Luk 1
1
Inade usino ne Tiopilus
1Bibi buo Tiopilus, lisa vanunua makuba sou tove a niagena mapamulina na golugolu vuso Salemo ei mapale balivua ne amiteu. 2Sou ogomuli a inade ne sou a vanunua sou ite a golugolu odo a matane sou, soke na ilala a golugolu sou odo i palea. Sou a vanunua ie sou ino tomane a vanunua mina pipigona na inade mine Salemo, me sou bilii e amiteu a mapamulina ie. 3Maido me eau tamai ea kale na niage a mapamulina ieli mea na sosove usino ne oo. Palapala eau gegemuale iiti a vuna golugolu vuso ie, me seidei eau niage bilesi moni, tomane a golugolu sou odo ei paleasi. 4Maido me mane oo gi, o no muada iiti i maido, a inade sou matetengi e oo iedo, ei patotona vuso.
Ioanes ni alaposa
5Ilala Herot ei muina a mapana mine Iudia, a prist tasa ino, aisana e Sekaraia. Ei a prist mine sou a abuna mine Abiia. Susuna ei a abuna mine Aron, ma aisane susuna e Elisabet. 6Sulu bilesi sele na matane Salemo. Sulu ogomulimuli a binea vuso ma inade vuso mine Bibi Taula, me sulu ma isa oto a mamauna na matane ei. 7Moni e sulu ma isa oto a bibaini, vuna Elisabet ei ma mapigogoi ete ni natua. Me sulu buo mamauosi.
8Na bai tasa sou a abuna mine Sekaraia sou goli a pipigona mina prist, me Sekaraia ei goli a pipigona prist na lagune Salemo. 9Na inigogona mina pipigona prist iedo sou vileale Sekaraia na maisalosalona, me ei gali ulilo na luma mine Bibi Taula mina gunolina niabi a muo ei mangina. 10Na ilala ei goli a niabi iodo, a abuna vanunua ma tavivine taula sou muina sala me sou kaka.
11A bineanea tasa mine Bibi Taula ei palea le Sekaraia mei magili na limana e gata na poso na niabi na muo ei isa a manginana. 12Sekaraia ei ite a bineanea mei saga mei lae. 13Moni a bineanea ei vei lei maido, “Sekaraia, oo ma laelae lou. Salemo ei longesi a kinaka minio. Susumu e Elisabet ei ni maalepose a bibaini. Me oo no tole a aisana e Ioanes. 14Lilomu ni muina doana, me oo no mongemonge. Ma vanunua ma tavivine makuba ne sou mongemonge na ilala a bibaini dolo ni alaposa, 15vuna ei ni isa a aisa buo na matane Bibi Taula. Ei ni ma ini ete a vain ma nanu sagaligali. Ilala ei saboa ino na tiane tinana, a Maolona Nunu ei ni vonu sele ne ei. 16Ei ni toe a vanunua ma tavivine makuba mine Israel ne sou veteliu usino ne Salemo, Bibi Taula mine sou. 17Ei ni guale a inigogona ma sagagalina mine Elaiia mei ni muga pala ane Bibi Taula. Ei ni toe selebanini pilu e tamatamane sou ne sou lilo tasa moni. Me ei ni toebilelesi a damutatalana mina vanua na saukikina inade, me ne sou guale a damutatalana doana tomane sou a bilesina vanunua. Ei ni masusulu a vanunua ne sou pipigo ane Bibi Taula.”
18Me Sekaraia ei vei ane bineanea maido, “Eau na muada a inade minio ieli matina? Eau buo sosouosi, me susugu tamai ei buo mamauosi.”
19Ma bineanea ei adeliu maido, “Eau e Gebriel, eau magiligili na lagune Salemo. Salemo oto ei peltase eau na vei lio mea maasi a malongona doana ieli usinani ne oo. 20Io, oo longe. Oo ma silimuli ete a inade minau, maido me seidei asemu ni sobo, me oo no ma adeade oto mapigogoi na ilala a golugolu vuso do i palea. Inadegu ieli ei ni palea ivu na ilala Salemo ei tau.”
21Vanunua ma tavivine sou magitali e Sekaraia, sou damutatala papai sei golu i palea me ei muina tabaa lilo na luma mine Salemo. 22Me mulimuli ei gali usala mei ma mapigogoi ete ni ade ane sou. Maido me sou damu, ei ite a golu sea sanii lilo na luma mine Salemo. Ei matailala ane sou a limana moni. Ma asena i sobo moni muina.
23Mulimuli, na ilala pipigona mine Sekaraia i pulu, ei veteliu usino na aubu minei. 24Me mulimuli susuna e Elisabet ei saaavu, mei ovu moni muina mapigogoi a game lima. Elisabet ei vei maido, 25“Bibi Taula ei dode eau mei goli a golu ieli ni palea le eau mina mapulina maelana minau na matane sou a vanunua ma tavivine.”
Iesu ni alaposa
26Na game pantasanai mine Elisabet ei saaavu, Salemo ei peltase a bineanea e Gebriel usino na aubu tasa ne Galili, aisana e Nasaret. 27Ei asu usino na tavine alaba tasa sou mavuni ni taulaiale a bibi tasa mina abuna mine Devit, aisana e Iosep. Aisana tavine alaba do e Maria. 28Io Gebriel ei asu usino ne ei mei vei maido, “Oaso, tavine. Bibi Taula ei ino pilu e oo, mei maibalave oo mei toekube oo.”
29Maria ei longe a inade do mei saga mei damutale maido, “Ieli sei matana inade?” 30Ma bineanea ei vei lei maido, “Maria, oo ma laelae lou. Salemo ei lilokuba sele ane oo. 31Longe. Oo no tiana me oo no maalepose a bibaini. Me oo no tole ei e Iesu. 32Ei ni a bibi buo. Me ne sou tole ei e Natune Salemo oata oto sele. Me Salemo ni tau ei a mapana tomane tubune ei e Devit. 33Ei ni muina a mapana mine sou a abuna mine Iekop taliuliu. Ma pipigona mapana minei ei ni ma pulu oto.”
34Me Maria ei tagi e bineanea maido, “Golu ieli ni palea matina? Eau saboa ngolo pilu a bibi tasa.”
35Ma bineanea ei maliu a inade minei maido, “A Maolona Nunu ni asu usinani ne oo, ma sagagalina mine Salemo oata oto ei ni avisobe oo. Maido ma bibaini mulimuli oo no maalepose, ei ni muina a bilesina bibi mine Salemo, me ne sou tole ei e Natune Salemo. 36Longe. Eisamu e Elisabet ei buosi, moni ei saaavuosi mei ni maalepose a bibaini. Lisa sou veivei ve ei ma mapigogoi ete ni natua. Moni seidei ei saaavuosi, ma gamena i pantasasi. 37A golu tasa i ma mapigogoi ete ni loi e Salemo.”
38Me Maria ei vei maido, “Longe. Eau a tavine na pipigona mine Bibi Taula. Ei mapigogoi ni toe eau tomane oo vei.” Io bineanea ei ilisitase ei mei asu.
Maria ei gagoale Elisabet
39Na ilala do Maria ei ilisi mei asu asi usino na aubu tasa ino na avena loena ne Iudia. 40Me ei gali ulilo na luma mine Sekaraia mei vate oaso doana usino ne Elisabet. 41Elisabet ei longe Maria i vate oaso doana, ma bibaini lilo na tiane Elisabet ei seu. Ma Maolona Nunu ei vonu ne Elisabet, 42me ei tola mamau sele maido, “Salemo ei toekube sele oo mei bilii e oo a maibalavana ei vululusi a maibalavana ei bilii e sou a tavivine vuso sea. Ma bibaini lilo na tiamu iede, ei tamai ei guale a maibalavana mine Salemo. 43Eau e sei me tinane Bibi Taula minau ei gagoale eau? 44Longe. Ilala tagilagu ei longe a oaso kubaana minio, io a bibaini eili lilo na tiagu ei mongemonge mei seu. 45Oo silimuliosi maido Bibi Taula ei ni toe tomane ei vei le oo, maido me ei ni maibalave e oo.”
Inala mine Maria
46Maria ei vei maido,
“Lilogu i beilange a aisane Bibi Taula.
47Ma nunugu ei mongemonge e Salemo, ei a Buloina minau.
48Eau a tavine na pipigona minei, eau a golu sabubu,
moni ei ite eau mei dode eau.
Seidei me mulimuli tamai a abuna vanunua ma tavivine vuso
ne sou vei maido, Salemo i toekube sele eau.
49Salemo ei isa a sagagalina buo,
ei goli a golu buo sele mina buloine eau,
ma aisane ei ni muina maolo.
50Ei dodode a vanunua ma tavivine sou matano moni ne ei.
Ei ni goli maido moni usino ne sou a vanunua ma tavivine seidei sou eili,
me ne sou a vanunua ma tavivine sou palea mulimuli mapigogoi taliuliu taliuliu.
51Limane ei goli a pipigona sagali.
A vanunua sou damu i sou a munugana sele me sou beilange a aisane sou oto, ei ni taulele sou maisaba.
52Ei taupui e sou a mapamapana,
mei beilange a vanunua sou taupuipui e sou.
53Ei bilii a golu doana papaina usino na vanunua sou vitolo ne sou masu sele.
Moni a vanunua sou isa a golu papaina, ei taulele me sou asu sabubu.
54-55Ei lilomuli a bibi na pipigona minei, e Israel, mei buloi e ei
mei damutaletale a adegatunana ei goli le sou e eisusune eitou, mei ni dode taliuliu e Abraham ma abuabuna mine ei.”
56Maria ei malu pilu e Elisabet mapigogoi a game tolu, mulimuli ei veteliu usino na aubu minei.
Elisabet ei maalepose e Ioanes
57Ilala i paleasi mine Elisabet ni maalepose a bibaini, me ei vasusiale a bibi baini. 58Sou mina aubu mine Elisabet me sou a abuna minei sou longe a inade e Bibi Taula ei dode sele ei, me sou mongemonge pilu e ei.
59Na malada pantolunai sou asu usinani ne sou moge a bibaini. Sou kale ne sou bilii e ei a aisa e Sekaraia tomane a aisane tamana. 60Moni e tinane bibaini ei vei, “Boa. Neitou tole a aisana e Ioanes.”
61Me sou vei lei, “Tasa mine sou a abuna mine amutou i ma isa oto a aisa maido.”
62Me sou goli a inade a limane sou me sou tagi e tamana ni bilii e sei aisa usino na bibaini. 63Ei vei le sou ne sou guale a golu tasa ni niage i, mei niage a inade maido, “Aisana e Ioanes.” Me sou saga sele. 64Ma tabaa oto a asene Sekaraia ei peo, mei mapigogoiosi ni ade lou. Io ei adeade mei beilange a aisane Salemo. 65Me sou minei vuso, sou ite a golu sea sele i palea do, me sou lae. Ma inade mina golugolu vuso do ei vele maisaba na aububuna vuso na avena loeloena mine Iudia. 66Vanunua vuso sou longe a inade do, sou damutala papai me sou tagu maido, “Mulimuli a bibaini ieli ni palea sei matana bibi?” Sou muada, sagagalina mine Bibi Taula ei ino pilu e ei.
Inade na malongolongona mine Sekaraia
67Io a Maolona Nunu i vonu ne Sekaraia, tamane bibaini iodo, me ei goli a inade na malongolongona maido,
68“Eitou beilange a aisane Salemo, Bibi Taula mine Israel. Ei asu usinani me ei buloi e eitou a vanunua ma tavivine minei mei gualeliu e eitou.
69Na abuna mina bibi na pipigona minei e Devit, Bibi Taula ei mapale a bibi tasa sagali mina gualeliune eitou,#1:69 Na laulau mina inade Grik ei a siili mina gualeliune eitou.
70tomane lisa otosi ei ade i na asene sou a profet maolo minei.
71Ei vei ei ni gualeliu e eitou maino na limane sou a butu mine eitou me sou a vanunua sou lilogegelu sele ane eitou.
72Ei damutatala a magilipiluna iedo lisa ei oto i goli.
Mei dode sou e eisusune eitou mei buloi e sou.
73Ei vei ivu uata ne eisune eitou, e Abraham.
Me seidei ei kale ni goli le eitou tomane lisa ei vei.
74Ei kale ni gualeliu e eitou maino na limane sou a butu,
me neitou lapitole a pipigona minei, me ne eitou ma lae oto.
75Maidolo ma ilala vuso eitou mauli, eitou mapigogoi neitou asu a inigogona vuso i bilesi na matane ei,
me eitou mapigogoi neitou vonu a inigogona doadoana ei kale.
76Me oo natugu, mulimuli ne sou tole oo a profet mine Salemo oata oto sele.
Oo no muga pala ane Bibi Taula, mina masusuluna vea minei.
77-78Oo no matetengi e sou a vanunua ma tavivine minei me ne sou muada,
na dinodo buo minei, Salemo ei kale ni taulele a sinusu mine sou mei ni gualeliu e sou.
Ei ni sosove a oaso mina langi usinani ne eitou,
79mina silidaveina vanunua sou malu na tunuui me na nilaena minate.
Me ei ni iteale kube a ubune eitou, me neitou asu na vea mina lilomeana.”
80Mulimuli a bibaini iedo ei palea buo, ma nununa i palea sagali. Me ei asu mei malu na avena a vanua boa mapigogoi na ilala ei palea muada na matane sou e Israel.
Iliyochaguliwa sasa
Luk 1: MXM
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Text © SIL International, Publisher: © 2023, Wycliffe Bible Translators, Inc. All Rights Reserved.
Luk 1
1
Inade usino ne Tiopilus
1Bibi buo Tiopilus, lisa vanunua makuba sou tove a niagena mapamulina na golugolu vuso Salemo ei mapale balivua ne amiteu. 2Sou ogomuli a inade ne sou a vanunua sou ite a golugolu odo a matane sou, soke na ilala a golugolu sou odo i palea. Sou a vanunua ie sou ino tomane a vanunua mina pipigona na inade mine Salemo, me sou bilii e amiteu a mapamulina ie. 3Maido me eau tamai ea kale na niage a mapamulina ieli mea na sosove usino ne oo. Palapala eau gegemuale iiti a vuna golugolu vuso ie, me seidei eau niage bilesi moni, tomane a golugolu sou odo ei paleasi. 4Maido me mane oo gi, o no muada iiti i maido, a inade sou matetengi e oo iedo, ei patotona vuso.
Ioanes ni alaposa
5Ilala Herot ei muina a mapana mine Iudia, a prist tasa ino, aisana e Sekaraia. Ei a prist mine sou a abuna mine Abiia. Susuna ei a abuna mine Aron, ma aisane susuna e Elisabet. 6Sulu bilesi sele na matane Salemo. Sulu ogomulimuli a binea vuso ma inade vuso mine Bibi Taula, me sulu ma isa oto a mamauna na matane ei. 7Moni e sulu ma isa oto a bibaini, vuna Elisabet ei ma mapigogoi ete ni natua. Me sulu buo mamauosi.
8Na bai tasa sou a abuna mine Sekaraia sou goli a pipigona mina prist, me Sekaraia ei goli a pipigona prist na lagune Salemo. 9Na inigogona mina pipigona prist iedo sou vileale Sekaraia na maisalosalona, me ei gali ulilo na luma mine Bibi Taula mina gunolina niabi a muo ei mangina. 10Na ilala ei goli a niabi iodo, a abuna vanunua ma tavivine taula sou muina sala me sou kaka.
11A bineanea tasa mine Bibi Taula ei palea le Sekaraia mei magili na limana e gata na poso na niabi na muo ei isa a manginana. 12Sekaraia ei ite a bineanea mei saga mei lae. 13Moni a bineanea ei vei lei maido, “Sekaraia, oo ma laelae lou. Salemo ei longesi a kinaka minio. Susumu e Elisabet ei ni maalepose a bibaini. Me oo no tole a aisana e Ioanes. 14Lilomu ni muina doana, me oo no mongemonge. Ma vanunua ma tavivine makuba ne sou mongemonge na ilala a bibaini dolo ni alaposa, 15vuna ei ni isa a aisa buo na matane Bibi Taula. Ei ni ma ini ete a vain ma nanu sagaligali. Ilala ei saboa ino na tiane tinana, a Maolona Nunu ei ni vonu sele ne ei. 16Ei ni toe a vanunua ma tavivine makuba mine Israel ne sou veteliu usino ne Salemo, Bibi Taula mine sou. 17Ei ni guale a inigogona ma sagagalina mine Elaiia mei ni muga pala ane Bibi Taula. Ei ni toe selebanini pilu e tamatamane sou ne sou lilo tasa moni. Me ei ni toebilelesi a damutatalana mina vanua na saukikina inade, me ne sou guale a damutatalana doana tomane sou a bilesina vanunua. Ei ni masusulu a vanunua ne sou pipigo ane Bibi Taula.”
18Me Sekaraia ei vei ane bineanea maido, “Eau na muada a inade minio ieli matina? Eau buo sosouosi, me susugu tamai ei buo mamauosi.”
19Ma bineanea ei adeliu maido, “Eau e Gebriel, eau magiligili na lagune Salemo. Salemo oto ei peltase eau na vei lio mea maasi a malongona doana ieli usinani ne oo. 20Io, oo longe. Oo ma silimuli ete a inade minau, maido me seidei asemu ni sobo, me oo no ma adeade oto mapigogoi na ilala a golugolu vuso do i palea. Inadegu ieli ei ni palea ivu na ilala Salemo ei tau.”
21Vanunua ma tavivine sou magitali e Sekaraia, sou damutatala papai sei golu i palea me ei muina tabaa lilo na luma mine Salemo. 22Me mulimuli ei gali usala mei ma mapigogoi ete ni ade ane sou. Maido me sou damu, ei ite a golu sea sanii lilo na luma mine Salemo. Ei matailala ane sou a limana moni. Ma asena i sobo moni muina.
23Mulimuli, na ilala pipigona mine Sekaraia i pulu, ei veteliu usino na aubu minei. 24Me mulimuli susuna e Elisabet ei saaavu, mei ovu moni muina mapigogoi a game lima. Elisabet ei vei maido, 25“Bibi Taula ei dode eau mei goli a golu ieli ni palea le eau mina mapulina maelana minau na matane sou a vanunua ma tavivine.”
Iesu ni alaposa
26Na game pantasanai mine Elisabet ei saaavu, Salemo ei peltase a bineanea e Gebriel usino na aubu tasa ne Galili, aisana e Nasaret. 27Ei asu usino na tavine alaba tasa sou mavuni ni taulaiale a bibi tasa mina abuna mine Devit, aisana e Iosep. Aisana tavine alaba do e Maria. 28Io Gebriel ei asu usino ne ei mei vei maido, “Oaso, tavine. Bibi Taula ei ino pilu e oo, mei maibalave oo mei toekube oo.”
29Maria ei longe a inade do mei saga mei damutale maido, “Ieli sei matana inade?” 30Ma bineanea ei vei lei maido, “Maria, oo ma laelae lou. Salemo ei lilokuba sele ane oo. 31Longe. Oo no tiana me oo no maalepose a bibaini. Me oo no tole ei e Iesu. 32Ei ni a bibi buo. Me ne sou tole ei e Natune Salemo oata oto sele. Me Salemo ni tau ei a mapana tomane tubune ei e Devit. 33Ei ni muina a mapana mine sou a abuna mine Iekop taliuliu. Ma pipigona mapana minei ei ni ma pulu oto.”
34Me Maria ei tagi e bineanea maido, “Golu ieli ni palea matina? Eau saboa ngolo pilu a bibi tasa.”
35Ma bineanea ei maliu a inade minei maido, “A Maolona Nunu ni asu usinani ne oo, ma sagagalina mine Salemo oata oto ei ni avisobe oo. Maido ma bibaini mulimuli oo no maalepose, ei ni muina a bilesina bibi mine Salemo, me ne sou tole ei e Natune Salemo. 36Longe. Eisamu e Elisabet ei buosi, moni ei saaavuosi mei ni maalepose a bibaini. Lisa sou veivei ve ei ma mapigogoi ete ni natua. Moni seidei ei saaavuosi, ma gamena i pantasasi. 37A golu tasa i ma mapigogoi ete ni loi e Salemo.”
38Me Maria ei vei maido, “Longe. Eau a tavine na pipigona mine Bibi Taula. Ei mapigogoi ni toe eau tomane oo vei.” Io bineanea ei ilisitase ei mei asu.
Maria ei gagoale Elisabet
39Na ilala do Maria ei ilisi mei asu asi usino na aubu tasa ino na avena loena ne Iudia. 40Me ei gali ulilo na luma mine Sekaraia mei vate oaso doana usino ne Elisabet. 41Elisabet ei longe Maria i vate oaso doana, ma bibaini lilo na tiane Elisabet ei seu. Ma Maolona Nunu ei vonu ne Elisabet, 42me ei tola mamau sele maido, “Salemo ei toekube sele oo mei bilii e oo a maibalavana ei vululusi a maibalavana ei bilii e sou a tavivine vuso sea. Ma bibaini lilo na tiamu iede, ei tamai ei guale a maibalavana mine Salemo. 43Eau e sei me tinane Bibi Taula minau ei gagoale eau? 44Longe. Ilala tagilagu ei longe a oaso kubaana minio, io a bibaini eili lilo na tiagu ei mongemonge mei seu. 45Oo silimuliosi maido Bibi Taula ei ni toe tomane ei vei le oo, maido me ei ni maibalave e oo.”
Inala mine Maria
46Maria ei vei maido,
“Lilogu i beilange a aisane Bibi Taula.
47Ma nunugu ei mongemonge e Salemo, ei a Buloina minau.
48Eau a tavine na pipigona minei, eau a golu sabubu,
moni ei ite eau mei dode eau.
Seidei me mulimuli tamai a abuna vanunua ma tavivine vuso
ne sou vei maido, Salemo i toekube sele eau.
49Salemo ei isa a sagagalina buo,
ei goli a golu buo sele mina buloine eau,
ma aisane ei ni muina maolo.
50Ei dodode a vanunua ma tavivine sou matano moni ne ei.
Ei ni goli maido moni usino ne sou a vanunua ma tavivine seidei sou eili,
me ne sou a vanunua ma tavivine sou palea mulimuli mapigogoi taliuliu taliuliu.
51Limane ei goli a pipigona sagali.
A vanunua sou damu i sou a munugana sele me sou beilange a aisane sou oto, ei ni taulele sou maisaba.
52Ei taupui e sou a mapamapana,
mei beilange a vanunua sou taupuipui e sou.
53Ei bilii a golu doana papaina usino na vanunua sou vitolo ne sou masu sele.
Moni a vanunua sou isa a golu papaina, ei taulele me sou asu sabubu.
54-55Ei lilomuli a bibi na pipigona minei, e Israel, mei buloi e ei
mei damutaletale a adegatunana ei goli le sou e eisusune eitou, mei ni dode taliuliu e Abraham ma abuabuna mine ei.”
56Maria ei malu pilu e Elisabet mapigogoi a game tolu, mulimuli ei veteliu usino na aubu minei.
Elisabet ei maalepose e Ioanes
57Ilala i paleasi mine Elisabet ni maalepose a bibaini, me ei vasusiale a bibi baini. 58Sou mina aubu mine Elisabet me sou a abuna minei sou longe a inade e Bibi Taula ei dode sele ei, me sou mongemonge pilu e ei.
59Na malada pantolunai sou asu usinani ne sou moge a bibaini. Sou kale ne sou bilii e ei a aisa e Sekaraia tomane a aisane tamana. 60Moni e tinane bibaini ei vei, “Boa. Neitou tole a aisana e Ioanes.”
61Me sou vei lei, “Tasa mine sou a abuna mine amutou i ma isa oto a aisa maido.”
62Me sou goli a inade a limane sou me sou tagi e tamana ni bilii e sei aisa usino na bibaini. 63Ei vei le sou ne sou guale a golu tasa ni niage i, mei niage a inade maido, “Aisana e Ioanes.” Me sou saga sele. 64Ma tabaa oto a asene Sekaraia ei peo, mei mapigogoiosi ni ade lou. Io ei adeade mei beilange a aisane Salemo. 65Me sou minei vuso, sou ite a golu sea sele i palea do, me sou lae. Ma inade mina golugolu vuso do ei vele maisaba na aububuna vuso na avena loeloena mine Iudia. 66Vanunua vuso sou longe a inade do, sou damutala papai me sou tagu maido, “Mulimuli a bibaini ieli ni palea sei matana bibi?” Sou muada, sagagalina mine Bibi Taula ei ino pilu e ei.
Inade na malongolongona mine Sekaraia
67Io a Maolona Nunu i vonu ne Sekaraia, tamane bibaini iodo, me ei goli a inade na malongolongona maido,
68“Eitou beilange a aisane Salemo, Bibi Taula mine Israel. Ei asu usinani me ei buloi e eitou a vanunua ma tavivine minei mei gualeliu e eitou.
69Na abuna mina bibi na pipigona minei e Devit, Bibi Taula ei mapale a bibi tasa sagali mina gualeliune eitou,#1:69 Na laulau mina inade Grik ei a siili mina gualeliune eitou.
70tomane lisa otosi ei ade i na asene sou a profet maolo minei.
71Ei vei ei ni gualeliu e eitou maino na limane sou a butu mine eitou me sou a vanunua sou lilogegelu sele ane eitou.
72Ei damutatala a magilipiluna iedo lisa ei oto i goli.
Mei dode sou e eisusune eitou mei buloi e sou.
73Ei vei ivu uata ne eisune eitou, e Abraham.
Me seidei ei kale ni goli le eitou tomane lisa ei vei.
74Ei kale ni gualeliu e eitou maino na limane sou a butu,
me neitou lapitole a pipigona minei, me ne eitou ma lae oto.
75Maidolo ma ilala vuso eitou mauli, eitou mapigogoi neitou asu a inigogona vuso i bilesi na matane ei,
me eitou mapigogoi neitou vonu a inigogona doadoana ei kale.
76Me oo natugu, mulimuli ne sou tole oo a profet mine Salemo oata oto sele.
Oo no muga pala ane Bibi Taula, mina masusuluna vea minei.
77-78Oo no matetengi e sou a vanunua ma tavivine minei me ne sou muada,
na dinodo buo minei, Salemo ei kale ni taulele a sinusu mine sou mei ni gualeliu e sou.
Ei ni sosove a oaso mina langi usinani ne eitou,
79mina silidaveina vanunua sou malu na tunuui me na nilaena minate.
Me ei ni iteale kube a ubune eitou, me neitou asu na vea mina lilomeana.”
80Mulimuli a bibaini iedo ei palea buo, ma nununa i palea sagali. Me ei asu mei malu na avena a vanua boa mapigogoi na ilala ei palea muada na matane sou e Israel.
Iliyochaguliwa sasa
:
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Text © SIL International, Publisher: © 2023, Wycliffe Bible Translators, Inc. All Rights Reserved.