Markus 1
1
Yaari Yohanes we Lei Hatütü Kaü
(Mateus 3.1-12; Lukas 3.1-18; Yohanes 1.19-28)
1Iyer mena hapurotaheri Titiro Maho yaari Hesus Kristo, ra Rauri Dios. 2E hapurotahe nga e weya-mo e farüüyehi räni yaari profeta Isaias pepa bwa:
“Dios e dölü bwa, ‘Ibwe uhori fangatiwo lei ikke namai ma imowamu
bwa ebwe mareti yaramu.’
3Demarü yalematara e kabwat ma niworu bwa
, ‘Hawerewereya yarari Tamoru; hawere yarara ebwe taühü!’ ”
4Yohanes e mire niworu, e hatütüül nga e kaüül yalemat nga e dölü bwa, “Hau wehitengi tammaümi hauda hatütü, bwa Dios ebwe peitaraho tammaümi.” 5Pipiyael yalemat sawori farüyeri Yudea ma Yerusalem la raho hadutering ramari Yohanes, lada tapani tammaüül, Yohanes eda hatütüül räni sarü hilidiri Jordan.
6Üfferi Yohanes e fitehiehi ifiri ureri camel nga talari puwar hini harabau, nga e mwangaü manifetiri ma risori määni niwonap. 7E tabongariil yalemat bwa, “E wol ebwe tabweyatoho mwili ra e taitei dewa ma imowai. Ngaangu e tei hapaüpöüri me ibwe bwalotiwo ida bwaidi höhöri yaar susu. 8Ngaangu i hatütü ngerihemi sarü, nga iiye ebwe hatütü ngerihemi Ngörü Liya.”
Yaari Hesus Hatütü ma Yaar Taraengara Hapaan
(Mateus 3.13—4.11; Lukas 3.21-22; 4.1-13)
9E tai miriyarai nga Hesus eda bwitoho ma Nasaret we wotawotari Kalilea, nga Yohanes eda hatütüye ma räni Jordan. 10Ifiri mena Hesus e bwitahe ma räni ssörü, eda hakane bwa e duhehi hatamari weirengi, nga Ngörü Liya e bwitiwo uwawor e weya hiyoope. 11Nga raam ra e bwitiwo ma weirengi eda dölü bwa, “Heer na Rai i wahawahahiri. E maho faringörüngöri iyolomu.”
12Ifiri mena sahü nga Ngörü Liya eda hafataratahe niworu 13eda mire irang faih bwongiri yaar taraengari yaari Satan hapaan. E türüngüül maru masoho nga anghel lada bwitiwo tapangi.
Hesus e Fadöngüül Famaru Lei Dairaho
(Mateus 4.12-22; Lukas 4.14-15; 5.1-11)
14Werimwiliri mena la karabuseya Yohanes, Hesus eda raho Kalilea eda hori kaü Titiro Maho ra yaari Dios. 15E dölü bwa, “Eda mori bwito yator, nga Farüyeri Dios ra eda mori halepatoho! Hau wehitengi tammaümi hauda hatödüye Titiro Maho!”
16Ifiri mena Hesus e fatare ngaseri sarüra Kalilea, eda käkäneiil liyemaru lei dairaho, Simon ma bwidir Andres, ra la uharai. 17Hesus eda haüül bwa, “Hau bwito pülüyei, bwa ibwe kaühemi bwa haubwe uharaiil yalemat.” 18Ifiri mena sahü nga lada rihitinitiwo yael uharai lada pülüya.
19Eda fatare tawaraho töt nga eda käkäneiil liyemaru bwidibwidi, James ma Yohanes, wonouri Zebedee. La mire usuri wael la hawereweni yael uharai. 20Ifiri mena Hesus e hakaneiil, eda hamatangari fadöngüül; lada rihitatiwo mena tamael Zebedee usuri na wael iyoloil marahara lei yaar fitehi, lada pülüye Hesus.
Mwaare ra E wol Yarüdü Tammaü Retipar
(Lukas 4.31-37)
21Hesus ma marahara lei tabwer la raho Kapernaum, nga eda lani Sabbat Hesus eda ra bwirango räni iimweri uwolongolong eda hapurotahe yaar kaü. 22Yalemat hara la hadutering ramar la lüdüyehiri dewa yaar kaü, bwa e tai weil lei tanahori Farau; bwa iiye e mouduraho bwa e wol poweri yaar kaü.
23Ifiri mena nga e wol demarü mwaare ra e wol yarüdü tammaü retipar ra e mire räni iimwara iimweri uwolongolong eda kabwat nga e dölü bwa, 24“Hesus eri Nasaret, meta ho laweya ma iyolomami? Ho bwito hobwe hatawadi hamami? I hüra re heer: heer na yaari Tamoru lei haküröü ra e liya!”
25Hesus eda yasingeri yarüdü tammaüra bwa, “Dauraho, hoda itiwou ma retiperi mwana!”
26Yarüdü tammaüra eda üsühü tawadiye mwana nga e kabwat eda itiwou ma retiper. 27Urutael yalemat la lüdüyehiri dewa lada hadiyefängääni bwa, “Meta mere? Iyer para dewo kaü ra e taifou? Mwaarer e wol ppour ebwe dölü ramar, nga yarüdü tammaü la bwe tabweya!”
28Titiini Hesus eda matangatangari saworaparaho uwori uruteri farüyeri Kalilea.
Hesus e Hasüya Hamatahiil Pipiyael Yalemat
(Mateus 8.14-17; Lukas 4.38-41)
29Hesus ma marahara lei tabwer ma James ma Yohanes, la süya ma räni iimweri uwolongolong lada hawereraho räni iimweri Simon ma Andres. 30Faifina dini liiri Simon e hamatahi e bwesi dewa rühür eda woro sahü, nga e bwito sahü Hesus lada tabongari. 31Hesus eda raho iyolori faifina, eda hamasü paür eda hasimwataheya. Nga ifiri mena sahü nga eda tawolaraho bwesi nühür eda fitehi harael.
32Werimwiliri torotiwori yaaro, nga yalemat lada hädilaraho lei hamatahi ma marahara e wol yarüdü tammaü retipael iyolori Hesus. 33Urutael sawori wotawotara lada toufängääni matari hatamari iimwara. 34Nga Hesus eda hasüya raho matamatari hamatahiil pipiyael lei hamatahi, nga e harewaniwou pipiyeri yarüdü tammaü ma ifil yalemat. Nga e tai faülüül yarüdü tammaü hara bwa labwe titiro, bwanasahü la faduri hüra re iiye.
Hesus e Kaü ma Kalilea
(Lukas 4.42-44)
35Nimatariyeni waradur, imowari tahaseri yaaro, Hesus eda simwatahe eda süye ma räni wotawotara eda raho burukara e tawol yalemat irang eda sipesipe. 36Nga dari na Simon ma marahara uwar lada kupetaraho. 37Ifiri mena lada weli lada hauya bwa, “Urutael yalemat la kupetiho.”
38Nga Hesus eda haüül bwa, “E mori hataingehiri na dibwe raho uwawori wotawot hara e halepato iha, bwanasahü na hapaüpöüri na ibwe ra kaü uwawor, bwa ira sapiri me ida bwitoho.”
39Ifiri mena nga Hesus eda waiyeraho uwawori uruteri farüyeri Kalilea, e kaüül niimweri uwolongolong nga e harewarewawau yarüdü tammaü.
Hesus e Hasüya Hamatahiri Demarü Mwaare
(Mateus 8.1-4; Lukas 5.12-16)
40Demarü mwaare ra e hamatahiri rühür, e bwitoho iyolori Hesus eda hadobuhuyetiwo, eda tingalowa bwa ebwe tapangi. Eda haüya Hesus bwa, “Nga sahü nga ho masari, nga e süya bwa hobwe hafaheyayei.”
41Hesus eda mouto dewa yara fahoya, eda yangangari eda hatangowa mwana, nga e dölü bwa, “I masari dewa, hobwe faheya!” 42Ifiri mena sahü nga e tawolaraho abedes ma ifiri podüri mwana, eda faheya. 43Nga Hesus eda hamatangari hasüye nga e hatabotabo ngari bwa, 44“E tawol yalemat re hobwe haüye titiini mere. Hobwe hawere sahü hoda raho iyolori paderei bwa ebwe habauhuho hoda hadaraho ffahi ra e tabweya-mo e dölü Moses bwa ebwe nnah ngariil yalemat bwa hoda mori faheya.”
45Nga dari na mwana e süye eda ra hasaworaparaho titin, eda tasüye-mo Hesus ebwe hannaha yara bwirango räni wotawot. Eda mire fatare burukara e tawol yalemat irang, nga yalematari pipiyeri farüye lada bwitoho iyolor.
Iliyochaguliwa sasa
Markus 1: SOV
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
(Active) © Wycliffe Bible Translators, Inc. All rights reserved.
Markus 1
1
Yaari Yohanes we Lei Hatütü Kaü
(Mateus 3.1-12; Lukas 3.1-18; Yohanes 1.19-28)
1Iyer mena hapurotaheri Titiro Maho yaari Hesus Kristo, ra Rauri Dios. 2E hapurotahe nga e weya-mo e farüüyehi räni yaari profeta Isaias pepa bwa:
“Dios e dölü bwa, ‘Ibwe uhori fangatiwo lei ikke namai ma imowamu
bwa ebwe mareti yaramu.’
3Demarü yalematara e kabwat ma niworu bwa
, ‘Hawerewereya yarari Tamoru; hawere yarara ebwe taühü!’ ”
4Yohanes e mire niworu, e hatütüül nga e kaüül yalemat nga e dölü bwa, “Hau wehitengi tammaümi hauda hatütü, bwa Dios ebwe peitaraho tammaümi.” 5Pipiyael yalemat sawori farüyeri Yudea ma Yerusalem la raho hadutering ramari Yohanes, lada tapani tammaüül, Yohanes eda hatütüül räni sarü hilidiri Jordan.
6Üfferi Yohanes e fitehiehi ifiri ureri camel nga talari puwar hini harabau, nga e mwangaü manifetiri ma risori määni niwonap. 7E tabongariil yalemat bwa, “E wol ebwe tabweyatoho mwili ra e taitei dewa ma imowai. Ngaangu e tei hapaüpöüri me ibwe bwalotiwo ida bwaidi höhöri yaar susu. 8Ngaangu i hatütü ngerihemi sarü, nga iiye ebwe hatütü ngerihemi Ngörü Liya.”
Yaari Hesus Hatütü ma Yaar Taraengara Hapaan
(Mateus 3.13—4.11; Lukas 3.21-22; 4.1-13)
9E tai miriyarai nga Hesus eda bwitoho ma Nasaret we wotawotari Kalilea, nga Yohanes eda hatütüye ma räni Jordan. 10Ifiri mena Hesus e bwitahe ma räni ssörü, eda hakane bwa e duhehi hatamari weirengi, nga Ngörü Liya e bwitiwo uwawor e weya hiyoope. 11Nga raam ra e bwitiwo ma weirengi eda dölü bwa, “Heer na Rai i wahawahahiri. E maho faringörüngöri iyolomu.”
12Ifiri mena sahü nga Ngörü Liya eda hafataratahe niworu 13eda mire irang faih bwongiri yaar taraengari yaari Satan hapaan. E türüngüül maru masoho nga anghel lada bwitiwo tapangi.
Hesus e Fadöngüül Famaru Lei Dairaho
(Mateus 4.12-22; Lukas 4.14-15; 5.1-11)
14Werimwiliri mena la karabuseya Yohanes, Hesus eda raho Kalilea eda hori kaü Titiro Maho ra yaari Dios. 15E dölü bwa, “Eda mori bwito yator, nga Farüyeri Dios ra eda mori halepatoho! Hau wehitengi tammaümi hauda hatödüye Titiro Maho!”
16Ifiri mena Hesus e fatare ngaseri sarüra Kalilea, eda käkäneiil liyemaru lei dairaho, Simon ma bwidir Andres, ra la uharai. 17Hesus eda haüül bwa, “Hau bwito pülüyei, bwa ibwe kaühemi bwa haubwe uharaiil yalemat.” 18Ifiri mena sahü nga lada rihitinitiwo yael uharai lada pülüya.
19Eda fatare tawaraho töt nga eda käkäneiil liyemaru bwidibwidi, James ma Yohanes, wonouri Zebedee. La mire usuri wael la hawereweni yael uharai. 20Ifiri mena Hesus e hakaneiil, eda hamatangari fadöngüül; lada rihitatiwo mena tamael Zebedee usuri na wael iyoloil marahara lei yaar fitehi, lada pülüye Hesus.
Mwaare ra E wol Yarüdü Tammaü Retipar
(Lukas 4.31-37)
21Hesus ma marahara lei tabwer la raho Kapernaum, nga eda lani Sabbat Hesus eda ra bwirango räni iimweri uwolongolong eda hapurotahe yaar kaü. 22Yalemat hara la hadutering ramar la lüdüyehiri dewa yaar kaü, bwa e tai weil lei tanahori Farau; bwa iiye e mouduraho bwa e wol poweri yaar kaü.
23Ifiri mena nga e wol demarü mwaare ra e wol yarüdü tammaü retipar ra e mire räni iimwara iimweri uwolongolong eda kabwat nga e dölü bwa, 24“Hesus eri Nasaret, meta ho laweya ma iyolomami? Ho bwito hobwe hatawadi hamami? I hüra re heer: heer na yaari Tamoru lei haküröü ra e liya!”
25Hesus eda yasingeri yarüdü tammaüra bwa, “Dauraho, hoda itiwou ma retiperi mwana!”
26Yarüdü tammaüra eda üsühü tawadiye mwana nga e kabwat eda itiwou ma retiper. 27Urutael yalemat la lüdüyehiri dewa lada hadiyefängääni bwa, “Meta mere? Iyer para dewo kaü ra e taifou? Mwaarer e wol ppour ebwe dölü ramar, nga yarüdü tammaü la bwe tabweya!”
28Titiini Hesus eda matangatangari saworaparaho uwori uruteri farüyeri Kalilea.
Hesus e Hasüya Hamatahiil Pipiyael Yalemat
(Mateus 8.14-17; Lukas 4.38-41)
29Hesus ma marahara lei tabwer ma James ma Yohanes, la süya ma räni iimweri uwolongolong lada hawereraho räni iimweri Simon ma Andres. 30Faifina dini liiri Simon e hamatahi e bwesi dewa rühür eda woro sahü, nga e bwito sahü Hesus lada tabongari. 31Hesus eda raho iyolori faifina, eda hamasü paür eda hasimwataheya. Nga ifiri mena sahü nga eda tawolaraho bwesi nühür eda fitehi harael.
32Werimwiliri torotiwori yaaro, nga yalemat lada hädilaraho lei hamatahi ma marahara e wol yarüdü tammaü retipael iyolori Hesus. 33Urutael sawori wotawotara lada toufängääni matari hatamari iimwara. 34Nga Hesus eda hasüya raho matamatari hamatahiil pipiyael lei hamatahi, nga e harewaniwou pipiyeri yarüdü tammaü ma ifil yalemat. Nga e tai faülüül yarüdü tammaü hara bwa labwe titiro, bwanasahü la faduri hüra re iiye.
Hesus e Kaü ma Kalilea
(Lukas 4.42-44)
35Nimatariyeni waradur, imowari tahaseri yaaro, Hesus eda simwatahe eda süye ma räni wotawotara eda raho burukara e tawol yalemat irang eda sipesipe. 36Nga dari na Simon ma marahara uwar lada kupetaraho. 37Ifiri mena lada weli lada hauya bwa, “Urutael yalemat la kupetiho.”
38Nga Hesus eda haüül bwa, “E mori hataingehiri na dibwe raho uwawori wotawot hara e halepato iha, bwanasahü na hapaüpöüri na ibwe ra kaü uwawor, bwa ira sapiri me ida bwitoho.”
39Ifiri mena nga Hesus eda waiyeraho uwawori uruteri farüyeri Kalilea, e kaüül niimweri uwolongolong nga e harewarewawau yarüdü tammaü.
Hesus e Hasüya Hamatahiri Demarü Mwaare
(Mateus 8.1-4; Lukas 5.12-16)
40Demarü mwaare ra e hamatahiri rühür, e bwitoho iyolori Hesus eda hadobuhuyetiwo, eda tingalowa bwa ebwe tapangi. Eda haüya Hesus bwa, “Nga sahü nga ho masari, nga e süya bwa hobwe hafaheyayei.”
41Hesus eda mouto dewa yara fahoya, eda yangangari eda hatangowa mwana, nga e dölü bwa, “I masari dewa, hobwe faheya!” 42Ifiri mena sahü nga e tawolaraho abedes ma ifiri podüri mwana, eda faheya. 43Nga Hesus eda hamatangari hasüye nga e hatabotabo ngari bwa, 44“E tawol yalemat re hobwe haüye titiini mere. Hobwe hawere sahü hoda raho iyolori paderei bwa ebwe habauhuho hoda hadaraho ffahi ra e tabweya-mo e dölü Moses bwa ebwe nnah ngariil yalemat bwa hoda mori faheya.”
45Nga dari na mwana e süye eda ra hasaworaparaho titin, eda tasüye-mo Hesus ebwe hannaha yara bwirango räni wotawot. Eda mire fatare burukara e tawol yalemat irang, nga yalematari pipiyeri farüye lada bwitoho iyolor.
Iliyochaguliwa sasa
:
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
(Active) © Wycliffe Bible Translators, Inc. All rights reserved.