Matye 8
8
Yiisu dzuhu nga-a-buala
(Mar 1.40-45; Luk 5.12-16)
1Mu matala ma ófi Yiisu ku yulu a munguo, mampwumu ya mampwumu ma baara máyanama nde. 2Ya, nga-a-buala mutsyini áyasele kundaa nde, ya ákunu mabuo mu nsie ŋa nkulu a nde ya ályele nde ti: «Mfumu, kala we dzyi, lo we kughu otsehebe me.» 3Yiisu bu alabala kwogho, ábyeme nde ya ályele kundaa nde ti: «Me ndzyi, kala wu atsyeme!» Ya ŋaana oŋo, nde átsyeme mu buala bu nde. 4Yiisu áfirilyele kundaa nde ti: «Yughu! Ka lyele kundaa mbwuru ti mumõ o, lo gye yisuo nyuru kundaa ngaa a nzaami, ya yigwa ekaba ki ótumu Moyidze, mu osuo kundaa baara bwohono ti we aadzughu.»
Yiisu dzuhu musala a mukwuru a bambumbulu
(Luk 7.1-10; Dzã 4.43-54)
5Mu matala ma ókasomo Yiisu mu bvulu lili Kaperenawume, mfumu a ekuru ki bambumbulu nkama (100) mumõ áyasele kundaa nde ya ábuono nde 6mu olyele bu: «Mfumu, musala a me baakwoho ku nzo, binama bi nde biikpi, ya nde li mu okamono mpara yi alagha.» 7Yiisu ályele kundaa nde ti: «Me sa ngya ya me sa ndzuhu nde.» 8Lo mukwuru a bambumbulu nkama ábvuhulu kundaa nde ti: «Mfumu, me ka ndi wu a kughu o kuulu we somo mu nzo a me. Lo tsughu yini a ndagha mõ, ya musala a me sa adzughu. 9Mu kuulu, meme si ndi kunsa litumu li bakwuru ba me, ya me ndi a bambumbulu ba aakantumu me. Kala ti me ndyele kundaa mumõ ti: “Gye!”, Lo nde gyene, kala ti me ndyele kundaa wu muke ti: “Gya!”, Lo nde gyi, ya kala ti me ndyele kundaa musala a me ti: “Sa esala ki!”, Lo nde si kye.» 10Yiisu bu agyughu obo, nde ákiŋimi ya ályele kundaa ba bákabulunama nde ti: «Mu engaŋma me ndyele kundaa be ti, me nkini aamono mbwuru wu li a kana li linene lili bu mu Isarayele o. 11Me ndyele be yo, balagha sa bamara ku ookapala ya ku ookadzyama tala mu oyadza kyiri ebini emõ ya Abarahame, Idzake ya Dzakobe mu Emfumu ki Mayulu. 12Lo baana ba Emfumu ki Mayulu sa batsili bo kunsa mpyibi yi a laŋa-laŋa yi a ku mbala. Oko sa okala a bilili ya odza myini.» 13Ya Yiisu ályele kundaa mukwuru a bambumbulu nkama ti: «Bvughuru ku nzo a we, ya nyaã okala bwunu a bu aasi we kana.» Mu matala maana mamo, musala a nde ádzughu.
Yiisu dzuhu babyele balagha
(Mar 1.29-34; Luk 4.38-41)
14Yiisu bu asomo ku nzo a Piere, nde ámono buko bu Piere wu mukaha ágyoŋomo mu nkooro a mukaama. 15Yiisu ábyeme kwogho e nde, ya mukaama áfi. Nde átemene ya ákaba Yiisu bi-odza.
16Nkonkolo bu yito, báyabiri kundaa Yiisu baara balagha banga a mifulu mi mibi. Ya mu ndagha a nde, Yiisu ábyi mifulu mimye ya ádzuhu babyele bwohono, 17mu kuulu mandagha ma, ma áli ólyele mubighili Edzayi makeele: «Nde aagwolo bipfwumu bi bihi ya aabiri leme li mabyele ma bihi-a-be.#Edz 53.4»
Ba badzyi onama Yiisu
(Luk 9.57-62)
18Yiisu bu amono mpwumu a baara yi áadzyi nde, nde ágwi litumu kundaa binduono bagye ya nde mu ngulu yinke yi a mubu. 19Muluo-mikyene mumõ áyasele ya ályele kundaa nde ti: «Muluo, nswe ku aagye we, me sa nama we.» 20Yiisu ályele kundaa nde ti: «Mibagha mili a miŋma mi baakasweme, ya baŋmini ba mayulu bali a manzo, lo Mwana a mbwuru ka li a ŋa aasiili mutswi o.» 21Mukimi mu binduono bi nde ályele kundaa nde ndiri: «Mfumu, gwa me muswa me mangye yindzyighi taara a me.» 22Lo Yiisu ábvuhulu kundaa nde ti: «Nama me ya nyaã ba bákpi badzyighi bibyimi bi bo.»
Yiisu si ti efulu ki enene edzuunu
(Mar 4.35-41; Luk 8.22-25)
23Ya Yiisu bu asomo mu bwara bu bunene, binduono bi nde bínama nde. 24Ensihibi, efulu ki enene ébwi ofulu ŋa yulu madza ma mubu. Mampo ma madza mábaana oluhu bwara. Lo Yiisu áli mu ensama. 25Binduono bígyi ŋa bele a nde, bísiili nde ya bílyele ti: «Mfumu, bvwuhu bihi! Bihi likpi!» 26Nde ályele kundaa bo ti: «Mu emakye be lili a nzalamweẽ? Be baara baba kana li lisala!» Mu obo, nde átemene, áfyeẽ efulu ya madza ma mubu mu ebaghala, ya edzuunu ki enene ékala. 27Baara bákiŋimi ya bákalyele ti: «Nsa mbwuru wu, wuulu bifulu ya mubu biikagyughu nde!»
Yiisu dzuhu banga a mifulu mi mibi buolo
(Mar 5.1-20; Luk 8.26-39)
28Ya Yiisu bu ato mu ngulu a mubu yinke, mu nsie yi a basi Ngadara, baara buolo banga a mifulu mi mibi bápala kunsa mampyeme ya báyabwana nde. Bo báli a ebaghala ki elagha, me mu obo mbwuru ti mumõ ka ákaluru mu nzili oyo o. 29Bo bábaana okehe bingubu ti: «Mwana a Nzaami! Nki ndagha yili ŋa kara a bihi ya we? We bu aagyi ŋa mu oyamwehẽ bihi mpara nsomo matala mato?» 30Ankoho, la-la ya bo óli a mukaã a bangubulu wu munene wu áakabuludza. 31Mifulu mi mibi míbuono Yiisu ya mílyele kundaa nde ti: «Kala ti we bihi aabyi, lo gweghe bihi mu mukaã a bangubulu.» 32Yiisu ályele kundaa mye ti: «Ligye!» Mifulu mimye mípala ya míyisomo mu bangubulu. Ya mono, mukaã a bangubulu ábwi okumunu ku nsie a munguo mu ntyini, bo báyibwa mu mubu ya bákpi mu madza. 33Bankyele ba bangubulu básuru a ntyini ya bábvughuru kunsa bvulu, ya bályele mandagha mwohono mamõ bu máluru, ya mi óbwana a baara banga a mifulu mi mibi. 34Mu obo, baara ba bvulu lwohono bápala mu oyibwana Yiisu, ya bu bamono nde, bábuono nde amara mu etsulu e nsie e bo.
Iliyochaguliwa sasa
Matye 8: txy TEC
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2024 (Active) Wycliffe Bible Translators, Inc. All rights reserved.
