Yoane 16
16
1Naluteedidi misamu bemyomyo mwanki kiminu kyeno kilembolo zeza. 2Mbo balukuma mu zinzo zi lusambulu zi Bayudayo, mpe bilumbu bina kwiza, yobobo baaluhonda babanzila ti bwabobo bu fwanakani mu sadila Nzambi. 3Baasadila bobo mu dyambu ti bazebi Tata ko na banzebi ko. 4Kansi naluteedidi bobo mwanki ntangu bu yaafwana, lubambuka moyo ti waanaluteela. Naluteela wo ha ntonono ko mu dyambu ti naba neeno kintwadi.
Kisalu ki Mpeve Yilongo
5Nina kwenda bwabu ku yondowo wumfidisa, kansi kani muntu kana mfuula ko ti: “Kwedi wuna kwenda e?” 6Bwabu mitima myeno mifulukidi mu kyadi, bu naluteedidi bobo. 7Kedika nina luteela: bumbote ku yeno ti meno nenda, mu dyambu ti nalembolo kwenda, Nsadisi kaakwiza ku yeno ko. Kansi tala ti meno nenzi, mbo namufidisa. 8Bu kaakwiza, mbo kalonka ku bantu ba nza beyiyi misamu mitadidi masumu, lunungu na mfundusu yi Nzambi. 9Mu myo mitadidi masumu, mu dyambu ti bakwikidi mu meno ko. 10Mu myo mitadidi lunungu, mu dyambu ti nina kwenda ku Tata, na luna nyena dyaka ko. 11Mu myo mitadidi mfundusu yi Nzambi, mu dyambu ti mfumu yi nza beyiyi, meni fundusu bwabu.
12Nii na misamu dyaka mimingi mye luteela, kansi lulendi mye vibidila ko. 13Mpeve yi kedika bu yaakwiza, yaalutwadisa mu kedika kimvimba, mu dyambu ti yazonzila mu lutumu lu yandi bende ko, kansi mbo yazonzila mimvimba mi kaayuwa mpe mbo kalusamunina misamu myaakwiza ku ntwala. 14Yandi waankembisa mu dyambu ti waatambula ku meno mi kaalusamunina. 15Bimvimba bii na Tata, byani mpe bidi. Ni hahoho ntedidi ti waatambula mimvimba mi myani, mpe waalusamunina myo.
Kyadi kyaakituka kyese
16Mwa ntangu yifyoti kwandi yisidi, lwaabwesa nyena dyaka ko, mboki mwa ntangu yifyoti dyaka yisidi, mbo lubwesa nyena.» 17Mwa ndambu yi milongoki myandi myedi telasana yawu na yawu ti: «Nki katiidi mu tuteela e? Bu kana ta ti: “Mwa ntangu yifyoti kwandi yisidi, lwaabwesa nyena dyaka ko, mboki mwa ntangu yifyoti dyaka yisidi, mbo lubwesa nyena.” Mpe dyaka ti: “Nenzi ku Tata.” 18Nkye mbangudulu yi misamu mi kateedi ti: “Mwa ntangu yifyoti yisidi dyaka e?” Tuna bakula ko nki katiidi mu ta.» 19Yesu wubakula ti byuhu bana saka mu zika, ni kabateela ti: «Luna sosa mu zaba mbangudulu yi mpova yi nateedi ti: “Mwa ntangu yifyoti kwandi yisidi, lwaabwesa nyena dyaka ko, mboki mwa ntangu yifyoti dyaka yisidi, mbo lubwesa nyena.”» 20Kedika mu kedika nina luteela, lwaadila na lwaaba mu manyongo, kansi nza yaayangalala. Mbo luba mu kyadi, kansi kyadi kyeno kyaakituka kyese. 21Mukento bu kakwe banga lukufi mu buta, weka mu kyadi mu dyambu ti ntangu andi ye yena mpasi yifweni. Kansi mwana bu wubutukidi, zimbakani mpasi zandi, mu dyambu ti weka mu kyese ki butukidi mwana. 22Yeno mpe ntangu beyiyi lweka bwabu mu kyadi. Kansi bu twaayenana dyaka, mitima myeno myaangalala. Mpe kunaani muntu waalukatula kyese kyeno.
23Kilumbu bekyokyo bu kyaatuula, lwaabwesa mfuula dyambu ko. Kedika mu kedika nina luteela wo, ni hahoho, kyonso kima ki lwaalomba ku Tata mu nkumbu ani, kyaakaluhaana. 24Natee mu kilumbu bekiki, lwalombidi kani kima mu nkumbu ani ko. Lombeeno na lwaatambula, mpe kyese kyeno kyaaba ki lunga.
Yesu bedisi nza
25«Mu bingana naluzonzidi misamu mimvimba bemyomyo. Mu bilumbu byaakwiza, nabwesa luzonzila mu bingana ko. kansi mu luzonzila misamu mi tadidi Tata, na bwesa lusweka dyambu ko. 26Mu kilumbu bekyokyo, mbo lulomba mu nkumbu ani, mpe naluteedidi ko ti mbo nalulombila ku Tata. 27Tata yandi bende wulutiidi, mu dyambu ti yeno luntiidi na lukwikidi ti ku Nzambi nafuma. 28Ku Tata nafuma mpe nayiza mu nza. Bwabu nina sisa nza, mpe nina vutuka kuu Tata.» 29Milongoki myandi mi muteela ti: «Tala, bwabu mu tuzonzila wuna sweka dyambu ko, mpe wuna bwesa tuzonzila mu bingana ko. 30Tuzebi bwabu ti ngeye zebi misamu mimvimba, mpe wuu nsatu ko ti muntu kakufuula. Tuzebi bwabu ti ngeye ku Nzambi wufuma.» 31Yesu wubavutudila ti: «Bwabu lukwikidi e? 32Tala, ntangu yeka lukufi, na yifweni bwabu yilwaamwangana kadi muntu na ndambu andi, mpe mbo lusala nsisa me kaka. Kansi, nii me kaka ko mu dyambu ti Tata wuu kintwadi nani. 33Naluteedidi misamu bemyomyo, mwanki luba na kiyenge mu meno. Lwaayena mpasi mu nza. Kansi, lwateno kibakala, mu dyambu ti meno nabedisi nza.»
Iliyochaguliwa sasa
Yoane 16: dde Ddo
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© (Active) Wycliffe Bible Translators, Inc. All rights reserved.
