matiyu 8
8
Yesɔ gati shɔ vibii wɔɔ
1Aɗagbete Yesɔ notɛ a kɔpɔ, shɔ waa-ne i gɨwu a kntini. 2Shɔ vibii wɔɔ arɛ a ɓaki yuu gboti a Yesɔ ɗekn ashane, << Uɓeyelapa akɛ kasine, sɔmmpɛ wɔsɔk.>>
3Yesɔ ɗe naa rɛ a ɗii shɔ vibiiu rɛ.<<n kasitɛ,>>Yesɔ kasinya nɛ.<<ɔ̃ne wɔsɔkǃ>> u vibiiu gatirɛ tɛ̃ɛ̃t. 4Kɛɗɔn Yesɔ geliune, << ntapɛ mɔkɔ geli shɔ wɔɔ nɛ. Ama yɛnɛ, a tasaa yuu a shɔ nya waa-ne jaa Ɗa bii a ã Ɗalapa vigbete Musa ãsi nya au yuu, no gbete shɔ zɛkɛ naa vibii yisi nya tɛ.>>
Yesɔ gati sɔja Roma jawɛrɛ
5Naa Yesɔ to kafanahu tɛ, yupẽni sɔja wɔɔ a Yesɔ ɗɔ bii neu sãring naa abii. 6<<Uɓeyelapa, >>yupẽni sɔja shanɛ, <<n jawɛrɛ u vɔrɔ uɗɔ roone a wɛrɛ, jo zɛno rane ɓa u vɔrɔ kpokpok.>>
7Yesɔ geliune, << n yɛn yɛrɛ n gatiu tɔ.>>
8Yupẽni sɔjau kasiu shɔ wɛrɛ nyane, <<n shɔ wɛrɛ, njo yɛ ɓa nɔgbeten a ang wɛrɛ ɓa. Ama a nwa nya kɔ sheeli, n jawɛrɛ yɛ gati tɔ. 9Njong yuu npɛ shɔ nɔsisɨn, sɔjayi sɔ̃njo ang nosisɨn. n geli shɔne<yɛne,> i yɛrɛ; n geli shɔ wɔɔ nɛ,<appɛ,>arɛ. n geli n jawɛrɛ rɛ ne, <pɛli vimpɛ,> pɛli rɛ.>>
10Naa Yesɔ nta vimtɛ, ɔ̃ruu kɛ vibii-zaa nɛ a geli shɔgbeteyi gɨu a knti nɛ,<<vigbeten kɛ gelɔɔ nɛn kɔ nizɛ, njo kpaa shɔ wɔɔ ɓa Isrela ni ɓa gbete u sisɨn ãne aɗɔn nankɔ ni ɓa. 11Ngelɔɔ tɛ shɔ waa-ne gbeteyi sisɨn ãne aɗɔn i yɛ a akaa gnri a paa, i ɔ̃rɛ i pɛli vi bii nyaa tɔ̃ne a Ibirayi nii a Ishiyaku nii a Yakubu nii aɗagbete Ɗalapa yɛ roo kpati yɛ. 12Ama shɔ gbeteyi si roo kpati a Ɗa wɛrɛ ai bẽẽ anoni shɔ yɛ lokiyi a ɓili, aɗɔ knri, aɗɔ gbete shɔ sɨnn rɛ a yɔɔ ntari ɗɔn.>>
13Kɛɗɔn Yesɔ geli yupẽni sɔjau nɛ, <<yɛneǃ shɔ yɛ pɛlaa jo nagbete a ã sisɨn kɔ.>>A ɗawu ni tɛ̃ɛ̃ti sɔjau jawɛrɛ gati rɛ.
Yesɔ gati shɔ waa-nɛ
14Naa Yesɔ atɛ a Bituru wɛrɛ, azɛ Bituru ɓekponi soro roo tɛ aɗɔ roone, nori tuu tɔ. 15Yesɔ ɗii Bituru ɓekponi a naa si nori ɗɔgbete pɛliu yɛ, noriu yau rɛ, Bituru ɓekponi yulapa a gee Yesɔ nya rɛ.
16A dii wɔɔ a ɗaɗɗarɛ, shɔ n ti shɔ gbeteyi suru kɔlineyi ni abii Yesɔ ɗɔ bii, Yesɔ nwa nya a shɛshi suru kɔlineyi rɛ a gati shɔ vɔrɔyi kpai. 17Vim ɔ̃nankɔ u sɔ̃ri nya vigbete Ɗa jaa shone Ishaya sha si tɛ̃ɛ̃tɛ̃ɛ̃ yɛː
<<Tuu vɔrɔ bii tɛ kpai
a yiki vigbeteu n tiu vɔrɔ a bii kpɛkpɛlɛ au ɗɔ bii.>>
Shɔ gbeteyi tɔneyi gn Yesɔ
18Naa Yesɔ zɛtɛ mooyi tolitɛ au ɗɔ bii, a pɔ̃rɛ i tɛ ɓooti daa. 19kɛɗɔn shɔ mala gbete tasi shɔ laabeene nya ãsine gbete Musa beeyɛ arɛ Yesɔ ɗɔ bii a shane,<<Shɔ mala, n kasi n gn a tɔ ɗɔ gbete a yɛ piti kpai.>>
20Yesɔ kasi nya rɛ a shanɛ, <<zakulayi nya too aɗɔn, janoyi lapa i sati aɗɔn, ama jashɔzɛ u ɗɔ susune ɓa.>>
21Yesɔ jaɗɔ wɔɔ shanɛ, <<ma-shɔ-wɛrɛ, yampɛ n yɛrɛ n gbãa mayɛ pɛtɔ.>>
22Ama Yesɔ geliune,<< gɨng pɛ, a yaa shɔ gbeteyi Ɗalapa suru ɓa i gbãa ɓɛzɔyi rɛ.>>
Yesɔ shiri mii buu
23Yesɔ to yɛti girgi mii, u jadooyi i gnrɛ a knti ni. 24Kɛɗɔn i ɗɔ yɛne a mii wapo, mii buu yurɛ waane a yɛti mii wapo, mii gãsi yurɛ to a yɛti girgi. Ama Yesɔ si ɓɛjo ɗɔ noro roone. 25U jadoyi i yɛu ɗɔ bii a nisiu rɛ a noro, i shane, <<Uɓeyelapa, raujoǃ u kɛ vɔne.>>
26Yesɔ risi nya rɛ, <<ɔ sisɨn ãne Ɗalapa bii fẽ, aruu ivi ɔ nta seti nankɔ viya? >>Kɛɗɔn Yesɔ yulaparɛ a shiri sɔrɔu rɛ a mii buu ni, a ɗɔ ɔ̃rɛ shɔk laa kane ɓa.
27kopiya ɔ̃ruu kɛ vi bii zaane a hɨne, << Shɔmpɛ zɔng shɔzɛ ɗɔpiya? Piti a sɔrɔ mii buu ni kpai ntau nya tɔ.>>
Yesɔ shɛshi shɔzɛ ziti suru kɔline a bii
28Naa Yesɔ tɔ nya booti da tɛ a tipi Ganasara, shɔzɛ ziti gbeteyi suru kɔline a bii ni i a ayusaa ɗɔ gbete shɔ gbãa vɔrɔ aɗɔn yɛ neu kpaa Yesɔ. I ɔ̃ri shɔ tɛ vi seti aruu shɔ tɛɛ nyabau dɔɓa ai yuu. 29<< Aruu ne ivi ukɔ niviya, Ɗa jaa? I kaa nya lapa i shanɛ Dii jo a pẽneɓa a au ɗɔ yuusho gɔ̃ne tɛ gboti ya? >>
30Yɛne ɗekn fẽ jaa gãnya aɗɔn pẽniba shɔ gattɔ aɗɔwuni. 31A suru kɔlineyi i gakki Yesɔ ne, << Akɛ tɔnɛn shɛshiu tɔ, nyikiu rɛ a tosiu kɛ gãnyayi bii. >>
32Yesɔ geliyi ne, <<Ɔ yɛneǃ >> A i shɛrɛ i tokɛ gãnyayi bii, kɛɗɔn gãnyayi a jaa ni kpai i gɛrirɛ yɛne dii, i tɛ̃kɛ mii wapo a vɔli rɛ a yɛti mii. 33Shɔ gbeteyi ga gãnyayi, i yurɛ a yɛkɛ koomoo a kɔri shɔ vigbete pɛli gãnyayi, a vigbete yesɔ pɛli shɔ suru kɔlineyi ni kpai. 34Kɛɗɔn shɔ koowiyi kpai i shɛ ɗɔ Yesɔ kpaa nɛ rɛ. Naa i zɛu tɛ, a i gakkiu rɛ ne Yesɔ u yaayi dolaa tɔ.
Iliyochaguliwa sasa
matiyu 8: Laa
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Word for the World International and The Word for the World Nigeria
