Санау 15
15
Сыйлы саугъала юсюнден жорукъла
1Раббий Муссагъа былай айтханды:
2– Исраил улулагъа сёлеш да былай айт: «Мен сизге жашаргъа берген жерге сиз киргенден сора, 3Раббийге жагъымлы ийис этдирир ючюн Раббийге тууарладан неда къой-эчкиледен отда кюйдюрюлген къурманнга: толусунлай кюйдюрюлген неда башха къурман, нюзюр къурман не кеси ыразылыкъдан келтирген, неда байрамда тийишли саугъала – келтирген заманда, 4къурман этген адам Раббийге мирзеу саугъагъа 1 литр зейтун жау бла къатыш 1 500 грамм бидиш ун келтирсин. 5Толусунлай кюйдюрюлген къурманны неда башха къурманны келтиргенде, дагъыда, къуюлгъан саугъагъа хар къозу бла бирге 1 литр чагъыр келтиригиз.
6Къочхар келтиргенде, аны бла бирге мирзеу саугъагъа 1 литр зейтун жау бла къатыш 3 килограмм бидиш будай ун келтиригиз. 7Къуюлгъан саугъагъа да 1,25 литр чагъыр келтиригиз. Ол Раббийге жагъымлы ийис болсун.
8Раббийге толусунлай кюйдюрюлген неда башха къурманнга, нюзюр ючюн къурманнга неда саламатлыкъ къурманнга бугъаны келтиргенде, 9тана бла бирге мирзеу саугъагъа 2 литр зейтун жау бла къатыш 4,5 килограмм бидиш будай ун келтиригиз. 10Къуюлгъан саугъагъа да 2 литр чагъыр келтиригиз. Ол отда кюйдюрюлген къурманды, Раббийге жагъымлы ийис болсун. 11Хар бугъаны, къочхарны, къозуну неда улакъны келтиргенде, алай этигиз. 12Келтирилген къурманланы санларына кёре хар къурманнга алай этигиз.
13Сизни кеси адамларыгъызны хар бири отда кюйдюрюлген къурманны, Раббийге жагъымлы ийис этдириуню бу жорукълагъа кёре этсин. 14Тыш адам, неда арагъызда жашагъан башха бир адам, Раббийге жагъымлы ийис этдирир ючюн, отда кюйдюрюлген къурманны келтирирге сюйсе, хар затны сизнича этсин. 15Жамауат! Сизге да, арагъызда жашагъан тыш адамгъа да жорукъ бир болсун; келлик тёлюлеге да ёмюрлюк жорукъ болсун. Раббийни аллында сиз да, тыш къыраллыла да тенгсиз. 16Сизге да, арагъызда жашагъан тыш адамгъа да, адет да бир, жорукъ да бир болсун».
17Раббий Муссагъа былай айтханды:
18– Исраил улулагъа сёлеш да былай айт: «Сиз, Мен элтген жерге киргенден сора, 19ол жерни ётмегин ашагъаныгъызда, аны бир кесегин Раббийге кётюрюлген саугъагъа келтиригиз. 20Кётюрюлген саугъагъа биринчи тартыудан чыкъгъан ундан бир гюттю келтир; аны ындырдан#15:20 Ындыр – мирзеу басыучу жер; орус. ток, гумно. келтирилген саугъаныча кётюрюп келтир. 21Битеу келлик тёлюледе биринчи тартыудан чыкъгъан ундан Раббийге кётюрюлген саугъа беригиз.
Билмей этилген гюняхла ючюн къурманла
22Раббий Муссагъа берген бу буйрукъладан бирин сиз билмей бузсагъыз, былай этигиз. 23Раббий ол буйрукъланы сизге Муссаны юсю бла бергенди. Раббий аланы сизге берген кюнден башлап келлик тёлюлеге дери турлукъдула ала. 24Ол иш жангылып, жамауат да билмей тургъанлай этилсе, битеу жамауат толусунлай кюйдюрюлген къурманнга, Раббийге жагъымлы ийис этер ючюн, бир бугъа эм биргесине тийишли мирзеу саугъа бла къуюлгъан саугъа келтирсин, гюнях ючюн къурманнга да, бир теке келтирсин. 25Дин къуллукъчу битеу Исраил жамауат ючюн тазалау этсин да, алагъа кечилир. Нек дегенде, бу – жангылыч эди эмда бу жангылыч ючюн ала Раббийге отда кюйдюрюлген къурманны бла гюнях ючюн къурманны келтиргендиле. 26Битеу Исраил улуланы жамауаты да, арасында жашагъан тыш адамла да кечилирле, нек дегенде, битеу халкъ аны жангылып этгенди.
27Бир адам жангылып гюнях этсе уа, ол гюнях ючюн къурманнга жыллыкъ эчкини келтирсин. 28Сора жангылып гюнях этген адамны гюняхы ючюн дин къуллукъчу Раббийни аллында аны тазаласын. Тазаланыу этилгенден сора ол адам кечилир. 29Жангылып гюнях этгеннге, Исраилни кеси адамына да, арагъызда жашагъан тыш адамгъа да, адет бир болсун.
30Кеси адамларыгъыздан неда тыш адамладан биреу билип тургъанлай гюнях этсе уа, ол Раббийни сыйсыз этеди. Ол жан халкъ арасындан жокъ этилсин. 31Ол Раббийни сёзюн сансыз этгенди, Аны буйругъун бузгъанды. Ол жан халкъындан ишексиз жокъ этилсин, гюняхы ючюн азап чексин».
Шабат кюнню бузгъаннга сюд этиу
32Исраил улула къуу жерде болгъанда ала шабат кюн отун жыйгъан бир адамны тапхандыла. 33Отун жыйгъанны тапханла аны Муссаны бла Харунну эм битеу жамауатны аллына келтиргендиле. 34Анга не этерге билмегенлей, аны тутуп тургъандыла. 35Раббий Муссагъа:
– Ол адам ёлюрге керекди. Битеу жамауат аны къонушдан тышында ташла бла тюйюп ёлтюрсюн, – дегенди.
36Битеу жамауат, Раббий Муссагъа айтханы кибик, ол адамны къонушдан тышына элтгенди да, аны ташла бла тюйюп, ёлтюргенди.
Кийимде токъмакъла
37Раббий Муссагъа былай айтханды:
38– Исраил улулагъа сёлеш да былай айт: «Битеу келлик тёлюледе кийимигизни этеклеринде токъмакъла тигигиз. Хар токъмакъны ичинде кёк жюнден этилген халы болурча этигиз. 39Сизде ол токъмакъла болуп, сиз, алагъа къарагъанда, Раббийни битеу фарызларын эсигизге тюшюрюп, толтурурсуз. Сора, сиз, саякълыкъгъа тартыннган жюрегигизни бла кёзлеригизни ызындан бармазсыз». 40Алай бла сиз Мени битеу фарызларымы эсигизде тутуп, толтуруп турлукъсуз эмда Аллахыгъызны аллында сыйлы боллукъсуз. 41Мен – Раббийме, сизни Аллахыгъызма. Сизни Аллахыгъыз болур ючюн, Мен сизни Мисирден чыгъаргъанма! Мен Раббийме, сизни Аллахыгъызма!
Iliyochaguliwa sasa
Санау 15: МалкъСК
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Институт перевода Библии, 2020-2024