundila mabuuku mamvimba bemomo ko.
Iliyochaguliwa sasa
Yoane 21: dde Ddo
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© (Active) Wycliffe Bible Translators, Inc. All rights reserved.
