Tite 6
6
Yiu mala mùr-gùla
1Lang ɓwapǝndǝa tinata làkkì a ɓanza sǝ à ɓǝlki amuna-mamǝna ka, 2amuna mala Ɓakuli#6:2 amuna mala Ɓakuli ka à kǝ sǝni kǝla amǝturonjar mala Ɓakuli na, ko abangŋo na mǝnana à twal nggūrǝ aɓwapǝndǝa ka, ko aɓea amurǝma na a pwarian mǝnana à twal ɓamuria ama à nda ka aɓakuli ka. sǝn ɓoarkinsari mala amuna-mamǝna mala aɓwapǝndǝa, nda à yiu à yì twalki amana à earkicea ateà ka, ɓǝà duk amālea.#6:2 Ɓalli aɓa: Ayu 1:6; 2:1; 38:7; 1Bit 3:19-20; Yahu 6. 3Pǝlǝa Mǝtalabangŋo bang ama, <<Bangŋo mem pà nǝ̀ lidǝmba nǝ do aɓa ɓwapǝndǝa do mana málá male pà kàm raka ɗàng,#6:3 pà nǝ̀ lidǝmba nǝ do aɓa ɓwapǝndǝa do mana málá male pà kàm raka ɗàng ko: pà nǝ̀ lidǝmba nǝ núngírǝu andǝ ɓwapǝndǝa bà ɗàng. acemǝnana yì ka nǝ̀ nggá wǔ.#6:3 nǝ̀ nggá wǔ ko: kiɗikina a njar male. Sauwa mala do ɓanza male pà nǝ̀ kútì apǝlǝa gbǝman-mwashat nǝ lumi-ɓari (120) ɗàng.>>#6:3 Ɓalli gbal aɓa: Gal 5:16-17.
4A bàkú mǝno sǝ a nzǝmi ka, akwatǝman-ɓwa, yia Nefilim#6:4 Nefilim ngga yakǝla à nda ka amǝ'turonjar mala Ɓakuli mana à kpana ka. (1Bit 3:20). ngga, à ndakam a ɓanza, sǝ lang amuna mala Ɓakuli nongnǝ amuna-mamǝna mala aɓwapǝndǝa ka à ɓǝlki amunia. À nda ka akanggǝrang aɓwana, amǝ'lwa mǝnana lullǝia zǝ́kí ɗiɗyal ka.
Ɓakuli tsǝki Nuhu bù
5Mǝtalabangŋo pelǝki ɓikipa mala ɓealɓikea mala ɓwapǝndǝa a ɓanza, sǝ sǝni ka koya ɗenyicau mala ɓabum ɓwapǝndǝa ka mǝɓike na koya pwari.#6:5 Ɓalli gbal aɓa: Tite 8:21; Ang 14:1-3; Pas 6:18; Mat 15:19; Rom 1:28-32. 6Mǝtalabangŋo pak ɓǝnsǝlǝma nǝ pusǝ ɓwapǝndǝa aɓa ɓanza. Gìrnî ɓungi ɓabumi kǝ̀rkǝ́r.#6:6 Ɓalli gbal aɓa: Ɓal 23:19; 1Sam 15:11,29; 2Sam 24:16; Jol 2:13. 7Sǝ Mǝtalabangŋo bang ama, <<Mǝ nǝ esǝki ɓwapǝndǝa mǝnana ǝn pe ka a ɓanza; mǝ nǝ kiɗikia atārǝia andǝ agirkusǝu mǝgulke, andǝ amǝkèke mǝnana à kǝ ɓang amur nzali, andǝ anyal mǝnana a bumkuli ka. Ən pak ɓǝnsǝlǝma nǝ pea.>> 8Sǝ mala Nuhu ka, kum earmúrú aban Mǝtalabangŋo.#6:8 Ɓalli gbal aɓa: Tite 19:19; Pur 33:17; Luk 1:30.
Ɓakuli ne Nuhu ɓǝ̀ gballì nggea-waru
9Mǝnia ka nda cau mǝnana à gilǝì amur Nuhu andǝ ɓala male ka. Nuhu ka nggea mǝɓealɓoarna na aban Ɓakuli; atà aɓwana mǝnana a nza male ka, kǝ yì na do male pàk jik ka. Nuhu kpata njar mala Ɓakuli. 10Nuhu ka ndanǝ amuna-burana tàrú. Lullǝia ma: Shem, sǝ Ham, andǝ Jafet.
11Ɓakuli sǝni adyan ngga ɓanza ka kǝ cauɓikea nda mùrú hasǝa mala ɓwapǝndǝa, nyare lùmsǝ nǝ caukpaka.#6:11 caukpaka ko ɓealɓikea. 12Ɓakuli pelǝki ka, cauɓikea marǝkina ɓanza kàngkàng, acemǝnana koyan a ɓanza ka anjar male kiɗikina nǝ ɓealɓikea.#6:12 Ɓalli gbal aɓa Ayu 22:15-17; Ang 14:2-3; 53:2-3. 13Ɓakuli pǝlǝa ne Nuhu ama, <<Mǝ ndo mǝ nǝ twalta ɓwapǝndǝa kat, acemǝnana ɓanza lùmsǝ nǝ caukpaka. Mǝsǝcau ka, mǝ nǝ kiɗiki ɓwapǝndǝa andǝ ɓanza. 14We ka gballî ɓamur rǝò nggea-waru nǝ nggun gofa, sǝ wu lanzǝ ɓālǝi andǝ nzǝmi nǝ myang mǝcandǝe mǝnana mùr pà nǝ̀ sùr kàm raka. Kasǝki akurǝm aɓalǝi. 15Ani sǝ awu nǝ gballì warunì: Sauwa male ka, kusǝu gbǝman-ine nǝ lumi-tongno (450). Tangŋa male ka kusǝu lumi-tongno-nong-ɓari bwamdǝ tongno (75). Sǝ dāh'rya male ka, kusǝu lumi-ine bwamdǝ-tongno na (45). 16Gballì mùrí, sǝ wu nying nreban mǝnana tangŋa male ka ɓakusǝu mwashat na nǝ tsùrú aɓata mùrí sǝ arǝ agírǝí, ɓǝ̀ kàrìban kat. Gballì ɓá warunì ɓǝ̀ pangnǝ aɓalǝ akurǝm a nzali, a ɓalǝu, sǝ a kùli, sǝ wu tsǝk kun waru a nkanggari. 17Sǝni! Mǝ ndo mǝ nǝ yinǝ nggea mùr-gùla a ɓanza mǝnana nǝ̀ yia twalta gìr mana kat ndanǝ yilǝmu ka. Koman a ɓanza kǝ lin'ueo ka nǝ̀ wú.#6:17 Ɓalli gbal aɓa: Tite 7:4; 2Bit 2:5. 18Sǝama we ka, mǝ nǝ tamsǝ kùrcau mem a nre sǝm, sǝm nǝ we. Awu nǝ kútí aɓa waru, we sǝ māmó, sǝ amunio andǝ amālia.#6:18 Ɓalli gbal aɓa: Tite 9:9-16; 17:7. 19Awu nǝ yinǝ koya ulang girkusǝu ɓari-ɓari: jamne andǝ mǝ'nggaule, atò a waru, ace mǝnana wu amsǝia ka. 20Koya ulang nyal ka, awu nǝ oasǝ ɓari-ɓari a waru, sǝ koya ulang girkusǝu ka, awu nǝ oasǝ ɓari-ɓari a waru, andǝ koya ulang gìr mǝyilǝmui mǝnana kǝ ɓang a nzali ka ɓari-ɓari, ɓǝà yiu atò aɓa waru. 21Awu nǝ ram koya ulang girlina ma'wun, sǝ mala agirkusǝu, mana nǝ̀ karǝban kat ka.>>
22Nuhu pàk koya gìr ka a nggùnì kǝla mǝnana Ɓakuli ne wi ka.#6:22 Ɓalli gbal aɓa: Tite 7:5.
Iliyochaguliwa sasa
Tite 6: mbu
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
©️2022 The Seed Company