Санау 12
12
Мариям бла Харун Муссагъа зарланадыла
1Мусса бир хушлу тиширыуну къатыннга алгъанды. Мариям бла Харун а Муссаны хушлу къатыны ючюн, анга тырман этгендиле. 2Ала:
– Раббий жаланда Муссагъамы сёлешгенди? Бизге уа сёлешмегенмиди? – дей эдиле.
Раббий аны эшитгенди.
3Мусса уа битеу дунияда эм жууаш адам эди.
4Ала билмей тургъанлай Раббий Муссагъа, Харуннга эм Мариямгъа:
– Ючюгюз да Тюбешиу Чатыргъа чыгъыгъыз, – деди да, ала ючюсю да ары келдиле.
5Раббий булут чигинжиде энди да, Чатырны эшик аллында тохтап, Харунну бла Мариямны чакъырды; ала экиси да алгъа чыкъдыла. 6Раббий алагъа былай айтханды:
– Мени айтханыма тынгылагъыз!
Арагъызда Раббийни файхамбары болса,
Мен анга кёрюнюуде билим береме,
тюшлеринде сёлешеме.
7Мени къулум Мусса бла уа алай тюйюлдю;
ол битеу юйюмде ышаннгылыды.
8Мен аны бла бетден бетге ушакъ этеме,
элберле бла угъай, ачыкъ сёлешеме;
Раббийни сыфатын да кёреди ол.
Сиз а къулум Муссаны айыпларгъа къалай къоркъмадыгъыз?
9Раббий, алагъа бек чамланып, алайдан кетгенди.
10Булут чатырдан кётюрюлгенден сора, Мариямны келепен ауруу алып, териси къар кибик акъ болгъанды. Харун анга айланнганды да, аны келепенден ауругъанын кёргенди. 11Харун Муссагъа:
– Тилейме, жюйюсханым, биз акъылсызлыкъдан этген гюняхыбыз ючюн сен бизге азап салма, – деди. – 12Мариям ёлю кибик болмасын, анасыны къарынындан, санларыны жартысы чирип, ёлю туугъан сабий кибик болмасын.
13Мусса къычырып, Раббийден:
– Эй Аллах! Тилейме, муну сау эт! – деди.
14Раббий а Муссагъа жууапха:
– Атасы аны бетине тюкюрсе, сыйсызлыгъында жети кюнню турургъа керек болмазмы эди? Къонудан тышына жети кюннге элтсинле да, андан сора къайтыр, – деди.
15Мариям жети кюнню къонушну тышында тургъанды. Ол къайтхынчы халкъ жолгъа чыкъмагъанды.
Iliyochaguliwa sasa
Санау 12: МалкъСК
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Институт перевода Библии, 2020-2024