Yoane 19

1Pilatu wuhaana lutumu banata Yesu na ba muzuba bikoti. 2zimbulu-mbulu zihidika mpu yi nsende yi kintinu, ni batuula yo ha yulu mutu andi, mpe zimulwika kiyunga kimbwaki. 3Mboki bedi finamanga ha ntadisi andi na bedi tanga ti: «Mbote aku, ntinu yi Bayudayo.» Ni bedi mu katanga zimbata.

4Pilatu wuduuka dyaka na wubateela ti: «Yuweno, yandi nina lutwadila ku mbazi, mwanki luzaba ti na mubeki kibila kye muzengila lufwa ko.» 5Buna Yesu wuduuka ku mbazi, wuba wulwata mpu yi nsende na kiyunga kimbwaki. Pilatu wubateela ti: «Muntu bende ewu!»

6Kansi mfumu zi zinganga-Nzambi na minkengi bu batumbu muyena, balokana ti: «Mukoma ha kulunsi, mukoma ha kulunsi!» Pilatu wubwesa ta ti: «Mubongeeno na mukomeeno ha kulunsi yeno bende, mu dyambu ti mu meno, mbeki kibila kye muzengila lufwa ko.» 7Bayudayo bamuvutudila ti: «Musiku wuu neto. Musiku bewowo wuna ta ti yandi fweti fwa, mu dyambu ti wukiteedi ti yandi Mwana wu Nzambi kadi.» 8Pilatu bu kayuwa misamu bemyomyo, wubwesa yena dyaka bunkuta. 9Wukota dyaka mu kati di nzo andi yi kisalu na wufuula Yesu ti: «Ngeye mwisi-kwedi wudi e?» Kansi Yesu kamuvutudila mvutu ko. 10Pilatu ni kamuteela bwabu ti: «Wuna mpeeka mvutu ko e? Zebi ko ti meno nii na lutumu lwe kuyambula na lwe ku komoso ha kulunsi e?» 11Yesu wumuvutudila ti: «Kulendi ba na lutumu mu meno ko tala ti Nzambi kakuheeni lo ko. Ni hahoho, yondowo nyekodi ku ngeye, hodidi masumu ma hyokidi bunene.»

12Tuka ntangu beyoyo, Pilatu wusosa nzila ye muyambula. Kansi mfumu zi Bayudayo batona mu lokana ti: «Wumana muyambula, wuu nkayi yi Kayisali#19.12 Kayisali: nkumbu yi kintinu ku muntu wuna toma nsi yi Loma ko. Mu dyambu ti wonso muntu wuna kilonka ti yandi ntinu kadi, weka mbeni yi Kayisali.» 13Bu kayuwa misamu bemyomyo, Pilatu wuduukisa Yesu ku mbazi, mpe wuyenda zakala ha kyandu ki lufundusu, ha kibuka ki bakwe tumisinanga ti kyanzala ki matadi, mu ndinga yi ki-Ebeleo ti Ngabata. 14Kiba kilumbu ki bedi kubikanga mukembo wu Pake, kampe yiba bela-bela na ntangu ha mbata. Pilatu wuta ku Bayudayo ti: «Ntinu eno eyi!» 15Kansi balookana ti: «Muhonda! Muhonda! Mukoma ha kulunsi!» Pilatu wubwesa ta ti: «Nakoma ntinu eno ha kulunsi e?» Mfumu zi zinganga-Nzambi zivutula ti: «Ntinu yimosi kwandi yii neto ni Kayisali.» 16Buna wubayekodila Yesu mwanki baamukoma ha kulunsi. Babonga Yesu mpe bamunata.

Bakoma Yesu ha kulunsi

(Mat 27.32-44; Mlk 15.21-32; Luk 23.26-43)

17Bu kananguna kulunsi dyandi, wuduuka mu mbanza mu kwenda ha kibuka ki bakwe tumisinanga ti: «Kikonzongolo ki mutu», mu ndinga yi ki-Ebeleo, Ngolongota. 18Hahoho bakomina Yesu ha kulunsi ha kimosi na bantu bole bahiika, wumosi ku lubakala na wuhiika ku lumoso, Yesu ha kati-kati. 19Pilatu wusonika mu kibuku ki baya, kikaledika ha yulu kulunsi, bisono bita ti: «Yesu mwisi-Nazaleti, ntinu yi Bayudayo.» 20Bayudayo babingi batanga bisono bebyobyo, mu dyambu ti kibuka ki bakomina Yesu kiba bela-bela na mbanza, na bisono biba bisonoko mu ndinga yi ki-Ebeleo, yi ki Latini na yi Kingeleke. 21Mfumu zi zinganga-Nzambi zi Bayudayo ziteela Pilatu ti: «Kusonikandi ti: “Ntinu yi Bayudayo”, kansi: “Muntu bewuwu wuta ti: Meno nii ntinu yi Bayudayo”.» 22Pilatu wuvutula ti: «Minsonikini, mimeni sonama.»

23Zimbulu-mbulu bu zimana koma Yesu ha kulunsi, zibonga binkutu byandi, ni zikabana byo mu ndambu ziya, kadi mbulu-mbulu na ndambu andi. Zibonga mpe zwele dyandi, diba mu mulele wumosi wulembolo tungu, kutonina ku yulu natee ku nsi. 24Zimbulu-mbulu ziteelasana yawu na yawu ti: «Tukakunandi kinkutu bekiki ko, kansi tubudileeno kyo hwadi mu zaba nani waabaka kyo.» Mwanki Masonama menda detila:

«Zikabani binkutu byani

na zibudidi zwele dyani hwadi.»

Bwabobo bu sa zimbulu-mbulu.

25Ngudi andi, mpangi yi ngudi andi yi mukento, Maliya mukento wu Kolopase na Maliya mwisi-Mangadala baba batelama ha kulunsi di Yesu. 26Yesu bu kayena ngudi andi ha ntendo mulongoki wu kedi toma tyanga, wuteela ngudi andi ti: «Mama, ewu ni mwana aku.» 27Mboki wuta ku mulongoki bewowo ti: «Ewu ni ngudi aku.» Tuka kilokola bekyokyo, mulongoki wumutambula ku nzo andi.

Lufwa lu Yesu

(Mat 27.45-56; Mlk 15.33-41; Luk 23.44-49)

28Yesu bu kazaba ti mimvimba milungidi, mwanki Masonama menda detila, wuta ti: «Nsatu mamba yi nani.» 29Huma behoho ha ba na kisiku kiba kiteboka mu vinu dinsa. Zimbulu-mbulu zibonga musakasaka, zikanga wo ha nsongi yi kintala ki muti wu isopi, zivwanga wo mu vinu dinsa, mboki zituula wo ha munwa wu Yesu. 30Yesu bu kamana nwa vinu dinsa, wuta ti: «Mimvimba milungidi.» Bu kayinika mutu, ni kafwa.

Batobodi Yesu lubanzi

31Kiba kilumbu ki bedi kubikanga mukembo wu Pake. Mfumu zi Bayudayo batya ko ti mvumbi ziba ha kulunsi natee kilumbu ki saba, mu dyambu ti kilumbu ki saba bekyokyo kiba nkatika kilumbu ki kinene. Ni hahoho, bayenda lomba ku Pilatu luve lwe bokola malu ma bantu ba bakoma, mpe lwe bakatula ha kulunsi. 32Zimbulu-mbulu ziyenda mpe zibokola malu ma muntu wuntete, mboki wunzole mu yobobo bakomo ha kulunsi ha kimosi na Yesu. 33Bu zituula ha Yesu, ziyena ti wukifwila kwandi, ni hahoho zilembolo mubokodila malu. 34Kansi wumosi mu zimbulu-mbulu wumutobola lubanzi mu dyonga, mpe menga na mamba maduuka. 35Yondowo wuyena myo, wuna ta kimbangi. Kimbangi kyandi kikedika kidi. Mpe zebi ti kedika kana ta, mwanki yeno mpe lukwikila. 36Kansi mimvimba bemimi mihilama, mwanki Masonama menda detila: «Bamubokola kani kihisi kimosi ko.» 37Masonama mateedi dyaka ti: «Baasikika meso mawu ku yondowo wu batobodi lubanzi.»

Batuula nitu yi Yesu mu ndyamu

(Mat 27.51-61; Mlk 15.42-47; Luk 23.50-56)

38Ku manima ma misamu bemyomyo, Yosefi mwisi-Alimate, wuba mulongoki wu Yesu mu mansweki, mu dyambu di bunkuta bu zimfumu zi Bayudayo. Wuyenda lomba Pilatu luve lwe bonga nitu yi Yesu. Pilatu wumuhaana luve, mpe Yosefi wuyenda bonga nitu yi Yesu. 39Nikodemo, mu ntama, wuyenda tala Yesu mu kati-kati di mpimpa, wuyiza mpe. Wunata mananasi, makumatatu ma zikilo, ma bahidikila mu mile na alowese. 40Yosefi na Nikodemo babonga nitu yi Yesu na bazinga yo bitende bi lino, batula yo mananasi, bonso buu kifu ki Bayudayo bu bakwe zika zimvumbi. 41Ha kibuka ki bakomina Yesu ha kulunsi, haba na mfuba yi miti. Mpe mu mfuba beyoyo mu ba na ndyamu yimosi yi batimuna mu tadi, yilembolo teka zikulu muntu. 42Ni mwamomo batuula Yesu, mu dyambu ti yiba nkubukulu yi mukembo wu Pake yi Bayudayo, mpe ndyamu yiba bela-bela.

Iliyochaguliwa sasa

Yoane 19: dde Ddo

Kuonyesha

Shirikisha

Nakili