Mavanga 3
3
Lunyakusu lu muntu wuba na kyeta
1Petelo na Yoane batomboka ku nzo-Nzambi mu ntangu yi lusambulu mu kilokola ki tatu ku manima ma ntangu ambata. 2Kuba na bakala dimosi diba na kyeta tuka mbutuka andi. Kadi kilumbu, bedi munangunanga na bedi muzakikanga ha mwelo wu nzo-Nzambi, wu bakwe tumisinanga ti «Mwelo wuntoko» mu sanga mundombila ku yobobo bedi kotanga mu nzo-Nzambi. 3Bu kayena Petelo na Yoane bedi saka kota mu nzo-Nzambi, wubalomba mbongo. 4Petelo na Yoane bamusungimina naswii, Petelo ni kamuteela ti: «Toma tutala!» 5Bakala bende ni kabasungimina, na wedi banza ti waabaka mwa kima ku yawu. 6Kansi Petelo wumuteela ti: «Nii na mbongo hoti wola ko. Kansi kima kii nani, kyanina kuhaana: mu nkumbu Yesu-Klisto mwisi-Nazaleti, telama na dyata!» 7Mboki, wumusimba mu kooko ku lubakala na wumutedimisa. Hansi na nsi, malu na makoto mandi matumbu baka ngolo. 8Wudumuka na wutumbu telama, mpe ni katona mu dyata. Wukota mu nzo-Nzambi ha kimosi na zintumwa buna wuna kwe dyati, wuna kwe dumuki na wuna kwe kembidi Nzambi. 9Bantu bamvimba bamuyena bu kedi kwe dyati na kwe kembidi Nzambi. 10Bu babakula ti ni muntu bewowo wedi zakalanga ha Mwelo Wuntoko wu Nzo-Nzambi mu sanga mundombila, bamvimba bayituku na bayiza ba na bunkuta mu dyambu di misamu bemyomyo mi mutudila.
Petelo wuna longa mu nzo-Nzambi
11Bakala bedyodyo kedi bwesa tatukila Petelo na Yoane ko. Mukangu wumvimba wu bantu wuyituku na wuyenda bazungidila mu ntiinu mu kati di musampa wubedi tumisinanga ti musampa wu Solomo. 12Petelo bu kayena bobo, wuta ku mukangu ti: «Yeno bisi-Isaeli, mu dyambu di nki luna yituku mu lunyakusu belulu e? Bila nki luna tutadila bonso ti mu lulendo lu yeto bende hoti mu kukangama kweto mu Nzambi tusidi ti muntu bewuwu kenda dyati e? 13Nzambi yi Abalahami, yi Isaaki na yi Yakobi, Nzambi yi zinkaka zeto, kembisi kisadi kyandi Yesu, wuluyekola ku zimfumu na wulubisa ha ntadisi yi Pilatu, mpeleko yandi wuba na lukanu mu muyambula. 14Kansi yeno lubisa muntu wulongo, na wulunungu mpe lulomba kweno baluyambudila mumpondi wu bantu. 15Yeno luhondisa Mfumu yikwe haananga luzingu, kansi Nzambi wumufulukisa mu bafwa, mpe yeto tudi zimbangi. 16Ni kiminu mu nkumbu yi Yesu kiheeni ngolo ku muntu bewuwu wu luna tala na wu luzebi. Ni kiminu mu Yesu kinyakisi muntu bewuwu ha meso ma yeno bamvimba.»
17«Mpangi zani, bwabu nzebi ti yeno na mintwadisi myeno ku nsye bunzimbu luba bu luhidika musamu bewowo. 18Kansi Nzambi wulungisila bobo mambu maa kasamuna mu munwa wu mimbikudi mimvimba ti: Mesiya fweti yena mpasi. 19Viluleeno madyela bwabu na vutukeeno ku Nzambi mwanki masumu meno malemvokolo. 20Buna, Mfumu waaluhaana bilokola bi mvundulu mu Yesu, na waalutambikila Klisto wu kalusoodila tuka ntama. 21Ni yandi yulu kafweti tambula natee mu ntangu yi kasa ti bima bimvimba bi kituka bimoona, bonso busamuna wo Nzambi mu munwa wu mimbikudi myandi milongo mu ntama. 22Mose mpe wakata ti: “Mfumu Nzambi waasoola ha kati dyeno wumosi mu zimpangi zeno waaba mumbikudi bonso meno. Mbo lumuyuwila mu mimvimba mi kaaluteela. 23Mpe wonso muntu waalembolo yuwila mumbikudi bewowo, baamukatula mu kanda di Nzambi na baamuhonda.” 24Mimbikudi mimvimba mizonza, tuka Samueli natee myo milanda, mi kisamunina mpe misamu mina hyoka bilumbu bebibi. 25Ni yeno ludi baala ba mimbikudi na ba luwawanu lutunga Nzambi na matata meno mu ntangu yi kata ku Abalahami ti: “Mu dyambu di nkuna aku, makanda mamvimba ma ha butoto mana tambula lusakumunu.” 26Ku yeno ntete Nzambi kayenikisa kisadi kyandi, wumutambika mu lusakumuna na mu tatula kadi muntu mu nkadulu zandi zimbi.»
Iliyochaguliwa sasa
Mavanga 3: dde Ddo
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© (Active) Wycliffe Bible Translators, Inc. All rights reserved.
