Susuuon 24
24
Minangadaawa i Tongotulun Joudi di Poulus
1Katalib nopo dii iri limo tadau om ongoino dii iOnonias, i Imam Tagajo soi Bandar Koisoria. Om kivaro piipiro moloingon om iso luyar, ngaranjo i Totolus, nakavaja nogi diOnonias. Om minongoi iolo gumotuvang di Gobonor Pilik do minangadaawa di Poulus. 2Om loovono dii di gobonor i Poulus masu siri poibisaraan om timpuunno dii i Totolus mangadaawa di Poulus do kadisido, “Gobonor Pilik, ikano i datu i rorojoonja marong. Koiloko marong momorinta dagai do alaidno aman iti vonuvo dagai. Om oguu iri noulitnu siti vonuvo dagai do papamaju diti vonuvo dagai. 3Kasangkat diri nga kaandaianja mivaja do mangarajou#24:3 mangarajou: mongompod ikoi dikau soumur sombo-sombo nopo. 4Nga mokitulung oku dikau supaya asabar ginavonu do posivat oku dika do oruai rumongou diti tangaronku i odibak. 5Oilaanja do i Poulus nopo nga tulun do popourau di tongotulun Joudi. Om popiodu isido di tongotulun Joudi pointongkop kasangkat do vonuvo, om isidono iso kotua di kumpulan di tulun Nasarit. 6Om moo daa i Poulus papasaim di Valai Sasambayanganja Tagajo, nga tinangkapjai dii isido. [Om bisarawonja daa i Poulus maja di Undang-undang Ugamaja, 7nga korikot nopo dii i Losias, i kotua di oribu soujor, om lavano ikoi dii disido om i Poulus dii nga nosolod dii di Losias mantad dagai. 8Nipaatod di Losias i Poulus siti dikau, om sinuu disido i tongotulun iri minangadaawa di Poulus minongoi siti dikau.] Aandai do duatonnu i Poulus nong onu i vinaaljo om oilaannu do kasangkat diti pangadaawaanja nga oinomod,” kadi Totolus.
9I tongotulun Joudi vokon nogi nga kopiiso i ginavo mangadaawa di Poulus om mitangar do oinomod iri tinangaran di Totolus.
Misinjawap i Poulus diri Daawaan-daawaan di Tulun siri Gotuvang di Pilik
10Mapoi-kapoi i Gobonor Pilik di Poulus do monuu disido mitangar. Om kadi Poulus, “Oilaanku ika do momutusko bisara siti bansaja piipiro toun linaid. Jadi aandaian dii i ginavoku misinjawap diri daawan-daawan diolo dogo si gotuvangnu. 11Nong mongoduatko do tulun nong sombia korikatanku soi Yorusalim nga oilaannu do aupo norikot opulu om duvo tadau mantad di kinorikatanku soi do sumamba di Kinoringan. 12Nga aui dii insan koontong iolo dogo kumisival di tongotulun. Insan soi natad do Valai Sasambayangan Tagajo ko soi valai sasambayangan do vokon ko sombo-sombo nopo soi Bandar Yorusalim nga ausoi nokoontong dogo kumisival do tongotulun. 13Om au dii buli iolo papatarang do oinomod iri pangadaawaan diolo dogo maino do momudut iolo. 14Nga itino okunonku dikau do sumamba oku do Kinoringan iri sambawon di gulu-guluja. Nga ontok do sumamba oku, maja okui di ponudukan di Tuhan Yisus, i ponguranan diolo do kumpulan di tulun Nasarit. Om aparsaya oku nogi kasangkat diri tinulis saralom Undang-undang di Musa om tongobuuk di tongonabi vokon, i popolombus di tinangaran do Kinoringan. 15Aarap oku do Kinoringan do povijau Isido kavagu di tulun do otulid ginavo om i tulun do okonko otulid ginavo. I tongotulun Joudi vokon nogi nga aarap diri. 16Om arajin oku supaya aandai i kopurimanan di ginavoku si gotuvang di Kinoringan om si gotuvang do tulun toomod,” kadi Poulus.
17Om kadi Poulus kavagu, “Nga piipiro toun do au okupo nokouli soi Yorusalim, jadi rumikot oku mongovit di siin siri di bansaku om manaak oku nogi do isogit si di Kinoringan soi natad do Valai Sasambayangan Tagajo. 18-19Om nokoopod oku nopo dii misinlidang siri natad Valai Sasambayangan Tagajo, om naantangan oku di tulun Joudi mantad soi Vonuvo Osia soi natad do Valai Sasambayangan Tagajo. Nga ausopo tulun oguu nakavaja dogo, om ausopo nokourau. Nong moo i tulun Joudi mantad Vonuvo Osia do mangadaawa dogo, apatut do gumotuvang iolo dikau do mangadaawa, 20atau pun apatut iti tongotulun siti popoilo dika nong onu kinasalaanku ontok do ginumotuvang oku do Pinonguntunan di Tongokotua soi Yorusalim. 21Nga irino iso oilaanku do buli daawaan oku diolo do poingkakat oku si gotuvang diolo om linumuvap oku do irad diti, ‘Bisarawon oku dikovu tadau maino sabap aparsaya oku do ovijau kavagu i tongotulun nongapatai laid,’ kangku,” kadi Poulus di Gobonor Pilik.
22Nga oilaan di Pilik oguu pasal di ponudukan di Tuhan Yisus, jadi ginantung disido iri bisara, om kadisido, “Korikotpo dii i Losias i kotua di oribu soujor, om salasaionku nogi dino kavagu,” ka. 23Om sinuu di Pilik i kotua di aatus soujor mangajaga di Poulus, nga minongolila nogi isido supaya obobojou kopoyok i Poulus. Om sinuu nogi di Pilik i kotua di soujor do, “Poboyoon dii i songkoruangan di Poulus mongovit onunu nopo i kokurangan si disido,” kadi Pilik.
Ginumotuvang i Poulus di Gobonor Pilik om Dorusila
24Katalib piipiro tadau mantad diri om korikotno dii i Gobonor Pilik duvo di savojo, tulun Joudi, ngaranjo nopo nga i Dorusila. Sinuu di gobonor i tulun mongongoi di Poulus do rumongou iolo di Poulus mitangar pasal do aparsaya di Koristus Yisus. 25Nga monuduk i Poulus do misti do otulid manalasai om misti momorinta i tulun do kojuvan kondiri. Om monuduk isido nogi do momutus i Kinoringan di tongotulun do insan tadau. Om nokorosi dii i Pilik om kadisido, “Pampanauno pogi maino. Kivaro kosivatanku om loovonku ika kavagu,” ka. 26Om aarap daa i Pilik do manaak i Poulus do siin disido. Jadi soumur suuon disido i tulun mongovit di Poulus mongoi si disido kumisorita.
27Katalib duvo notoun mantad diri, om kivaro iso gobonor kavavagu korikot do sumuvoli di Pilik, ngaranjo nopo nga i Porokius Pitus. Jadi kouvangan di Pilik monoluod#24:27 monoluod: monginsasamod di ginavo di tongotulun Joudi, om niopung dii disido i Poulus siri jiil.
Iliyochaguliwa sasa
Susuuon 24: LabukPKV
Kuonyesha
Shirikisha
Nakili

Je, ungependa vivutio vyako vihifadhiwe kwenye vifaa vyako vyote? Jisajili au ingia
© 1995, Wycliffe Bible Translators, Inc. All rights reserved.