MARKU 7
7
1Mba yakungulukila kuli iye A-Fwariseu, ni amwe a kuli akwa kusonyeka waze akatukile ku Yerusaleme. 2No yamona amwe a kuli tumbaji twenyi kanali mbolo jo ni moko a majilo, te aze keshi kusana; aámbilile. 3(Mumu A-Fwariseu ni A-Yunda eswe keshi kulia shina masana ku moko kanji, se anakakaminya ku ndongo ja makulwana; 4muze mahiluka ku yitanda keshi kulia shina masana; ni yuma yinji yikwo kuyili, yize hanatambula mukuyikakaminya, kukosa cha misenge ni milondo, ni kengelia ni miu.) 5Mba A-Fwariseu ni akwa kusonyeka yamuhula ngwo, Kuchi te tumbaji twe keshi kwenda nikulita ni ndongo ja makulwana, alioze kakulia mbolo jo ni moko a majilo. 6Iye wambile kuli ayo ngwenyi, Izaia waprofetezele kanawa ha kutwala kuli yenu yilembese, ngwe chinasonewa ngwo,
Wano atu kakungulemesa ni mivumbo yo,
alioze mbunge jo jili kusuku ni yami.
7Alioze hamokomoko kakunguwayila,
nikulongesa ngwe longeso lio, yambo ya atu.
8Mumu nwakuhichika liji lia shimbi lia Zambi, nwakukakaminya ku ndongo ja atu, kukosa cha milondo ni misenge, ni yuma yinji yikwo ya kulifwa ni yino nwakulinga.
9Iye wambile kuli ayo ngwenyi, Pundu nwakulituna liji lia shimbi lia Zambi, hanga nukatange ndongo ja yenwene. 10Mumu Mose wambile ngwenyi, Lemesa tatenu ni noko; chikwo ngwenyi, Yoze mahanjika yipi hali tato hanji naye, akafwe lume: 11alioze yenu nwakwamba ngwenu, Kachi mutu mamba kuli tato hanji kuli naye ngwenyi, Chize wahasa kutambula kuli yami, chapwa Korpane, chinalumbunuka, Chawana kuli Zambi. 12Kunushi kumutayiza nawa kulinga chuma chimwe hali tato hanji hali naye; 13nwakulelesa liji lia Zambi ni ndongo jenu jize nwakujikunjika: ni yuma yinji ya kulifwa ni yino nwakulinga.
14Watambikile mbunga kuli iye cheka nawa, wambile kuli ayo ngwenyi, Ngwivwenu eswe, chikanulumbunuke: 15chuma chakuhi chize chili haze lia mutu, ha kunjila muli iye, muchihasa kumuchisa, nichimwe; alioze yuma yize muyituhuka muli iye, ye yize yakuchisa mutu. 16Kachi umwe uli ni matwi a kwivwa, evwe. 17Muze te hanjila mu zuwo ha kukatuka ku mbunga, tumbaji twenyi amuhulile ha kutwala ku chishima. 18Iye yamba kuli ayo ngwenyi, Ni yenu nawa kunushi malinjekela, nyi? Kunwanyingikine ngwo, Cheswacho chakukatuka haze, chikanjile muli mutu, kuchishi kuhasa kumuchisa; 19mumu kuchishi kunjila mu mbunge yenyi alioze mu jimo lienyi, muchituhuka mu musenge. Acho kanambe ngwenyi, Kulia cheswe Chinapeme. 20Iye wambile ngwenyi, Chuma chize muchituhuka muli mutu, chize muchichisa mutu. 21Mumu muchima, mu mbunge ja atu nwakutuhuka, ni manyonga api, ni utanji, ni wiji, ni ungalwe, ni upangala, 22ni kuzo, ni ungulungulu, ni kalimbalimba, ni ujila, ni liso lipi, ni kushililika, ni kulizelula, ni uzuzuke: 23yino yuma yeswe ya ungulungulu kuyakutuhuka muchima, kuyakuchisa mutu.
24Iye wakatukile kuze, wayile ku manjiza ja Teru ni Sendone. Wanjilile mu zuwo, mumu kazangile niumwe kuchinyingika, hindu kahashile kuswama. 25Alioze haze hene umwe pwo, mwanenyi mukepe wa pwo wapwile ni Spiritu ya luchisa, ha kumwivwa lufuma, wejile, wafulamanyine ku yiliato yenyi. 26Achi, pwo wapwile Ka-Ngresia mukwa Serufwenishia ku munyachi wenyi, waliumbile kuli iye, hanga atuhwise ndemoniu muli mwanenyi wa pwo. 27Yesu wambile kuli iye ngwenyi, Ana aliange kukuta: mumu kuchawahile kuchiza mbolo ja ana ni kujimbila kuli tuwa. 28Alioze wamukumbulwile, ngwenyi, Ewa, Mwene; hindu chipwe tuwa kushi lia mesa kakulialia yifwenyufwenyu ya ana. 29Wambile kuli iye ngwenyi, Mumu ha liji lino, yako kwe; ndemoniu hatuhuka muli mwané. 30Iye wayile ku zuwo lienyi, wawanyine te hapombesa mwana ha muu, ni ndemoniu hamukatuka.
31Cheka nawa wakatukile ku manjiza ja Teru ni Sendone, wahetele ku Chitende cha Ngalileya, ndusu mu manjiza ja Ndekapoli. 32O yaneha kuli iye, kafwa-matwi, iye chilimi cha kuhanjika wapwile nacho, o yaliumba kuli iye, hanga asayike kwoko lienyi hali iye. 33Iye wamutwalile ku tenga lia mbunga ukawenyi, wasele minwe ku matwi jenyi, iye wafwilile mate, wasele munwe ku limi lienyi; 34nikuhetula meso jenyi kwilu, watwile mikuma, yamba kuli iye ngwenyi, Efwata, chinalumbunuka ngwo, Jikuka. 35Haze hene matwi jenyi ajikukile, ni uta wa limi lienyi watusukile, iye wahanjikile pundu. 36Iye waahele koki ngwenyi, Kanda nukahanjika kuli niumwe, alioze cheswe iye aahele koki, chocho achambujolele kuhiana chikolo. 37Mba alishimwokene kuhiana chikolo, ngwo, Hanalingi kanawa yuma yeswe, kakuvwisa chipwe afwa-matwi, kakuhanjikisa tumama.
Iliyochaguliwa sasa
MARKU 7: Csa
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Chokwe Bible © Bible Society in Angola, 1975.
